< عندما اخرج هيثم مصطفي (بيانه) الشهير الذي حكي فيه عن معاناتهم تندر المريخاب وضحكوا كثيرا.

< ما عارفين ان هذا (البيان) طالع ليه فوق رأي.

< قعدوا يلتوا ويعجنوا في (البيان)...كتبوا وحللوا وتركوا ناديهم الذي يتراجع الي الوراء وانشغلوا بي (بيان) هيثم مصطفي.

< رغم ان الوضع في المريخ يستوجب استخراج الف بيان.

< لاعب جنسوه وهو بين طيات السحاب.

< ولاعب سجلوه بجامعة الدول العربية.

< ولاعب سجلوه بدون ما يجلدوه.

< ولاعب ...السنة كلها مصاب ...منذ ان جاء من جنوب افريقيا وهو بشكي من الاصابة.

< في المريخ ما شفنا ليه أي حاجة.

< انت يا العجب ..لو عندك احساس ...كان طلعت ليك (بيان).

< قالوا ليك ...في جماعة كدا ...من غير تحديد اسماء ...مشوا ليهم لي (فكي)...قالوا ليه شوف لينا الحل ...فريقنا دا اصلو ما بمشي لي قدام.

< عملنا (الطابق التاني) وقعدنا نتلفت.

< زي (الحلاق) يوم الوقفة.

< الفكي شاف الحالة صعبة ...(قطع ليه جك موية).

< الفكي قال ليهم : حالتكم دي متأخرة شديد.

< حالتكم صعبة.

< الفكي تاني قطع ليه جك موية.

< طبعا الحركات دي (دراما) ساكت من الفكي.

< عاوز يشعرهم انو الموضوع دا صعب.

< زي الدكتور ..وقت تسوق ليه (زول) عيان ...يدخل ويطلع ..ويقول ليك : اتأخرتو شديد...ما كان تخلوا الحالة تصل للمستوي دا.

< يعني يا دكتور ..نجيبوا ليك قبل ما يمرض.

< الحكاية دي بتذكرني بي حكاية تانية.

< بس ان شاءالله (الحكايات) ما تكتر عليكم ..وتتلخبطو.

< واحد حبشي ...مفلس ...فلسة شديد...ما عارف يتصرف من وين؟.

< قاعد في (العنقريب) ...في الضل ...يفكر يتصرف كيف؟....(الفلسة) شديدة.

< الحبشي قاعد يفكر كدا ...في (ديك) ظهر ليك في حيطة الجيران.

< الديك علي فلسة الحبشي قعد (يعوعي).

< الحبشي طوالي ..فكر في (الديك)...قال احسن حاجة اقبض الديك دا وامشي بيه علي السوق ...ابيعوا ...بفك لي (العوزة).

< الحبشي ..يدخل هنا ..ويطلع من هناك ...لمن قبض (الديك).

< شال (الديك) وعلي السوق.

< في الطريق لاقتو حاجة السرة.

< السرة دي منو؟.

< السرة دي صاحبة الديك.

< السرة قالت للحبشي مودي ديكي وين في المطر دي؟.

< الحبشي ما عرف يتصرف.

< فكر ..جاي ..وفكر جاي ...وقال ليه : مودي (الكشف)..في طبيب بيطري بتاع (عيون)...ماشي اودي ليه (ديكك) دا ...نظرو ما كويس.

< السرة قالت ليه ...ان بقي كدا ...ما كنت تجيب (الجدادة) الحمراء معاك ...برضو عيونها ما كويسة.

< الجدادة كل ما ادور ادخلها القفص تدخل التلاجة.

< ارجع ليكم لي موضوع (الفكي)..تتطيروا (الكلام) من الرأس.

< الجماعة المشي يشكوا من حال فريقهم للفكي ...الفكي صعب ليهم الحكاية خالص.

< صعب ليهم الموضوع.

< قال ليهم فريقكم دا بطريقتو دي بنزل.

< طابقكم التاني دا ما بنفعكم.

< انا هسع قلت المريخ.

< الفكي قال ليهم ...اجانبكم السبعة ديل ..إلا تشاركوا بيهم في اسبوع (مسرح البقعة).

