{ احتفلوا المريخاب كثيرا بفوز معتصم جعفر برئاسة اتحاد كرة القدم السوداني حتي ان احتفاء المريخ (الظاهر) جعل الدكتور معتصم جعفر يشعر بالحياء فقام الاخير بتحفيز أي لاعب من الهلال شارك امام الجيش النيجر بالف جنيه سوداني.

{ نظام عاوزين نفتح صفحة جديدة.

{ حركتك قديمة يا دكتور.

{ يعني معتصم جعفر بقي رجل (قومي).

{ لكن (قومي) علي منو؟.

{ وفوق هذا التبرع الذي يشكر عليه رئيس اتحاد كرة القدم السوداني قام معتصم جعفر بالتصافي مع رئيس نادي الهلال السابق صلاح ادريس.

{ واظن لولا هذه الخطوات لما باركت الفيفا فوز الدكتور معتصم جعفر برئاسة اتحاد الكرة...وتلك من بركات الهلال.

{ المهم معتصم جعفر عرف ان اتحاده بفهمه المعادي للهلال لن يمشي الي الامام لذا حاول ان يكسر حالة الرفض الهلالي له.

{ لكن دعونا نقول ان الدولة مهدت وقدمت كل المساعدات الممكنة واللا ممكنة للمريخ من اجل ان يكون المريخ فريقا كبيرا وبطلا ..لكن مرامي الدولة كلها فشلت وعجزت من ان تحرك المريخ من (ظل) الهلال كوصيف دائما لسيد البلد.

{ وصيفكم دا ما بمشي لي قدام.

{ قدموا كل شيء للمريخ ..ولم يغادر المريخ وصافته الابدية التي حجزه فيها الهلال.

{ قبل سنوات قال السيد رئيس الجمهورية ان الدولة قدمت للوسط الرياضي السيد جمال الوالي (هدية) للمريخ.

{ والهدية لا ترفض ولا تباع ولا تتنحى.

{ لكن (اتنحت).

{ وكانت اول (هدايا) الدولة للمريخ ..(جمال الوالي)...ثم تعاقبت الهدايا ..همد (ولاية الخرطوم) ..وعبدالله حسن عيسي (الضرائب)..وهلمجرا.

{ وكانت الهدايا علي المستوي الاخر متمثلة في السيخ والاسمنت والطوب والكراسي والطابق الثاني.

{ حتي ان جمال الوالي وصل به الامر في احدي السنوات ان يقول انه متنازلا عن 11 مليار للمريخ.

{ بالله.

{ لكن لا جمال ...لا همد ..لا عبدالله حسن عيسي ...لا الـ 11 مليار ..لا الطابق الثاني عملوا حاجة.

{ شيل وارمي البحر.

{ في سنوات جمال الوالي التي انتقل فيها المريخ من مربع التسجيل بالاتوس الي التسجيل بالمليارات لم يحقق المريخ شيئا.

{ وصيف من الدرجة الخامسة.

{ بل حقق المريخ في 8 سنوات بطولة الممتاز مرة واحدة باعتبار ان بطولة هذا العام ان شاءالله سوف تكون من نصيب الهلال.

{ الباقي كلو (وصافات).

{ نعم في 8 سنوات المريخ حقق كأس الممتاز مرة واحدة ...وبعض بطولات كأس السودان التي لا قيمة لها.

{ لم يفعل المريخ أي شيء..مع كل هذا الذي قدم له.

{ استضافوا ليهم بطولة سيكافا التي بلغت تكلفتها 2 مليار جنيه ..وحضر جمال الوالي واركان حربه للمقصورة للاستمتاع بالتتويج..لكنهم فشلوا رغم انهم كانوا يلعبون امام فريق رواندي صغير اسمه (اتراكو).

{ فريق تاكسي كدا.

{ هسع (الطرحة) عملت كم؟.

{ هزمهم في استادهم وحمل الكأس ثم غادر به محمولا جوا الي بلاده.

