الشفــع .. جمع شافع .. وتعتي الأطفال أو الطفل
تستخدم هذه اللفظة عندنا كثيرا ..
يقول ليك الشفع ناموا .. كل الشفع مشوا المدرسة إت المقعدك للآن شنو ؟ الشفع البلعبوا قدام الحلة ديلك .. الشافع الببكي دا ود منو ؟
يا أخي ماتخليك شافع ؟ وغيرها الكثير ..
غير أننا وعلى ما أعتقد الشعب الوحيد الذي يستخدم كلمة شفع للأطفال .. وهي مأخوذة تأويلا أو تقريبا من المعني أن يشفع لك يوم القيامة .. وهذه مصدرها صوفي ( تقريبا ) ..

فياتري ماذا تعني كلمة شفع .. ومن أين أتت الينا نحن في السودان

يا طارق تفاحة

شفع الحلة ,, وشفع الروضة ,, وشفع الجيران ,, وشفع القسم (ناس السر ) !!

اعتقد ان كلمة شافع تحوير لكلمة ( يافـــع ) والتى تعنى الصغير فى اللغة العربية

وحليلك ياهيثم ..!!

الحبوب طارق
يقول ليك شفع الزمن دي شالقين وما بسمعو الكلام والشافع دي لايوق خلاص بتاع مشاكل ما تلعبو معاهو واغلب المشاكل بتاعت النساء كلها في الاطفال هو شافعك دي رابط الشارع دي لي ولدي والمشكله تبدي بالنقاش وبعض الاحيان بالعراك .
الشافع دي ما بسمع الكلام انتظر ابوك بعلقك ويقول ليها مام
الله يحفظهم الاطفال

الأخ الحبيب وليد
الأخ الحبيب محمد الطيب
لكم التحية . ـ
اوافق الرأي اخي وليد بأنها ربما مأخوذة من تحوير كلمة يافع .. الى شافع ..
الشفع الأطفال هم احباب الله .. فإذا رأيتهم في الصلاة لا تنتقص من قدرهم .. لأنهم اتقى منى ومنكم .. لأن صفائحهم بيضاء غير مدنسة بأي ذنوب .. كيف لا وهم لم يبلغوا الحلم بعد .. والأنسان يحساب بعد بلوغ الحلم ..
اسامة بن زيد .. وهو شافع ..طفل ..صغير قربه الرسول صلى الله عليه وسلم منه .. وأؤكل اليه تعلم السريانية أي العبرية لغة اليهود ,, وكان هو المترجم للرسائل التى تبعث بين الرسول صلى الله عليه وسلم .. وبين اليهود وبالعكس ..
هناك وزير من الزمن السابق ( لاتسعفني الذاكرة بأسمه ) اتي الى البصرة .. ووجد الجيش يتقدمه حدث ( طفل ) فقال : الا يوجد فيهم رشيد ليتولى القيادة غير هذا الحدث .. فدنا منه وسأله : كم عمرك يافتي ؟
فرد عليه : عمري اطال الله عمر الوزير .. هو عمر اسامة بن زيد حينما ولاه الرسول قيادة جيش من المسلمين فيهم ابوبكر الصديق وعمر بن الحطاب ..
فهنا قال له الوزير : تقدم بارك الله فيك ..
فالأطفال او الشفع كما نقول لهم .. هم احباب الله .. يجب إعادة النظر في كلامنا وتعاملنا معاهم ..
غير أن سؤال مازال قائما .. لمن يمتلك المعلومة .. من اين أتت كلمة شافع جمعها شفع الى السودان .؟ وهل هي مأخوذة من نفس المعنى من الشفاعة يوم القيامة ؟

يا طارق بمناسبة شفع الروضة
قال ليك : مجموعة كبيرة من الاطفال طالعين من الروضة وتصادف ان هناك امرأه جاية يا دوبك من البلد ( لنج )
سألت قريبتا الخرتومية وقالت ليها : الشفع الكتار ديل شنو ؟؟
قالت ليها : هيي ديل ماااا شفع الروضة !!
فقالت : النبيىىىىى ,, كلهم جايباهم من راجل واحد ؟؟
ههههههههههههههههههههههههههههههههههههههههههههههههههههههههههههههههههههههههه

يا طارق كيف حالك (طبعا وليد أستخدم تفاحه هو قاصد يسحبك علي الصفوه أسوة بطارق تفاحه بتاع المريخ).
الشفع كما سمعت هي أصلا من الشفاعه لأن الأطفال يشفعون لآبائهم وعلي الرغم من أن استخدامها سوداني بحت ولكنها عربيه أصيله (أكثر من العرب أنفسهم).
علي ذكر الصلاة بتاعة الشفع كان معانا واحد من أولاد كسلا قال زمان لما كان صغير دائما أبوه يأمره بأن يصلي بهم وتفسيره لذلك بأنه صغير ولا ذنوب عليه كما الكبار.
وربنا يحفظ لينا وليكم الشفع.
وزي ما قال الفنان :
ربي ما تحرم بيت من( الشفع) الأطفال
ولك تحياتي

الحبيب صديق ..
لك التحية . ـ
والله دي أنا دقست فيها .. بتاعت طارق تفاحة دي .. مريت عليها مرور الكرام ..
بسيطة ياوليد .
تشكر يا الحبيب على الأضافة الجميلة والمرور المميز المهمور بي حكاية زميلكم الكسلاوي .. وطبعا الشفع الصغار دائما بقولوا عليهم لا ذنوب لهم .. لعدم بلوغهم سن الرشد .. والبلوغ وهي سن الحساب والمحاسبة .. بالتالي صفائحهم بيضاء .. وربنا يحفظ لينا وليكم الشفع ومايحرم بيت منهم ..( آمين )