الحبيب عبدالرحمن مدثر ..
وفي الأنطباع عنهم .. ذكر بأنه تعرض لسرقة جهاز اللابتوب
حقو من داخل المحل .. ويا للوقاحة ويا لسوك السلوك أن تتم السرقة في نهار رمضان .. ووقت الصلاة ..

الذي فعل هذه الفعلة .. ناقص سلوكيات وروحانيات .. وناقص قيم .. وشكلو كدا شارب من شاي الزرافتين .
وين حيمشي بعملتوا دي .. نحن في أواخر شهر فضيل .. وفي عشرة تعتق فيها الرقاب من النار .. لو علم كل هذا لما تجرأ على فعلته هذه ..

الحبيب ود مدثر خلف الله عليك وعوضك بجهاز اكثر منه سرعة واكثر رامات واكثر قوة وقيقات .. والجاتك في لابتوبك سامحتك .

اني اشتم رايحه صيوان عزاء واكيييييد طارق جاي بكراسو يعني الكشف لا محال واقع
هههههههههههههههههههههه



ربنا يخلف ليك في الاحسن يارب ببركه الشهر الفضيل

الحبيب ود مدثر
اللهم اجره في مصيبته واخلف له خيرا منها
وزي ماقال طارق الجاتك في لابتوبك سامحتك وان شاءالله القاصداك وقعت فيه

سمعتا بالسرقة دى وكنت ناوى ادق بوست بتاع تعزية لاكن سبقنا بها طارق .
ابشر اخونا عبد الرحمن باذن الله سيعوضك المولي خيرا منه ونحن نعزى انفسنا اولا علي هذا الفقد الجلل .

يا ود مدثر
المحمول هين وسهل التعويض , ولكن ما بالك في قوم وأناس سرقت أعمارهم و أحلامهم و طموحهم حتي الآلم سرق منهم والبسمة سرقت ايضا من يعيد لهولاء الاحلام والالام المسروقة (و في فلم اسمو شنو كدا مسروقة سمعت بيهو )
واخير
دع شيئا سمعت به ففي طلعة البدر ما يكفيك عن زحل
ولك تحياتي

الله يصبرك على المصيبة ويعوضك احسن منة
ياعبدوش اكيد اللاب توب زهق منك وقال احسن
اضرب بوش مع ود المرضى وقام هاجى على الهدى وقال ليك اكان
راجل الحقنى
ولك العوض من الله
وبمناسبة السرقة دى معيد وين؟

هيثم إبراهيم محمد الشيخ كتب:

يا ود مدثر
المحمول هين وسهل التعويض , ولكن ما بالك في قوم وأناس سرقت أعمارهم و أحلامهم و طموحهم حتي الآلم سرق منهم والبسمة سرقت ايضا من يعيد لهولاء الاحلام والالام المسروقة (و في فلم اسمو شنو كدا مسروقة سمعت بيهو )
واخير
دع شيئا سمعت به ففي طلعة البدر ما يكفيك عن زحل
ولك تحياتي

ماعشان الناس المساكين والغلابه ديل الله رسل ليهم انقاذ من السماء

الأخ حسن لك التحية . ـ

انا مشتاق ليك ..

ماعشان الناس المساكين والغلابة ديل الله رسل ليهم انقاذ من السماء ( لسرقة احلامهم ) ؟؟؟؟

شكرا للحبيب الغالى ودمامون طارق

ولكل احبابنا ناس الهدى على هذا التواصل

والفقد الجميل وان شاء الله نجيكم فى خير

ونفتح ليكم بوستات افراح وافراح


ودالشيخ هيثم حبيبنا دعنا فقط نجتهد فى ايجاد شمعه نوقدها تمكننا من رؤية الاخرين

ومعرفة السكة حتى نتمكن من تحقيق مانصبو اليه ومايحلم به الاخرين


ابوعلى نتفق ونختلف بفهم .. لكن عندما ندمن الاختلاف ونبحث عنه فى كل مكان اذا هناك

شربكة فى مكان ما ..خلينا نقعد براحة ونفكها .. من اجل سعادة الاخرين

ابو مزن انشاء الله يخلف ليك بالاحسن والجاتك في الا بتوب والله هي حاره لكن سامحتك انا عامل ليهو حساب شديد واسال الله ما ينسرق مني بفرش عديل وهاك يا سكليب
والبهدله زي بتاعة كاريكا لدفاع الجماعه.
وانشاء الله يرزقك بالاحسن

الحبيب ود مدثر

انا شخصيا لا اخفي اعجابي الشديد بكتباتك .. ودائما بتذكرني .. بالكاتب الساخر الشهير بالواد الشقي ( محمود السعدني ) رحمه الله .. نفس اللونية ونفس النكهة .. بس الطعم المرة دي سمح شوية ( زيت صباح) ..
وماتنسى يا أخي نحن كالجسد الواحد .. فقدك فقدنا وجنك جننا ..
وزى ماقلت أدمان الإختلاف دا مشكلة .. وتبقى زاوية مشاترة .. وعيد بخيت وسعيد عليك ..