الموضوع دا طويل حبتين لكن انتو اقروة والعهدة على الراوى
هو فاكهة رمضان
شروع فى الإفطار
فى مبنى رئاسة المحلية الأنيق وفى قاعة الإجتماعات تحديدا إجتمع كبار المسئولين بالمحلية لحضور الإجتماع الهام الذى دعا له رئيس المحلية :
- الحقيقه يا جماعة أنا جمعتكم الليلة وقبل ما يدخل علينا شهر رمضان الفضيل شهر التوبه والغفران عشان نقوم بالتحضير لإستقبالو من بدرى عشان الناس شايلا حالنا وكل ما تجى مناسبة يقولوا ناس المحليات ما كانو مستعدين ليها وجاتهم فجأتن وعشااان مسألة فجأتن دى أنا جمعتكم الليلة عشان نخت الخطط والإستراتيجيات والبرامج ال ح نستعد بيها لمواجهه متطلبات هذا الشهر المبارك الفضيل … طيب لو فى أى زول عندو إى إقتراحات ممكن يقولا لينا
- والله سعادتك أنا بفتكر نوفر للمواطنين السلع الأساسية وبأسعار تكون مناسبة وفى متناول كل يد
- وأنا كمان بفتكر إنو يكون فى تكثيف لرجال المرور عشان الحركة بتبقى زحمة وكمان بتكون فى حوادث خاصة قرب ساعات الإفطار
- أهم حاجه يا سعادتك أنا شايف إنو يكون فى إفطارات للناس المساكين والفقراء
- (فى تبرم) : خلاص إنتهيتو؟ قال أيه توفير سلع وتكثيف مرور وإفطارات مساكين؟ إنتو ما عارفين المحليات دى عدمانة التعريفه وما عندها مصادر دخل غير الرخص والرسوم الكلها 3232145 رسم دى ! عاوزننا نجيب للمواطنين ديل قروش من وين عشان نرخص ليهم السلع الضرورية ونكثف ليهم ناس المرور ونطعم ليهم المساكين ؟ إنا ده الجبتكم ليهو؟
-(جميعا) : مال إنت سعادتك جبتنا ليه؟
- (مندهشاً) : يعنى إنتو ما عارفين؟
- (بصوت واحد) : لا واللهى ما عارفين؟
- أنا جبتكم هنا لأنو رمضان ده فرصة نزيد فيها دخل المحليات !
-(بصوت واحد) : ونزيدو كيف
- أنا ح أقول ليكم … خلو بالكم معاى !
-(بصوت واحد) : خليناهو !
- أول حاجه إنتو عارفين حركة السوق فى رمضان بتنتعش وكمان خاصة لمن العيد يقرب .. عشان كده ح نقوم نأجر كل الفسحات ومواقف العربات وحتى الشوارع الجوه الأسواق لبتاعين الخيم والطبالى المتر المربع بى مليون جنيه فى الشهر أها شوفو الحكايه دى بتطلع ليها بى كم؟

- والحاجه الأهم التانية حكايت المطاعم والكافتيريات العاوزة تفتح فى نهار رمضان دى ؟ يعنى نخليها تفتح ساااكت كده ؟ ما لازم يدفعوا رسوم يعنى اكان مليون اكان إتنين فى الشهر نسميها إن شاء الله رسوم تقديم طعام فى رمضان يعنى هما عاوزين يستفيدو ونحنا نطلع من الحكاية كيت؟
- والله يا سعادتك إقتراحك الأول بتاع إنو نأجر الفسحات والمواقف والشوارع الفى الأسواق ده ما ح يعمل لينا مشكلة أصلو الدنيا زحمة والحكاية دى أصلو قاعديم نعملا كلو عيد .. لكن حكايت ندفع ناس المطاعم والكافتيريات ديل رسوم ياها دى المشكلة لأنهم قاعدين يدفعو حق الرخصة التجارية والرخصة الصحية والنفايات والشنو ما بعرفو داك والرخص دى كلها سنوية .. يعنى بالقانون يفتحو سنة كاااملة بدون زول يسألهم !
- (مستنكراً) : يعنى شنو؟ نخليهم يفتحو فى رمضان ده ملح سااكت بدون ما تدخل جيبنا حاجه؟ لا لا يستحيل ..
_ لكن سعادتك القرار ده عشان يكون نافذ مش مفروض يوافق عليهو المجلس التشريعى؟

