لو بتذكروا.. لاعب اسمو (طمبل)





} زمان في الهلال كان في لاعب اسمو ...(هيثم).

} هيثم منو؟.

} نحن في الهلال ما بنعرف غير هيثم مصطفي.

} هيثم كمال.

} هيثم كمال منو؟.

} هيثم كمال (طمبل).

} طمبل منو؟.

} لاعب كان هداف الهلال.

} يا زول أي زول يلعب جوار هيثم مصطفي ببقي (هداف).

} لو جبت ليك زول من الشارع ولعبتو مع هيثم مصطفي ببقي هداف الدوري.

} وليس علي (الباك) حرج.

} بس كلموا المهاجم يغمض ويشوت وما يتلفت كتير.

} هيثم مصطفي (حفظه الله ورعاه) لو لعب معاه (موسي الزومة) مهاجم ببقي هداف.

} يا زول ما تبالغ.

} موسي الزومة دا ما ممكن يبقي هداف بشرط واحد وهو ان يعكسوا الحكاية ..يعني القون يحسبوا (اوت)..والاوت (قون).

} زي الزول البدخل السينما ..ينوم في الفيلم ..بعد ما يصحي يقول ليك الفيلم دا بااايخ.

} انت الفيلم شفت فيه حاجة يا ود الناس.

} موسي الزومة لو حسبوا ليه (الاوات) ما بطلع هداف.

} لكن لو لعب مع هيثم مصطفي ....ببقي اخطر من (ايتو).

} ايتو عيشتو تطير.

} ايتو لو قرأ العمود دا تاني ما بيلعب كورة.

} هيثم طمبل لاعب كان بيلعب في الهلال...كان ماشي زي الطلقة لدرجة ان اولارندو الجنوب افريقي طلب التعاقد معه.

} زول يحترف في (جنوب افريقيا) تاني عاوز شنو؟.

} طمبل بفضل الهلال احترف في جنوب افريقيا.

} لكن ما صبر...الشقي يلقي العضم في الفشفاش.

} طمبل رجع ولعب في المريخ.

} زولكم دا من لعب في المريخ ما شفنا ليه حاجة.

} غير (الرباط الصليبي) ما شفنا ليه شيء.

} عملها لينا كلها (رباط صليبي).

} وعلاجات ...مرة في القاهرة ..ومرة في الامارات.

} زي اكرم حصوة.

} وكلتشي نيوكاسل.

} أي لاعب يتسجل في المريخ من الهلال ما بكسب عافية.

} امس في صحيفة الصدى قرأت هذا الخبر عن هيثم طمبل ...ساعة ونص انا بتذكر في الاسم.

} هيثم ...هيثم ..هيثم ...هيثم طمبل.

} دا منو؟...ود الجيران.

} الاسم دا ما غريب علي.

} يا ربي سامع بيه وين؟.

} بتاع الموبايلات.

} هيثم ..هيثم .....هيثم ...انا متأكد الاسم دا قبل كدا مر علي...لكن وين؟.

} في الموردة ؟.

} ابدا!!.

} جزيرة الفيل ...يا رب؟.

} ابدا.

} اهلي شندي؟.

} ابدا.

} اهلي شندي ..ما عندهم (باك) بالاسم دا.

} هيثم ..هيثم ..هيثم ...الاسم دا يمر علي ويفوت ...لكن لاقاني وين؟.

} دقيقة اقرأوا معاي الخبر ...يمكن نتذكر الاسم.

} الخبر الذي نشر في الصدى امس جاء علي هذا النحو:

} ((أوضح جار النبي اختصاصي العلاج الطبيعي بنادي الوصل الاماراتي أن هيثم طمبل مهاجم المريخ الذي يتلقى العلاج في الإمارات حالياً وصل مرحلة متقدمة وأنه بات قريباً من العودة)).

} طمبل دا من اتسجل في المريخ ...نحن بنسمع انو قريب من العودة...وانو وصل مرحلة متقدمة.

} يا طمبل إلا تعود (مساعد مدرب).

} نعود للخبر: والكلام بلسان ااختصاصي العلاج الطبيعي جار النبي:

} ((وقال : حالياً ينفذ طمبل تدريبات تأهيل، يجري تدريبين في اليوم، الأول قبل الافطار داخل الصالة والثاني على الملعب الرديف لنادي الوصل بعد الافطار، كما يجري (15 لفة) حول الملعب)).

