فى نهار شديد الحرارة فى يوما عاديا من ايام قريتنا الجميلة الطيبة طيبة اهلها البسطاء فى كل شىء والقرية هادية الا من صياح الجزارين والنداء على اللحم الذى ورد الان حار من المناقل والكيلو بواحد جنية وسعيد ينادى بقرى بقرى سمين وبعض نسوة فرشنا طماطم وبصل وعجور واخر يخيط فى مركوب ضاربا فى القدم ويغنى بلحن لا افهم كلماته وانما الموسيقى لغة عالمية تخاطب الوجدان والناس يتوافدون على الجزارة ودكان ابراهيم كجولة وبعضهم اتى من الخلاء ممتطيا صهوة حماره واخرين بكوارو وعجلات دبل وتاتيك روائح الكسرة فى لحظات قلبها الى الصحانة ورائحة كشنة تدغدغ الخياشيم وتجعل صراخ البطن يعلوا وينخفض وتكل خالتى ام بلينا يتصاعد منه الدخان ويعانق عنان السماء وهى تعوس والحلة فى تجقجق وتفور وبما فيها ينضح وترى فى الافق عصارا مخترق الحلة وناس تصيح محمد معانا ما تغشانا مر مسرعا واخذ معه عراقى حسن ود امنة وخرج على ابكيس وزبل لحم سعيد البقرى السمين وفجاة سمعنا شافع يصرخ وينادى واحد غرق فى الغلاية فى الكنار كل من كان ممسكا بشىء تركه وهرول الى الكنار النساء غادرت ادكال العواسة وسعيد غطاء اللحم بسرعة وادخله فى الدكان وجريت مع الناس وكنت مرعوبا من الموت والغرق ووصلت الى الكنار اعداد كبيرة من الناس نساء ورجال اطفال والذى غرق شخص غريب ووجدتهم كأنهم يشاهدون مباراة فى كرة القدم يتصايحون ويضحكون وقال احدهم يا ناس جيبو جكسا بعرف العوم وخرج جكسا من بين الجموع منتزعا عراقيه وضرب الماء جمبلق لق لق لق لق وكل الحضور يصفق جكسا يا فنان جيب الراجل من الاضان صفافير وكواريك وجكسا نبع فاضى وخرج وظهر مصطفى طيارات ونال قدر كبيرا من التشجيع وهو مكشكش دبز الموية من فوق ل فوق من الحيف للحيف خرج وقال والله انا خايف يمسكنى واتى بريمة والكل يهتف بريمة سمكة بريمةسمكة واتى بريمة يتتضرع خلال الجموع و وقفذ جلبق جلبق ومكث تحت الماء حتى ظننت انه قد لحق امات طه وخرج خالى الوفاض وقال واحد رفسنى هنا فى الحتة دى ورما فى مكانها قصبة واخير اتى الضو كتم وكان شابا رياضى وتحت الصياح والتشجيع غطس هذا الكتم وما هى الا هنيهة واخرج كتم رجل الرجل وصاح الحضور الله اكبر الله ونزل معه بقية الناس واخرج الى البر والجمهور يصيح كتم يا بطل وتسلمه اهله الله يرحمه

يا سلااااااااااااام يا ودالبلة

يالمجقجق مرتين .. !!

مرة فى الغلاية ,, ومرة فى الحلة .. !!

ونرجو منك مرادف الكلمات التالية : -


جنبلق لق لق لق

دبز الموية

من الحيف للحيف

الحلة تجقجق

يا عم وليد انت سيد العارفين وانا اعرف اكتر من الحكومة ممكن تشوف قاموس العامية تجد التفسير الجيد ارجو العفو الواحد يكتب ويخطرف وكلام خارم بارم المهم سامحونا

الرايع دوما مصطفي البلة تحية ود واحترام
منور المنتدي بكل ماهو جميل واصيل ومتابعين لقصصك وابداعاتك الراقية وزكرتنا الكنار والجنابية وقصص من الماضي ويسلم كتم [/color]

