بين يدى آلان كرت دعوة انيق لحفل زفاف فى صالة (امسيتى ) جوار منتزه برى العائلى

هذه الصالة تجعل من ليلة الفرح اكبر من خيال (الف ليلة وليلة ) .. بتخلى النااااس (بيووووض )

من زينتها المفرطة وكشافتها الفرحانة شديد ..

كرت الدعوة فى حد ذاته انيق لدرجة بعيدة (ممكن تتصور معاهو ) او تكتفى بامتلاكه لانه سيكفيك

متعة الفرحة المنشودة هناك لانه تحفة فنية جدا

طبعا انا قمت رجعت بذاكرتى للوراء (طوالى ) وتذكرت تسلسل (كروت الافراح ) فى حلتنا منذ زمن بعيد

- كانت البداية بلمة شفع الحلة (الختاتين ) والختاتين طبعا من جمال الخط وليس (الختة ) وجمال الخت كفيل

باخراجهم من دائرة الحرج بعدم اللحاق بدفتر الختة

- نمشى نشترى كم (كراس دبل ) ابو 64 صفحة .. وكم (قلم بيك ) ونعدى ليلنا كتابة (وقطيع )

- تاتى بعد ذلك مرحلة توزيع ماكتب من دعوة نزينها ببعض الاشعار المحفوظة والمرتبطة بالمناسبات

بحيث يتم توزيع (الشفع ) على الاحياء .. ياسلام على حتة كل بيوت الفقراء بيوتى

يصبح الشفع كالمطر وهو يدخل كل البيوت

- قبل التحضير لحفل المرطبات المصغر .. قد تاتى بعض مظاهر (الشكوى ) من ان فلان لم تصله الدعوة

وبعدها يرمى اللوم على (الشافع ابو صنقير داك ) كلو منو

- بعدها اتذكر تم اكتشاف وسيلة اخرى تجنب الناس الشكوى من ضياع بعض الكروت نتيجة الاهمال والتعب

الزائد

- كانت البداية بمكرفون (الجامع ) يربط فوق (برينسة 78) ويقوم احد الصبية (على شرط يكون صوته جميل)

عشان يشرط المكرفون ويوصل الدعوة للجميع ... وتبدا العربة بالمرور على الحلة شارع .. شارع

وزقاق .. زقاق .. وبذلك تنتفى فكرة الهروب من (دفتر الختة ) بان كرتى ماجااااااانى



[ندعوك للتسجيل في المنتدى أو التعريف بنفسك لمعاينة هذا الرابط]

العاقبة عنكم فى المسرات دى سيك سيك معلق فيك
لكن تكافل اجتماعى قل ان تجده فى اى دولة غيرنا ونفخر به
لمن تلقى فى الكرت........ وشكرا معناها مافى ختة تعالوا ساى

عبد الرحمن..ود مدثر ابو مزن ..الخرباش
تحية مليانة خربشة..من الهداية ..لمعايش
ومن السلخانة شاقة فريق الغرب بشارع النص
لى عن بيتكم..فى حى ..الصفاء..
ليه ..سميتوه الصفاء..الحى الجديد مالها
ما حلوة..والا دايرين تتقعدوا..
زى ناس حى البان المالك مثيل
وفيك زينة نايرة الجبين
وانا زولى بعرفو..
يا ود مدثر
هسى ناس الحلة..اجيكم كيف
كدارى ...
ولا باللوارى...
ولا الترحيل..مجانا
امسيتى....فى برى ..جنب النيل
محل الهوى البارد الترطيبة
انوارها بتخلى الزول ابيض
يعنى ..لوفلى..ولا مبيض جماعى
الزول تشوفوسمح سماحة شديدة
وبعد تلاقيه مرة تانية
تفرك عينيك ياربى ياهو ولا ما ياهو
وبعدين عنصر الدهشة زول عوز ابقى ابيض
حتى اللون ابيض برضو عوز ابقى ابيض
والناس الزرق ديل مالم عيبن لى
بالعكس ما بكبرو سريع
الخدرة الدقاق...
الخدار....
الولع فى جوفى
نااااااار
مبروك لود اخوك
الوجيه شيخ الدين...
الكريم الحر...
قضاى القروض
زمان قبل الرطبات الدنيا كانت بخيرها
الدنيا كانت بخيرها
العزومة بالكلام بس..وبالسمع
والعضة راقدة..وبدون ما يقرحوك
كرامة ساكت..
طبعا الصوانى فى الواطة مافى ترابيز
الكسرة ردم وفوقها رغيف بالاطراف وصحنين سلات
اللحم راقد..والزيادة راقدة
وملاح الرز فى النص..شفت طيبة الناس دى ..ملاح رز
وملاح القاورمة..البصل الصغار..ده مستمر للان
لكن ملاح الرز ودع ...
وبالليل الحفلة..على الصادق
واحمد محمد خيارى
ومحمد محمود من الحلاوين كان سائق بالبطرى
بعدها ظهرت المرطبات..
وفى ختان العبد الفقير لله
مشى عمنا دفع الله عبد الله
جاب الموز والبرتكان والتفاح اللبنانى
اى والله تفاح لبنانى فى صندوق خشب
جابن من مدنى
والبنات نظفن الشارع خلنو المع
ورصو الترابيز وفرشوا فوقن المشمع
ورصو صحانة السرويس فوقن الفواكه
وجنبهن البيبسى..
وبعداك الشاى الحليب الصافى المقنن
واذكرجانا تمويل لبن تقيل من السديرة
بعد الناس اتفرقوا
حفلة بمحمد محمود..وخيارى
ومنصور عبد القادر..
اسفين على التخريمة دى
يا خرباش موالكرت بس اللتغير
كل شئ..
السلات بقى ضلع
والشربات بقى بارد
والكسرة بقت خبز وكمان مستورد فرنسا وايطاليا
والحفلة بقت قعدة..وبقت بارتى
والقيدومة والسيرة بقت زفة..
والجلابية والتوب..بقت بناكلين وكرفتات
والفنان البغنى بالرق بقى اغنى بالموسيقى
اختفت الصفقة والدلوكة والبنقز
والايقاع بقى صناعى من الاورغن
والتعريفة والقرش
والشلن والريال
والطرادة ونص الجنيه
والجنيه
ماتوا الله يرحمم ويحسن اليهم
ومن ما ماتو ماتت فينا حاجات كتيرة
واشقلب كيانا شقلبة
ودى الصورة الكبيرة المقلوبة
الى ما لقت زول اعدلها
وما اظن اعدلها
غير الخالقها
والخالقها مو طالقها
مرة اخرى الف مبروك

