¤إجترار¤
/زكريات طفوله/
شفع كنا مناطير ساي قبل الطير مايهج بنقوم
حفايا غبش زي قشر التوم
وجوهنا مشققه مافي جضوم
كنا بنترسل مش حكمتو بالغه زي ما الناس بننوم
كنا بنمشي الحواشات
ونلم القرود للبهمات
ما بنهبش لوز الناس هي كان الواحد مات
الدرت الفات والناس صايمين
لمينا القش ولعنا النار
حننجض فول
حارقين كومين
جلدونا جلد!
قمنا نكورك من التقنت لي ابعشرين
البلل سروالو_النسا نعلاتو_السبه الدين
البركه أهلنا الجو
ماكان صبحنا النمره دي جت مررو
وللإجترار بقيه
كتمت

الكلمات جميلة
وتجسد الماضى
بتصور جميل
تجعل القارئ
يتوه فى ذكريات
طفولته وماضية
بس المنتدى عالمى
وليتك حذفت بيت
البلل سروالو_النسا نعلاتو_السبه الدين
لكى لا يعتقد قارئ بأن
طفولتنا كانت سب دين
وفكرتنى بطفل سب الدين فضربه والده ضرباً مبرحاً
وحذره أشد تحذير من السب مرة أخرى ,بعد ايام صحب الابن والده
الى المسجد وعندما قرأ الامام مالك يوم الدين ترك الطفل المسجد
وولى هارباً وهو يقول ونن سب الدين سب الدين
نعوذ بالله من الكفر
كما يعلم الجميع أن سب الله أو سب الدين أو سب النبى من الكفر
ودمتم بخير

شكرا وليد علي المرور والملاحظه_قصدت أن يأتي السرد عفوي ليكون أكثر واقعيه_ونحن أمة تحترم دينها وتوقره_وحاشا أن يكون في ديننا دنيه

‏* الجردله *
‏(‏ الجردله إحساس بنتابني في مواقف معينه _ بكون متبوم غاية البوم ومتلش غاية التليش_بتكون دواخلي مخنصره__غايتو أفسرها ليكم شعر

الجردله
بتتجلا في النفس العميق ومريح
وبتقصر قوام شريانك التاجي
وتضم قطر المشاعر فيك
تحس إنك مجلبط بالحلا
دي الجردله
الرؤيه البتهبش فكرتك
تتلاشى مده وتاني تظهر
تبدا توضح وتمحي وتتهد تفتر وتنصلي
بتكون دي زاتا الجردله
وأسألني كيف الجردله؟
الزول التشوف في عيونو فرح الدنيا ونجاة آمالك الوصلت حدود المقصله
ببقا إنبهارك جردله
الزول التشوفو تطش يتشك جوه في قلب الاماني المزهله
الإحساس دا واضح جردله

‏* منتهى الجردله *
بتجردلك لما القوافي تمد بنانا تنظم الماقلتو ليك
بتجردلك رغم الفوارق والمسافات والخطاوي الاهدا من سرعة مشيك
بتجردلك ماطبعي زاتو الجردله
وغصبآ عن أحلامي البسيطه التصطفيك
بتجردلك في كل لحظه تهل عيونك وتعكسك في دمي غنوه تهاتي بيك
بتجردلك يوماتي عمدآ وبرتبك لما الدواخل تلتهب محمومه فيك
بتجردلك وعدا يساور مقلتيك
أنا والبصر كل المشاهد حبلى بيك
بتجردلك تفرز مساماتي الروى
ويدخلني عطرك يملا كل الاورده
وأرجع تماما مرتويك
ينزر غمامك بالمطر_تتوارى أرضي من البلل
ينجب جزيئاتو الخجل في نور وشيك
بتجردلك أنا شان أجيك
وأعتريك في النبض حمى وجردله
مابستبيك
مابنتهيك
بتشابا ليك
‏
وأتجردلك

الاخ الرائع دوماً والمنيطير حينها

السراج الوهاج ..

والله غايتو جردلتنا جنس جردلة لمن كتمت ..

انا فى البداية افتكرتها الجردقة داير اكفر ليك ..

