لاشك ان كان واخواتها وإن واخواتها قد لعبن دورا كبيرا فى لغة العرب وفعلن الافاعيل فى المبتدأ

والخبر من نصب واحتيال ورفع احيانا فى عربية النحو ...

أجى واخواتها ايضا لها الدور البارز فى العامية السودانية وهى من اللوازم النسائية الخالصة

وهى لاتعترف بالمبتدأ والخبر اصلا حتى تنصبه او تتبله عليه وهى ان وجدت مبتدأ او خبر اعتقد

انها سوف تعفصة عفصا .. والخبر حتى يضمن سلامته عندهن غير اسمه إلى شمار .. واخوات أجى كل له

دوره عند النساء .. واخوات أجى هن ( سجمى , كر على , ووب على , ............)

وأجى حرف استغراب واحيانا تكون مصحوبة بكلمة آبنات امى لتصبح (أجى آبنات امى) وقد حاول

بعض الحناكيش تبديها بكلمة ( أصلووووو ) لكنها لم تصمد طويلا ..

سجمى حرف اندهاش ولكنها تؤازر كرعلى حينما تتكرر (سجمى سجمى سجمى ) !!

كر على و ووب على حروف ولولة واستغاثة .. وهذه الكلمات تجدها حتى عند البنات الصغار وهى

تجرى فى لسانهن مجرى الدم ..

والموضوع متروك للاضافة والتعليق ..

الاخ وليد فعلا الموضوع ظريف وطريف ولمزيد من المعلومات حول هذا الموضوع راجع كتاب العامية في السودان لعون الشريف قاسم و لغة الشارع السوداني د عباس محجوب وزمان جريدة قلب الشارع فيها المزيد من العبارات الدارجة ويمكنك الاستفادة من الاخ ابو شيبة حيث احد كتابها
ولك ودي

مهندس/ وليد التلب
احيك وانت تبحر بنا
فى بحور العامية النسائة
السودانية القحة( بكسر القاف )
وتجود علينا من سفر ذاكرتك العامرة(بكسر السين )
ايام بصات الثورة بالنص وزحمة المواصلات
كنا راكبين انا وبابكر امام البص وكان وقت الزروة
والبص ولا نفس وفجاءة سمعناصوت نسائى (ابلى انا 000
ابالى انا ) يا بابكر دى بتقول فى شنو ؟
قال لى دى حبشية عفصوها وبتقول ووب على انا

الاخ صلاح الشيخ تحياتى وعبرك احى الاخ بابكر امام

يعنى (ابالى انا)حبشى تعادل (ووب على)سودانى وتعادل

(يالهوى يالهوى)بالمصرى ..فى البورصة الحريمى

اين انت ايها المتبحر في العامية النسائية .
منتظرينك تخش في (بري) واخواتها
(ابره واستبره).
ودائما تستخدم للدفاع اذا اتهمت احداهن بشى .

عوض ياعوض يا حرف الاس ..

اضافة حلوة ومعزره ل( ابرة واستبرة وبرى) وفعلا ديل

حروف دفاع واستنكار ومكر .. وساعة يكون فى كضبة

بكون معاها نطيط عيون

يا وليد وكل الاخوه المتداخلين- سلام
ممكن القائمه تطول ونسميها مفردات نسائيه سودانيه خالصه
ومثال ذلك عندما تعزم احداهما الاخري وتصر تلك علي عدم الاستحابه تقول ليها الكطاعه(اعتقد المقاطعه) فترد المعزومه الكطاعه خاته ليها مطرقا خدرا (ويا وليد ممكن تفسرلينا لماذا مطرقا خدرا ومش سوط عنج او بسطونه او مسدس)

وااااااااااااااو

موضوع متميز فى طرحه ياوليد

والكلمات الفوق دى دخلية بتاعت حناكيش

من خلال هذه المساحة دايرينك تبقى صنديد

وتتحزم .. وتتلزم امام تغول المفردات الغريبة الزى الفوق دى

واصلو مامكن ..

الاستاذ صديق تحياتى

نأسف للانقطاعة الخفيفة وتأخر الرد .. خصمتك بالنبى والكطاعة من المتداولات بكثرة .. ولكن اعتقد ان الكطاعة انزوت وشح استخدامها عند بنات اليومين ديل.. والمطرق الخدرا عشان الكطاعة تقطعها بسهولة بدلا من ان تقع فى المعزومة .. والمطرق الخدرا ممكن تكون عنكوليبة !!

