{ اعود الي (قلنا ما ممكن تسافر).
{ استمع الفنان الراحل ابراهيم عوض للمقطع الاول في اغنية (الحب الظروف):
قلنا ما ممكن تسافر
نحن حالفين بالمشاعر
لسه ما صدقنا انك بجلالك جيتنا زاير
السفر ملحوق ولازم انت تجبر بالخواطر
{ تململ ابراهيم عوض في مقعده ..ومحمد الامين (يترواح) في هذا المقطع مثل (خرير) المياه في جدول موية.
{ الاغنية فيها (سِفر) بديع من الروعة والجمال ..والاصرار الحزني البديع.
{ لعل اغنية (قلنا ما ممكن تسافر) من اروع ...(الحظريات)..بمعني انك اذا استمعت عليها سوف يختم في (تذكرتك) ..يوجد حظر ..كما يخرج من وزارة الداخلية في استبيان (جوازات السفر) وفحصها ان كان هناك مانع جنائي او سياسي يمنع السفر.
{ غير ان (قلنا ما ممكن تسافر) تحظر السفر بلطف ..ومنطق.
{ الحظر هنا لا قانوني ولا سياسي ..حظر عاطفي..ووقع العاطفة اشد علي النفس والقلوب.
{ ابراهيم عوض لم يتمالك نفسه عندما وصل الي هذا المقطع:
الغريبة الساعة جنبك تبدو أقصر من دقيقة
والدقيقة وإنت ما في مرة ما بنقدر نطيقها
دنيا بقربك يفرهد كل طائر يحيا فوقها
وجنة من بعدك بتذبل كل مخضر فيها ناضر
{ مفارقة غريبة لمعادلة مجنونة (الساعة جنبك تبدو اقصر من دقيقة).
{ احسبتها بكل القوانين واللوائح والنظريات والاسس ..ولم اصل الي هذه النتيجة.
{ الساعة اقصر من دقيقة.
{ انه استبدال لقانون المسافة والزمن.
{ المهم عندما وصل محمد الامين الي هذا المقطع لم يستطع معه ابراهيم عوض صبرا:
لو تسافر دون رضانا بنشقى نحن الدهر كله
ما بنضوق فى الدنيا متعة وكل زول غيرك نمله
أقل حاجة تخلي سفرك حتى لو إسبوع أقله
وإنت عارف نحن بعدك للصباح دايما نساهر
{ لم يتمالك ابرهيم عوض نفسه ...طوالي (دق) للسواق ..ونزل من البص ورجع الي اهله.
{ هذه القصة قرأتها في حوار صحفي لابراهيم عوض قبل سنوات ..وبقت في ذاكرة استرجعها كلما استمعت لاغنية محمد الامين (الحب والظروف).
{ مفارقة (انت عارف نحن بعدك للصباح دايما نساهر)..مفارقة تعني بالروعة ..وهي نظرية مجربة عاطفيا..اذ يبقي السهر للصباح والفة وإلازام.
{ توصيل الليل بالصباح سهرا ...(شهر ما عندنا فيه نفقة).
{ الرحمة للفنان ابراهيم عوض ..والصحة العافية للفنان محمد الامين والاستاذ فضل الله محمد.
{ بالمناسبة هذه الاغنية تمني الفنان الراحل ابراهيم عوض لو انه اغنية خاصة له ..وعلل عن اعجابه بالاغنية واللحن.
{ اتذكر الان الاغنية كليا ..ووارغو يتجه نحو ليبيا (معارا)...واتوقف عند هذا المقطع وانا اري (جقلبة) المريخاب.
لا لا ما بنقبل نسيبك تمشي للوحدة وتعاني
برضو ما بنقدر نقاوم شوقنا من بعدك ثواني
وما بنغنى وراك كلمة وما بنشوف البهجة تاني
غايتو لو شفقان علينا ما أظنك يوم تسافر
{ انتوا يا المريخاب في زول جبركم.
{ الموضوع مالو وقت بقي جد ..بقي ليكم حار.
{ عشان تعرفوا ان الشغل في المريخ ..بدوروا الهلالاب.
{ تاني الموضوع دا ما تغالطوا فيه.
{ الهلالاب نقوا في (الباشا)....المريخاب طوالي اعاروا الباشا.
{ الهلالاب نقوا في (اكرم).
{ اكرم شطبوه.
{ اتكلموا في (كلتشي).
{ كلتشي اتلجن.
{ اتحدثوا في (طمبل).
{ طمبل انتهي.
{ دوروا في (وارغو)..وارغو اعاروه.
{ اقول ليكم حاجة اكتر من كدا.
{ الهلالاب هم الذين اجبروا جمال الوالي (يتنحي).
{ من الله خلقكم وقمتوا سمعتوا ليكم بي (رئيس نادي) اتنحي.
{ وين نحن؟.
{ في جمعية تأسيسية.
{ الهلالاب ديل الموضوع البمسكوا فيه ..ما بمشي لي قدام.
{ عليكم الله هسع في داعي في الوقت دا ..وفي الظروف دي تعيروا وارغو.
{ هنو دا قاعد لي شنو؟.
{ طارق مختار ذاتو قاعد ليه؟.
{ طارق مختار هسع ذنبو شنو؟.
{ انا غايتو بعد اعارة وارغو بعترف ح تكون عندي مشكلة..يعني تاني بدل اكتب 7 اجانب ..ح اكتب 6 اجانب.
{ الاجانب نقصوا واحد.