عقب عقب آخوى متحكرين وراجين المزيد وعقبال ما تجينا

بالبسكلة !! .. لك ودى

ياوليد شكرآ جزيلآ_لكين عليك الله حصل إتجردلت؟_وشكرا لمتابعاتك لشئون المدينه_وأتمنى يوبيل الهجره يجد نفير ضحوه وضهريه أومقيال عديل
‏
لك ودي

سراج ما تقوم تنداح وتمرق المغتا و الملان شطة اصلو فريقكم كان عامر بالبجردلو وانت كنت المستشار وكل ما واحد يجردل يلقاك سبقتو اصلك خامي الجرادل كلها ونافست عمك النور وبالمناسبة الستك الكبير داك القدام بيت عمك بخيت لسع في ولا لحق الزينين
و اتجردل جردلة فانت مجردل وبكرة بشوف عمك ابن منظور بتاع لسان العرب و اجبيب ليك خبر الجردلة
ولك ودى

ياسراج قول لهيثم دا يا زول اقيف .. والله يمشى يبحت

ليك فى ابن منظور ومختار الصحاح والكتب الكبيرة دى

يطلعها ليك حاجة تانية ختيرة تب .. وتكتم فيك

الاحباب شراج , وليد تحية طيبة
جردل تعني قرب يقع بس يقع وين ما ما معروف وهاكم المعني من المعجم
جَرْدَلَ (القاموس المحيط)
جَرْدَلَ: أَشْرَفَ على السُّقوطِ، ووقَعَ في "صحيحِ البخارِيِّ": فمنهم المُوبَقُ بعَمَلِهِ، ومنهم مَن يُجَرْدَلُ"، وفي رِوايةٍ: فمنهم المُجَرْدَلُ، كِلاهُما بالجيمِ فيما ضَبَطَهُ الأَصيليُّ، وفَسَّرَهُ بالإِشْرافِ على السُّقوطِ، وحَكَى ابنُ الصابونِيِّ: المُجَزْدَلُ، بالزايِ والجيمِ، وهو وَهَمٌ، ورِوايةُ الجُمْهُورِ بالخاءِ والراءِ.
وبعد شوية حانشوف مكان السقوط
ولكم تحياتي

ياود هنونه _بتجيب المعاجم دي من وين_طبعا في الهدي مافي أي كتب تتقري ولازول يشجع علي القرايه_وقفت من زمن مهدي الفكي عمر_تحياتنا ليك ياودهنونه اوعاتكون عملت حنون_

ياوليد _ودهنونه يقيف من المراجع والمعاجم وللا المغطى وملان شطه؟؟ علي الشبكه العنكبوتيه ياود هنونه شطه وشططا ؟الله يدينا خيرك__ياوليد جايي الهدي متين؟

سراج الدين الفاضل كتب:

ياود هنونه _بتجيب المعاجم دي من وين_طبعا في الهدي مافي أي كتب تتقري ولازول يشجع علي القرايه_وقفت من زمن مهدي الفكي عمر_تحياتنا ليك ياودهنونه اوعاتكون عملت حنون_

مكن )

تسلم ياراقي_وإنشاءالله يوم شكرك مايجي_المطلوب بس قيام المركز التقني البنتحدث عنو ودا ببقا بي مجهوداتك والاخوه_ودمت

كتمت ولما استحكمت حلقاتها
كتمت تانى.
وينك يا كاتم
خليتنا فى الكتمة دى وزغتا
جيب جردلك دا واديها رشة شوية.

ياعوض انت ما أصلك كاتمة فيك من زمان .. خليها

التكتم سااااى .. وقالوا ليك الكتمة ولا قحة

الخشم !!

بمناسبة الكتمه انا مره كتمت علي كتمه
وفاة جون قرنق_ساكنين في الازهري لاعندنا رادي لاتلفزيون_يوم الاثنين الصباح بدري أناطالع ماشي العربي_لاعارف طياره تاهت لا جون قرنق رايح_ركبت حافله _لاحظت الركاب صانين ساي لافي زول غالط كمساري لاولد نطر عيونو في بت_أدب شديد _مع دخول الحافله للسوق العربي_نشم ريحة البنبان والناس جاريه والحجار_قيامه_طوالي بتاع الحافله رجع بي دربو_خش شارع كدا في الصحافه ووقف حدي هنا_نزلت مع النزلو_وبسأل الحاصل شنو؟ ولد شاب قال لي كتمت ياعمك_طيارة قرنق حرقت_ببراءه سألتو وقرنق راكب فيها_عاين لي بي طرف عينو وقال لي إنت بتستهبل؟ سكت ومشيت عندي أسئله كتيره مالاقي ليها إجابه_وصلت المحطه_شايف ناس ماشين كداري غرب مقابر المسيحين_قلت الموت مع الجماعه عيد _في نص المقابر والسور علي شمالنا نشوف ليك ناس مظاهره كامله جنوبيين تلبوا السور بعد ماضايقتهم الشرطه في شارع الزلط_أمك كتمت قلت_الناس المتوزر بيهم عملو (يع) قلت ليهم إنتو أجرى مني؟ عملت يافكيك مره ألمس الواطه بأرجلي ومره بي يدي_خشينا المصانع ونحن ماشين علي الازهري_أشوف ليك ناس مايو دافقين جراد بس حريم وشفع وسيخ وحاجات _أمك كتمت قلت_كملت كل المخزون العندي من الادرينال_قرب يقوم لي قرني إستشعار_المخ إتشل_الحيل برد_العيون راحن_بي عناية ربنا ظهرت عربة إحتياطي مركزي_وقفت _ماشين وين ياشباب؟ زول كبير رد ليه_علي الازهري_ركبنا _خشيت البيت وأنا أتساءل في شنو_تاني ماطلعت من البيت إلا الإتنين الجايه_
رايكم شنو في الكتمه دي؟

