الشعيرية ذالكم الكائن العجيب

انها وجبة خفيفة وسهلة التحضير .. قليل من الماء والزيت والسكر وقليل من الصبر تصبح امام عشاء معتبر !!

وهى تاخذ وضعيات مختلفة فى المائدة السودانية .. فأحيانا تكون ثانوية كما فى الفطور بجوار التقلية وتارة اساسية منفرة لوحدها كما فى

العشاء وحينها يلازمها شاى اللبن !! وهى كثيرا ما تفك الحيرة وتمرق ست البيت من الزنقات وذلك حينما يأتى ضيف متأخر منتصف الليل .. وكذلك تقدم

وجبة لود الطهور والذى تكون سقفا لامانيه الغذائية .. وايضا من لدغته عقرب تقدم له الشعيرية المحمرة والتى فى كثير من الاحيان تكون من

نصيب المرافق .. وزمان كانت كانت اساسية فى حفلات الشاى والبارتهات واو مايسمونه حينها بالشركيت!! قبل ان تزاحمها الزلابية او اللقيمات المخرمة

.. وللشعيرية طرائف كثيرة .. واذكر ذات مرة فى منزل اخونا كباشى وكنا جايين من مشوار مهويين .. والناس نايمين ذهب كباشى الى الدكان واتى بأكياس

الشعيرية ولكنه نسى الزيت فلما رجع الدكان وجدة مغلق .. فذهب البيت خلسة وبدأ يفتش وماهى إلا دقائق واتانا بصحن كبير ملئ بالشعيرية الرهيبة

والتى كدنا ان نلتهمها قبل ان نغسل ايادينا .. وقبل ان نسمى سمعنا صوت حاجة بتول تنادى ياكباشى : الشعيرية دى عملتها بى شنو؟؟

الزيت الفى القزازة الخضراء ؟؟ ايوه !! ياولدى دا ما زيت دى ريحة !! ههههههههههها

والشعيرية برغم مما تقدمه من جلائل الاعمال الا انها قد جار عليها الزمن والناس رموها بهتانا بكثيرا من البلاوى ..

فمثلا حارس المرمى الذى لايجيد حراسة مرماه يقولوا ليك دا حارس شعيرية ساى !! وشواكيش الخطوبة يقولوا ليك فلان دا اكلوه الشعيرية !!

فهل هى فعلا مفترية ام مفترى عليها ؟؟ وافيدونا وانصفوا هذه المسكينة !!

وليد ياطاعم إنت ..
هى مفترى عليها .. وجبة حبيبة مسكينة .. تفك الزنقة وتكرم ضيف الهجعة
الشعيرية والسكسكانية والمكرونة .. من الوجبات التى لها حضور مميز في المأدبة السودانية
وهي طبعا مكملة للسفرة .. وتختلف اشكال تحضيرها .. ولها في النفوس وقع طيب
يعني انتو اكلتوها بالريحة .. ههههههها

ماتنسي ياوليد الرز .. الرز عندنا زمان كان بسوه ملاح .. يقول ليك الليلة الغداء بي ملاح رز
دا اكلتوا ؟

يا طارق مشكور على الطله البهية وإنصاف الشعيرية !!

وبرضوا تقول لى قاشيت .. ياخ انت من زمن ملاح الرز !!

والله زمان ملاح الرز دا كان سيد المائدة وخصوصا فى السمايات !!

العزيز و الغالي وليد
اليوم شــــــــــــــــاهدنـــــــــــــــــــا
الشــــــــــــــــــــعـــــــــــــــريــــــــــــة الأصلية وفعلا كم هــــــــــــــــــي شــــــــــــــــعـــــــــريــــــــــــــــة

وبرجع ليك بعد الحج بأذن الله

تاني ياوليد الشعيرية
سمعنا بي شعيرية المناقل لكن ماسمعنا بشعيرية طابت ؟
ها ها ها هاااااااااااي

احكي براحتك لكن النطلع المنتدى العام عشان تقطع بالحلال
انت قاعد للمحن؟

هووووووووووى يا الكبش

هسى فى زول جاب سيرة طابت ؟؟ ما زمان الشمس غابت !!

بالمناسبة دى الشعيرية عليها ضرائب ؟؟

انت يا وليد الأكلت ملاح الرز في السمايات دا .. شكلنا كدا حنقول ليك إنت يا عمو

انت يا طارق طوالى كدا المؤمن صديق ؟؟

ياخ حكوا لينا قالوا فى السمايات زماااااااان

الرز بعملوه ملاح ههههههههههه

قالوا في العريجه لما تجي تخطب
لو جابو ليك شعيريه معناها مادايرنك

طبعا يالسر لو كانت الشعيرية بيضا ساى ممكن تاكل بى نص قلب لكن لو كانت محمرة اتنفض وقوم سااااى مع السلامة ما تقولا

يا محمد طيب السر دا جابو ليهو حاجات اخطر من الشعيرية لكن قلنا ما ننكأ ليهو جراحاتو ساى خليهو فى شعيريتو دى

يعني شعيريتك دي لو كانت اجنده كان عملت شنو ؟؟

ياودالطيب
الشمار ليك شنو يا اخوي

وليد التلب كتب:

قلنا ما ننكأ ليهو جراحاتو ساى خليهو فى شعيريتو دى

يا ســـر مكتوم فى جوف اصداف

حليل الاجــندة وايام الاجـــندة !! وبتاعت القسم المخرمــــة ديك ( قرمش وانتعش ) .. والبلح الممسح بالرز !!

