كان عم (أيوب) يعمل (عتال-حمال ) بسوق التوابل بالمدينة يقوم بإنزال حمولات الجوالات المليئة بالشطة والكمون والفلفل والتوم والكسبرة وبقية التوابل من الشاحنات إلى داخل مخازن التجار ، بعد سنوات قضاها في هذا العمل الشاق أصيب عم (أيوب) بضيق في التنفس إثر التهاب في الشعب الهوائية جراء حساسية أصيب بها من تواجده الدائم بين روائح التوابل النفاذة فى تلك المخازن الرطبة ذات التهوئة الرديئة.
في أول زيارة له لتلك المستشفى الحكومية قبل سنوات طويلة تم تشخيص الحالة بأنها حالة( أزمة شعبية) وبدأ في التردد على ذلك المستشفى لأخذ العلاج حتى بات معروفا لدى الجميع مما جعل الأطباء بالمستشفى والذين يعملون كأساتذة بكلية الطب بجامعة تلك المدينة يستعينون به (كحالة) عند امتحان الطلاب حيث يطلب منهم الكشف عليه وتشخيص حالته ومن ثم وصف العلاج المناسب له .
دخلت (منال) .. الطالبة في السنة النهائية في كلية الطب ومعها أستاذها الاختصاصي إلى عنبر الباطنية الذي كان قبل يومين مكتظا بالمرضى وتم تفريغه استعدادا للامتحان النهائي .. كلها شهر وينتهي الامتحان وتظهر النتيجة وتصير (منال) .. دكتورة منال.
تم تجهيز العنبر بالحالات المرضية المزمنة .. المرضى يتم استدعاؤهم بدعاوى المتابعة الدقيقة وإجراء الفحوصات اللازمة . . وبين المتابعة والفحوصات يمتحن عليهم الطلاب كأجندة خفية لإدارة المستشفى ..
وقف د. حسين أمام (عم أيوب) ثم التفت إلى (منال) قائلا: شوفي المريض دا اخدي الهيستري (History) (التأريخ المرضي) منو واعملي التشخيص المبدئي .. و وريني ح تطلبي ياتو فحوصات .. والعلاجات المناسبة شنو .. ثم خرج د. حسين الاختصاصي والأستاذ بالكلية .. إلتفتت (منال) لعم (أيوب) وهى تضع السماعات على أذنيها :
- إذيك ياعمو ..
- اهلن يابتي ..
- ياعمو اها وريني .. بتشكي من شنو بالضبط كده ؟
- شحتفت روح ووجع أضان ساااكت ..
- كيف يا عمو .. إنت في عنبر الباطنية .. يعني لازم يكون عندك حاجة متعلقة بالبطن .. او الصدرية ..
- قلت ليكي .. بس اضاني ..
- عليك الله ياعمو ورينى عندك شنو؟ .. أنا والله كدا ح ارسب في الامتحان .. وبابا وماما ح يزعلو..
- بابا وماما وين .. ؟
- بره .. مغتربين ..
- وبيقروكى(بيعلموكي) على حسابهم ؟
- ايوة ياعمو..
- بتدفعي كم ..؟
- سبعه الف دولار .. ياعمو ..
- تدفعو ليكم سبعه ألف دولار وتشيلو منى (الهيسترى) بتاعى مجانين ! أنا مما مرضت الأدوية انا بشتريها بقروشي .. والمستشفى لمن برقد .. بدفع .. والكشف .. بدفع .. والفحوصات .. بدفع .. طالع بدفع ونازل بدفع .. ولما ينادونا عشان يمتحنوكم فينا .. يقولو لينا .. تعالوا للمراجعة .. وهم مبيتين النيَة يمتحنوكم فينا .. ملح سـااااااااااكت ( يعني مجانا ) ..أها أنا هسه غير اضاني ما في شئ بيوجعني ..
لم يفت على((منال)) بأن عم (أيوب) عاوز ليهو حاجه(فلوس) فقامت بفتح شنطتها الجلديه الأنيقه ثم اخرجت منها ورقة مالية معتبرة ودستها في يد عم (أيوب) . . قائلة: معليش يا عمو تساعدك في شراء الأدوية .. وهنا إستعدل عمو :
- الحمد لله .. وجع الأضان راح .. اكتبي .. وبدأ عم (أيوب) يسرد في التأريخ المرضي لحالته .. بصورة سلسة تتخللها كثير من المصطلحات الطبية.. وأسماء الأدوية المختلفة التي حفظها عن ظهر قلب من كثرة تردادها أمامه كحالة مرضية يمتحن عليها الطلاب…. ولم ينس أن يخبرها بأن التشخيص هو حالة (أزمة شُعبيًة) ..
- اكتبي .. اكتبي .. يا بتي .. بتلقي ويزنق wheezing لما تختي السماعة هنا في الجيست chest.. واشار إلى اسفل صدره .. وفي العلاجات زمان كان بيدوني اماينوفيللين في 100 سي سي dripجلكوز 5 في المية مع الماء .. لكن بقى ما بنفع معاي .. اسع باخد .. فنتولين .. ولو سألوكي من إسمو العلمي .. قولي سالبوتامول .. اصلو د. حسين بيحب يسأل السؤال دا كتير .. وبعدين في حالات الإيميرجنسي Emergency بيدوني هايدروكورتيزون بالوريد .. وبعدو بستمر في حبوب بريدنيزولون 5 ملغم .. يبدأ بجرعة عالية وبيخفضوهو تدريجيا .. و(منال) تكتب .. وتكتب ..
جاء د. حسين .. وبدأت (منال) تقرأ ما كتبته .. وتقرأ .. ثم بدأ د. حسين فى طرح الأسئلة عليها :
- أها حالة المريض دى شخصتيها شنو؟
- ممتاز .. عظيم .. إكسلنت ..
- والفنتولين إسمو العلمي شنو .. ؟
- ممتاز .. عظيم .. إكسلنت ..
- وفى الإيميرجنسى تديهو شنو؟
- ممتاز .. عظيم .. إكسلنت ..

تخرجت (منال) وأصبح يسبق إسمها حرف (الدال) ! .. هسه لو واحد قالو ليهو عم ايوب (العتال) جاوب ليها سؤال بيصدق؟