‏(‏1) ... قرنتية ..مادبابة برمائية..لاجاسوسة مدسوسة لاغواصة روسية لاجندية في (حركة) لا مختلسة مال شركة لا قصفت حدود فشلا لاكسرت صريف كسلا ولا معروفه ختميه ...قرنتية لاصعلوكه لبست (شورت) لابتعرف شنو البظبورت .........>>

لامحتاجة (جنسية) هي قايله النيل سقف بيتها (محمية) ..جات منسابة عز الصيف قايلة الناس بكرمو الضيف ..قايلة النيل امان والقيف وقايلة الحاضرة عصرية .قرنتية جات بصغارا دايرة الخير لا شافت يفط تحذير لا نزحت..>>

تكوس توزير لا جاطت حركة سير ..لا دارت وسام تقدير لا مستقلة عشرين وش ..تعيش بالغش كان محتاجة بس للقش وجات احلامها دوغرية..قرنتية لا بلعت عديل السوق ..لانضمت بدون طايوق ..لاكنزت دهب اوماس.لا ظلمت بدون احساس..>>

لاظلمت بدون احساس ..لا عصرت شباب الناس لاكتمت علي الانفاس لا قطعت عشم بي فاس..لا داستنا زندية ..قرنتية سلع في الخيش ..لاشربت مريسة العيش لا ضبطوها في التفتيش لاسجنوها شالو الفيش لاخانت قسم او ديش ..>>

لا اجتمعت (بمستر جون ) لا اكلت مؤنة (العون) لاسدت علينا الكون ..لاسبت كتاب او دين..لا سامتنا حمرة عين ولا باعتنا ضهرية..قرنتية جات مشتاقة للخرطوم ..تزور احبابها خايفة اللوم ..تصيح وتنادي بالحلقوم .جنينة النزهة وين يازول ? >>

جنينة النزهة وين يا زول ? لقيت حال الجنينة خلا _حليل زمنها وحليل اهلها _لا قرنتية لا اصله لا صوت ككو لا بغله _لا حلوف ولا اسدا مهاب بالخوف لا نمرا يشد الشوف _لا ضل فيل لا تيتل جريهو جميل _ولا غزلان ولا طاؤوس يباهي النيل >

لازفت طيور ونعام ولانمرا دفر قدام _كل الشلة ياقرنتية _غمضة عين_احالوهم لصالح عام تقول (الدنيا مهدية ) ...قرنتية _جات زي ضيفة ماغارة لا محتاجة لي فيزا ولا تصديق علي زيارة _جات والشوق دموع حارة ...>>>

تجدد في العيون الشوف _قرنتية لادبابة برمائية لاجاسوسة مدسوسة لاغواصه روسية لاجندية في حركة لا مختلسة مال شركة ولا حزبية بعثية قرنتية .