- من متين كمان قراراتنا بيوافق عليها مجلس تشريعى هسه جباياتنا ورسومنا الفرضناها دى كووولها فى واحده وافق عليها مجلس ؟ خلاص ده قرار وطلع وينفذ فورا .
وخرج القرار :
أمام مطعمه البلدى الذى يجاور السينما جلس العم صبير على كرسى الخيزران ممسكاً بالخرطوش يرش فى واجهه المطعم بعد أن قام أحد عماله بعملية القش ولم أكياس البلاستيك المتناثرة هنا وهناك وبقايا الصعوط واعقاب السجائر بينما إنهمك العمال فى ذلك الصباح الباكر فى عملية توضيب اللحم وحش البصل وتقشير البطاطس وتجهيز السلطات ونظافة الحلل والصحون .
- من باكر ياحاج خلاص ح ترتاح من قومت الصباح ورش الموية ده ! عشان بكرة رمضان !
قالها له جاره سعد صاحب مغلق السعادة الذى يجاورة مازحاً
- والقال ليك نحنا ح نقفل منو؟ إنت ما سمعت الحكومة قالت البلد دى فيها ناس عيانين وأطفال وناس على سفرن وكمان ناس ما مسلمين عشان كده ممكن نكون فاتحين ؟
- آآيا يا حاج صبير لاكن الظاهر إنك ما قريت جرايد الليلة ! الحكومة قالت المطعم العاوز يفتح فى رمضان لازم يدفع رسوم مليون ونص !
- (فى إستغراب) : يدفع شنو؟
- مليوووون ونص يا حاج …. خلاص عملت فيها ما بتسمع؟
- وعشان شنو؟ أدفع مليون ونص ؟ ما الرخصة التجارية دافعنها والرخصة الصحية دافعنها والضرائب دافعنها والنفايات بندفعا والعتب بندفعو .. أها تانى ندفع ليه؟ العاوز يفتح ما يفتح !!
- والله يا حاج الناس ديل أى فرصة بيلقوها بيقومو يليسو للمواطن واهو دى برضك فرصة
- فرصة كيف يا شيخ سعد .. مطعم ودافع كل الرخص والضرائب السنوية يعنى سنة تانى ما مفروض يدفع حاجه … يفتح فى رمضان يفتح فى شوال يفتح فى أبريل !!
- وح تعملو شنو هسه يا حاج صبير ؟ إنت مش رئيس إتحاد اصحاب المطاعم السودانيين ونقيب إالإتحداد العام لأصحاب المطاعم العرب ؟
- لا لا لو الكلام ده طلع جد ح أدعو طوااالى لإجتماع عاجل للأتحاد وح نصعد الموضوع لمن نوصلو للإتحاد العالمى لأصحاب المطاعم وما بعيد نوديهو الأمم المتحدة !
فى المحلية :
بينما كان مسئول المحلية مجتمعا بمدراء التحصيل لمناقشة الربط المتوقع من جراء قرار رسوم المطاعم التى تفتح فى نهار رمضان همس له مدير مكتبه ثم أعطاه ورقة قرأ فيها قليلاً ثم بدأ الغضب على محياه :
- بالله شوفو الطابور الخامس ديل؟
- ديل منو كمان !
- أصحاب المطاعم والكافتيريات !
- مالهم كمان رفضو يدفعو الرسوم ؟
- يا ريت !
- طيب عملو شنو؟
- تصورو رفعو الموضوع لأتحاد أصحاب المطاعم العرب .. الرفعو للإتحاد الأفريقى لأصحاب المطاعم ومش كده وبس ديل كمان رفعوهو للإتحاد العالمى لأصحاب المطاعم وده بيان منو لينا بيهددوا فينا إنو لو ما لغينا الرسوم دى فى ظرف 24 ساعه ح يرفعوا الموضوع للأمم المتحده !
- وما يرفعوهو سعادتك يعنى شنو؟
- يرفعوهو كيف أنحنا ناقصين بلاوى !
- أها طيب والعمل؟ نطلع قرار نلغى الرسوم دى !
- نلغيها كيف؟ نحنا هسه خلاص قفلنا عليها ! وبقت إيرادات مضمووونة !
- خلاص نخفضا ليهم يعنى بدل مليون ونص نخليها مليون فى الشهر ده !
- أفهمنى يا استاذ القصة ما قصت تخفيض … الإتحاد العالمى لأصحاب المطاعم قال إنو طالما الناس دى بتدفع كل الرخص والرسوم المطلوبه أثناء السنة عمليت يشيلو منهم رسوم عشان يفتحو فى رمضان دى مسألة ما قانونية !
- أها طيب ودى يحلوها كيف ؟
- أنا بفتكر ندى الفرصة لأخونا دكتور عبدالمنتقم مستشار شئون الجبايات بالمحلية نشوف وجهه نظرو !
عبدالمنتقم يضع المسبحة على التربيزة ويقوم بإصلاح وضع نظارة النظر ويمسح على وجهه بكلتا يدية ثم يقول :
- والله يا جماعة إنتو ذاتكم بتبالغو إنتو لو شاورتونى من الأول ده كلو ما كان حصل .. الجبايات دى فن وعلم إنتو ناسين إنو الدكتوراة بتاعتى دى من الأكاديمية العليا لعلوم الجبايات بجمهورية أمازونيا ؟
- والله يا دكتور أصلك بس إنت كنت فى رحلت العلاج بتاعت ألمانيا عشان كده نحنا إتصرفنا برانا !
- مافى حاجه إسمها برانا … ده تخصصى وكان لازم تتصلو فينى تشاورونى عشان ما تقعو الوقعه السوده دى أصلو مشكلت البلد دى إنو القرارات فيها ما بتطلع من الناس المتخصصين !
- أها يعنى يا دكتور فى طريقه تحلنا من الموضوع ده بدون ما تلغى لينا الرسوم دى عشان أصلو نحنا مأملين عليها شديد وبتدعم لينا الإيرادات
- كدى أول حاجه يا سعادتك هسه دى تقوم تلغى الرسوم العملتوها للمطاعم دى عشان ما تجيب ليكم الهواء – مواصلاً- وطبعن وأنا عندى ليكم طريقة ح تجيب ليكم قروش أكتر من حكايت رسوم المطاعم دى وما ح تعرضكم لأى مسآءلة من أى حته فى العالم !
- طيب رسوم المطاعم البتفتح فى رمضان دى هسه ح نطلع قرار نلغيها بس إنت أشرح لينا الطريقه الح نطلع بيها قرش قرشين من حكاية الفطور فى نهار رمضان دى !

