ملاح قرع وبامية مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن اجتاحت البلد أعداد مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح!
عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده)!
عند موعد الغداء انتشر أفراد يرتدون زياً موحداً يحملون (صوانى الأكل) النيكل الناصعة التى ترتاح بداخلها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عدد من زجاجات المياه المعدنية البااااردة!
فى صالون النساء جلست سوسو (فى الأصل ست البنات قبل أن يصبح حسن يورو رجل أعمال) جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية!
- كلمتى (عوضية ردحى)؟
همست (سوسو) لجارتها وصديقتها (نوسة) والتى مالت قريبا منها وهى تجيبها:
- والله (عوضية ردحى) دى قالو عندها مناسبت بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجالية مات هناك أها فى الأخير مشيت كلمت ليكى (حنان سكليب) لقينا ما عندها ارتباط ووقعت العقد مع مدير أعمالا! وأديتو مليون عربون مقدم.
- وشالت منك البيانات!
- أديتا ليها كووولها.. المرحوم كان شغال شنو؟ وعندو كم عمارة؟ وقاعد يتبرع لى ياتو (نادى) وإشترى ليهم كم (لاعب)؟ وعربيتو الراكبا نوعا شنو؟ وموبايلو الشايلو موديلو كم؟
انتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهة (الكبيرة حقت الشاى والصغيرة للجبنة) التى تفوح من (فناجينها) رائحة (المستكا)..
وفجأة دخلت إلى الصالون شابة (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعة ويصحن بصوت كالجرس يشق عنان السماء:
ووووب ووووب ووووووووووووووووووووووووووووووووووووووووووووووووووب..
ثم تبدأ (حنان سكليب) فى السكلى و(الوصف) وهن يرددن خلفها:
- ووووب عليا والله ليا يا حسن يوروو يا البتدى البتدورو والما بتدورو
ووووب عليا والله يا صغير وجاهل يا البتجيب القروش بالساهل
يا ود امي.. هيء يء يء يء ..
الكورس : وووب ... وووب ...ووووووووب
الليله يا حليلك يا زين الرجال ياملك الدولار يا البتستر الحال
الليله يا حليلك يا البتشيل من البنوك وتشتت قبال ما يلحقوك
يا ود امي.. هيء يء يء يء ..
الكورس: وووب ... وووب ...ووووووووب
الليلة وينك إنتا يا الإسبليت هبوبك والهمر ركوبك
الليله وينك إنتا يا البنيت المقصورة وركبت النافورة
الليله وينك إنتا يا أب جيوب منفخة وأب عربية مصفحة
يا ود امي.. هيء يء يء يء ..
الكورس: وووب ... وووب ...ووووووووب
يا حليلك الليله يا البتفك الصعيبة ويا البتسجل اللعيبة
يا حليلك الليله يا جوكى البنوك يا التهريبك بالسنبوك
يا ود امي.. هيء يء يء يء ..
الكورس: وووب ... وووب ...ووووووووب
ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ... ووووووووووووب وب وب وب ووووووووب ثم يتوقفن فى لحظة واحدة بإشارة من (حنان سكليب)! التى تجلس على أقرب كرسى وتتناول علبة مناديل الورق وتخرج منديلين تمسح بهما حبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة:
- قبلكن وحدكن.. جنس بخلن عليكن .. أول مرة أمشى ليا (بيت بكا) ما ينقطوا ليا فيهو!!

الاخ الاكرم ودالياس لك التحيه و الاجلال
ومشكور علي مرورك وردك .
واناعندما اذكر هذه الاشياء انما اريد من الناس ان يحاربو هذه الطبقيه القادمه اليهم
و ان يعو الانقسام كما تفضلت ووضخته
وحسبنا الله يكفينا شر التمزق و الفتن
شكرا لمرورك مره اخري الاخ محمد و اتمني من الله ان يصلح حال جميع المؤمنين

روعة وفن فى التصوير
يكاد القارئ يرى
هذه الاحداث .
متعك الله بالصحه والعافية

الاخ عوض
مشكور علي المرور

رهيب رهيب والله رهيب حياك الله منتصر عيساوى

وضعتنا امام مشهد كأننا متحكرين قدامو وسوسو وحنان سكليب وصويحباتها بكامل عدتهن وعتادهن وطبعا بكون فى عشاء الرداحات وفاصل لسوسو ست الوجعة وكدا ..
والله للاسف الشديد لقد شهد ذات مرة عزاء من هذا النوع
وطبعا المؤسف برضو الزول لمن يموت فى الابراج العاجية دى اول حاجة بعد ناس البيت يجيهو حالهن تب حتى يبدوا البكاء اعلانا بوفاته ..
مع السيناريو الجميل دا لازم المخرج الكبير اسماعيل عيساوى يكون اخوك .. وربنا يسترنا

