انا من المجانين جدا بروح الدوش ورائعته الجميلة (سعاد )

لانها تنقلنا فى مساحات للتواصل للاحساس .. للغبن وللحماسة

الباشمهندس على ابوشنب

تحية خاصة

حبابك

ونتواصل

ددايرين الجديد
بعد الكهرباء
والرابطه
اهى الاطلاله عبر بوابة الشبكة العنكبوتية
وبعد دا سايفين نحن مقصرين
لولاالحزن القديم انت
ولا لون الفرح انت
ولاالشوق الغلبنى اقيف ولابنتى ولا التزكار
بتطلعى انت من اهات ومن وديان
ومنى انا
ومن صحية جروف النيل مع الموجة الصباحية
وشهقة زهور عطشانة فوق احزانها متكية
بتطلعى انت من صوت طفلة وسط اللمة منسية
تجينى .........
ويجينى معاك زمن امتع نفسى بالدهشة
طبول بدق
وساعات جمل وحسن للحزن ممشى
ولا البلقاة بيعرفنى ولا بعرف زمانى معاك
ولا بنتى ولاكنتى
ولا التزكار.....
ليك ياهدى الافراح .....

دقّتْ الدَلّوُكَهْ

قُلنا الدنيا ما زالت بخير

أهو ناس تعرِّس وتنْبَسِط

تكْكَّتَ سروالي الطويل

سويتْلُو رقعات فى الوسط

فى خشْمِ عضّيت القميص

أجرى وازبد شوق وانُط

لا مَن وصلتَ الحفلَهْ زاحمتَ الخلق



وركزْتَ

شان البِتْ سُعاد

أصلى عارف جِنَّها فى زول بيرْكِز وينْسَتِر

لكنِّى عارِف إنَّها

لو كلو زول فى الحلة بالسُتْرَهْ إنجَلَد

يانى الآزاها وجِنَّها


برْضِى عارِف أظنَّهَا
تحت تحت بتحبني
دِيمهْ فى صَرَّ ة وشيهَا

يلفحْنى شوق نافِر لَبَد

وركزْتَ للحُرقَهْ المَشَت فوق الضلوع

تِحت الجِلد

ضمّيت قزازتى مرقتَ عِن طَرَف البلد

وسِكرْت جَدْ

وأنا جايىّ راجعِ مُنْتَهى لاقتْنى هِى

قالت "تعال"

كِبْرَتْ كُراعى من الفرح

نُص فى الأرِض نُص فى النِّعال

اتْلخْبَط الشوق بالزَّعل

اتْحَاوروا الخوف والكلام

"ه-يْى يا سُعاد

على ودْ سكينَهْ وكِلْتِي في خشمو الرماد

علي ود سكينَه ومَات أسى

وأنا بِت بلاك ملْعُون أبوى لو كنتَ أرْضَى أعرِّسهْا

وأنا يا سُعاد

وكتين تصُبى سحابَهْ تَنْزِلي زي دُعاش

بفْرِش على روحى واجيكْ

زولاً هِلِك تعبان وطاش

وأنا يا سعاد وكتين أشوفِك ببقى زول

فَرَشولوا فَرْش الموت وعاش)

قالت سُعاد

(بطِّل كلام الجِرْسَهْ انجض يا ولد)



مزّقْت روحى نِتَف


مرّقْتَ من جيب القميص

تمباك وحب
عرقى وأسف

طبّيت قزازتى وصلتَ لى طَرَف البلد

وسكْرتَ جَد

اذّنت فى الشوك والسَلَم

وسرحْتَ بالناس والغَنَم

وركعتَ للعرقى البِكِر

ورقدتَ فى الألم الحِكِر

وحلمتَ زى شايلنى ومشَى

فوق زحمة نْبيْ الله الخِضِر

صحَّانى صوت العُمدهْ قال

(مسعول كبير زاير البلد)

قال لينا

(وكَتْ الزول يجِى ، لازِم تقيفوا صفوف صفوف

وتهيّجُوا الخَلا بالكفوف

وتقولوا عاش.. يحيا البطل)