الطريقة :
وبدأ دكتور عبدالمنتقم فى شرح المسألة :
- شوفوا يا جماعة نحنا عندنا هنا كمية من الناس الجالدين رمضان وما بصومو .. البيقول ليك أنا عندى كلى قايمة عليا .. والبقول ليك أنا عندى سكرى والبقول ليك أنا عندى ضغط والبقول ليك ما عارف شنو داك …
وديل هم الناس البمشو ياكلو فى نهار رمطان فى المطاعم والكافتيريات دى .. أها أنحنا نشيل رسوم من بتاعين المطاعم ليه ؟ ما نشيل من المواطنين الما صائمين ديل …هم عاوزين يفطرو ملح ساااكت بدون ما يدفعو حاجه ؟
- لكن ديل يا دكتور ما ناس عيانين وعندهم رخصة !
- أيوااا .. الرخصة الأداها ليهم منو؟
- مرخصين لى نفسهم براااهم
- لا … لا .. كلام ذى ده مافى .. نحنا نعمل مراكز طبية بتاعت ترخيص آلى تكشف على المواطنين ديل واليطلع عيان صحيح وما بقدر على الصوم نديهو رخصة وما نسألو وأى زول نلقاهو ماشى فى الشارع مولع ليهو سيجارة ولا سافى ليهو سفه ولا قاعد ياكل فى مطعم ولا كافتيريا وما شايل الرخصة بتاعتو ده نعمل ليهو مخالفة ونغرمو 30 ألف !
- لاكن يا سعادة المستشار الناس الكتيرة الجالده دى نفحص ليها كيف ونجيب ليها قروش فحص من وين؟

- والله إنت راجل طيب خلااس …نجيب لينا مكنتين تلاته بتاعات تشخيص نبرمجهم ونعمل رسوم فحص ميتين الف ! فى تلاته يوم يرجعو حقهم والباقى ربح صااافى ! وبعد رمضان ده ينتهى ندسهم لى رمضان الجاى ! إنتو ما بتفهمو فى البيزنس؟

- الله لا كسبك يا دكتوووور ! والله ده الشغل !!

