هاردلك للجالية التونسية في الخرطوم ..(الوصيف) طار

سبعتاشر هيع..حالتها دي بدون (فطور)
•
النقطة..ولا صمة الخشم
•

•

< ناس المريخ السنة دي ما عندهم أي حاجة.

< ما في حاجة طلعوا بيها.

< يمكن الحاجة الوحيدة الطلعوا بيها ..فوز (معتصم جعفر) برئاسة الاتحاد العام لكرة القدم السوداني.

< والفيفا الانتخابات دي ذاتها عندها فيها رأي.

< اظن ناس المريخ سوف يكونوا في انتظار تجميد (الفيفا) لنشاط الاتحاد العام لكرة القدم السوداني.

< ناس المريخ سبقوا الجميع ...(وجمدوا نشاطهم).

< جمال الوالي يتصور مع (كمال شداد) ويدعم معتصم جعفر.

< اجانبكم السبعة ديل ح تعملوا بيهم شنو؟.

< هيع عفارم عليك يا كاربوني. طيرت الجماعة من كل البطولات...وقعدت.

< سيكافا نظموها ...وطفوا نورها وولعوه ...وطاروا منها.

< نظام طيران بي فهم.

< زي الزول البجيب ليه (فرخة) يحمرها ويقمرها ..ويضعها في (التربيزة) عشان يضربها ...تجي كديسة تلقي (الفرخة) جاهزة تقزم بيها.

< ناس المريخ من السنة الفاتت يضيعوا في البطولات.

< سيكافا ...شالوها منهم ...جابوا ليك جمال الوالي في المقصورة زي العاوز ينزل ليه رصيد ...والرصيد ما نزل ليه.

< جمال الوالي يبلع في ريقو ...متل (كشك الجرايد).

< كشك الجرايد هسع ذنبو شنو؟. كشك الجرايد ...هسع ببلع في ريقو.

< المهم (اتراكو) نفض ليك الجماعة.

< ناس المريخ بقوا (وصيف) لبطولة سيكافا.

< قول واحد.

< جاء الدوري الممتاز...لمينا ليكم فيهم نحن.

< (سيد البلد) طبعا صعب ...في بطولتو دي ما برحم. ولا بجامل.

< المريخ بقي وصيف للممتاز. جنس (وصافات).

< دخلنا علي كأس السودان.

< سادومبا مسك ليك ملف (اكرم الهادي سليم).

< اكرم عملها لينا كلها (حصوة).

< اها (الحصوة) هسع يا اكرم بقت ليك بي (شطب).

< المريخ اصبح (وصيف) كأس السودان ...انا ما عارف (الوصافات) الكتيرة دي بتعملوا بيها شنو؟.

< انتوا الحكومة ما بتسألكم من (الوصافات) دي.

< مليتوا البلد بي وصافاتكم دي.

< المريخ السنة دي شارك في بطولة الاندية الافريقية للابطال.

< نظام شنو؟...نظام هم كبار زي الهلال. في فريق كبير بيلعب في (التمهيدي). المهم المريخ طار من بطولة الاندية الافريقية.

< نزلوا الكونفدرالية. جيش النيجر في (الرد كاسل) حاصرهم.

< محمد كمال حاصروه في شبكتو. والنفطي يشيل ويضيع في ضربات الجزاء.

< محترف دافعين فيه الشيء الفلاني ...يضيع ليه (ضربة جزاء).

< ضربة الجزاء الضيعتها دي يا النفطي ...ود السرتية بجيبها.

< ود السرتية هسع ذنبو شنو؟.

< للمعلومية ...ود السرتية دا البطيخة من كورة القدم ما بعرفها.

< لكن مع ذلك ...ود السرتية كان بجيب ضربة الجزاء قون.

< ما كان بضيعها. المريخ طار من الكونفدرالية.

< يا جمال الوالي انت الجماعة ديل ما قصرت معاهم.

< تعمل ليهم شنو؟. قالوا عاوزين مدرب برازيلي ...جبت ليهم المدرب البرازيلي.

< قالوا عاوزين (مساعد وطني)...اشمعنا الهلال عندو مساعد وطني.

< جبت ليهم (المساعد الوطني). قالوا عاوزين المساعد الوطني يكون دفعة طارق احمد ادم. جبت ليهم (الدفعة).

< دا غير (الطابق التاني). انتوا يا ناس المريخ ما في شيء عملها فيكم غير (الطابق التاني).

< الطابق التاني ...وحصوة اكرم. حصوة اكرم هسع ذنبها شنو؟.

< حصوة اكرم وجنسية (كلتشي). كلتشي جنسوه وشطبوه.

< ما عاوزين يشطبوه (اجنبي).

< غايتو المريخ دا عندو مشاطيب (مجنسة) كتيرة بشكل.

< مهدي بن ضيف الله دا ...لو سألتو من (ام درمان) بقول ليك ولاية في افغانستان.

< مهدي بن ضيف الله دا ما عارف أي حاجة. انتوا تعالي هنا (النيجر) دي امس كان فيها (كشة).

< نحن شفنا (الحكم) جاري جري صاح ...تقول جاري ليه من (مجروس).

< انتوا (الصفوة) البتقولوها دي وين؟. صفوتكم دي إلا تكون في (السلة).

< في كرة القدم ...كل يوم بتعملوا ليكم (فضيحة).