الحبيب عيساوي لك التحية وأنت تحكي بهذا التوصيف الدقيق الممتع والخيال الخصب
صارت المآتم حتى في الأقاليم فيها مشاهد من البزخ والشوفونا
ذهبنا لأداء واجب عزاء في قبلة الأنظار ، وكنا نسابق الزمن حتى ندرك الدفن
لكن وصلنا والجماعة راجعين من المقابر
ما قعدنا خمسة دقائق حتى جاتنا ليك الصواني وفيها اللحم والسلطات
يعني في مثل هذه الحالة عندما حدثت الوفاة ـ ناس مشو المقابر للحفر وناس مشو السوق جابو البهيمة والخضار والطباخ
ل حول ول قوة إلا بالله
أحكي ليكم وأنا أتمزق من الأسى ليس فقط لفقد المرحوم والذي كان علي كبير
إلا أن فاجعة موت القيم لا تقل عنه أساً وحسرة

علاءالدين عبدالرؤوف السني كتب:

الحبيب عيساوي لك التحية وأنت تحكي بهذا التوصيف الدقيق الممتع والخيال الخصب
صارت المآتم حتى في الأقاليم فيها مشاهد من البزخ والشوفونا
ذهبنا لأداء واجب عزاء في قبلة الأنظار ، وكنا نسابق الزمن حتى ندرك الدفن
لكن وصلنا والجماعة راجعين من المقابر
ما قعدنا خمسة دقائق حتى جاتنا ليك الصواني وفيها اللحم والسلطات
يعني في مثل هذه الحالة عندما حدثت الوفاة ـ ناس مشو المقابر للحفر وناس مشو السوق جابو البهيمة والخضار والطباخ
ل حول ول قوة إلا بالله
أحكي ليكم وأنا أتمزق من الأسى ليس فقط لفقد المرحوم والذي كان علي كبير
إلا أن فاجعة موت القيم لا تقل عنه أساً وحسرة

يا خال تحياتي

في بعض الأحيان حسن النية يكون سيد الموقف ربما كانت اللحوم والسلطات من أجل إكرام الضيوف تقديرا لمشاركتهم , بس لو كانت بوبار و فشخرة تبقي مصيبة وميته وخراب ديار
أحلي حاجة نسوي قهوة وتمر في العزاء وينتهي العزاء بعد ثلاث أيام وكان ما شينه نقول ينتهي بإنتهاء مراسم الدفن
وربنا يرحم أموات المسلمين
ولك تحياتي

الاخ وليد التلب شكرا لمرورك و مداخلتك
و كما ذكرت يا اخي اصبحت المراعاه للمظاهر و الانشغال بما يقول الناس اكبر هما حتي من الفواجع بدليل ان الناس كما قلت ياجلون العزاء و ياخرون الدفن حتي تكتمل الاستعدادات و التجهيزات وهذا دليل من دلائل انشغال الناس بلدنيا
مشكور علي المرور مره اخري
بلمناسبه اسماعيل عيساوي ابن عمي لزم و انشاء الله ربنا يسترنا و يسترك

الاخ علاءالدين ليك التحيه و التجله و احساسك ينبض هما و اسي لما و صل اليه حال الناس من انشغال بلدنيا و مراعاه للمظاهر في زمن نحن احوج الي الرجوع الي ديننا و جزورنا التي لم نسمع فيها كل تلك الاشكال و التصرفات الدخيله علينا
لك التحيه مره اخري و ربنا يصلح حال جميع المسلمين

الاخ هيثم ابراهيم شكرا لتفضلك بلرد علي ضيفي
و شرحك لوجهت نظرك وظنك لما يفعله الناس في الماتم هذه الايام!
بلمناسبه هناك بعض اللذين ينهون الماتم بانتهاء الدفن و هي سنه حميده درج عليها بعض الصالحين
و لكن يا اخ هيثم هل تعتقد بان معظم الناس الزين يركضون خلف المظاهر سيستطيعون فعل ذالك
((اتمني بان يهدي الله الجميع و ان يصبرهم و ان يفعلوها حتي و ان كانو يخافون من الشينه ))

حقا اخي عيساوي لك التحية نعم شكلت تراجديا بدواخلنا فتذوقنا نحن في المنتدي لذة الحزن بابداعك في عكس ظاهرة بدت في الانتشار..بهذا القلم الذي يفيض ابداعا نرجو المرور تراجديا ودراميا علي مظاهر اخر فعشمنا في ابداعك...

الاخ منتصر تحية لك موضوع جميل ووصف دقيق لنسوان المدن رغم نحن اولاد ريف والريف قرى وحلال وفرقان ولا نعرف طبائع ناس المدن بس عندنا البموت فى اهلنا اللعمى يشيل المكسر اناس رسلو لى حاج عبد الله وحاج ابزنقر و ودعطمنو وقولو ا ليهم حاج ابزهانة توفى ويا جنا شوف لك حمارن متين وروح ناس خالك حمد ابسردبا وخالتك العافية وريهم تعالو بس وواحدة تبكى الليله ياالخزين يا صمد النمرتين اخخ تفف المخاتة بطرف التوب الليله حليلك يا حسب الله ابو فرج الله ياحبيب قساى المابتفطر براى

شكرا منتصر عيساوي
شكرا مصطفى البلة

تباين ثقافي واضـــح وإختلاف في الردحي بين الرداحة حنان ( ناس البندر )
وردحي ناس الأرياف والحلال والفرقان ..
لكم التحية ..