{ وجماعتكم يطفوا ويولعوا في الانوار.

{ منحوا المريخ في المنافسات المحلية خصوصية خاصة ..وكانت لجنة سيحة تقدم (الهدايا) علي شاكلة ضربات الجزاء وحالات الطرد...مع هذه العطايا لم يفز المريخ في 8 سنوات ببطولة الدوري الممتاز غير مرة واحدة.

{ لا احد في السودان يذكر ان لعب المريخ امام فريق سوداني وهو مكتمل ...فما ان يلعب المريخ مباراة في الممتاز او في كأس السودان إلا ويقوم الحكم بطرد لاعب او لاعبين من الفريق الذي ينازل المريخ..مع احتساب ضربة جزاء للمريخ.

{ دي حاجة عادية عندهم.

{ الاخ الاستاذ صلاح التوم من الله نسأله ان يقدم لنا احصائية لحالات الطرد الذي تعرض له لاعبي الفرق الذين ينازلون المريخ.

{ ويمكن كذلك ان يحسب لنا ضربات الجزاء التي احتسبت للمريخ سوف يكون نصيب المريخ فيها كبيرا.

{ لا تقولوا ان هذه الاشياء يكتسبها المريخ بمهارة اللاعبين ...فقد كشف ذلك ابراهومة مدرب النيل الحصاحيصا عندما تحدث عن حكم مباراة المريخ والنيل ...وابراهومة كابتن المريخ السابق وعضو مجلس ادارة الي وقت قريب ..كما عمل اكثر من مرة في الجهاز الفني للمريخ...مع ذلك شعر بالظلم عندما لعب ضد المريخ.

{ من ثم أي مهارة تلك التي يتميز بها موسي الزومة وبلة جابر وسعيد السعودي وطارق مختار ونجم الدين ..و..ومهدي بن ضيف الله.

{ احسبوا عطايا الحكام للمريخ سوف تجدونها الاكثر ..وسوف تجدوا ان الهلال رغم مهارة لاعبيه الاكثر عدم استفادة من ضربات الجزاء ..ومن اللعب امام فريق طرد منه لاعب.

{ لكن مع كل هذا ..المريخ ..لا يفوز ...(فاز في 8 سنوات ببطولة كأس الممتاز مرة واحدة).

{ والمريخ تقدم له (الجنسيات) صباحا ومساء ..ويجنس له اللاعب حتي قبل ان يصل الي البلاد.

{ توانسة ويمنيون..ومالي ورواندا ونيجيريا وزامبيا ..الخ.

{ جنسوا لهم (علي النونو) ليلعب في الدوريات الخليجية ..وجنسوا له ابوبكر كوني ليقولوا انه مصاب بالقلب رغم انه مازال يلعب.

{ جنسوا له اليجا تانا في مطار الخرطوم وجنس مهدي بن ضيف الله وهو بين طيات السحاب.

{ جنسوه قبل ما يعرفوا اسمه الثالث.

{ جنسية بالنية.

{ جنسوا له كلتشي وهو عريسا خارج البلاد ليصاب ويشطب..وكلو ما نفع.

{ في 8 سنوات لم يحقق المريخ بطولة الممتاز غير مرة واحدة.

{ الان يلعب في المريخ 7 اجانب ..والمريخ الان يتراجع ويتراجع حتي ان اعلام المريخ (السالب) اصبح يطالب بالتخلص من فائض العمالة الاجنبية.

{ الاتحاد العام لكرة القدم سجل لهم البوسني (نجاد) في القاهرة ليلعب هذا (النجادي) في السودان 15 دقيقة فقط ويعود من ثم الي بلاده لانتهاء اجل الصلاحية.

{ والاتحاد العام سمح للمريخ بتسجيل لاعب بقاعدة من قواعد الجامعة العربية وعبر استثناء من رئاسة الجمهورية.

{ ولا شيء غير (الهشيم).