وليد التلب كتب:

يا ســـر مكتوم فى جوف اصداف

حليل الاجــندة وايام الاجـــندة !! وبتاعت القسم المخرمــــة ديك ( قرمش وانتعش ) .. والبلح الممسح بالرز !!

والعولمه ياعم ما تنسى

وليد تحياتي لك واسمح لي بتحية ودالدسوقي والله شعيريتك ماهينة الجابت لينا السر _ لكن بيني وبينك بعد الاستفتاء الغبشه محمداها...

الاخ مضوى نحييك على المرور الجميل !!

وبركة الدخلت يدك فى الشعيرية .. تلقاك جايى من المدرسة مهوى !!

هى فعلا جابت السر .. لكن بعد الغيبة الطويلة دى جانا بى ركشة

وغالبو يقطع الكبرى !!

ههههههههه

ياوليد انت حضرت زمن
الشعرية فى كيس الورق
وكان لونه اخضر طبعا
اكيد جدك طارق حاضرو

يا صلاح يا أخي حمدا لله على السلامة
شوق كتير .. زي الريحة في الفتيل ..

وطبعا وليد .. دا الحاضر الشيعيرية الفي كيس الورق اللونو اخضر
وعلى شرط يكون قاعد في رف الدكان لمن مليان غبار .. والبعرف الموص دا شكلو اكبر مننا نحن ذاتو .. تذكرت قفشة عن واحد قريب ناس الشفيع عندو ولدو اسمو الكريل .. قالو ليهو انت يا حدى الكريل ولدك دا عمرو كم ؟ يقول ليهم : الكريل الله ايقطعوا دا أنا من ماقمتا لقيتو ...

ود الشيخ مبروك وبخيت علينا الطلــــــــة

والشعيرية ام كيسا اخضر دى انا ما حضرتها .. لكن قطع شك دى
حقت ناس جدو طارق ابو دفعتنا مؤمن !!
وطبعا جدك ابو الطا ...
من الناس الكانو بحبو بى حلاوة لبان ...!! هههههههههه

طارق مامون كتب:

يا صلاح يا أخي حمدا لله على السلامة
شوق كتير .. زي الريحة في الفتيل ..

وطبعا وليد .. دا الحاضر الشيعيرية الفي كيس الورق اللونو اخضر
وعلى شرط يكون قاعد في رف الدكان لمن مليان غبار .. والبعرف الموص دا شكلو اكبر مننا نحن ذاتو .. تذكرت قفشة عن واحد قريب ناس الشفيع عندو ولدو اسمو الكريل .. قالو ليهو انت يا حدى الكريل ولدك دا عمرو كم ؟ يقول ليهم : الكريل الله ايقطعوا دا أنا من ماقمتا لقيتو ...

طارق سلامـــــــــــــــات

لكن يا صلاح الزول دا ما مشتاق ولا حاجة !! ... لانو الفتيل القاصدو دا يمكن يكون فتيل ميسو...!!

وبعدين العبارة دى انا سمعتها من جدى زماااااااااااان !! .... ويقولوا ليك شوق بحر ودموع مطر والحاجات الموية دى !!

ياخى الزول دا من زمن الساعة زى أخواتا !!

والموص يا طارق انا تعاملت معاه بحسن نية حسب المعرفة السنية لكن خايفك تكون قاصد ( البقنيـــــــــــــــــة) ..!!

هههههههههاى ههههههههههههههاى

اخ وليد هى جانية ومجنى عليها

الاخ المعز ود حموده

نشكرك على المرور وهى فى كل الاحوال مجنى عليها ولا اعتقد انها جانية بدليل انها تنقذ من ورطة وتشبع من جوعة وكثير ما يسخر منها وى صامتة !!

شعيرية وليد الحق نقوم نعملها ماركة مسجلة
ونعمل ليها دعاية
اتصور معاي شكل الدعاية
اكون كيف٠
نجيب اتنين ونعمل في السناريو بتاع
الدعاية قصة غرام ٠٠٠٠؟
اها تم الباقي

,,,,,عووضى يا ملكا ,,,,,

رأيك شنو ان يتم التصوير فى مزرعة القرع ويتم حشد كبير من الشعراء
لعمل اشعار الدعاية
والبرنامج تحت شعار { اضرب الشعيرية بال( قرع ) وتمشى فى كوبرى (الرقع ) }
هههههههههههههههههههههههههه

مافيش مانع !
بس انت مصر علي الشعيرية
قاصد تقلب المواجع علي ٠٠٠؟
وبعدين ركشة السر دي كان قالت
نفسي اقطع كبري الرقع تبقي بالغت

معزوم ملاح شعيرية

عوض خيارى كتب:

معزوم ملاح شعيرية

ما عندك مشكلة بس كتر الصلصة !!
وما تقول لى مشيت السوق وما لقيت بطيخة ,, عشان كدا نفقش ليك قرعة !!