أرجو من جميع الإخوة والأخوات كتابة حكاوي ونوادر العزابة في هذا البوست..
حتى يستفيد الجميع وحتى نأخذ العظات والعبر وأيضا حتى نضحك ونمتع انفسنا بالدهشة
و هاكم دي مني كضربة بداية

عزابة تكاسة من عرب العسيلات كانو ساكنين بحري حلة حمد تحت .. ففي مرة نميري عمل عفو عام فك مساجين كوبر تشت.. واحد سوابق طوالي مشى استلم عدتو وهدوم الشغل.. بدلة وكرفتة والذي منو.. وانطلق ناحية قصر الصداقة ..لف جا جاي.. و كت مالقا ضحية وهو راجع بشارع البلدية لما في اتنين من تكاسة العسيلات.. قال مابرجع قمحان فطوالي لفق قصتو المثيرة.. عمل فيها مندوب شركة جاي من السعودية.. في مأموية مستعجلة عايز سواقيين و حرفيين .. طوالي ساقوه جري على البيت.. فيهم واحد فراعي مرطب شوية أخونا النصاب خاف منو يكشف نومتو فركز عليه بالأسئلة بتعرف عوض إبراهيم عوض ؟ كيف ياخ جداً.. طيب معاكم عمر الجزلي و سهام العمرابي ..؟ ياخ دي شلتنا في الجامعة كيف! المهم أخونا لقط الفيها النصيب من هؤلاء العبطاء .. وشحنم ليك في أتنين من تكاسيهم عايز يطفشم ويزوغ.. واحدين قال ليهم طبعاً بيتنا بعد طرمبة صلاح ابن البادية جوار بيت كابلي قدامو شدرة دقن الباشة تحتها مزيرة سبيل.. انتو ارجونا هناك نمشي نظبط التاشيرات ونجي..وانطلق بالباقيين ..قطعو بالنقل الميكانكي فالجامعة لما قابلو بوابة النشاط قال لبتاع التاكسي.. لو سمحت تديني عشرة دقايق بس أسلم على البروف محمد هاشم عوض دا.. دي فرصة ما ح تتعوض بس ح أمرق هوا..أها من حيسو داك و اتلحس.. تاني لا يوم الليلة ..جماعتك لا هو لا الجوازات.. صنقرو كل واحد يحمر لتاني.. لمان ريقم خلاس نشف شتتو .. راجعين لجماعة كابلي ديلك لقوهم ملطوعين يشربو ماإروو لمان نشفوالمزيرة

عزابة ابخس جِنِس
العزابة كانو ساكنين وسط الحلة والباب كرو كرو صباح ومساء وكوشتينهم مدورة وهاك ياكواريك وغلاط نص الليل حاميين ليك الجيران النوم
ومرات يطشموا يقوموا يغنوا اها ناس الحلة زعلانين من حركاتهم دي وكل مرة ينتقدوا العزابة ديل ناس كعبين ديل العزابة ناس ماكويسين مابراعو للجيرة
الحاجة ترسخت في زهنها انهم جنس او قبيله
قامت واحدة من بناتهم اتخطبت سالت عن العريس من وين يابتي قالت ليها من العزابة
الحاجة بس عزابة ابخس جنس

مجوعة عزابة قطة الإيجار +الميز النفر الواحد بدفع اخر الشهر 450الف بالقديم طبعا
في واحد من عزابة ساكن جمبهم كان معاهم يوم القطة استغرب كيف النفر يدفع 450الف
قاليهم انحنا الواحد بدفع 50الف بس في الشهر
سألوا واحد من العزابة قاليه انتوا بتأكلوا شنو النفر الواحد بدفع 50الف
رد قال انحنا باقي عصيدة الفطور بغدينا
كيف
قال بنختها في كيس وبنقلي مويه وبنختها في الموية
رد واحد من العزابة بزعل اصلو هي لبـــــتون

هههههههههههههههههههههههههههههههههههههههههههههههههه
الضحك بقي ليهو طعم ولون يالله نفرق الدنيا دايره كده