ساهموا فى إعداد كتاب بعنوان (الكامل فى الجبايات)
الإخوة أعضاء وقراء المنتدى
السلام عليكم ورحمة الله وبركاته
لا يخفى عليكم كثرة الإستقطاعات والضرائب فى كل المجالات ونريد فى هذا المقال مشاركة الجميع فى إعداد كتاب بعنوان(الكامل فى الجبايات) أملا فى تنبيه القائمين على أمر الدولة بأن الشعب قد ضاق ذرعا بالجبايات كما نريد أن يتم حصرها على مستوى السودان لو أمكن , وهل الدولة تقدم خدمة بمستوى الجبايات التى تفرضها ؟
ولو وضعت الجبايات وعائدات البترول فى كفة ووضعت الخدمات التى تقدمها الدولة للشعب فى كفة هل سوف تكون متوازنة وما السبب فى إختلالها؟
هيا بنا نبدأ فى إعداد الكتاب بلغة الأرقام
مثال :
1 – جباية الركشات
سألت أحد سائقى الركشات بالخرطوم ما هى الضريبة المفروضة عليك فى السنة
قال 1800 جنية بالإضافة الى دفع جنيه لكل يوم بالموقف
الجملة 1800 +360 =2160 جنيه
وكم عدد الركشات بالمحلية
فأجاب 5000 ركشة
إذن جملة جباية الركشات فى السنة /محلية واحدة (جنيه) = 5000 *2160 = 10,800,000
هذه أنا أعتبرها غير دقيقة لأننى لم أحصر عدد الركشات من مصادرها ونطلب منكم تصحيح المعلومة
هذا جزء يسير جدا ونأمل مشاركتكم كل حسب المعلومة الصحيحة لديه فى الجبايات والتى تشمل الآتى :
1 - جباية طلاب المدارس
2 – جباية المحلية
3 – جباية المزارعيين
4 – جباية تجار القطاعى
5 – جباية تجار الجملة
6 – جباية المغترب
7 – جباية الميناء البرى للحافلات والبصات
8 – جباية الموظفين
9 – أى جبايات أخرى
هذه الجبايات التى نقوم بحصرها هى عبارة عن جزء من إيرادات الدولة
وكما قال السيد الصادق المهدى فى برنامجه الإنتخابى فيما معناه (نسعى بأن تكون دولة رعاية بدلا من دولة جباية)

الاخ البشمهندس اللمين اخوى لك تحياتى

دلوقت بس عرفت لماذا توقفت مشاريعك ال.............

الحبيب ابن الحبيب الامين
لك الود مثنى وثلاث ورباع
وحتى ترضى
نشكرك ان فتحت نافذة مست كل المواطنين فى الوطن العزيز
ساتعرض بحكم وجودنا خارج البلد الى ما يسمى
وخدمات العاملين بالخارج
اولا كانت الضريبة لفئة العمال 1200ريال
تتصاعد وفقا للفئات الاعلى
ويتم كذلك دفع زكاة الدخل السنوى وهى 350ريال
وهناك مساهمة ترعتى الرهد وكنانه
والمساهمة فى دمغة الجريح
ودمغة الشهيد
والدفاع الشعبى
والفضائية السودانية
وكانت هناك ضرايب على الاجهزة الكهربائية
فمثلا التلفزيون الملون 14 بوصة100000جنيه بالقديم
واى صنف عدده دسته(12)يتم دفع جمارك(حتى لو كانت سفنجات)
وعندما تطأ اقدامك ارض السودان فى الموانئ البرية او الجوية
تدفع رسوم قدوم قدرها50ريال
وعندما تغادر ندفع ايضا 50 ريال رسوم مغادرة
وتدفع 25000جنيه للكرت الصحى حتى وان كان جديد
والملاحظ ان معظم هذه المدفوعات لا تستلم باورنيك 15..
ما يؤسف له ان لا يمكن تجديد الجواز وعمل تاشيرة الخروج
الا بعد دفع الضرائب..
نتحول الى جانب مهم جدا للجبايات
وهى ضريبة الماء والارض على الزراعة فى مشروع الجزيرة والمناقل
تؤخذ الضرية والزكاة على المحصول المزروع
فى عدد المساحات المزروعة
اى تؤخذ على المساحة وليس على الانتاج
والمساحة الادنى هى 3 فدان..وقد كانت 3جولات بالنسبة للذرة
و4جولات بالنسبة للفول السودانى
وجوالان بالتسبة للقمح
4500000لزراعة الخضروات
وبالنسبة للقطن تخصم من الارباح النقدية
وفى حالة عدم ضعف الانتاج لاى عوامل ليس للمزارع سبب فيها
فتحسب الضريبة وتسجل دين على المزارع تخصم فى الموسم القادم
ويمكن ان تتراكم الديون حتى يضطر المزراع للاستغناء عن مهنته
التى اصبحت طاردة بسبب الديون والضرائب...
نسال الله ان يرفع عنا الوباء والسخط والبلاء