< فضايحكم كترت يا جمال الوالي.

< طارق مختار قالوا ليك عمل ازمة في نجيلة (النيجر).

< قرض ليك (النجيلة) قريض. انت يا طارق دا شنو البتعمل فيه دا.

< انت الظاهر عليك عاوز تلعب في (ليبيا). نجيلتك الاكلتها دي بتلعبك في (النصر). تلقي (صديق علي صالح) بدأ في الاتصالات من هسع.

< طارق مختار دا عاوز ليه (اعارة) كاربة.

< اعارة ليها (ضل). معتصم جعفر ممكن الخميس القادم يفككم منو.

< ما تضايقوا انتوا. ما تستعجلوا.

نحن أي حاجة عندنا بي نظام. لكن يا ناس المريخ ما بالغتو عديل.

< من الكونفدرالية تتطيروا. ومن الجيش النيجر كمان.

< دي فضيحة شنو دي. انتوا بتعملوا كدا ليه.

< جايبين ليكم 7 اجانب وتتطيروا من (الكونفدرالية).

< الـ 7 اجانب ديل بتودوهم وين؟. انا عندي ليكم حل.

< وارغو شغلوا في بصات ولاية الخرطوم. والله (قرد) ما يفوت منو.

< وارغو دا في كل فردة ...يدفع ليه (دولار) لي جمال الوالي لمن يحل الـ 5 مليون دولار.

< غايتو يا وارغو سنة 2050 ...لو ما جاتك حاجة ..بنعفي ليك الباقي.

< رمزي صالح ..عشان فلسطيني شغلوه في المجلس الوطني.

< الحالة واحدة طبعا. النفطي ..خلوه يعمل ليه اتصالات في (الشهداء).

< النفطي دا فيه حلاة تحويل رصيد.

< الرصيد يحولوا ليك قبل ما يعرف الرقم الاخير.

< مهدي بن ضيف الله عشان زول جديد بنشغلوا في (الطرق والكباري).

< همد بلقي ليه صرفة. اول نحن عاوزين نعمل بيكم شنو؟.

< الكونفدرالية طرتو منها.

< عاوزين بيكم ايه؟. لاسانا ...بقي زول مصارع ...عشان كدا يشتغل لينا في (سوق القش)...جوار استاد الهلال. هيثم المرابط ...خلوه يشتغل (سواق).

< عشان يرابط ليكم من (خمسة) صباحا.

< اما كاسروكا دا ما بنفع أي حاجة. قروشكم راحت ساكت يا ناس المريخ.

< المشكلة ما في القروش...المشكلة في (الجنسية).

< جنسية ورموتوها في البحر. سبعة اجانب وتطلعوا.

< سبعة اجانب وتتطيروا. اعلموا ليكم طيب (طرمبة).

< او فرن. او سينما...ما بكون عندكم مشكلة في (الاجانب).

< بالمناسبة ...نحن بمناسبة خروج المريخ من الكونفدرالية بنقول للجالية التونسية في الخرطوم (هاردلك).

< معليش. فريق الجيش النيجر دا طلع (النجم التونسي).

< وطلع (المريخ).

< الظاهر فريق الجيش النيجر دا ما عاوز ليه أي (تونسي) في البطولة الكونفدرالية. ولا تونسي بالغلط.

< ملحوظة : شارع عبيد ختم كلو صينيين ..وشارع القصر كلو (توانسة).

هوامش

< الامل طلع من الكونفدرالية.

< والمريخ طلع من الكونفدرالية.

< والاندية التي اخرجت الامل واخرجت المريخ سوف تواجه الهلال ان شاءالله في مرحلة المجموعات.

< يعني ح ننتقم ليكم يا ناس الامل ..ويا ناس المريخ.

< ما عندكم أي مشكلة.

< فريق الجيش النيجر دا بنغلبوا هنا وهناك.

< بختكم يا ناس الهلال.

< الهلال اليوم امام كابس ان شاءالله لن يخسر.

< اسوأ نتيجة يمكن ان يخرج بها الهلال اليوم ...هي التعادل.

< مهند الطاهر عندو (هوبة).

< ومدثر كاريكا عندو (قون).

< يعني ما في أي مشكلة.

< لاسانا اتكسر ...لكن (طارق مختار) دا اتلجن عديل.

< انت يا طارق مختار ..وقت تكون عاوز تلف ارمي اشارة.

< زول تقيل.

< تقول قطر.

< غايتو أي زول يشطبوا الهلال ما بنفع.

< عشان تاني ما تسجلوا ساي.

< انبراشة طارق مختار دي بتلعبوا في (ليبيا).

< هسع ليبيا ذنبها شنو؟.

< انتوا ليه يا ناس المريخ (غلطاتكم) كلها بترموها في ليبيا.

< لياقة لاعبي المريخ جيدة ..بتظهر بعد المباراة تنتهي.

< شفتوا الناس ديل جروا كيف؟.

< الجري الجروه بعد الكورة علي حكم المباراة لو جروه اثناء المباراة ...المريخ كان صعد.

< المريخ بعد كدا خلوه يتفرغ لناس الاهلي الخرطوم وجزيرة الفيل.

< انتوا اصلو ما بتمشوا لي قدام.

< تعالوا شوفوا الروعة كلها اليوم.

< الهلال فقط.

< خبر عاجل: ما تمشوا بعيد.