الاخ ابو مزن سلامات ..

وااااو حرف اندهاش وهى كلمة اجنبية وتعادل عندنا

الكترااااابل .. والكتحيييبل !!

ياوليد إنت عارف أنا ماعرفتك بتاع خفشات وسرعة بديهه وخفة دم إلابعد إتطلاعي علي مساهماتك في المنتدى_كنت قايلك زول وجدي ساي_بمناسبة وجدي _ياخ الزول دا جيبو لينا هو العرس بعمل كدا؟

سراج يا فرقة الكفاح !!

والله ضحكتنى شديد بحكاية انا كنت قايلك وجدى .. ياخ الزول دا مما عرس شايل هم السماية .. عشان كدا بعد يجى من الدوام الرسمى بتاع الشغل .. يطلع بالركشة

والله السمايه حاره_تستحق الجري_تحياتنا ليه كتيره

يا سراج , وليد
تحياتي أقترح تخفيفا للتكاليف إدراج بند حق السماية مع أول خطوات الزواج يعنى تدفع مهر , شيلة , شبكة , شنطة , فطور أم العروس وأخيرا حق السماية
بس مافى زول يقول آجي آجى دا شنو دا
تحياتى

ياهيثم اجى اجى دى قايلنها قايلنها اخير ليك تجى

تغمض وتخش .. بعدين حق السماية الخروف ليهو دافع !!

يا حبيب وليد لك التحية
اخوك جاي و مغمض كمان بس فى اخر لحظة أهل العروس جابوا ليهم شروط تانية قالوا العرس فى صالة المعلم - دى ب 25 مليون - دعوة كاميرا أفراح أفراح و قناة النيل الازرق دى ب 12 مليون - أها عمك فتح و قلت ليهم و الله ناس أمانة جدة متوقعين سيول و امطار عشان كدا عطلوا الاجازات لحين ميسرة , وهسع محتاج لنيفاشا تانية , وياريت لو بقت على حق السماية بس
عشان كدا الشاف المحلي في عطبرة ما كضب
تحياتي

لحين ميسرة؟ .. ميسرة بدرالديييين ؟ هييييي يكا!!

يااخوى خليك فى المحلى وبدل صالة المعلم اعملها

فى صالة ودابراس .. وبدل افراح افراح اعزم

الفرطيقى والله الحفلة للصباح مافى زول اعمل شغب ..

وبعدين كان جات مطرة فى جدة عليك الله جيب ود طارق

مامون صاحب النظارة العجيبة! خليهو يشبع لعب فى

الطين

و الله يا وليد مطر جدة السنة الفاتت قاعد في امان الله قدام راكوبة عمي علي ود الشيخ معاى محمد مكن و على قلد شوية كدا التلفون يرن قالو ا أقطعو الاجازة و بكرة الساعة 12 دوام - و السنة دى كان جات مطرة مش نجيب ولد طارق - نجيب عمنا طارق ذاتو وبدل اللعب في الطين نوديهو مزارع الشطة و الطماطم ليقف على الطبيعة, ونعمل ليهو كبدة نص نجاض , بس خائف الولد تجيهو زائدة , وما نلقى علاج عند محمد طيب الوقت داك بكون عنهم خيمة حزن على الصفر الوقف ما زاد
والمحلي دا داير ليهوا تسجيلات , وما تخاف الفرطيقي دفعة , يعنى عندنا حق الفيتو الكاهلي
آها ياآخوي سراج ابو مهدى إتكوهل عشان يجى الحفلة ولا لسع متحلوين

يا ود التلب
سلامات و كيف حالك انشاء الله بخير البوست بتاعك ده حميل نجرتو لينا من وين حيرتنا. الكلام سامعينو كل يوم لكن ما حاولنا فيهو لا بلاعراب ولا بلتفريز
بمناسبه التفريز سؤال يا خوي انت خريج Production لانو ((الخراطين)) دايما بجيبو المواضيع الزي دي .
لك التحيه و الشكر علي تسقيفنا لغويا

يا عيساوى سلامات ونشكرك على المرور انت وينك ياخينا ليك مده ماظاهر ولا كنت لافى بالعربية العجيبة ديك ؟؟