سلام عزيزي الامين لك التحايا
والله الموضوع ده لو الناس اتجردت وكتبت بصدق ح تألف ليك مجلدات مش كتب
طيب انا مرة عندي مرابحة بتاعة مزرعة دواجن وكانوا طالبين مني شهادة خلو طرف من الضرائب والزكاة خلصت بتاعة الضرائب
ومشيت ناس الزكاة قال لي تدفع المبلغ الفلاني
قلت بس يااستاذ الزكاة دي لازم يحول عليها الحول وانا قروشي دي مابتحصل الحول كلها 4 شهور ونص مافيها زكاة
وكاد الرد الجبائ لازم تدفع لاوم تدفع قلت ادفع تحت اي بند قال لي صدقات او ما ح نديك الشهادة
قلع عينك ياتاجر

والحادثة الثانية عندنا واحد عايزين منو مبلغ وقال ماعندو قروش لكن عندو سمسم لو عاوزين ممكن يدينا ليهم سمسم ونظام المال تلتو ولاكتلتو قبلناه منو ومشيت معاه لمنطقتهم استلمت السمسم وفي الطريق تلاقي الخيمة والعسكري ادفع كدة على السمسم بتاعك ده قلت ليه المبلغ ده كتير قال الكلام ده من المحلية في منشور قلت ليه اشوف المنشور والله يالامين مكتوب من التاجر مبلغ كذا للشوال ومن المنتج مبلغ كذا لقيت ليك صاحبك ضايفهم الاتنين وحصلت المشادة الكلامية طيب ماممكن اكون انا الاتنين يامنتج ياتاجر اختار واحدة قال لا الا الاتنين طيب ما اح دفع الاتنين لانو الكلام واضح اصر انو لو مادفعت ينزل الشوالات وطبعا تاني مافي عربيه الا بعد كم يوم تدفع غصبا عنك عشان تتخارج قوة كدة يقلعوا حقك
اتخيل المنظر

الأخ عادل خيارى
السلام عليك ورحمة الله وبركاته
نشكرك على المشاركة
طبعا إنهيار المؤسسية وعدم وجود مصانع للقرار وتسيير الشعب بالتفكير الإنطباعى للسياسيين فتح الباب على مصراعيه للإجتهاد الفردى لتوسيع المواعين الإيرادية وتضييق مواعين الخدمات للمواطنين .
وأنا كمان أذكر سنة 1994 كنت فى أبوعشر وطبعا المرتبات ضعيفة لازم ندعمها بوسيلة أخرى وكنت أدعمها بالزراعة , وقمت زرعت عجور والتسويق بالحصاحيصا كل يوم أأجر عربة لترحيل العجور الى الحصاحيصا ويلاقينى موظف ديوان الزكاة يقول لى أدينا زكاة العجور, أقول ليه شيل الزكاة الدايرة من العجور , يقول لى لا أنا دايرة كاش , وأنا ما عندى كاش ,يقول لى أنتظرك حتى تبيعها ,وينتظر ويشيل زكاته .
هذا قليل من كثير
ولك التحية

باشمهندس الامين كل عام وأنت بخير_الضرايب_زمان بقولوالينا يضربك الضريب شقاق العناقريب _كان زكر_والضريبه أنثى زي كونداليزارايس كدا_والمره في الزمن دا بتشق الجيب_أنا كنت شغال في جمارك السودان_أقول ليك شنو؟

كنت في جمارك أبوحمد_بعدماتدفع رسومك الجمركيه والقيمه المضافه_تطلع تقطع إيصال ضريبة محليه_تطلع من الحظيره يقابلك عسكري تقطع إيصال دمغة جريح_تمشي شويه يصفر ليك واحد تدفع ضريبة محاربة الفلاريا_تمشي حبه يصفر ليك واحد تدفع ضريبة بناع كبري الشريك

سراج الدين الفاضل كتب:

تدفع ضريبة محاربة الفلاريا_

اها الفلاريا دي كمان شنو ؟؟؟؟
والله ياعمك كبرت وخرفت ..

تدفع تدفع إلي أن تصل المستهلك العادي_وأزيدك ضريبات(ماضربات)1 رسوم العبور 2 مع إيصال المويه3 كل بداية شهر تدفع ضريبه للكهربا4في كل تزكرة دخول للمستشفي5في كل عمليه6كل مولود جديد في المستشفي بندفع عليه ضريبه الدوله مابتدينا علاوه(يقربو يقولو ليك جبتو من وين)

السر الدسوقي جيت هناكيف؟أها الفلاريا عمى الانهار_قابلني في (بين الضحوه والضهريه) عزا باشمهندس _نحن مضروبين ضرب غرائب الابل_ونلتقي