صلّحْتَ طاقيتي الحرير

واتنَحْنَح الحشا بالكلام

ورميتُو من حلقى الوصَل

قُتْ ليهو يا عُمدهْ اختشى

مسعول كبير في الدنيا غير الله اِنْعَدَم

ما شُفْنا زول رضّع صغار

ما شفنا زول نجّح بَهَم

ما شفنا زول لمْلَم رِمَم

لا صِحِينَا عاجِبنا الصباح

لا نُمْنَا غطّانا العَشَم

والحِلَهْ من كلَّ الجِهات محروسَهْ

بالخوف والوهم

ومضينا من زمناً قديم-يا عُمدهْ-مرْسوم انتحار



الموت مُباح

والحب نِطاح

والصِدقِ من جِنس الزِّنا

العافيهْ مولودَة سِفاح

والرغبَهْ مكسورةَ جناح

الحلم والوعد النبيل

الطِفلهْ والأم ، النخيل

الرّنَهْ فى الوتر الاصيل

تلقاهَا فى قاموس نكاح

يا يُمَّه واح..يا حِلَّهْ واح

***

يا سعاد تعالى ولمِّى من كل البيوت

عِدَّة السَفَر الطويل

زَخْرِفى الفجر النهار

شخْبِطى الضُحى والأًيل

المَغْرِب

الفجر

النجوم.

فى صُرَّهْ وارمِيها البحر

خلِّينَا فوق الشك نَعُوم

والعُمدَهْ فاض

العُمدَهْ صار مليون عُمَد

العُمده فيل

جبلاً تقيل

لبْوَهْ وأسد

حَسَنَهْ وغَصِب

جُمْعَهْ وأحَد



بقّيتْ قزازتى

مرقْتَ عِن طرف البلد

وسكْرتَ جَد

وأنا جايى راجِع أجهجهو

لاقانى هو

سايق العساكر والكلاب

رامى بين عيني وعينو

كلب وتَكْشيرهْ وحُراب

ضاقت نِعالى من الزّعل

من تحتهَا اتْمَلمل تُراب

الغيم سكب ضُلو ومشَى

والدنيا غيما سراب سراب

والحِلهْ زى بلداً بعيد

زوَّد بُعاد وقُرُب سُعاد

اتجمَعَت كلَّ البيوت فى راحتَا

زى بِت لِعاب

مجنونَهْ تصرخ فى الزوال

ممزوجَهْ فى الدم واللُعاب

عينيَّ ضاقت نظْرَتهْا

والجوف يطقْطِق بالكلام

قُبَّال يقولوا لي سلام

اتلمُوا حولى بلا نِظام

شال وعِمَّهْ

توب وغُمَّهْ

فاس وطوريَّه وحزام

شالونى بى كُل إحترام

ورمونى فى قَعَر السجن

حصلّنى قبل اليوم يِتم

جارنا المدرِّس ودْ خدوم

قال ليَّ

لا زول قام هتَف

لا كف مشَت بتلاقِى كَف

والعُمدَهْ زى هَمْبول وقف

يا صمت أُف

يا دنيا تُف

وأنا يا سُعاد للشوق نغَم

للهَم عَلَف

ومابين

كبرت كراعى من الفرح
نص فى الارض نص فى النعال

لحظات لقيا اجمل بسعادتها وسعادها

ومابين

ضاقت نعالى من الزعل
من تحتها اتململ تراب

فرق شاسع عندما يكون صوت العمدة عنوان للزيف
والخداع

بمناسبة نصوص الدوش الخارجة عن اطار المالوف شوية
وبمناسبة غناء الكابلى لرائعته سعاد .. لكن بتعديل اكيد
خصوصا عندما نصل الى
ومرقت لطرف البلد ... وودرت جد

هذه الايام يدور جدل كبير بمناسبة مصادرة رواية الكاتب المجنون

عبدالعزيز بركة ساكن .. التى عنوانها :



الجنقو .. مسامير الارض

والتى نالت جائزة الطيب صالح لهذا العام


كدى النجيب ليكم منها حتة واجى

الخميس 29 undefined -542 - 10 يونيو 110

الخرطوم تحظر رواية "الجنقو: مسامير الأرض"


الكاتب السوداني عبدالعزيز بركة ساكن



الخرطوم: يعد عبدالعزيز بركة ساكن الكاتب السوداني هو الأكثر تعرضاً لقرارات الحظر التي أصدرها المجلس الاتحادي للمصنفات الفنية والأدبية في الخرطوم ذلك بعد حظر روايته "الجنقو: مسامير الأرض" الفائزة بجائزة الطيب صالح للإبداع الروائي في دورتها الأخيرة، إذ صودرت مجمــوعته القصصية "امرأة من كمبو كديس" في 2009 وجمعت من جناح مكتبة عزة في معرض الخرطوم الدولي للكتاب.