سلامات ياوليد يارايع مانسحرك لاكن نافستا ودالبزعي في المفردات العاميه لاكن اناسمعت حاجه جديده مره ركبت ماعي مره مشلخه في الرقشه رناتلفونا سمعتها بتقول أوشري أوشري أوشري بحثة عن معنا الكلمه دي لقيت انو من أخوات /أجي_وكرعلي_بعد

الاخ ابو دينا سلامات

واحييك على المرور والاضافة الجميلة وزى ما قالوا (العز اهل) !! انت الان تضيف ل أجى اهل جداد واخت تائهة بمنطقة شمال السودان وهى (واشرى ) او وا شريري وعلى ما اعتقد هى من كلام اهلنا الشوايقة وقد وردت فى اشعارهم :
وا شرى يا زينوبة ولدك فى بحور الشوق كمل

لك التحيه يا ود التلب انا داير أسئلك انت اوشري دي أخت أجي وكرع علي بنات خالات ولاشنو لأكن الوده اوشري الشماليه شنو هسي عليك الله كان إندفنت في الرمال البجيب الخبر منو لأجي وأخواتها ???

امجد بخيت وينك انت يا مان

ليك مده ما ظهرت اختفيت وين .....؟؟
يقال ان واو شرى هى اصلا من الجزيرة ومشت الشمالية مع حصاد التمر .. ولقت التمر احسن ليها من القطن وبعدين جاء السد والدهب
وتركت بنات خالاتها المزكورات اعلاه ... واستوطنت وتلبت فى السنهم لى يوم الله وبقت حقتهم عديل ويدلعوها كمان ويقولو : واشريريي !!
لكن هى بقت بطل والبطل كما معروف لا يموت لذلك مافى خبر بجى لاجى !!
ههههههههههههههههههههههههههههههههههههههههههههههههههههههههههههههههههه

بعد التحيه
وليد والله حيرتنا وضحكتناوالموضوع جميل والحاجات دي جبتها من وين والله تحسسك بالبراءة لكن زمن ناس (نورهان - جوهرة -دينا -رماز ..........) ديل بعرفنها ولو كبرت وبقت حبوبة تناديها كيف

تحيه طيبة وخدك دي

حنكوشة بتحكي مع صديقتها وقالت ليها الليلة ماشفتي عمرو ياي حاجة فظيعة خالص مابقدر اقولها صديقتها قالت ليها شنو عمل حادث بسيارتو البورا قالت ليها لا افظع بكتير جاب مقبول في الجامعة لا لا افظع صديقتها قالت ليها اعصابي باظت ياتوتة عليك الله قولي الحصل شنو لعمرو الحنكوشة قالت حلق صلعة

ودي كمان

حنكوشة في الجامعة الاهلية معجبة بواحد اقليمي فمرة قالت ليهو ممكن نمشي
نشتري بيج ماك فقال ليها انا زاتي عطشان

الاخ وليد تسلم على الطرح الموضوعى والسلس

وليد كيفنك إنت أمسيت طيب ياعشاي كيف حال وليداتك
بعد التحيه
قالو في 2 حنكوشات مشن رحله علميه في الخله مكثن في الخلأ أسبوع كامل موية الصحه الجابنها كملت إحتارن أمشن وين لافي سوبر ماركت ولا بقالة غايتو بعد تعب شديد لقن عمك كبير في السن زول غنم ساي واحدي أشجعت وقالت لعمك عمو عايزين موية شراب عمك رحب بيهن وجاب ليهن عنقريب قد ومشه يجيب ليهن الموية من السعن المعلق في الراكوبه واحده منهن شافت السعن جااااك صرخت قالت لتانيه عايني ياسودي فستان الغنمايه داك

محمد خالد الامين كتب:

لكن زمن ناس (نورهان - جوهرة -دينا -رماز ..........) ديل بعرفنها ولو كبرت وبقت حبوبة تناديها كيف

محمد ناس ريماز ديل مولودات بسنونهن .. لانو الطفلة الصغيرة لو سألتها من حاجة تقول ليك برى !! لكن برضو كل جيل يأتى بلهجته لكن هناك ثوابت متوارثة ولا تفارق اللسان

احييك محمد على المرور

وطبعا الحنكوشات حين الاندهاش بقولن : واااااااااااو

المعز تشكر على المرور الجميل

امجد مساء الخير وحبابك آ ود امى

بمناسبة يا عشاى دى , قالوا فى استاذ مصرى منتدب للعمل فى السودان وهو ملاوز من السودان لانو الجماعة المصريين خوفوهو قالوا ليهو : السودانيين ديل بيأكلوا الناس !!
ولما وصل السودان اول من قابله عمتك كبيرة كدا حاول يسألها قائلا : لوسمحت ياحاجة قالت ليهو : اهلا يا عشاى فقال لها : انا حا افطر بك !!