والله كتمة قوية
انا شايف اثارها
لسه فيك باكية(باقية)

ردودك المسكولات دي_ماتقول سراج بتردد في أي قرار بفعل الكتمه ديك _لكن أديك سر! القلب خف شويه

‏*‏ إتجردلت وفقا للحلا *
‏
يازارعه في دمي الزهول__يامزهله
ويانشوه في الزمن الملول
يابسمة الزول الخجول__يامرحله
إستوفيت شروط الجردله
إتجردلت بيك لابربريه ولا همج__لابلبله
إتجردلت وفقآ للغلا
إتجردلت طوعا للحلا
إتوهدبت رغم الجردله
وبتجردلك
ياكرنفالات الشروق
يابت شمس ترسل شعاعها يفتش الجوه العروق
بتجردلك
يامارقه من بطن الكتب
ياسارحه في الجوف والعصب
ممزوجه بي لهفه وتعب
يادافقه في الشوف العجب
بتجردلك
ياأنثى بي وهج النجوم
كل الحسان غيرك خصوم
ياإنتي أبقي نهاري والليل الكتوم
حتكوني واقع جردله وماكل زكرانا بتدوم
بتجرررررردلك

قلت لنفسي ذات يوم شديد الفلس والدبرسه
بتتثآءب هموم مانوم
وبتمط النعاس جنبك
وبتفكر كروب ماراي
بتتلاشى الحلول منك
طبيعة الدنيا ما ليلين
يكون سقط النهار عنك؟
دوام خدر الهموم فيك نوم
وصحو الفكره زي إنك
ممغنط بالكدر كل يوم
بتتثاءب بدون إحساس
زمان خلو النعاس الناس
تكرج مكره الاضراص
تعضي الفكره في راسك
تفوح وسواس
بتتثاءب قدرتك بس
ويبتسم النعاس بالدس
ولاإتثاءبت قدر النوم
ولاقالت همومك هس
بتتثآءب هموم مانوم
ويتمط النعاس جنبك
‏

ابو النسب
لك الود ختى لايبقى للود متسع
لايسعنى الا ان اقول
حكـــــــــــــتــــووووا بالغـــــــــــــــة

عرفنا الجردله ياعمك
علييييييييييييييك الله اكتب لي عن المرغنه

هو في___ أكتر من الإنت فيها دي؟_السر مشتاقين ياخ_إنت داير ليك درس في الاشواق وتتعلم كيف الناس بتفرق علي بعض_
علي العموم هي إنتفاخ الاوداج وارتخاء الابطين وإنسداد الاذين الايسر
وهي عند علماء النفس هي حالة إنكماش جذئي للشخصيه ينتج عنه إنبعاج البطن وإندعاجها_و هي حالة تكور وجداني ينتج عنها التبول اللا إرادي_

حكمتو بالغه في صورة براءه العسل دي ياأبو الامين_وينك إنت ياشيخ

‏(‏ المجنون السكاني بالحجر)
كنت ماشي بشارع القياده العامه_وأناماشي فجأه أشوف ليك مجنون في نص شارع الزلط مالي يديه حجاره وبجدع في العربات_اي سواق يشوف المجنون يزيد السرعه_أنا عملت فيها الود مامهتم ماشي عادي_مامجنون شنو!
الساعه ال أشوف ليك المجنون جاري علي وشايل نص طوبه_الشارع دا بقا ضيق _أجري؟ لاماأجري_لو جريت حيضربني_أقيف؟ لو وقفت الفلقه بتجي حاره_تطير عيشتي_إتوكلت علي الله وجريت_والمجنون وراي_كتمت لما عارضت لي عربيه_المجنون وصلني_غمضت وراجي الفلقه_الناس الفي العربيه يقولو_لا لا لا_أمك كتمت_فتحت بالراحه لقيت المجنون مادي لي نص الطوبه_وقال لي_ هاك أضرب العربيه دي _
انا أخوك إت_مابضربا كيف تعليمات مجنون_شلت الطوبه وكو في نص البودن_السواق قال لي مافي البودن ياخ_قلت ليه مافي البودن يعني تكون في راسي؟
كتمت وللا لا؟؟