} يعني يا طمبل بقيت زي امولادي ..وافياني ..(جري حول الملعب).

} 15 لفة في رمضان دا...تستاهل ...عشان تمشي المريخ.

} نحن اللاعب من يقولوا ليك بجري حول الملعب ..بنقنع منو؟.

} بنتعوض فيه.

} خلاص يا طمبل ..الفيك اتعرفت.

} لما ترجع تلقي الفرق بين الهلال والمريخ 9 نقاط.

} بعدين انت المريخ الان يعمل بيك شنو؟.

} البطولة الافريقية المريخ طلع منها.

} الكونفدرالية طلع منها.

} الممتاز بقي ما عندو فيه (امل).

} ان شاءالله يا طمبل تلحق (كأس السودان).

} انتوا عارفين كاس السودان الان في مرحلة دور الـ 8.

} يعني نحن في النهايات ..وطمبل الي الان بلف حول الملعب.

} نعود للخبر:

} (( ومضى جار النبي: أشرف على تأهيله وأعتقد أنه يظهر جدية كبيرة ورغبة في العودة بسرعة ويفترض أن يقابل الطبيب الأمريكي بعد أسبوع ليحدد موعد مشاركته في التدريبات)).

} جابت ليها كمان (طبيب امريكي).

} خد.

} الموضوع دا الظاهر عليه ما جايب حقو.

} طبيب امريكي وعاوز يرجع يلعب تاني في الدوري السوداني.

} تاني يرجع يلعب ضد ناس مرق.

} الشيء دا هيثم طمبل ما بقدر عليه.

} ما علينا ..نعود الي خبر الصدى.

} ((وأوضح جار النبي أن هيثم طمبل لامس الكرة وقال: تسديده للكرة يؤكد أنه تعافى، يسدد بقوة تشير إلى أنه بات قريباً من الانضمام لزملائه والمشاركة في التدريبات)).

} يا دوب بلامس في الكورة ..الموسم انتهي.

} يا طمبل ألحق (قريشات) الوالي الباقية دي.

} جمال الوالي ذاتو (اتنحي).

} لكن في باقي قروش ..بتصرفوا بيها.

} القروش دي وقت تنتهي ...طارق مختار ..ما بشتغل بيكم.

} وانتوا يا ناس المريخ ما في زول (بدينكم).

} علي الاقل ناس الهلال الفنادق والشركات بيثقوا فيهم.

} نشوف باقي الخبر بقول شنو؟.

} ((وأفاد جار النبي أن اللاعب سيخضع لتدريبات اليوم يشرف عليها مدرب اللياقة بنادي الوصل بهدف رفع لياقته البدنية وقال: في نهاية الأسبوع سينخرط في تدريبات مع الفريق الرديف بنادي الوصل)).

} كمان عاوز يتدرب في (الرديف).

} الزول دا اصلو ما بتطور.

} رديف شنو البتنافس بيه مع ناس سادومبا.

} والله الهلال جاب ليه مهاجم بعمل في (الباكات)

سوات العاصفة في ساق الشتيل الني

وفعل السيل وكت يتحدر يكسح ما يفضل شي

} كمان عاوزين تغالطوا.

} الطفش (الباشا) الي ليبيا منو؟.

} سادومبا يا استاذ.

} الخلي طارق مختار يقع في (النيجر) شنو؟.

} سادومبا يا معلم.

} طيب الجاب (الحصوة) لي اكرم منو؟.

} سا ..سا ..سا سادومبا..يا ود الناس.

} والخلي ناس المريخ يسجلوا رمزي صالح بقاعدة من قواعد الجامعة العربية منو؟.

} سا سا سا سا سادومبا...يا زول.

} سؤال اخير.

} من هو الذي اجبر جمال الوالي علي (التنحي)؟.

} اوعكم تقولوا لي (حسن عبدالسلام).

} يا جماعة الذي اجبر جمال الوالي علي التنحي هو (سادومبا).

} سادومبا ..سادومبا ..سادومبا ...يعني الواحد ما ينوم.

} ينوم وين مع ناس (بشة) ديل.

} الواحد لو غفل ساكت ...بلقي بشة جاب ليه قون.