بيان من المحلية :
فى صباح اليوم التالى حملت الصحف بيانا من المسئول بالمحليات هذا نصة :
بسم الله الرحمن الرحيم وبه نستعين والصلاة والسلام على أفضل خلق الله أجمعين – أيها المواطنون- رمضان كريم وتصوموا وتفطروا على خير وربنا يتقبل صيامكم وقيامكم آمين أما بعد : فقد تلاحظ وجود عدد من الإنتهاكات التى يقوم بها المواطنون لحرمة هذا الشهر الفضيل والتى تتمثل فى الأكل والشرب فى نهار رمضان وتعاطى المكيفات ، إننا سوف نقوم بالتعامل بحسم شديد لكل من تسول له نفسة الإفطار فى نهار رمضان من دون أن تكون لديه رخصة بذلك وذلك حفاظا على الشارع العام من أى تفلتات لا تتناسب وعظمة هذا الشهر الفضيل ومن أجل هذا فقد قمنا بإنشاء وتوفير عدد من نقاط الفحص الآلى الطبى للمواطنين الذين يودون الإفطار فى نهار رمضان ومنحهم ترخيصاً بذلك يمنعهم عن المساءلة بواسطة السلطات المختصة فى حالة الإمساك بهم وهم متلبسين بالاكل او الشرب او تعاطى المكيفات فى نهار رمضان ! وعلى الله قصد السبيل

أمام الفحص الآلى :
خوفاً من الغرامة التى فرضتها السلطات المختصة على كل من يفطر فى نهار رمضان ونسبة لإنتشار ما يعرف بمباحث الإفطار والذين ينتشرون فى الأسواق وأماكن التجمعات وأمام المطاعم الفاتحة فقد هرع المواطنون الذين لديهم أعذار نحو مراكز الفحص الآلى .. حيث يقوم المواطن بدفع الرسوم ثم يتم إدخاله لثوان داخل كبسولة حيث يقوم الجهاز بتشخيص الأمراض التى لدى الشخص وكتابتها على الطابعه وكذلك كتابه النتيجه النهائية وهى منح الشخص المريض نمرة وترخيص إفطار إذا كان لدية من الأمراض ما يستوجب ذلك ، وقد تم التنسيق بين المحليات التى تشرف على هذا الأمر ووزارة الصحة بالإستفاده من جهاز الفحص والتشخيص هذا بتصنيف المواطنين حسب الأمراض التى يعانون منها فالشخص ذو اللوحة 2343 ف ك يعنى أنه الشخص رقم 2343 الذى لديه رخصة إفطار لأنه يعانى من فشل كلوى أما الشخص الذى تحمال لوحته 6543 أ ح فهو الشخص رقم 6543 الذى يعانى من أنيميا حاده وهكذا ! علماً بأنه لابد من وضع اللوحة والترخيص فى مكان بارز حين ممارسة أى نوع من أنواع الإفطار فى نهار ر

أهل العوض :

ما أن خرج عوض ود الحسين من مطعم عم صبير حتى إقترب منه شخصان يرتديان لبسة سفارى بيجية ويضعان نظارات شمسة سوداء ويحملان دفتراً :
- تعال يا زول هنا ؟
- فى شنو؟
- شنو الفى شنو ؟ أكلت وتقشقش فوق جضيماتك ديل سااااكت
- وما أقشقشهم كان قشقشتهم إنت شن دخلك؟
- شن دخلى؟ أكان كدى تعال ورينى رخصتك؟
- رخصت شنو ها زول إت قايل سايقلى قندرانى !! إت مجنون يا زول
- طيب دقيقه أفهمك .. إت مش دخلت المطعم ده وأكلت؟
- بالحيل
- طيب إنت ما عارف ده رمضان !
- لا بالحيل خابرو رمضان !
- أها وكت رمضان وخابرو فاطر ليش وماك صايم؟
- إت مالك أصوم وإلا ما أصوم ؟ الله ماش يحسابك معاى !
- كييييف ؟ إنت يا زول ما عارف الحكومة دى مسئولة من المواطنين أمام الله - - وبعدين ح يسعلا من الناس الفاطرين ..
- وما بسعلا من الناس الجعانين؟
- بطل الفصاحة يا زول وهات رخصتك ؟
- إت بى جدك هازول؟
- أيوه يعنى شايفنى بهاظر ..
- أها وأكان مع عندى !
- (يخرج من جيبه دفتر الإيصالات  عند غرامة إفطار بدون ترخيص يا حاج يلا أدينا خلينا نتخارج
- إت ما شديد ها زول انا ماكلى رشوشة بى ألف جنيه .. أديك تلاتين الف !!