الحنكوشة القاعدة فى عنقريب القد ..!! مسكينة لانها ما عارفة انها قاعدة فى قميص التور المشرط !!

يا وليد قميص التور ده بشرطو بالعنيه ولا أصلو بكون إتمزق في الجيوب من كثرة لعبو في ترعة معائش عشان كده بقولو أحسن نشرطو قبل مايشرطو كلاب البشير ود أبوذيد لك التحيه

أجــــــــى يا امجد تغيب سااااى كدا !!

قميص التور دا بشرطوه بعد ما خلاص ناس عمك ود البشير وودالسنى وحاج مصطفى يبيعوا لحمو ..
ويفضل القميص خالى جيوب يعملوه حبال قد ,, ولو ما اتعمل حبال عمك حامد مابقصر معاه بجيبو ليك بعد زمن شبشب !!
وبمناسبة كلب البشير ود ابوزيد ( له الرحمة )
مره جاهو احمد ود النور يشتكئ من الكلب الابرق وكان حاصرو بالنباح لمن شرط بنطلونو ,,,,
وحكى القصة للبشير وقال ليهو كلابك ديل شوف ليهن صرفة
والبشير مستمتع بمافعله كلبه وقال : والله انت سعيد فى عمرك دا لاقاك الابرق والله
لو لاقاك الاصفر كان شرطك انت ذاتك خلى بنطلونك !!

سجم خشم ياوليد دحين أنا فت ساي ماحدستك بكون إن شقلته باتخير حبوبتي الشالت ___? ماضهبت مرقة فوق كوبري الرقع جات تصور لامن سألته قالت لي نسيت الكلامه بتاعتي في بيت ناس اختي أم روف عشان كدي ماضربته ليك في أمان الله كن حين بنتلأقه

يا امجد بخيت

سلام كتير كتير ,, لكن اوع تقول ( كتير العوامرة ) !!

يا خوى حبوبتك دى من النوكياب ولا الصينياب عشان نعرف نوع الكلامة بتاعتا ..!!

بعدين سودانى ولا اريبا ولا زين ,, ولا خط إلا لط ..... !!

هى ذاتا مرقت ساااااااى تانى ما جات ,, عشان لقت كبرى الرقع فاتح سااااى

لا رسوم عبور و لا حراسة ....!!

يا وليد موضوعك جميل أضفت بعض المعلومات من العامية السوانية الي رصيدي وخاصة التي جات مع حصاد التمر من الجزيرة العربية..... وهنا سوال ليك يا وليد أين موقع العامية الرجالية ؟؟
أود التعرف عليها ممكن؟

ياود التلب كل سنه وأنت طيب والشعب السوداني في تأخي وسلام وإنسجام أهل السودان جميعآ @ أها ياود أمي نبدا حبوتي من الصلصاب و الحريكاب والطريفاب هي كان حضرة ناس النوكياب كان عملت البدع الحمدلله الشالت ال___ ____________? ماشالت المصيبه دي أخير ليه هسي شالت المقابر

الاخت اعتماد احييك على المرور

طبعا العامية السودانية هى اصلا متعددة اللهجات بتعدد القبائل والامكنة
وفى كل منطقة توجد لهجة يختص بها الرجال والنساء على السواء .. !!
ولكن هناك كلمات نسائية خالصة لا يجوز ان يستخدمها الرجال لانها اصبحت من لوازم المرأة
وكل مفردات الرجال العامية على ما اعتقد تصلح للتداول النسائى إلا ( حررم وطللق ) .. !!
والموضوع (فرفشى ) أكثر مما هو أكاديمى كما تلاحظين .. !!

الاخ ابو دينا

نترحم على روح حبوبتنا الشـــالت الطلـيـــــــــــــــح .. . !!

وطبعا هى لو بقت من النوكياب كان طوالى دخلت المنتدى وعملت البدع زى ما قلت !!

ههههههههههههههههههههههههههههههههههههه