الكاتب الانيق عثمان ابوشيبة .. كان فاكهة العيد من خلال الضحكة التى يزرعها فى كل مساحات الحضور

سعدت بلقائه .. وسعدت بتخصيصه مواضيع متميزة لهذا المنتدى

نخليكم مع عيدية ابوشيبة ... ودحر الملايات




صدقونى العيد ملايااااااااات 00 ياتعمل نيفاشا مع (المره ) وتجيب الملايات وتجر السرير
من ضل الضحى لضل الضهر وتعمل (كمل نومك ) 00 ياترووووح فى (65) ونقة لمن ااامين

مره مزعجة ازعاج لو فتحت خشمها بس فتحت ليك موبايل صينى (ماسورة )

والعلاقة بين الملاية والملاريا الاتنين فيهم صداااع 000 صداع امير

لو عندك ملايات فخمة ومتينة وليها 5 سنين مرتك بتفرشها للموسم الخامس زى برنامج اغانى واغانى
ملايات كبيرة (موردة )00 ماعندها وردة 00 لا فيها ورود كبيرة عشان مرتك تغنى براحتها

نحن فرشنا السكة ورود

الملايات هاجس 00 (هاجس ولا امجاد )
من اول رمضان المرة تطلع الملايات المدسوسة من رمضان الفات زى موسيقى فترة المنوعات فى الاذاعة
اغسلوها 00 واكوها 00 واكو بيها الجارة 00
ملاياااااااااات طويلة زى المسلسل التركى 00 موش قصيرة زى الماهية
الملاية لون الاوضة 00 والاوضة لون زينب 00 وبعد داك خت (اللون ) على
وزينب لو جااااااات وما لقت عندك ملايات بتقول ليك (ماعندكم صيام )
مسكين الراجل الميزاينية كلها يوجهها للملايات
يعنى تبقى ميزانية ملايات

حتى البند التانى الخبيز 00 مافيها الايكون (خبيز وجمعة )
والراجل المسكين بعد مايجيب الملاياات قايل بنوووم فيها سجم خشمو
بالليل المرة تجمعها زى كراسات الرياضيات 00 وتديهو ملاية قديمة اشتغلت 15 سنة
وهسة دفعتها بقت (كيس مخدة ) عشان ينوم فيها
والمرة جنها وجن تتغطى ليها بالملاية الفارشها 00 ان شاء الله السقط يكتلك
بس الملاية

لاتتكرفس

لا تتطبق

تظل ممدودة

ومشدودة على وتر السرير

ويدوووك ملاية قصيرة 00 تغطى راسك 00 كرعيك يعرجن
تغطى كرعيك 00 راسك يبقى كااشف ( كاشف رقم )



الملاياااااااات سادتى انواع وخامات 00 (خامات يهودية )
من نوعية (سوقنى معاك ) وحتى البوليستر مشجر 00 ومطرز 00 مخطط 00 وسادة
دا طبعا واحد من (مخططات المرة )00 لازم تكون الملايات بوليستر
موش زى البوستر 00 صفراء وحمراء ومشخبتة زى اللوحة التجريدية

المسالة لازم يكون فيها تجرد 00 وجيب الملاية البتعيش 00 ولونها مايهد
لكن ممكن السعر يهد حيلك انت 00 والملاية لمن يصل سعرها المائة الف
نحن (الماكلين ليها شنو )

المهم الفراش 00 التقول فرااااااش القاش

العزيز عبد الرحمن
حقيقة ابو شيبة من اهرامات الهدى ولكني اتعجب اين هو من المنتدى؟؟؟ و الكثيرين من قمم الهدى لا يتواجدون في المنتدى ما السبب ؟؟؟
اين الاساتذه الافاضل عمر الصديق ؟ اولاد جابر ,حسبو ,محمد خالد , الهادى عبد الرحمن , صديق عبد الله ,عوض الكريم ابو سن , بتول امام رائدة التعليم قبل المدرسي فالمنتدى منبر لطرح قضايا التعليم في الهدى لو انت في الهدى نتمني تحثهم , وياريت بالكاميرا تنقل لينا صور حية من المدارس و المستشفي و السوق ومعالم الهدى وانت اهل لذلك ( وحياتك نحن منتظرين ....)