{ يعملوا ليكم شنو تاني يا مريخاب.

{ قالوا نحن مشكلتنا في الدنيا دي (الهجوم)...عاوزين (طمبل)..نحن لو ما سجلنا (طمبل) ما بنلعب.

{ جابوا ليهم (طمبل) من جنوب افريقيا.

{ قالوا عاوزين (كلتشي).

{ نحن بدون كلتشي ما بنلعب ...هو كلتشي شن طعموا بدون هيثم مصطفي.

{ شالوا كلتشي.

{ هل تصدقوا بعد كل هذا ..مشكلة المريخ مازالت في (الهجوم).

{ كلتشي خارج الكشف ..وطمبل خارج التشكيلة.

{ نعمل ليكم شنو؟.

{ قالوا جيبوا لينا (وارغو)...وارغو دا جاب في الهلال 3 اقوان.

{ جابوا ليهم وارغو بـ 5 مليون دولار.

{ ناس الاهلي المصري الي الان بضحكوا في جمال الوالي.

{ بعد الخمسة مليون دولار ..هل تصدقوا ان المريخاب عاوزين يتخلصوا من وارغو ما عارفين يتخلصوا كيف؟.

{ تاني يعملوا ليكم شنو؟.

{ السنة الماضية ناس المريخ قالوا ما بيلعبوا مع الامل في عطبرة.

{ الاتحاد قال ليهم ما في مشكلة ...نحول ليكم المباراة الي بورتسودان.

{ في بورتسودان ما قدروا يغلبوا الامل ..المباراة انتهت تعادل.

{ السنة دي ...ناس المريخ شافوا (الامل) ..قالوا عاوزين نشارك في دورة في الامارات.

{ الاتحاد العام وقف ليهم الدوري الممتاز ...عشان يمشوا يستعدوا كويس.

{ رجعوا من هناك بي نقطة ..ومشوا الي عطبرة وكشف الفريق فيه 7 اجانب ..واتهزم المريخ.

{ عاوزين شنو اكتر من كدا.

{ قالوا عاوزين (مناضل)..زول (فدائي) يقبل يقيف في مرمي المريخ.

{ جابوا ليهم المناضل الجسور (رمزي صالح).

{ مناضل في كل مباراة تستقبل شباكه اهدافا.

{ انت يا زول نضالك دا في (شعر لبيد).

{ الي الان ما شفنا لينا أي حركة (نضالية).

{ ولا حتي حاجة (فدائية).

{ يا رمزي نضالك طلع كلام جرايد ساكت.

{ يعملوا ليكم شنو؟.

{ قالوا نحن ما بنقدر نمشي لي قدام إلا اذا صلاح ادريس استقال.

{ صلاح ادريس (شفت)..معاه ما بنعمل حاجة.

{ الفنادق ..والديون واعضاء مجلس ادارة نادي الهلال القاعدين ساكت بي جاي وجاي ..خلوا صلاح ادريس يستقيل.

{ صلاح استقال.

{ دا كلو عشان يرضوا المريخ.

{ لكن استقالة صلاح ما عملت حاجة.

{ الهلال ماشي زي الطلقة.

{ قعدوا يفكروا.

{ الحكومة قالت ليهم انتوا عاوزين شنو نعملوا ليكم.

{ قالوا نحن جمال الوالي لو ما فات مننا ما بتجينا عافية وما بتتحقق لينا أي بطولة.

{ جمال لازم يتنحي.

{ لكن جمال (هدية).

{ نحن لو جمال ما فات ما بنكسب عافية.

{ جمال (اتنحي).

{ يعمل ليكم جمال الوالي اكتر من كدا شنو؟.

{ يا جماعة حددوا ..انتوا عاوزين شنو؟.

{ قالوا (جوعوا) لينا ناس الهلال ..ناس الهلال ديل لو ما جاعوا ما بنقدر عليهم.

{ خلوهم يجوعوا.

{ المحاكم بقت تلاحق في الهلال.