{ عجبهم حال الهلال.
{ التوانسة ديل القاعدين ليها شنو؟.
{ وارغو ذاتو يا دوب نفسو اتفتحت.
{ جاب ليه 3 اقوان في اخر مباراة...الزول دا الظاهر عليه كان مضايق شديد.
{ لكن في المريخ دا الواضح كدا في مشكلة.
{ لاعب مصاب ...(طمبل).
{ لاعب معار...(الباشا ووارغو).
{ لاعب موقوف ..(موسي الزومة ومحمد كمال ومصطفي جعفر وطارق مختار).
{ انتوا بعد كدا عاوزين تلعبوا بي منو؟.
{ لاسانا ما بقعد ليكم.
{ النفطي ..ما بيلعب اكتر من شوط.
{ هنو إلا تجيبو ليهو (تربيزة).
{ فريق كلو مشاكل...انتوا عوارضكم دي من شنو؟.
{ عشان تاني تدعموا في (حي العرب).
{ غايتو تحفيز المريخ لحي العرب ..ظهر في المباراة الاخيرة.
{ نحن ما كنا بنفتكر ناس حي العرب بقبلوا بي حاجات زي دي.
{ جمال الوالي شغال (تحفيز) في الاندية التي تلعب ضد الهلال.
{ دا ما تحفيز ..دا (تحريش).
{ والمحرش ما بكاتل.
{ الحكاية مقفلة علي المريخ من برة ..ومن جوة.
{ الاتحاد الافريقي يعاقب في المريخ ..والاتحاد السوداني ..(يطبطب) للمريخ.
{ اطبطب ..ادلع.
يا اطبطب وادلع يا يقولي انا اتغيرت عليه
انا ازعل اولع ما هو كل همه ازاي ارضيه
اطبطب وادلع
{ هذا ما يفعله الاتحاد العام لكرة القدم السوداني.
{ تاني يا ناس المريخ يعملوا ليكم اكتر من كدا شنو؟.
{ اتوقع برمجة الدوري الممتاز العام المقبل تأتي علي هذا النحو.
{ مباراة الامل والمريخ في الدورة الاولي يعتبر المريخ فائز 5- صفر.
{ مباراة الدورة الثانية ..المريخ يعتمد فوز المريخ 10- صفر.
{ مباراة المريخ وحي العرب ..الاتنين ..المريخ غالب فيهم.
{ وهكذا.
{ لكن برضو ما بتمشوا لي قدام ..لو دا حالكم.
{ قدام وين؟.
{ قدام محجوز.
{ ما تفكروا في اكتر من (الوصافة).
{ جمال يتنحي.
{ ما مشكلة.
{ وارغو يتعار.
{ ما مشكلة.
{ موسي الزومة يوقوفه ما مشكلة.
{ طيب المشكلة شنو يا الحلنقي.
{ المشكلة في سادومبا ابو رأس دا.
{ سادومبا دا لا بعرف (تنحي)..ولا بعرف (اعارة)..ولا بعرف (حصوة).
{ الحصوة هسع الدخلها شنو؟.
{ والله انتوا يا الهلالاب اللاعب البتمسكو ..يا تعيروا ..يا تجيبوا ليه (حصوة).
{ هيع.
{ ملحوظة: كلتشي اتجنس واتصاب.
هوامش
{ الما شاف هيثم مصطفي (حفظه الله ورعاه) في مباراة الهلال وهلال كادوقلي الاخيرة ..يحضر حفلة محمد الامين القادمة.
{ غايتو هيثم في الكورة دي جضم (الفلوت).
{ العاوز يدخل ليه معهد لغات...يحضر اعادة المباراة.
{ الشيء شنو؟.
{ قولوا ما شاءالله.
{ بويا ما قصر.
{ حارس هلال كادوقلي عامل لينا فيها (صعب).
{ مهند الطاهر وبويا مسكوا ملفو.
{ الحارس مسكين طلع بعد الكورة فاكر نفسو في العراق.
{ الحارس قال لي اصحابو ... العراق دي صعبة خلاص.
{ انت يا الحارس ما كلموك بـ (المقبرة)..وإلا ما حفزوك.
{ هوبة مهند الطاهر زي (قطار الشوق).
{ هسع قطار الشوق الدخلو هنا شنو؟.
{ عاوزين لينا حفلة خاصة في مباراة الهلال والخرطوم.
{ يا بويا بي طريقتك دي بتبقي هداف الدوري.
{ وإلا بتكتل ليك حارس.
{ نقول بشة ..يطلع لينا عبداللطيف بويا.
{ قولوا ما شاءالله.
{ مباراة الخرطوم عاوزين ضربة جزاء مخصوصة لي المعز محجوب.
{ الزول دا لو ما جاب ليه قون ما برتاح.
{ عشان كدا يا عمر بخيت خلوه.
{ بكري المدينة ..هو الروعة ذاتو.
{ طارق مختار مع بكري المدينة دا ..ضرس ما بفضل ليك.
{ خلاص فكيتوا الباشا.
{ خلاص فكيتوا وارغو ..وعاوزين تقبلوا علي طارق مختار.
{ طارق مختار دا إلا تعيروه اعارة محلية.
{ ليبيا ذاتها ما بتقبل بيه.
{ خبر عاجل: المرابط دا بتتخارجو منو كيف؟.
موضوع: قلنا ما ممكن تسافر 
الجمعة 1 أكتوبر 2010 - 11:24