< طبعا انا ما قاصد المريخ.

< مريخ شنو البشتغل بيهو ..ونحن ضاربين الجيش اربعة.

< جيشكم دا طلع (دفاع شعبي).

< لكن برضو (جهجهنا).

< لو لم يكن امس الهلال نفسه طويل وخبرة لاعبي الهلال ممتازة لكنا خسرنا من الجيش.

< وهذا الفرق بين الهلال والمريخ.

< امس كان يمكن ان يخسر الهلال او يتعادل من الجيش مثل المريخ عندما تعادل مع الجيش.

< لكن نحن (شفوت).

< نرجع للفكي.

< الفكي تاني قطع ليه (جك موية)...ورجع يتحدث ..قالى ليهم : باكاتكم ديل الا تغيروهم.

< فكي شنو يا زول.

< الفكي المشوا ليه الجماعة.

< زولكم قعد يضرب في حساباتو..وكل ما الحكاية تتعقد معاه بقطع ليه (جك موية).

< الباشا يقصر.

< قالوا ليك (الباشا) في ليبيا خلي شراب الموية.

< لقي (سادومبا) ما في ..وقال احسن يتجدع.

< المهم ..الفكي ..بقي يدخل ويطلع ...وكل مرة يقول ليهم ...تعالوا لي بعد اسبوع.

< يرجعوا ليه ..بعد اسبوع...يقول ليهم : تعالوا لي الاسبوع القادم.

< وكل مرة يقطع ليه (جك موية).

< الفكي من شراب الموية بقي متل (الصهريج).

< الفكي فكر كدا ...قال ليهم الموضوع صعب شديد...انتوا شكلكم كدا ح تنزلوا (التانية).

< طبعا ما ح ينزلوا .....الفكي عاوز يكبر كومو ساكت.

< معقولة (الوصيف) ينزل للتانية.

< تاني وين نلقي لينا (وصيف) لطيف كدا.

< نضربو في استادنا..ونضربو في استادو.

< نضربوا في السودان ...وفي قطر...برة وجوة.

< نضربوا في الدوري الممتاز...ونضربوا في البطولة الافريقية.

< وصيف زي دا نلقي وين؟.

< الفكي قال للجماعة ..جيبوا لي جنسية (مهدي بن ضيف الله).

< الجماعة جابوا (الجنسية).

< الفكي عاين للجنسية كدا ...وقال ليهم: انتوا (الجنسية) دي طلعتوها من وين؟.

< امضاء ما فيها.

< دي جنسية شنو؟.

< تقول مطلعنها من (مطعم).

< مالها كلها (زيت) كدا.

< الفكي تاني ..قعد يتحاوم...قطع ليه (جك موية)..وقال ليهم جيبوا لي (جنسية) كلتشي.

< قالوا ليه : جنسية كلتشي كمان عاوز بيها شنو؟...نحن الزول دا شطبناه.

< الفكي قال ليهم : انت بتشطبوا ساكت.

< كلتشي دا بشطبوه.

< كلتشي وإلا طمبل.

< كلتشي وإلا عبدالحميد السعودي.

< لقوا كلام الفكي كتير ..جابوا ليه (الجنسية).

< الفكي عاين للجنسية كدا ...وقعد يضحك...قال ليهم والله انتوا تستاهلوا البحصل فيكم دا.

< معقولة ..الجنسية عندكم اسهل من (الكرت الصحي).

< الشيء شنو؟.

< الفكي قال ليهم ...جيبوا لي (عقد كروجر).

< يا زول عقد كروجر ...عاوز بيه شنو؟.

< كروجر دا شغال بدون عقد...انت قايلو ..جابوه من فريق.

< كروجر دا زي (الراديو) البشتغل بالحجارة البجيبوها من تحت الزير.

< انتوا يا مريخاب ..عارفين ..مشكلتكم شنو؟.

< انتوا مشكلتكم (الاعلام السالب).

< الاعلام السالب ..يقعد يكذب ليكم وانتوا تصدقوا.

< جابوا النفطي ..قعدوا ينفخوا فيه.

< النفطي انتهي.

< بقي يضيع في ضربات الجزاء.