شكر ا يابنى خالد تسلم الماضى ابدا لاينسى وهل تصدق انا الى الان لما اجى انوم اهيم فى ذلك الماضى البعيد والحواشات والقمح والغنم والبقر وريحة الزبالة والطين والخدير والخموج والربوب والمطر وريحة الدعاش اه يا بلد واتغنى مع حسن عطية رملة بيضا بين بحرين يلاك نزورا نسقى الحبايب كاس كاسين ونسقى حورا يا سلام هسع حا يطلع وليد التلب ويقول كاسين من ام قلة؟

ياخالد كتم موجود فى المملكة حاليا كان لاعب كرة فى فرق المناقل

مصطفى البله على كتب:

واتغنى مع حسن عطية رملة بيضا بين بحرين يلاك نزورا نسقى الحبايب كاس كاسين ونسقى حورا يا سلام هسع حا يطلع وليد التلب ويقول كاسين من ام قلة؟

يا مصطفى بمناسبة ام قلة دى ,, طبعا زمان فى كنبو البان كان فى ام قلل كتار ,, والناس جلهم من الزبائن

وعندنا عمنا كدا من الزبائن ,, وكان ماسك لينا الحواشة , وكانت جنينة وقتذاك , وكان متعود يجيب لينا الخضار

بالمساء ,, وذات يوم اخد ليهو غشوه كدا للكنبو وجاء محمل الخرج جركانتين من انتاج ام قلة العجيب .. !!

وجاء البيت كالعادة ,, وجات حبوبتنا امنة لها الرحمة ’ وحاولت ان تخرج ما فى الخرج ظنا منها انه عجور وجرجير

وقالت : ليهو جبت عجوووور , وفجأة هبشت الجركانة والجركانة نزت ,, فقالت : اجى يا مهدى الله بزبزت ... !!!

لك التحية ود البلة وكتم والله يستاهل نفتشو .
وبيني وبينك ود التلب ما مريحك بس نقول (البتريدو المو) ويديكم العافية

اه اه ياوليد على ذلك الزمان العجيب الجميل واحد مرة سكران طينة لقا واحد يخطب فى الناس الفساد عم البلد والشراب فى كل مكان حتى رحمة ربنا من السماء وقفت المطر وقف السكران قال ليهو الحته البتتكلم فيها دى كانت انداية والدلوكة نعرض فيها للصباح ورحمت ربنا القلت عليها نخوض فيها للركب اسكت اظنك انت اطيقش واريوش؟

ياودالبله الأذان بأذن لكين لازم أكتب ليك وأهنيك علي حسك وخيالك وسلاسة سردك وإستخدامك لمفردات حيه سهله صعبه_مبروك

شكرا يا سراج يا خوى تسلم وهى زكريات الواحد يجترها من حين لاخر الا ليت ايام الصفاء جديد ودهرا ولى يابثينة يعود **** اه اه ها هلا هلا هلا؟

مصطفى البله على كتب:

شكرا يا سراج يا خوى تسلم وهى زكريات الواحد يجترها من حين لاخر الا ليت ايام الصفاء جديد ودهرا ولى يابثينة يعود **** اه اه ها هلا هلا هلا؟

---------------------------------------------

ود البله الصفا دي الحي حقنا

تعيش  الصفاء وناس الصفاء  ببركة سيدى  ببركة سيدى المصطفى  مبسوط يا محمد ودابراهيم

ود البلة يارهيب
لك التحية اينما حللت برا وجوا وكنارا
نحييك على السرد الجميل
لكن ليه جكسا الناس صفقت ليه اكتر من كتم الطلع الجثمان ماعارف وليد فوت ليك جكسا دي كيف
ولا يكون ماحضر زمنو وماجايب ليه خبر

كان عادل جاء متأخرا بعد شهر،أنا ياربى أقول إمكن أنا الما جيت؟ ليك التحية أخى مصطفى البلة على سردك السهل والماتع،فحياة الزمن الجميل مربوطة بصفاء النفوس وتواضعها وقبولها لبعضها على علاتها،كأنهم يعلمون أن لا أحد معصوم، بينما الآن كل يدعى العلم والفضل ولذلك ظهر مجتمعا طبقيا وإنزوت المتعة،نشكرك على هذه الجرعة اللطيفة وظريفة آملين أن تواصل ومن بيت الكلاوى ومايهمك من جيل العولمة

شكر ا يا ابو الياس الواحد يحاول يكتب زكريات جميلةمضت