} المهم يا جماعة ..سادومبا عمل في الباكات

سوات العاصفة في ساق الشتيل الني

وفعل السيل وكت يتحدر يكسح ما يفضل شي

} عشان تبقوا عارفين.

} الموضوع دا تاني بمسكوا ليكم زي (حصوة) اكرم.

} انتوا بس ما تضايقوا ..خلوا ارواحكم رياضية.

} رياضية اكتر من كدا.

} اتغلبوا من الامل ..وما قالوا (المطر).

} يعملوا ليكم شنو؟.

} عذبتونا ..وبقيتوا لينا في رقبتنا يا الهلالاب.

} بعدين (الجيش) عشمكم.

} وبيان هيثم مصطفي (طمعكم).

} ما علينا ...نرجع نشوف خبر طمبل ...الخبر لسع فيه تفاصيل.

} نحن بنمشي معاكم خطوة ...خطوة...الي ان (همد) يتنحي.

} هسع اتنحي (جمال الوالي).

} الدور علي (همد).

} همد ما بتنحي.

} همد دافع ليه حاجة من جيبو.

} همد وسعد العمدة واحد ...الاثنين بتكلموا ساكت.

} وقت تجي ساعة الدفع بتكلموا عن (المؤسسية).

} انت يا سعد وانت يا همد ..لو في (مؤسسية) انتوا بتدخلوا مجالس الهلال والمريخ.

} لو في حبة مؤسسية ساكت ...دا كلو ما كان حصل.

} نرجع لي خبر طمبل.

} هسع طمبل ذنبو شنو؟.

} الخبر بقول:

} ((ونبه جار النبي إلى أن هيثم طمبل تم تشخيص حالته بطريقة خاطئة غير أن اختصاصي العلاج الطبيعي بنادي الوصل أشاد بطبيب المريخ الذي ذكر أنه حرص على عرضه على الاطباء بالامارات بعد أن تجددت اصابته بمعسكر الاسماعيلية)).

} كل مرة يقولوا التشخيص خاطئ.

} انتوا بتشخصوا عند طبيب هلالابي.

} وخليكم مع تفاصيل خبر طمبل:

} ((وقال: أؤكد أن هيثم طمبل حالياً بخير وتعافى تماماً ولا يشعر بأي آلام.. ووجه جار النبي رسالة إلى أعضاء مجلس إدارة نادي المريخ أشار فيها أن لاعبي الفريق يعانون بسبب مشاكل عضلية ورأى أن هناك اجهاداً عضلياً واضحاً يعاني منه اللاعبون وقال: تدريبات كروجر وويلي تحتاج لمتابعة من اختصاص علاج طبيعي، بالتحديد تحتاج لتدليك طبي من أجل ازالة حامض اللبنيك الذي يترسب في العضلات بعد المجهود البدني ويجب إزالة هذا الحامض حتى لا يتعرض اللاعبون للاصابات)).

} ألحق ...تدريبات (كروجر) الظاهر عليها بتعمل مشكلة.

} انتوا يا جماعة سمعتوا بي (حامض اللبنيك).

} حامض اللبنيك دا بكون جابوا لي طمبل منير ام بدة والله اعلم.

} مرة سمعت لي مهاجم من اندية الممتاز احتكي مع منير ام بدة ..وطلع بعد الاحتكاك يشكي من (حامض اللبنيك).

} حامض اللبنيك دا كمان طلع لينا من وين؟.

} يا طمبل انا بعرف مهاجم صغير ...اصيب بي (حامض اللبنيك) دا ...طوالي اعتزل.

} ما في زول بلم فيه الحامض دا وبيلعب كورة.

} عشان نكون من البداية واضحين معاك.

} لبنيك ...نحن تاقصين.

} هسع موسي الزومة تعجبوا الفكرة يقول عندي (حامض اللبنيك).

} ملحوظة: هسع اللبنيك ذنبو شنو؟.

هوامش

} في انتظار مجلس ادارة نادي الهلال الجديد.

} ابوسن قالوا اتراجع.

} ابوسن براجع وما بتراجع.

} هيع.

} سعد العمدة ..لا عمدة ...ولا شيخ خفر.

} معتصم جعفر رئيسا للاتحاد العام لكرة القدم السوداني بمباركة الفيفا.

