الاحباب الاعزاء
سلام من الله عليكم..ومتعكم الله بالصحة والعافية
..فى المرحلة الابتدائية..
فى كتاب المطالعة..
لا شك انكم تذكرون قصة..
هجم النمر..هجم النمر..
وبد كل هذا الزمن الطويل
يكرر..الاحباب..الخياراب
عادل..وعوض نفس القصة
بسيناريو مختلف..واعنونها
هجم الهلالاب..هجم الهلالاب
تفتح المنتدى تلقى اللون الازرق..وش قدام
لا حولااااااااااااااااااااااااااا
تجى تفتح نافذة جديدة..
تلقى تلاتة الوان كلها مشتقة من الازرق
تمد ليك لسانهل طويييييييييييييل
كانها بتقول ليك وراك..وراك
تجى ترد على موضوع
نفس الون...الازرق
تهرب للصفحة الرئيسية
كلها نفس اللون..
تعصر عينيك عصر من الزغللة
عشان نشوف
تقول خلينا نشوف ود الياس..وعاصم..وعكاشة والجودى
كتبو شنو عشان ننسى شويه
تلاقى الحال ياهو ذاتو الحال
نطير وين يا ابو الطيب
والا البمسكو القلم ما بكتب روحو شقى
بعدين ما قلتو دميقراطية..ياجماعة..
وينها ما شايفنها..
الظاهر جابنها.قلع
ولا انتخابات مزورة برضو فى ابريل
هوى شوفو..ياتدونا حقنا ونصيبنا
زينا زيكم..والا بنرفع قرن
والرهيفة تنقد
نحن ما بنرضى الحقارة
وما بنشتت من المنتدى
مش لو بقى ريحته هلال هلال
حتى لو صبحنا لقينا نفسنا نايمين
جوة لكوندة زرقان..
ولا زريبة العيش
وتبقى فى النعايه
مقبرة عدييييييييييييييل كده
دحين ياجماعة..ماتخلونا نحرش عليكم
ناس عثمان الشريف..والهادى يحيى..وعماد خالد
وبقيه الجماعة
انتو عارفين الناس
فى الميدان بسوو شنو
والله لكن قصة شغالين ساكت يا عوض
تخلو الناس افوتو من المنتدى بهنا
وانت وخالك تلونو بهنا
كل يوم نفتح عيونا من الصباح نقول نشرب الشاى فى المنتدى
تلقى الشاى لونو ازرق
ياعالم فى شاى لونو ازرق
ما نوم يعنى ولا شنو
الظهر تقول نشيل البطيخة دى ناكلها مع اولاد الهدى
تلقى البطيخة من جوة زرقه
لاقتكم بطيخة لونها ازرق
ولا تفاح ازرق
ولا منقة زرقة
ولا برتقال ازرق
ولا قريب
ولا يوسف
الدم..فى المنتدى
الرشاشات
دايرين اقابو لينا ازرق
ويادكتور احمد الخضر
ويا دكنور محمد الطيب
فى الطب فى دم لونو ازرق
انا طالع على ..وبجيكم
وانا وراكم وراكم
الا ان يقضى الله امرا كان مفعولا
ودمتم
زيادة عبد الباقى محمد القضل
ابومحمد

سلام ياابومحمد صباحك زين ود اُمحمد زين

كبف اخبارك
والله احزننا خروج المريخ لانه يلعب باسم السودان
ولعب بطريقة المريخ الافريقي العتيد العنيد
ولكن الكبوة التي سببها له اكرم في تونس طاحت بكل اماله
ويازياده برضو محظوظين لقيتونا مكتفين مابنقدر نطول لساننا عليكم مامعروف بكرة البحصل شنو
الله شافكم من لسان الهلالاب لانهم مامطمنئنين لمستوى الفريق

اقتباس :

نطير وين يا ابو الطيب
والا البمسكو القلم ما بكتب روحو شقى
بعدين ما قلتو دميقراطية..ياجماعة..
وينها ما شايفنها..
الظاهر جابنها.قلع
ولا انتخابات مزورة برضو فى ابريل
هوى شوفو..ياتدونا حقنا ونصيبنا