{ والفنادق ..والشركات.

{ لاعبو الهلال (جاعوا) وطلعوا بيان كمان ..وهددوا بالاضراب.

{ مع ذلك الهلال ماشي لي قدام والمريخ راجع الي الخلف.

{ عاوزين شنو تاني.

{ اتكلموا ما عندكم أي مشكلة.

{ أي حاجة تتطلبوها بعملوها ليكم.

{ اخر حاجة المريخاب طلعوا بيها شنو؟.

{ قالوا عاوزين رئيس اتحاد الخرطوم يكون من المريخ ..ورئيس الاتحاد العام يكون من المريخ.

{ نحن لو ما مسكنا الاتحادات دي ما بنمشي لي قدام.

{ اتحاد الخرطوم مسكوا حسن عبدالسلام ...والاتحاد العام مسكوا معتصم جعفر.

{ لكن برضو الحال ما اتصلح في المريخ.

{ في الانتخابات الاولي لمعتصم جعفر ...الهلال فاز في ليبيا علي الاتحاد والمريخ اتعادل في مدني مع الاتحاد.

{ في الانتخابات المعادة والتي فاز فيها معتصم جعفر برئاسة الاتحاد العام ..الهلال فاز علي (الجيش) النيجر ..والمريخ اتهزم من الامل عطبرة.

{ يعني خربانة ..خربانة.

{ عارفين انتوا الحل شنو؟.

{ الحل الاتحاد العام لكرة القدم يطلع قانون جديد.

{ في القانون الجديد مفروض أي (كورنر) للمريخ يحسبوه ليه قون.

{ الجدعة ذاتها اذا كانت لصالح المريخ ..مفروض تتحسب قون...وضربة المرمي.

{ يعني أي تهديفة لي وارغو في (الكشافات) قون.

{ قون صحيح مية المية.

{ مهاجم المريخ في خط 18 لو هبشو (النسيم)..ضربة جزاء.

{ قرصة النمل ..كرت احمر طوالي.

{ تاني شنو؟.

{ ذكروني.

{ أي فريق يحاول (يعرقل) المريخ ...يقوم مجلس ادارة نادي المريخ يتنازل من الدخل بين الشوطين.

{ شفتوا كيف؟.

{ في شفافية اكتر من كدا.

{ التنازل يعلونه في الاذاعة الداخلية بين الشوطين.

{ الاستاد كلو يسمع.

{ ويعلنوا التبرع كمان في الاذاعة.

{ منتهي الصراحة.

{ اما بالنسبة للمطر التي تشكل خطرا علي المريخ ...فان القانون الجديد يقول اذا هطلت امطار خفيفة في كلفورنيا او الهند او أي مكان في الدنيا تأجل المباراة ..ويعتبر المريخ فائزا نتيجة لانسحاب الفريق الذي لم ينسحب.

{ تاني شنو؟.

{ كفاية كدا وإلا نزيدكم.

{ نذكر للعلم فقط.

{ الشغيل شطبوه ورجعوا بعد 48 ساعة.

{ طمبل شطبوه ورجع خلال 24 ساعة.

{ دي في القانون الجديد تمسي (تجليات).

{ التجليات كمان ذنبها شنو؟.

{ يا جماعة القانون الجديد فيه حاجات غريبة.

{ لكن تصدقوا بعد دا كلو ..المريخ ما بفوز بالممتاز ولا بحقق أي بطولة.

{ نحن نجوع.

{ المجلس يستقيل.

{ نطلع بيانات.

{ سعد العمدة يهاجم الارباب.

{ اصلوا ما بتجينا عوجة.

{ نحن ماشيين...انتوا اقعدوا ناقشوا القانون الجديد (أي ضربة ركنية للمريخ تحتسب مباشرة هدف).

{ لو الفيفا ادخلت.

{ جيبوا ليكم زول زي (طه اسماعيل) ..بقول ليكم كلامكم دا كلو صاح....الفيفا بتقول كدا.

