لنا نحن السودانيين طقوس وعادات .. منها ماهو جميل ومحمود وعكسها تماما .. ماهو قبيح ومزموم ..
فمثلا كانت طقوس الطهور ( الختان للذكور) تقام لها الولائم وتوزع لها رقاع الدعوة .. وتبدأ التجهيزات مبكرا من تنجيد للمراتب وتلحيم للسراير أو سياجة العناقريب .. وكل البيت في حركة دؤوبة . تحس فيها بأحساس جميل ينتابك وأنت ترى هذه الأستعدادات في البيوت لهذه المناسبة الكبيرة . يعنى ود الطهور كأنه عريس ويكون له وزيرا .. يجلس بجواره ويلازمه طيلة الفترة التي يكون فيها في سرير الطهور .. وايضا يوضع البرش الأحمر على سرير ود الطهور .. ويكون له من الغذاء .. والطعام أشياء مخصصة منها الشوربة وكذلك الشيعيرية باللبن .
وما لا أنساه أبدا وهو راسخ في الذاكرة ونحن صغار حفر حفرة وهي الشرك يطلق عليها ( ود اب تشة ) وهي تحفر أمام الباب حتي يقع فيها القادم لتقديم المباركة لود الطهور .. ومقابل ذلك تأخذ منه العادة .. بأن يعطي ود الطهور ( أو العريس الصغير ) حفنة دراهم مفرحة طبعا .. في ذلك الوقت الجميل .. وأيضا في المساء يتجمع الصغار في مجموعات للهجوم على البهائم(أكرم الله السامعين ) وهي قادمة عادية من السرحة وذلك لحلبها وعمل مايسمى بالقاشيت ..لود الطهور ، وطعمه مازلت أتذوقه حتى هذه اللحظة .
أما الآن وبعد الزحف الحضاري والمدني أختفت تلك الطقوس وإندثرت بعد أن اضحت الطهرة أو الختان تتم في الأسبوع الأول من الولادة .

الحبوب الأصيل أبو وضاح
بارك الله فيك
يا لها من عادات جميلة ونبيلة
وكان ود الطهور يلغب بالعريس
والطقوس كما أسلفت حبيبي هي طقوس عرس عديل
والحنة والهلال والضريرة
والجرتق والفرحة والهيلمانة والوليمة
وكسوة العريس الجلابية الجديدة والعراقي الما خمج
وطقس جميل أظنك نسيتو في الزحمة
وهو شحدت العادة
الحوامة لكل البيوت
والإكرام من كل الناس
شكراً لك يا ود البشرى

أبو هدى

الأخ الحبيب علاء الدين عبدالرؤوف السني
عشرة الزمن الأصيل .. الزمن الجميل ..
نسيت العراقي ..
فعلا وتلبسوا بي زيت مكنتــوا.. وأيضا كل بقية التفاصيل التي ذكرتها في ردك الجميل ..
هذه الأشياء مرت بالخاطر ..
طبعا غالبيتها . إندثرت .. وتلاشت .

لك التحية على مرورك الجميل ..

مسئول من الخير : وين حبيبنا وأخونا الصديق ؟

لك التحية ابووضاح دوما تنكأ الجراح،موضوع الختان للذكور من السنة ويعتبر من فضائل المجتمع السودانى ولكنه يذكرنى بما فعله نفس مجتمع الفضيلة فى حواء بختانها فرعونيا وبقدر ما مارس الفضيلة مع الذكور مارس الجريمة والبدعة مع الاناث بدعوى المحافظة على الشرف،فظلت حواء تعانى نفسيا وجسديا مدى الحياة،ارجو ان تفرد شيئا من العزاء لتلك المكلومة عسى ولعل ان ينتفع جيل الغد بحياة انسانية افضل، ومن بوستك الجميل هذا نناشد الجميع بعدم ختان البنات وانا معكم فالحمد لله لى ثلاث من البنات لم ولن يتعرضن لهذا الجرم الفادح تضامنا مع حواء السودان

