من القيم الجميلة التي كانت في مجتمع الهدى في السابق كما ذكر لي عمنا عبد الرحمن خيارى ٠
إنو العرس كان ساهل جدا اتلمو الشباب واي واحد امشي الخلا اجيب ليو راس قش وابنو ليو بيت٠
ومن الطرائف انو كان في ضيف من اهلنا الحلاوين جاء زيارة للهدى انذاك
وكان شاهد عيان لعريس سيرتو
طلعت والناس جابوا القش وشغالين يبنوا ليو في البيت ٠
وعندما رجع هذا الضيف الي الحلاوين
قال لي اهلو: حجيتكم مابجيتكم (هو سيروا وبيتو مابنوا)
لمن سالو دا شنو قال ليهم ديل ناس الهدى٠

الأخ عوض خياري ..
لك التحية وعبرك لعمنا عبدالرحمن خياري .. متعه الله بالصحة والعافية .. وكم نحن سعداء حينما تروى لنا الذكريات الجميلة عن الأهل والبساطة والسماحة في التعامل .. والحياة البسيطة في كل شي حتى في الطموح .. وهذا لغز التعاون عند أهل الهدى ( سيروا وبيتو مابنو ) ..
لك التحية

الحبوبة عوض تحيه مليونية من عمق المناجم والبحار

ونحيى عبرك عمنا عبدالرحمن خيارى ربنا يديهو العافية وهو مخزون من الحكى الجميل والطرائف..!!
وحكى لنا ذات مرة قصة حمار الخالدى بتعرفا ؟
وقال : لجدنا الخالدى حمار مشهور ومعروف بالمكادى !! وقد باعه فى سوق الفريجاب وقتذاك , وان هناك احد من اهل الفريق وقد نسيت اسمه كان يود شراء حمار ولم يجد احد من الاهل يذهب معه الى سوق الفريجاب (عادة الناس ان يذهبوا جماعات للاسواق) .
فتوكل وذهب بمفرده واحضر حمارا وهو به معجب , وعندما سمع به الجماعة اتوه مباركين , وما ان رأوا الحمار إلا وصاحوا بصوت واحد : هييى دا ما حمار الخالدى .. !!
فما كان من صاحبه إلا وذهب للخالدى برفقة الحمار ,
ياعمى الخالدى : صحى دا كان حمارك ؟؟
الخالدى : ايوه بالحيل !!
صاحبنا : أها الحمار دا مشيهو كيف ؟
الخالدى : مشيهو كان مع الحمير تقول يطير ...!!
صاحبنا : أها وكان برايو ؟؟
الخالدى: كان برايو .... بوريك رايو !!

لك التحية الحبيب وليد
ونشهد بأنك إنت دا الحبوبة .. ما عوض خياري .. ونترحم على روح عمنا الخالدي .. وهو من ظرفاء المدينة المشهود لهم بخفة الدم .. وله من النوادر و الطرائف الكثير .. في ذلك الزمن الجميل ..

طارق ود المامون والله بالجد انا في غاية السعادة وانا اسطر هذه البساطة
والعفوية والتكاتف البقي مجرد حكاوي
ياريت نرث منهم ولو القليل
وانا اكثر سعادة بي مرورك
الجميل جدا٠

وليد ياشديد وانا بيك سعيد كانو الدنيا عيد
هههههههه
غايتو ضحكتا من الاعماق
لاكين قصة الحمار دي ماسمعتها
(بوريك رايو)

لك التحية اخى عوض الله
هى قمة البساطة وقمة التعاون
فى بناء القطاطى فى يوم واحد

هو زوج بركة فى بركة
وامتثال لقوله عليه الصلاة والسلام تزوجوا فقراء يغنيكم الله

الشيخ لك الف تحية
وانت من تناول موضوع تيسير
الزواج من قبل
وما هذا الا دعم لك
وتذكير بان اهلنا كان
يضرب بهم المثل في البساطة
والتوكل

الاخ عوض الله سيد الحوش لك التحية
تشكر على هذه الاريحية التي تحكي زمن التكافل الاجتماعي بين اهل الهدى في الزمن الجميل
ياريت ياعوض الله تستنطق الوالد ليكتب لك القصيدة التي انشدها وكانت سببا في بناء النادي قسم الشرطة الحالي

الحبيب ابو الطيب تشكر علي المرور
وصبرك علينا ان شاء الله سترى الكثير
من ابداعات اهلنا الطيبين
سنستنطنقهم واحد تلو الاخر

الاخ عوض
زكرتنا الماضي وهذا من الواقع قبل عدة اعوام زمن مشروع الجزيره بخيرو كان الناس
يحضرون ناس لجني القطن وهم يبنون منازل من القصب وكان عريس تقدم لبنت عمه للزواج وبعد تحديد اليوم واهل العروس يسكنون في الحواشات وعند استيقاظي من النوم
ومعي مجموعه من الشباب ارسلونا يوم العرس لبنا منزل للعريس وبعد حضور العريس
وجد المنزل مكتمل باحسن الصور وباب من الصريف لا يحتاج الي لحام او بهيه
والله ايـــــــــــــــــــــام يازمـــــــــــــــــــــان

محمد طيب يازول ياطيب
انت انا خايف تقول لي حاضر
زمن السيد خالد ٠٠
ههههههه٠
تشكر علي المرور الطيب