ياخي مانجرب التزوير هي بقت علينا نحن بس
طيب مالانتخابات الكببيرة انتهت بالتزوير وشفنا ادروب
عمل البدع وبرضو الجماعه في محلهم ههههههههههههه
ياحبيب انت ماحتطير يطير اللون الماعاجبك ده انت تطير وين بي تاريخك وحفظك لكل شارده ووارده عن المنطقة ماشاءالله عليك تربية اجداد مليانين معرفة وحب منطقة فحفظوا كل مايتعلق بها لم نتداخل لكي لانفسد التسلسل
خليك قريب ياحبيب اللون طاير يصحى عوض الله بس نشوف يمكن المحبرة اندفقت منو

ياحبيب ياغالي يااحمر
الاحمر لون الدم والدم بعمل الرجافا والجافا من لغات البرمجه
الاحمر دائما للاشياء المميزه
)مثبت - اعلان - وغيرها ،
دا كلو ما مهم انت الاهم ونحنا
ديموقراطيتنا
ماشعارات
وكان دورتو كلو احمر بنسوي ليك اشان ماتعمل ليك
حركه وتقول داير الانفصال
ابشر يا ابو محمد

الاحباب ابو الطيب ..وعوض الله ود الخالة..ود الاخت
الاعزاء جدا
هذا البوست فتحناه للترويح عن النفس
واتكاءة..فى ظل الرياضة
نتيادل التعليق الخفيف والظريف
واختلاف اللون..لايفسد للود قضية
ونحن فى المنتدى اخوة
نعشق المندى ونهوى
واختلاف الراى فينا يجعل المنتدى اقوى
شكرا الدكتور عمر محمود خالد عاشق المريخ
وعديل ود اللمين
وحو من الفريجاب
اشكركم ان خففتو من من الظهرة شوية
الظهرة الكتيرة ما كويسة
ولا غسلتو المحبرة
وبعدين يا ابو الطيب البخلى عاتو قلت سعاتو
الجماعة ديل مكنكشين فى الشغلة
كنكشة جد
لاكين فراجها فوق
واكرم الهدى سليم
لايشبه المريخ
وانا ضد ان يلعب اكرم فى المريخ من اساسو
وهو ياخوى لو فيهو فايده اتو بتخلو
تشيلو فييرا
وتدونا اكرم
والترجى سواها ولا يخاف عقباه
وسنبى راينا فى المبارة فى وقت لاحق
حتى لا نتهم بالكتابه تحت تاثير الخروج
وانشاء الله تكونو شفتو فيلم
الهلال اسماعلية رايح جايى
هذه النكته طرف الظريف احمد محمد البشير
طبعا احمد موردابى
كان المريخ قد انهزم من هلال بورتسودان
وكنا فى دكان الهادى بشرى نتبادل التعليق
مجموعة كبيرة
علق احمد قال
فى صلاة العشاء بعد هزيمة المريخ
وفى مسجد من المساجد
قراء الامام الفاتحة
وفى القراءة للسورة بعد الفاتحة..قرا
...والنجم اذا هوى...
ودمتم
زيادة عبد الباقى محمد الفضل
ابو محمد

الغالى وزياده ونص ووتلاته الطريف فى الامر انو المريخ ملازماهو التلاته دى طوالى
حتى انو بت عبداللطيف طبعا ابوها مريخابى وجدها على الصادق مريخابى وعمها عمر هلالابى طبعا محفظها الرقم تلاته واقول ليها المريخ ادهو كم تقول ليك تلاته يعنى قبل ماتعرف بابا وماما عرفت تلاته والفضل يعود للمريخ
واصل ماعندك مشكله والله لاحرمنا من توثيقاتك ومن مداخلاتك الطريفه
وعارفين همك هم بلد
موهو داب احمر وازرق
لاكين المثل بقول ليك عينك فى الترجى تطعن فى الاسماعيلى
وانتو الفيكم اتعرفت الله استرنا نحنا الخشامة ديل
مانجى بى خمسه

سلام اخونا زياده
شكرا للنقد الهادف وكما ذكرت
كل الشغل ده في مرحلة تجريبية
واسه مع اخونا عوض قمنا ببعض التعديلات
ليتها ترقى لطموحاتكم
شلنا ليك لون الهلال الممغسك ده ومغسنا اكتر اليوم وبعض التعديلات كتبير الخط
وايضا بعض التعديلات على صفحة البداية
ياريت اي ملاحيظ اخرى
تسلم ياابوذوق رفيع