حنكشة :
بالقرب من بوابة الجامعه نزل مؤيد من عربتة الأنيقة ومعه زميلته نانسى ، قام بففل العربة بواسطة الريموت بينما قام بأخذ نفس أخير من السيجارة التى يحملها قبل ان يقوم بقذفها بعيدا فى ذات الوقت الذى وقف أمامة أحد الأشخاص :
- ممكن يا شاب تدينى رخصتك !
- ليه هو إنت بوليس مرووور ! طيب ما لابس البتاعات البيضاء ديك لييه

- لا ما بوليس مرور نحنا .. بوليس فطور !
- نانسى : ياااى هو الفطور عملو ليهو كمان بولييييس !
- آآى عملو ليهو بوليس وحراسات كمان ينظر لها ثم .. كمان بتلوكى فى لبانه فى نهار رمضان !
- عندك رخصة ؟ - يخرج دفتر الإيصالات من جيبه- ستين ألف .. إنت 30 ألف والأستاذة المعاك البتلوك فى اللبانه 30 ألف !
- بصراحة بصراحة أنا يا عمو عاوز أستـانف الحكم ده ! وإلأ أقول ليك أعمل لينا تخفيض وكده !

عندو شنو؟

حسب ما جاء فى القرار الذى أصدرته المحليات كان على جميع المواطنين المرخصين للأفطار فى نهار رمضان وضع لوحات الترخيص الخاصة بهم فى مكان بارز حتى لا يكونو عرضة للمساءلة .. فإنتشرت اللوحات المعلقة على صدور المواطنين والتى تحمل أرقام وحروف الأمراض التى أدت لنيل الرخصة ، بعض اللوحات أصبحت معروفه تماما لدى المارة فمن كان يعلق لوحة عليها ف ك فهو يعانى من فشل كلوى ومن كان يعلق أ ح فهو يعانى من أنيمياء حاده
– الزول الماشى داااك وخاتى ليهو لوحة 5432 م م يكون يا ربى عندو شنو؟
- والله ما عارف يكون عندو شنو ؟ كدى يلاك نسألو
- بالله لو سمحت إنت عندك شنو؟ م م يعنى شنو؟
- دى يا جماعه ملاريا مزمنة … ملاريا مززززمنة ! إنتو م م بتاعتى دى خلووها ساااهلة أمشو كدى أسألو الزول الخاشى المطعم داااك ولوحتو المعلقا 365) أ ك و) وكمان صاحبو الماشى معاهو النمرتو 2678 ) ق م ( داك !!
- ألسلام عليكم يا أخونا
- وعليكم السلام
- ياخى والله أنحنا بس الشمار حارقنا وعاوزين نعرف إنت عند شنو؟ يعنى الـ (إ ك و) دى شنو؟
- يعنى ح تكون شنو؟ ما إلتهاب كبد وبائى
- وطيب صاحبك ده قوات مسلحة ولا قبل الميلاد؟
- تقصد أنا؟ يعنى عشان نمرتى ق م ؟ يا جماعه أنا عندى عملية بتاعت (قلب مفتووووح) !!

شروع :

فى زحمة السوق كان هنالك رجلان من مباحث الفطور يندسان وسط المارة لتتبع الجمهور والإمساك بالمخالفين :

- شفت الزول ابوجلابية سمنية دااك .. العاوز يطلع كيس الصعوط داااك
- آآى يلاك نمشى عليهو
- أحدهما : بتدردم فى السفه دى ساااكت وإلا عندك ترخيص
- ما أدردما كان دردمتها شايفنى ختيتا هسه فى خشمى؟
- ما شرطن تختها فى خشمك إنت ما قريت القانون
- قانون شنو مش قلتو الزول البياكل أو يشرب أو يتناول مكيفات !
- طيب الصعوط ده مش مكيفات؟
- آآى بس لكن أنا هسه ما سفيت !!! دردمتها ساااكت
- يخرج دفتر الإيصالات : ياخى ما تأخرنا الأيصال إتقطع أدفع الغرامة وخلينا نمشى !
- هى أدفع لكن ساااكت أنا ما سفيت !! إنتو عاوزين تحاكمونى بدون ماده ؟
- يخرج القانون من جيبه : بدون ماده كيف كدى أقرأ هنا .. مش فى ماده إسمها شروع فى الإفطار !