كتمت مره_وأنا في سوق المناقل_أحس بي زول مسك يدي فجأه وبقوه إتلفت للزول المسكني لقيتو عسكري ملامحو جامده وجادي جدا_مرت علي زهني أسئله كتيره_الزول دا مشبهني لمجرم؟ إشاراتي ماشغالات .وأنا زاتي ماشي بي رجلي_الحاصل شنو؟ العسكري قال لي بصرامه_عايزنك في الخدمه الوطنيه__(نحن نكش أي حاجه_الخمور البلديه_النفايات_ستات الشاي_الباعه المتجولين_البهائم للزريبه_الشباب للتجنيد الإجباري).
علي العموم قلت للعسكري بأدب شديد_ياجنابو أنا زميل _قال لي( مع دفره حاره كدا) الكلام دا قولو قدام__
ياجنابو أناعسكري زيك كدا_يعني زميل_
قال لي زميل قدر كدا يازول أمنع الكلام_
في اللحظه دي جا عسكري تاني مندفع_أداني جلده بخرطوش كسين
‏ وقال للعسكري_المعفن دا مالو(نحن لانحترم بعض ولانعرف إساليب التعامل فيمابيننا)
العسكري رد ليه بضحكه_ قال زميل_شوف الفاره ده عليك الله
‏
لماشفت الموضوع جاب جلد وفاره ومعفن_طلعت البطاقه الحيلتي
العسكري مسك البطاقه ومداها لزميله_كدي أقرا كدا(عرفت سبب العله الموضح بين القوسين_نحن بنستوعب في الجنديه الطوال القامه فقط ولانسألهم عن الشهاده الدراسيه)
زميلو قال ليه الزول دا زميل ياخ_معليش يادفعه كان تتكلم ياخ
قلت ليه يافرده كتمت أنا عايز حقي بس
وفضيت ليهم كل اليوم

والله يا سراج كتماتك كترت !! لكن آخوى اتكوهل حبة

ماتخليك طوالى كدا حلاوى!!

مع الاعتزار لخالى عبد الرحمن ود شرفت

ياسراج برد نفيست اخونا السر ووريهو المرغنه !!

عشان بعد شوية يقول ليك اكتب لى عن الرقعنة !!

( عندكم جرايد؟؟ ).

ياخ إنت ياوليد بتختزن حاجات غريبه( عندكم جرايد دي نكتها كيف؟) ياأخوي السر دا من مافارق ابوودعه والناس البقطعو بي كبري الرقع وباعوضة حواشة بشري المدوعله ديك بقا دمو ناقص_
وبعدين ياباشمهندس أتكوهل مع مجنون وللا مظاهرة جنوبيين؟ الله أدانا الكريعات القصار ديل للنعلات بس؟ ياأخوي الكريعات ليهن حوبه_قال أتكوهل_مين!!!

يا سراج بالله وليد دا ما بالغ عديل كدا هسع الزول ميرغني دا خبرو شنو اخر مرة اخد منى جريدة الوان كنت كاتب فيها تلفون زول عزيز لحدى هسع بفتش ليهو

والله يا سراج البركة فى اللياقة وال.... ربى عيالو والتكوهل فى المواقف دى بودى التوج .. التوج حامد؟ هيييييى يكا

والله يا هيثم تلفون زولك العزيز دا ما بتلقاهوا بالساهل .. الا تمشى تفتش بى كوش القسم واعمل حسابك ما يكشحوا فيك ملاح بايت !!

شباب حلوين سلامات ياناس

وليد التلب كتب:

ياسراج برد نفيست اخونا السر ووريهو المرغنه !!

عشان بعد شوية يقول ليك اكتب لى عن الرقعنة !!

( عندكم جرايد؟؟ ).

الرقعنه ههههههه
وبعدين تعال هنا الحلاوين مالم
انتو كنتو بتقولو الحلون ال.... كنتو بتقولو شنو؟؟؟

يا السر انت نسيت انو انا ذااااااتى عندى عرق فى الحلونة !!
طبعا البقولوا كدا ديل اهل حسبو الجوهو دفار من القليز
يباركو ليهو رئاسة الرابطة .. زماااااااااان !!
وايضا صاحبنا ( Fطيقى)

ركشة السر مكتوب عليها نفسي أقطع كبري الرقع؟
ماشي وين يالسر آآآآآ؟

وليد التلب كتب:

يا السر انت نسيت انو انا ذااااااتى عندى عرق فى الحلونة !!
طبعا البقولوا كدا ديل اهل حسبو الجوهو دفار من القليز
يباركو ليهو رئاسة الرابطة .. زماااااااااان !!
وايضا صاحبنا ( Fطيقى)

ما يسمعوك اهل حسبو رئيس الرابطه
لكن صاحبك (F طيقي بسويييييييها) واسال صاحب البوست ..

سراج الدين الفاضل كتب:

ركشة السر مكتوب عليها نفسي أقطع كبري الرقع؟
ماشي وين يالسر آآآآآ؟

ماشي اب دقن ..... هووي ياالسراج