الحبيب الغالى ابو الطيب
عاد المنتدى الى عهده الاول والعود احمد
عهدناك ملكا للقفشات بين الناس
تمشى بيها..ويمشى هعك حبهم لك اينما ذهبت
ودالخالة
الظهرة الخفيفة دى بتكمل متين
ولا عوض الله لسة محتفظ بالمحبرة
ولا تكون لاماها بتول بت خالتى
انا اقترح ان يتك تكبير عنوان المنتدى
وان تلون الخلفية بلون اخضر
مع اضافة قليل من الاحمر وقليل جدا من الاسود..وقدر من الابض
وان تضاف ايضا لما نحت العنوان كلمات
بعض الكلمات التلا تعبر عن المنتدى..ما يتلق بالامور
الرياضية والسياسية..
وان تكون العبارة التى تحمل الشعار قوية وبخط اوضح..
داخل المنتديات
يتم اختيار الالوان التى تتناسب مع نوع المنتدى
فمنتدى الافراح..يحتاج لالوان يكثر فيها اللون الاحمر
اظن دى ما دايرة ليها هلالاب ومريخاب
ععنى الوان الورود..وانتو عارفنها
ولا حولوها على صديق الماحى
عايش وسط الناس البعرفو الحاجات دى
ولا ود الياس وطبعا..
يحتفنا باخر ما راه فى اوروبا..
وزى المنتدى الخاص بالتعازى والاحزان فلون الحزن معروف
وكذلك منتدى الشعر
ديل ناس الاحلام الجميله
لازم تختو ليهم الوان تفتح النفس
الوان فرايحية
حتى تصبح مصدر الهام للابداع
ودمتم
زيادة عبد الباقى محمد الفضل
ابو محمد

الاخ الفاضل زيادة
السلام عليكم
عهدناك تناقش القضايا الفكرية الكبرى ومشاكل البلد وهمومها دعك من الألوان ومريخ هلال فالقضية أكبر من ذلك ماذا قدم المريخ والهلال أنهما أصفار كبرى ,,, مريخ هلال دي دعها للجماعة الجالسين الان علي الرصيف وفي أكشاك الشاى في سوق الهدى وكن ملهما للفكر والثقافة والسياسة في المندى وأنشر هموم ومشاكل الهدي عبر المنتدى وناقشوا الحلول وقدمو المقترحات بالفكر والجهد والمال كما نعشم من الأعضاء الخروج من قيود التبريكات والتهاني وكل حد يكتب مساهمة ينتظر الرد والشكر من الآخرين ,, الهدى تناديكم ,,, الاطفال والطلاب الجالسون يفترشون الأرض ينتظرون دعمكم ,, المسجد الكبير ممزق الفرش يتظر من يكسو أرضيته بفرش جميل ,, المدارس عارية الأسور تحتاج من يسترها الطريق الوعر الرابط مع الخط القومي يحتاج من يكمله ,,المستشفي محاصر بجيوش الباعوض والحشائش تكسو الممرات الهدى تعانى وتنتحب تشكو ظلم ذوي القربى وهجر الحبيب وقسوة الزمان وتفرق الأبناء ,, أما نكون قادرين علي التغيير وحمل مشاعل النور في قريتنا الغناء نحمل البسلم ,نداوى جراحات الأهل , نجلس الأطفال والطلاب علي مقاعد المستقبل نرعهم صغارا حتي يبرونا كبارانكسو جدران المدارس بالأمل ونبعث منها الثقافة والفكر أما أن نكون هكذا أو نكون كما قال الشاعر
دع المكارم ولا ترحل لبغيتها
فأقعد فأنك انت الطاعم الكاسى
ولك الود

من المستحيل يا هيثم ان يكون لون المنتدي احمر ولا اصفر وانت مسمي علي البرنس وخايفين من ناس مهند وكاريكا لو شافو اللون الاحمرولا الاصفر يقومو يضربوهو لينا بفايروس محمد كمال ما يسبتو