الاخوه بالمنتدي من مزاحه اخونا ابو شيبه قال مصر علي الاشتراك لكن عندي
موبايل ماسوره زي وارغو ويطلب موبايل للدخول اشنراك جنيه جنيه

الأخ العزيز ود مدثر

لك التحية . ،

يا للروعة ويا للجمال .. المزركرش المطرز كملايات وحلويات وخبيز العيد .. لقد أحتفتنا بهذا البوست الجميل ..
وعمنا الحبيب ابو شيبة يجب ان يكون في قلب المنتدى وقلب الشارع النابض افقتدت كتاباته من زمن جريدة الشماشة .. ارجوك انثر لنا منه الدرر .. لك التحية يا أكثر من رائع ..

التحية عبرك ياودمدثر للرائع ابوشيبة والمصرين بقولو مش كويس الكويس كويس البعرف الكويس يعنى كل مره اتحفنا بابداعات الاستاذ ابوشيبة لحدى مانلقى طريقة نجيبو حي ومبرووووووك العيد

لك التحية حبيبنا عبدالرحمن مدثر ،وعبرك نحى الاخ الزميل العزيز الاستاذ عثمان ابوشيبة وهو فى قلب المعاناة التى عبر عنها فى رمزيته العميقة "مشاددة بين المره والراجل فى ملاية"، يبدو أن الأزمة ممتدة مع الرجل وتحتاج لخارطة طريق وانعقاد قمة للرجال فى غابة البان لوضع الحلول،ورتق النسيج الاجتماعى ،بالله اتحفونا بسفر هذا الرجل الحبيب ابوشيبة وبلغوه سلامى وقول ليهو إذا مر عليكم الراجل البصلح السراير وقفو وقول ليهو تعال شوف السرير دا مالو مجنن المره بالملايات؟ إمكن السرير عندو حالة نفسية لا تحسها إلا بنات افكارنا كما يقول المثل "الطول فيهن الهول"

الحبيب الخرباش(ابومزن)
كل عام وانت بخير
فى عودتى فى اجازتى من اول اجازة لى
وبعد اليوم الثالث مباشرة اصبت بملاريا(تخلينى اشوف اشجاروبحار واشكال مخيفة
وهلوسة وهضربة وزولات غريبة)
واصبحت متوالية عددية وهندسية فى كل اجازة
لذلك وبصراحة كل ما امر على عنوان البوست اقراه طشاش واعبره سريع
خوفا من الصديقة اللعينة بطريقة غير مباشرة(ان اتغمس حالة الاصابةنفسيا)
وكنت افرا واهرب
واليوم جمعت كل شجاعتى وتوكلت على الحى الدايم
وتفاجاءت بالبوست التحفة
الجميل الرائع
ولمت نفسى
ان لم اقرا البوست متزامنا مع الحدث
شراء الملايات فى العيد
شكرا لك وشكرا لابوشيبة
استنباط الفكرة
عنوة
من اجل السترة
من واقعنا وثقافتنا
من مرتبنا
قراءة واقعية مرة
لمراة مرة
الزمن لا يرحم
والمرة ما بترحم
والحكومة ما بترحم
والجارات ما برحمن
والشوفونية
ثقافة تحتاج منا لبحث
فقد قتلت كثير من قيمنا
الفاضلة
والمراة السطحية
زادت الطين بله
ونحن فى ظل الظرف الاقتصادى الحرج
والمرتبات
التى تشبه ملايه ابوشيبه
ان غطت الراس عرت الرجلين
وان غطت الرجلين
كشفت الراس(الحال)
وفى الحالتين
(انا ضايع)
وراحت شمار فى مرقه

التحية لك ابومزن
والتحية عبرك لابو شيبة
حلمنتيش بطعم العيد

سمعهت بان احد الاخوة
جاسف واشترى ملايات وعندما هو يتجول فى السوق
سرقت الملايات منه وهو راجل جرسة وكان اليوم مسخن
فى رمضان عندما سرقت الملايات توجه لاقرب زير وشرب وهو يقول عمدا وقطع الكوز التانى وهو يقول عمدا:
قصة الملايات قصة

التحية لك عثمان مساعد