{ 7 اجانب يا مفترين.

{ عملتوا لينا ازمة في (الاسكراتش).

{ ملحوظة: اسكراتش في عينك.

هوامش

{ مباراة الهلال امام دجوليبا المالي تأتي في توقيت صعب ..لذا استراتجية الهلال لهذه المباراة يجب ان تضع باحكام.

{ الاستعدادات والاسلوب الذي يجب ان يلعب به الهلال في هذه المباراة لا بد من ان يكون موصلا للفوز.

{ في 3 مباريات ان شاءالله الهلال سوف يحقق 9 نقاط.

{ الدرجة الكاملة.

{ التهاون والاستهتار امام الجيش كاد ان يفقدنا نتيجة المباراة.

{ تأثير رمضان بشكل كبير سوف يظهر في هذه المباراة.

{ لكن لا خوف علي الهلال في المناسبات.

{ الدنيا عيد.

{ نخشي علي الهلال فقط من الصراعات الادارية.

{ من المضحك ان يحسب المريخ ان تبرع معتصم جعفر (رئيس الاتحاد) للهلال تبرع من المريخ.

{ هذا اعتراف خطير.

{ الاعلام السالب دائما وابدا يضر المريخ وينفع الهلال.

{ مجلس الهلال القادم ..عليه ان يعرف انه مجلس اول بطولة قارية للهلال ان شاءالله.

{ اللواء عابدين الطاهر يجب ان يكون في مجلس الهلال القادم.

{ اما ميرغني ادريس فهو اولي اقطاب الهلال بقيادة الهلال في المرحلة المقبلة.

{ زمان كنا بنقول الهلال عاوز ليه (طرف شمال).

{ هسع بقينا نقول الهلال عاوز ليه (مجلس).

{ ان شاءالله الوزير ما يقول لينا انتظروا (التسجيلات).

{ طارق مختار ...سعيد السعودي ...وارغو ...مهدي بن ضيف الله ..المرابط ...طمبل ..الي النصر الليبي.

{ ليبيا فتحت.

{ مهند الطاهر الي الان لم يواجه (المناضل) رمزي صالح.

{ وعلاءالدين فييرا كذلك لم يقابل (الفدائي) رمزي.

{ وسادومبا و..و....وعييييك.

{ انت يا رمزي بتعرف (الحصوة).

{ لو ما بتعرفها احسن تسأل منها... (الظروف) ما معروفة.

{ المريخ دخل معسكر مقفول للميرغني.

{ ثقة في الاجانب الـ7 ما في.

{ يعني قبل مباراة الهلال اجانبكم ديل إلا تدخلوا بيهم (مجلس الامن).

{ طمبل وقت يرجع بلقي ريتشارد دفعتو مافي.

{ العجب قالوا بتعلم في كتابة (البيانات).

{ انت يا العجب لا بتجدع ..ولا بتكتب البيانات.

{ قاعد ساكت.

{ المناضل رمزي صالح ..قال تاني ما بمشي عطبرة.

{ انت ما عارف عطبرة دي بلد (النضال) ذاتو.

{ عشان تعرف اكرم الهادي سليم ..كان صابر قدر شنو؟.

{ خبر عاجل: تفتكروا الفدائي رمزي صالح ممكن يضحي ويلعب في (جزيرة الفيل).