< جابوا وارغو ..قعدوا ينفخوا فيه.

< وارغو انتهي ...بقي يهدف في (الكشافات).

< قبلوا علي مهدي بن ضيف الله ...لحقوا امات طه.

< طمبل وكلتشي من انتقلوا للمريخ ..ما شموا عافية.

< دا كلو من الاعلام السالب.

< انتوا عارفين الاعلام السالب الايامات دي بنفخ في منو؟.

< الاعلام السالب ..الايامات دي بنفخ في هنو ومعتصم جعفر.

< هنو اصلو ما منتظرين منو حاجة.

< لكن معتصم جعفر دا هسع بلحقو ليك (كلتشي).

< بالواضح كدا ..اقنعوا منو.

< نرجع لي موضوع (الفكي).

< الفكي قال ليهم ..خلاص انا لقيت الحل.

< مشاكلكم كلها ح تنتهي ...تاني ما عندكم أي قضية.

< ما في عوجة بتجيكم ...بس بي شرط.

< قالوا ليه : اشرط زي ما انت عاوز.

< الفكي ..قال ليهم خلوا العجب يطلع ليه (بيان).

< انتوا ما شفتوا الهلالاب ولعوا كيف وقت هيثم مصطفي طلع بيان.

< يا مريخاب ..لو ما العجب طلع ليه (بيان) انتوا ما بتستعدلوا ...بعيدين ..انتوا موش ضل الهلال.

< المشكلة شنو يعني.

< هيثم مصطفي طلع بيان.

< العجب لازم يطلع ليه بيان.

< ان شاءالله يهاجم فيه (جامعة الدول العربية).

< لكن ...العجب مسكين ما بعمل كدا.

< خلاص خلوا البيان يكتبوا (قلق).

< الفكي قال ليهم : كلام زي دا ما بنفع ...لازم البيان يكتبوا العجب ..انتوا قايلين الحكاية لعب.

< القيادة دي عندها اصول.

< اصول ومبادي.

< المريخاب اقتنعوا بي كلام الفكي...لكن البقنع (العجب) منو؟.

< اقول ليكم حاجة.

< العجب ما بكتب ليكم (بيان).

< العجب لو بكتب بيان ...كان لعب في الدوري السعودي...ما كان بقعد ليكم.

< يقعد وين مع (المطرة) دي.

< هسع (المطرة) دخلها شنو؟.

< ملحوظة: كلام بقي كتير.

هوامش

< مباراة صعبة جدا لعبها الهلال امام الجيش.

< تقدم الجيش مرتين وجاء الهلال ليفوز برباعية.

< اعتقد ان الهلال استفاد من تجربة مازيمبي.

< هيثم مصطفي لعب اجمل مباراة له في الفترة الاخيرة.

< هيثم بعد البيان اصبح اكثر روعة.

< كذلك كان فييرا من نجوم المباراة.

< بشة ضيّع كور سهلة.

< الجيش كاد ان يحرج الهلال مثلما فعل مع النجم وهارتلاند والمريخ.

< المريخ شنو البتضعو لينا مع الجماعة الكبار ديل.

< الاسماعيلي خسر امام بطل هارتلاند النيجيري 2-1 ...ليخرج الاسماعيلي من سباق التنافس للصعود للمرحلة المقبلة في بطولة الاندية الافريقية الابطال.

< فوز الاتحاد علي الفريق الليبي ..ما كعب علي الهلال.

< الجيش في النيجر سوف يكون اسهل للهلال ...والاتحاد الليبي قد يكون اصعب علي الهلال في ام درمان.

< امس كان في اداء الهلال بعض الاستهتار.

< ربما هذا شيء تسببنا فيه نحن بتصوير الجيش بالفريق السهل.

< الجيش فريق ما ساهل.

< علي الاقل هو بعرف كيف يلعب مع الكبار.

< ناس المريخ ...بصورة رسمية فكروا يعيروا (مهدي بن ضيف الله) الي ليبيا.

< اول انتوا في الاساس ...جبتوا ليه من ليبيا.

< وانتوا طول ما عاوزين تعيروه ..مجنسنو ليه؟.

< خسارة جنسية.