الأخ/ طارق مأمون

جزاك الله خيرا

مواضيعك مميَّزة
ودائماً تربط الماضي بالحاضر
مشكور على موضوعك _ ود أب تشة - ود الطهور الفتح لينا باب
شقائق الرجال بواسطة تعليق أخونا ذو الطرح المميز المهندس محمد احمد ألياس بجد موضوع للنقاش
ونختم بنكته
الولد قال لأَبيه-(أبوه)- عضو .. ما قاعدين نسمع منك إقتراح ولا تثنية ولاصوتك ما سمعناهو الأب العضو قال :لأبنه إنتو ما قاعدين تسمعوالصفقة الولد رد قائلاً: آي نعم بنسمعها الوالد .... طيِّب البنصفق ديل ما نحنا !!!!
نود من الجميع التعليق بما يفيد المجتمع ونخرج بتوصيات قابلة للتطبيق
ودمتم
أبو هالة

طارق ياحبيب
نسيت حاجة مهمة
عاين فوق عاين فوق
شوف الحمامة فى السقف
وتلقى نفسك ملان دم ومطهر وراجل

الحبيب ابو زينب
لك التحية .. يارائع يا أنيق
ختان الإناث هذه العادة (الفرعونية )الضارة القبيحة المزمومة ندعو الجميع الى تركها ومحاربتها بشتى انواع السبل . كما ونطلب من الجميع ترك الإناث على ماخلقهن الله عليه دون تشويه وتدخل منا نحن بني البشر . وأيضا لى واحدة زى بناتك .
وأنا هنا أناشد جميع الأخوة في المنتدى .. على العمل كل في مايخصه بمحاربة هذه العادة وعدم ختان الأناث سوى البنت أو الأخت أو بنت الأخت .وبالتالي جميع الأناث في المجتمع .
أجدد لك التحية على مداخلاتك الهادفة من أجل المصلحة العامة .

ابو وضاح

الأخ محمد نور محمد أحمد
لك التحية . ـ
اشكرك على المرور الرائع .. وشقائق الرجال معنا أين ماحللنا .
الرجل ذكر والمرأة أنثي ( من جدال )أخونا علاء الدين
في مكان آخر من هذا المنتدى .

لك التحية على مداخلتك القيمة .
ابو وضاح

صديق الماحي .. يالذيذ

لك التحية على المرور ..
حاليا أصبح لابد من أخذ عينة من الدم لمعرفة نسبة التخثر والتجمد قبل الطهارة .

سلام عزيزي طارق
شكلو كدة يادااااااااااب البنج فكة اتذكرتها من وين دي
ولا يكون عندك ناس طالبهم عادة وقلت دي فرصة تنبهم بي طريقة ديبلوماسية

خروج
وردت كلمة ختان البنات وعلى حسب علمي تستعمل للاولاد
اما البنات فتستعمل كلمة خفاض ومنها الخفاض الفرعوني
والله غايتو كان كلامي ده طلع غلط الا اطلع انا
انت وودالياس حتسلوا اقلامكم قدر ده

الحبيب ابو الطيب
لك التحية على مرورك الرائع الجميل .. طبعا إنت من الجماعة الهم طالبني أنا عادة .. وسوف نردها ليك في اولادك بعد مانقابلكم إنشاء الله .
أما بخصوص خروجك نوضح الآتي:
كلامك في محلوا وماتشمي بعيد،
تستخدم ختان للذكور .
وللإناث تستخدم خفاض وختان الأثنين معا. والله أعلم
وبعد دا بخليك لي ود الياس .

ادونا العادة .. العادة جدادة !!

الاخ ابو وضاح بعد ما خلاااااص سحبنا كلمة جدو وعمو داير ترجعنا تانى مالك؟؟ .. والله انها لعادات جميلة وتزكرنا بمجتمع جميل

الأخ الحبيب وليد

لك التحية
يا أخي والله الموضوع دا قديم شديد من بدايات المنتدى لمن نسيناه بتنكت مالك .. في المواضيع القديمة ..
فعلا عادة جميلة من العادات التى إندثرت بفعل التمدد الحضاري .. وطبعا كثير من الناس من الجيل الحالي مابعرفوها