الاخ محمد تحية طيبة
اصلا محمد عبد الماجد دا زول فصيح ساي خليكم من الوالي القنع من خيرا فيها واها الحكومة جابت ليكم هدية كبيرة خلاص السيد احمد يوسف الرئيس الجديد يمتلك 40 باخرة بترول وصديق شخصي للشيخ زايد بن نهيان
في هدايا اكبر من كدى ورينا بعد دا محمد عبد الماجد وناس منتدي كتاب الهلال رايهم شنو ؟؟؟؟؟

بعد دي تمشو الليق طوالي ما بنلعب معاكم زمان ما لاقين فريق يقولو عليه
دي فريق بقدر علي اسياد البلد نقرقش بيكم ونتسلا بيكم نعمل شنو حتي نلقي فريق زي الامل كده 2 طوالي

لك الشـــــكر والتقدير الاخ محمد طيب على هذه الزاوية الجميلة
وبعد
انت عارف اظن المطر السنة كثير شديد في السودان سمعت في نادي ام درماني اتشلع مواسيرو كلها ظهرت وفي كمان ماسورة سفروها ليبيا لي ناس الاهلي اليبييييي لفترة صيانية والله السيد ابوالهل السواها

هيثم إبراهيم محمد الشيخ كتب:

الاخ محمد تحية طيبة
اصلا محمد عبد الماجد دا زول فصيح ساي خليكم من الوالي القنع من خيرا فيها واها الحكومة جابت ليكم هدية كبيرة خلاص السيد احمد يوسف الرئيس الجديد يمتلك 40 باخرة بترول وصديق شخصي للشيخ زايد بن نهيان
في هدايا اكبر من كدى ورينا بعد دا محمد عبد الماجد وناس منتدي كتاب الهلال رايهم شنو ؟؟؟؟؟

نحن غلطتنا الوحيييده انو ماضقنا قروش الحكومه دي
مالك مستكثرا علينا
والله خايف نجيب بيها كاس
والله بعد كده عاوزين نستضيف كم فريق تعبااااااااااااااااااان كده والتكلفه مامشكله الحكومه معانا وما همانا اها نسمي البطوله سيكافا عشان الاتحاد يخلينا ننظما ونقع ليك في الحمام ده جنس اكل

ملحوظه.........
اي اتراكو ماحنعزمو
هههههههههههههههههههههههههه

هههههههههههههههههههههههههههههههههههههههههههههههه
الحمام الميت ما بناكلو نصطاد من الجو والضبح طوالي
وهم متعودين علي اكل الفطيسه وجابو كل واحد لابس عمه
مقنطره وجلالايب ما تديك الدرب ويباركو في الكاس قبل المباراه
الله يجازي التكاسي ... كاسر ركبه

عليك الله امثال سييييدا بياكل فطيسه

المطر كتير والحمد لله انت ما شفتا طارق مختار انزلق كيف
قرب ينفهق والحمد لله الاعب ما عمل حاجه كتيره وضع الكوره في
القون بس وصاحبنا اتملا طين بقي ما بتعرف المزيع ما عرف
الوقع منو بقي يتزكر عرفو بالرقم نقول غلطان المطر ولا البرد.

نطالب بشدة ونناشد بضم الكاتب محمد عبد الماجد في منتدانا العامر عشان زمان قالو الزول ما بكاتل بي سيف غيرو

أقروا واكتبوا يوم ماتغبوا جيبوا وكبوا المريخ بنحبوا

معتصم اعطاكم حق الفول وليس حبا فيكم خاف عليكم من الموت جوعا وحرام ناس شبعانين وجيرانهم جيعانين رحمه بأطفال وشيوخ لاعبي الهلال ( لا كاس ولا اكل والله حاجه تحنن مساكين بس العاجبني فيكم لسانكم طويل وزي ما بقول المثل رزيه ونطاحه)

صديق خالد عوض الكريم كتب:

معتصم اعطاكم حق الفول وليس حبا فيكم خاف عليكم من الموت جوعا وحرام ناس شبعانين وجيرانهم جيعانين رحمه بأطفال وشيوخ لاعبي الهلال ( لا كاس ولا اكل والله حاجه تحنن مساكين بس العاجبني فيكم لسانكم طويل وزي ما بقول المثل رزيه ونطاحه)

_____________________________________________________________________
يا خال انت قاصد ناس العجب عددددددددديل

اعمل حسلبك يا محمد طيب ----محمد عبد الماجد زول مشاكل بتاع محاكم قديم