< لاقين (الجنسيات) الهملة دي وتجنسوا في التوانسة.

< قالوا ليك ناس المريخ فكروا يجنسوا (الفكي) كابتن الامل.

< في النهاية اكتشفوا ان الفكي اصلا سوداني.

< الجماعة اتعودوا علي (التجنيس).

< الطاهر حماد احسنت ادارة الامل عندما اوقفته.

< لو شارك الطاهر حماد كان بكون اضافة للمريخ.

< لكن ادارة الامل ..ادارة مفتحة...وهي عارفة بتعمل في شنو؟.

< عملتها ظاهرة يا الطاهر.

< بل عملوها ظاهرة ناس المريخ.

< انتوا اصلوا ما بتخلوا عادتكم دي.

< لماذا لم يرجع (لاسانا).

< لاسانا قنع.

< الاعلام السالب ...الذي يتحدث عن لاعبي الهلال وعن حقوق سادومبا ..لماذا لا يتحدث لنا عن (لاسانا)؟.

< كرهتونا بوالدة سادومبا.

< والدة لاسانا يمكن تكون (عيانة).

< قالوا ليك لاسانا منعتوا نسيبتو من الرجعة.

< لاسانا عندو (نسيبة) صعبة.

< نسيبة صعبة شديد.

< نسيبة زي (دفتر الايصالات).

< هسع (دفتر الايصالات) ذنبو شنو؟.

< الامل امام المريخ لعب بي الصف التاني.

< قادر الله.

< المشكلة المريخ سوف يلعب في مدني وفي بورتسودان وفي كسلا.

< يعني 9 نقاط وراحت شمار في مرقة.

< السنة دي يمكن الفرق بين الهلال والمريخ يكون 18 نقطة.

< علما ان المريخ وحتي قبل الاسبوع الاخير من الدورة الاولي ...كان بتقدم علي الهلال بـ 6 نقاط.

< الوصيف قدمو وألحقوا.

< الاعلام السالب ..قنع من الممتاز.

< الاعلام السالب دا بقنع سريع.

< يا جماعة لسع.

< اصبروا شوية.

< الهلال برضو عندو مباراة مع الامل.

< يعني عادي.

< الموضوع في غاية البساطة.

< لو فيصل العجب ..طلع ليه (بيان) مشاكلكم كلها بتنتهي.

< لكن العجب ..ما اظن يطلع ليه (بيان).

< إلا اذا كان بيانه سوف يكون عن (السيول والامطار والفيضانات).

< اكتر من كدا ما تنتظروا حاجة من العجب.

< يا جماعة العجب ..ما عندو ذنب.

< هسع لو طلع ليه (بيان)..بتقولوا بقلد في هيثم مصطفي.

< انت يا (العجب) لو عاوز تبقي زي (سيدا)..اول حاجة (شوت) القارورة.

< يا اخوي القيادة دي ما لعب.

< القيادة دي شخصية.

< عشان تكون عارف.

< نحن أي حاجة عندنا بي نظام.

< نحن ما عندنا حاجة ساكت.

< الوصيف لو لعب اربع مباريات في الممتاز ...بنزل التانية.

< والله الاتحاد العام ليه حق يحول مباراة الوصيف الي بورتسودان.

< عطبرة دي اعفوهم منها.

< عطبرة دي ما بقدروا عليها.

< شبيبة القبائل لعبت امام الاهلي مباراة كبيرة ...رغم ان لاعبي الاهلي الشوط الثاني كله كانوا يلعبون في منطقة الشبيبة.

< الهلال وحده الذي لا يخسر او يتعادل في ارضه.

< الاهلي اتعادل.

< الهلال بس.

< حالتها دي بدون (فطور).

< خبر عاجل: ما عندي ليكم حل ..غير العجب يطلع ليه (بيان).



هههههههههههههه
نحن في انتظار البيااااااااااااااااااااااااااااااااااان

تشكر الاخ حسن اسماعيل
نحن في انتظار بيان الاعب فيصل العجب يشكر فيه قوات الفتح المبين التي حررته من اسره من المليشيات النيجريه في مقبرة الابطال ويدعو فيه جنوده بعدم الاقتراب من تلك القوات المعده لدك الحصون