ود مدثر ذي ماقال ود الماحي شكرا
حلوة حلا
زيادة البناني كنتو مفترين خالص
وطهوركم اعرس لي نفرين

الغالى صديق الماحى

انت عارف رغم ضيق الحال .. وظروف الناس لكنهم

بتلقاهم قدام وكت الواجب .. ان شاء الله يبيع غنمايتو لكن مايقصر يوم

الواجب .. فى حلتنا شكرن مافى .. لانك بتكون براك

شفت القيمة الاجتماعية دى جميلة كيف

انت عارف انا لحدى هسة بتذكر مشاوير توزيع الكروت فى سخاااااااانة صعبة

لكنها اصبحت آلان مجرد ذكريات تنعشنا وتشجينا

وتخلينا نقول ياريت نرجع لزماااااااااااان

زيادة ياسلام على مطرك الجميل
وانت سايقنا وسط شعفوفة ورزاز ايام وذكريات جميلة
والصينية كوعت دا مصطلح بتاع فتح الرحمن التركى وهو من هواة
التكويعة .. والترطيبة .. والضلعة القليدة التقول جبدوا القلاليز
انا احلى حاجة عندى فى المناسبات بحب اصور لحظة الهجوم الشرس
على وسط المدينة .. اقصد وسط الصينية حيث الضلعة المسكينة
هناك اتفاق اطارى من دون توقيع طبعا على اقتسام هذه الرقعة من الصينية
المحببة الى كل القلوب ..
وتاتى ذكريات عربية الدعوة .. والصادق مزقة دا طبعا متخصص فى الاذاعة
الداخلية والتجوال على الاحياء بخفة دمه وسرعة البديهة ..

ثم نعرج على رمز من رموز الحفلات .. فى زمن جميل (الفرطيقى ) ومجموعة من شباب الزمن الجميل

هسة الحفلة بقت لحدى حداشر

واصبحت الانشحاطة بتاعت زمان ماعندها نكهة

فى حاجات اتغيرت

والسيرة ذاتها اتغيرت

لمن تجعر فى نص الشارع عشان فاتتك سيرة

ياسلاااااااااااااااااااام

الاخ عبد الرحمن .. شكرا كتيير على تصوير ورسم تلك اللوحة
الجميله جدا .. بالمناسبة البوكسى شغال والعاقبة عندكم فى المسرات
ياسلام الدنيا بخييير والحمدلله .. مجتمع الهدى محافظ على تلك المجاملات
فى الافراح .. الجميع معك فى المناسبه .. خدمات وخته ودفتر ولمة فريق
وزغاريد ودلوكه وبهجة ..
اعتقد الان الدعوة بالبوكسى لكن بقت بدل المرطبات الدعوة غداء
وبعض الناس شكرا فى النهايه يعنى مافى خته
ولشنو يااجمااااااااعه .. وله غلطانين
والعاقبه عندكم فى المسرات
تحياتى

ام ضحى تحياتى
مجتمع الهدى مجتمع متماسك .. ولازال يحتقظ بقيمة التكافل الجميلة
التى بدات مع نشاءة الهدى الاولى وتمسكها بمكتسبات الاسلام من بيت مال
للمسلمين .. وتجمع كل الخير فى المسجد العتيق
قيمة اجتماعية يجب علينا الاجتهاد فى الابقاء عليها
لانها بها عرفت الهدى
ومن خلالها كان لمجتمع الهدى هذه الميزة التى لاتوجد فى سواه