ووفق صحيفة "الحياة" اللندنية فقد كانت أمانة الخرطوم عاصمة للثقافة العربية 2005 أصدرت مجموعته القصصية "على هامش الأرصفة" إلا انها سارعت إلى سحبها بعد اجتماع لمسئولين استغرب بعضهم محتوى المجموعة القصصية الـ "خادش للحياء العام".

تعكس رواية "الجنقو: مسامير الأرض" الأجواء الغرائبية لحياة "الجنقو"، وهم عمال الزراعة المطرية الموسمية، في المناطق الحدودية بين السودان وإثيوبيا وأرتيريا، وهي تحكي علاقتهم عن الأرض والنساء والتجوال، وتقارب التحولات التي حصلت في واقعهم "العمالي" نتيجة إدخـال الآلة الزراعية الحديثة.

وبذلك تكون معظم أعمال بركة ساكن الأدبية "محظورة" في الخرطوم، وهو يقول أيضاً إن ثلاثيته التي ضمّت روايات "الطواحين" و"رماد الماء" و"زوج امرأة الرصاص وابنته الجميلة" التي صدرت أخيراً تحت عنوان "ثلاثية البلاد الكبيرة" ضمن منشورات "مكتبة الشريف الأكاديمية"، هي الأخرى لم تسلم، فالثلاثية صودرت قبل شهرين إلا أن ناشرها تمكّن من فك حظرها شرط ألا يوزعها!".

وأوضح وليد سوركتي من مركز عبد الكريم ميرغني الثقافي، وهي الجهة المنظمة للجائزة والناشرة "اقترحنا على بركة قبل النشر أن يحذف بعض الكلمات التي رأينا أنها قد تثير حفيظة بعض الجهات، لكننا شددنا على حقه في القرار باعتبار أن العمل عمله".

وأصدر اتحاد الكتّاب بياناً استنكر فيه حظر الرواية كونها فازت بجائزة الطيب صالح للإبداع الروائي وورد فيه: "إن الرواية المحظورة هي عمل إبداعي حاز تقدير لجنة محترمة من كبار المبدعين والنقاد الرصينين في السودان".

ياسلام ياشباب على الزوق الرفيع باختيار كلمات تلك الاغنية البت سعاد
فعلا كلمات ولحن واداء جميل جدا
والقصة اللذيذه في الاغنية نزلت اجازه قبل 5 سنوات وكانت طاغية على كل الاغاني الجيدة لجودتها
وكان ان اهداني اخي الصادق عبدالرحمن هذا الشريط والذي ما ان تدير المفتاح في وجود ابني الطيب الا يقول ليك يابابا شغل لينا البت سعاد وكان حافظها عن ظهر قلب وهو ابن السابعة وتاثر بها ايما تاثر لدرجة ان اختي عندما رزقت بنتا اصر الا ان تسميها سعاد ولم يجد مايصبو اليه وماكان منه الا ان اتجه ابى صديقي علي سكسك في بريطانيا وكانت زوجته على وشك الوضوع وطلب منه ان يسمي تلك البنت مريم او سعاد ووجد عندهم مايشفي غليله
وفي ذات يوم وفي مشوار لم اكن معهم اصر عمار على ان البت سعاد اليوم في اجازه ولايمكن ان يدير هذا الشريط فماكان من ابني الطيب الا ان تنازل عن المشوار اذ انه لايمكن ان يكون في السياره دون سعاد وحينها تدخل ابي وحسم الامر وانتصر الطيب وسعاد على عمار
شكرا لكم لقد ادخلتم الفرحة بالذكريات الجميلة