الشاعر الكبير ود الرضى والذى اجاد فى تتبع محبوبته او ( الشايله قليبو) !! وارسى لنا ادبا جغرافيا جما
وجعل من وعثاء السفر رحلة نيلية مشوقة
تتبع مسيرة البابور من الاسكلة فى قلب دولة الشمال وحتى الرجاف اقصى جنوب دولة الجنوب !!
ترى هل يكون مصير هذا القصيدة الجميلة وهذا الادب الجميل مصير الجنوب ؟؟
وهل تتدخل لجان ترسيم الحدود وتمنع التغنى بهذه القصيدة .. حتى :
صباح الخير على ام نفلين.......أهني البيها محتفلين
سيد الحسن رب اللين.......شرف كوستى والجبلين


وهذا نص الاغنيه

من الاسكلا وحلّ...... قام من البلد ولّى
دمعي للثياب بلّ
***
بى داهى العذاب حلّ....وبى تذكاره بتسلى
قلبي الذاب واختلّ.....وين بدر التمام هلّ
***
صفر ودع الوابور......حاجزين قمره أتنين دور
الوابور مرّ بالمجرور....شال ظبيا سكونو خدور
***
جبل أوليا حبيبي غشا.....وحصل في القطينة عشا
يا قلبي الطفش وفشا.......الما آليته......... ينكفشا
***
حل زى الصقر خوى......بالبدر الدويم ضوّى
عاد لا حوله لا قوّه......حبيبي الليله في الكوه
***
صباح الخير على ام نفلين.......أهني البيها محتفلين
سيد الحسن رب اللين.......شرف كوستى والجبلين
***
هنيئا حان وقت زهاك.........الرنك احتفل ببهاك
وين الليله يا النشهاك......يا ليت كنت في جلهاك
***
يا كاكا الحبيب طلاك......بعده الزاد نفوسنا هلاك
يا ملوط حليل نزلاك........يازمن الفراق نسلاك
***
بقدومك كدوك أصبح.......سوقو من الكساد ارباح
انا من نياحى صرت ابح........كأنى فى مبرك المذباح
***
زاد من بعدك الانكال......قلبى البالهموم..... انكال
شاطري العاصمه يا ملكال.....توفيقيه صبرى انا كال
***
شامبى أضحى بيك مسرور.....بعد المنقلا يا سرور
يا جوبا حي أنا المضرور....بعده النوم بقى لي ضرور
***
من دا الهم ما بنجى.........حبيبي الليله في تونجا
يا خالق الخلق تنجا.......تركاكا..... حلت العنجا
***
سلام متنامى ما غبّ.....ما مرّ النسيم صبّ
يرضى ال للعفاف ربى....ويخدم كامل الرتبا
***
صب يا دمعي لا تكون جاف......وياقلبى البقيت رجاف
البدر الخفا....... الانجاف.....اليوم شرف...... الرجاف

الأخ الحبيب وليد التلب
صباح الخير على أم نفلين ... أهنى البيها محتفلين

لك التحية . وأنت تنقلنا في هذه الرحلة الخالدة في الوجدان من الأسكلة الى الرجاف .. التى رسمها وقاد دفتها الشاعر الكبير ( ود الرضى ) .. ويا البدر الخفا الإنجاف .. اليوم شرف الرجاف ..
وهذه الرحلة ستظل خالدة راسخة في الوجدان والذاكرة لا يفصلها تقرير مصير ولا تحدها حدود ..
لك التحية ياحبيب .

حياك الله يا ود مامون

ونسأل الله الخير لهذه البلد و ان تمر سحابات الايام القادمات بسلام وامن وتمطر استفتاءا مرضى النتائج
وتظل هذه القصيدة واخواتها من الرائعات , محفورة فى وجدان كل من شرب من هذا النيل الخالد من حلفا حتى الرجاف ..!!

نتمناالوحدة لهذةالطون المترامي الاطراف ومتعددالثقافات
ويكتب الشعراء فيالخضراوالجال عن الابنوس والنخيل والنيل الجميل
لاكين ياوليد لو تم الانفصال موية النيل تبقة بالوايت

كيف اخبارك مــعز مساك الله بالخير

لعلك بصحة وعافية

نسأل الله ان يمن علينا بنعمة الامن والسلام والاستقرار

وما اجمل النيل ..!! وما احلى مويتو .. !!

ولا نجد فى الساحة اليوم ما يبشر بالوحدة وما إلغاء الدورة المدرسية إلا اكبر دليل على ذلك

ولو قدر لهم امتلاك النيل لغبرو مساره ومنعوا كل وايت !!