} اتوقع (نيل الحصاحيصا) يشيل كأس الممتاز السنة دي.

} معتصم جعفر لو خلي المريخ وركز مع (نيل الحصاحيصا) بشكل خطر علي بطولات الهلال.

} دعم الحكام والاتحاد للمريخ لو وجده نيل الحصاحيصا ...بشيل الكأس.

} واحد قال لي : الهلال لو فاز بكأس الكونفدرالية ...المحكمة بتحجز علي الكأس.

} قلت ليه ؟.

} قال لي في ناس عاوزين قروش من الهلال.

} شفتوا يا مريخاب ...نحن واضحين كيف؟.

} ديونا ...ولا قروش الحكومة.

} اخير نجيب لينا كأس بالدين ...عشان ما يقولوا لينا الدولة دعمتكم.

} هيع.

} والله انتوا يا الهلالاب ما في احسن منكم.

} بشة ..الايامات دي بفكر يطلع ليه (بيان).

} طيب مالو.

} نحن بتوع الديمقراطية.

} مباراة المريخ القادمة في كسلا.

} يعني الفرق ان شاءالله سوف يكون بين الهلال والمريخ 5 نقاط.

} هزيمة الميرغني من المريخ ..يعني هبوط الميرغني رسميا.

} يا ناس الميرغني ..ادخلوا معسكر (مقفول)...وقفلوا الموبايلات.

} نهر عطبرة ..ما قصر مع الامل...والقاش ذاتو ما بقصر.

} اجمل ما في مباراة الجيش ..ان ثلاثي الدفاع سجل ..(ميساوي وديمبا وخليفة).

} باقي المعز.

} المعز زي (سيدا) بصنع.

} اهداف ديمبا مع الهلال افريقيا اكتر من اهداف وارغو.

} وارغو اصلا ما سجل افريقيا.

} إلا اذا كانت مواجهة المريخ للشجرة كانت في بطولة الاندية الافريقية للابطال.

} احتمال ..ما في حاجة بعيدة.

} خبر عاجل: غريبة ..الي الان ناس المريخ ما قالوا (بشة) ولدنا.

تسلم ياولدنا

تشكر الاخ حسن
دي حالهم كده نهدي ليهم الا يغمضو اعينهم

و الله يا محمد طيب انت ومحمد عبد الماجد دا تقصدو طمبل بتاع الشربكة ولا طمبل بتاع اللفة اصلو الدروب راحت علينا

مما فات للوصيف ما لقي كور زي البيلعبه ليهو سييييدا
بقي يلف في الفاضي داير شحم وبلالي ركب
شوف سيدا بعمل في شنو

تقصدوا البطاح...........هو موجود اكيد اشتقتوا لبطحاته (زمان قالوا الكلب بريد خانقه) شيلوا الصبر بطحه بطحه الليل نعدووالشهور يا حليلنا عدو
شربكني وتدلل

صديق خالد عوض الكريم كتب:

تقصدوا البطاح...........هو موجود اكيد اشتقتوا لبطحاته (زمان قالوا الكلب بريد خانقه) شيلوا الصبر بطحه بطحه الليل نعدووالشهور يا حليلنا عدو
شربكني وتدلل

يا ابو حميد عليك الله شوف جنس ده
ماظاااااهر عليهو كلام واحد فاقد (الامل)

والله يالاخ حسن
فاقدين الامل زي ما قال حمد الريح
املوهم يغلبو تحقيقو ... التحيه لوردي
وا سهركم ونشاف ريقكم

هيثم مصطفي لاعب كبير
لكن لازم اعرف هيثم ده الاحترام:احترم من راى الشمس قبلك(فيصل العجب)

وائل محمد احمد عبدالرحمن كتب:

هيثم مصطفي لاعب كبير
لكن لازم اعرف هيثم ده الاحترام:احترم من راى الشمس قبلك(فيصل العجب)

______________________________________________________

في كنبة الاحتياطي ولا شنو

لا لا في عمود محمد عبد الماجد في منتدى محبي الهلال من ينكر موهبة العجب يراجع نفسه 100 هدف في الدورى الممتاز وحدها تكفي

يا حسن اسماعيل ومحمد الطيب السمسميه بالحمص حلوه حلا شديده تأكلها رايح جاي وتريح نفسك