زمان اثاث البيوت .. في غاية البساطة والجمال .. ياهو العناقريب الكبيرة .. والمراتب .. وأحيانا المراتب دي ذاتها الناس بتزهد من النوم والرقاد فيها .. لمن يجي زولا ضيف عزيز كدا .. حتى تفرش .. والفضية للعدة .ضرورية جدا. . حياة بسيطة سهلة مافيها أي عقد .. والفضية دي مليانة عدة وصواني وكبابي وصحون وحاجات كدا إلا لمن يكون في بوش ( فرح ) أو مأتم حتى ينزلوها من الفضية .. ومالا أنساه أبدا تعليق الصور في الفضية .. دا صورتو مخنفس .. وداك صورتو مع شلة .. وديل اطفال حلوين .. وصورتو في الطهور لابس عراقي وسبحة .. وديل عروس وعروسة .. بفستان الفرح .. ولما يجوكم زيارة أحد الأقارب والأهل .. أول حاجة يعاينوا في الصور المعلقة في الفضية .. هي دا منو .. ماشاء الله بقي كبير .. ودا منو حلاتو .. ولدوه متين .. والله إلا تدوني الصورة دي اشيلها تذكار .. وطبعا ماننسى صورة الفنانين الكبار .. دا عثمان حسين .. وداك وردي .. وداك النعام آدم .. وأنا كنت في ذلك الزمن معجب بالعندليب الأسمر ( زيدان ابراهيم ) .. وسافرت للخرطوم واشريت صورتو وجبتها البيت .. وعلقتها في الفضية .. وأمضت فترة طويلة معلقة .. وكلو ما يجي زول داخل يعلق .. ويطالبنا بأن نعطيه الصورة ونحن من حبنا لزيدان نرفض .. في يوم من الأيام .. واحدة من البنات نست ليها دهن كان في صحن ختوه في الفضية .. وماتقع في الزيت دا إلا صورة زيدان .. ويمتلي بالزيت .. وتتغير ملامحو ..
إهداء الصور للتذكار .. عندنا عادة .. وخصوصا صور المناسبات السعيدة .. (طهور .. خطوبة .. زواج ) .. ومابهدوا ليهو صورة من الزواج دا يزعل زعل شديد .. ويقول وين حقنا .. رحم الله تلك الأيام بعد تغير الحياة .. وأصبح للصور أطار ( برواز ) .. وتم تحويلها من الفضية .. بعد أن تغير أثاث الناس من فضية الى سائد بورد .. وحافلة .. وحاجات عصرية أخر

عائد .........عائد........ يا طارق !!

والله رسمت لينا صورة جميلة و مختزنة فى الزاكرة .. زى كأنو الواحد واقف فى نص الاوضة ويتلفت .. العناقريب مفروشة والواطة مرشوشة ..!!
والمراتب الفائضة مرصوصة فى تربيزة فى الكورنة .. والفضية مليانة صينى والحلل والصوانى فوووق ومنقوش عليها (سعاد بت النعيم)!!
لكن يا طارق شكلك كدا اكلتنا فى كم سنة كدا .. !! لانو الفضية دى ظهرت فى زمننا نحن .. انتو يخيل لى حضرتو زمن السحارة وتربيزة العدة وعنقريب ود ابرخيصة ؟؟
لكن زيدان دا ماااااااااا طلعتوا زيتــــــــــو ..... !!

ذكرتنا أخونا طارق عندنا زمان بيت فى الكارناب مش الفضيه بس حتى الاربعة درقات ملانه صور لما تدخل البيت تبدأ تعاين والله كأنه إستديو رقبتك توجعك من التلفت . ذكرتنا ماضى جميل جزاك الله خير كمان المراتب إرصوها فوق طربيزة النص والشفع الصغار سرير من قد فوقو برش إشيل عشرين , تشكرررررر

الحبيب وليد
لك التحية على المرور .. والله نحن السحارة دي ما حضرناها حكوها لينا .. ولقينا واحدة قديمة مريمة ونعرف عنقريب القــد لكن عنقريب ود ابو رخيصة دا .. ماسمعنا بيهو .. إنت شكلك كدا الماكلنا بسنين عددا ..

الشيخ اسامة
لك التحية على المرور .. وشكرا للإضافة .. وهذه من الأشياء التى تختزلها الذاكرة في زمن بعيد .. ويا لها من أيام .. لك التحية ياحبيب