بوست معلوماتى .. شماراتى .. يهتم بنقل صورة لمدينة الهدى يوميا

ممكن نستعين باحبابنا الفى نص السوق .. والليلة كمان سوق الخميس

لربط الاحباب هنا بمايجرى فى الهدى من مناشط .. فعاليات .. برامج

ومظاهرات .. ومظاهر فرحة كذلك بين بداية مشروع الزلط وبين الجماعة ديل مشوا ولاشنااحباب مع كل صباح جديد

وهكذا


يااحباب مع كل صباح جديد ... كيف اصبحتو .. وحالكم ان شاء الله ديمة يسر البال

بوست للجميع .... بوالجميع



[center]

لك التحية عبدالرحمن
فكرة جميلة جدا
دى حاتكون أجمل بوسته(الهدي هـــــــــــــــــذا الصباح)
جمالا ينبع من انك تشوف كل يوم صورة من الهدي
مع كل صباح جديد ... كيف اصبحتو .. وحالكم ان شاء الله ديمة يسر البال......................
مادام الموية جات يجب ان نطبق الأفكار الجميلة الواردة في بوستة الهدي مدينة بلا أشجار ومدينتـــى الجميلة
ياريت شهر مارس دا تكون بدايتنا الفعلية في نشر الخضرة في الهدي
هـــــذي يــــدي
إن شاء الله في منتصف مارس حاكون في الهدي
عشان نكون عمليين يجب تكوين لجنة لتحديد مايلزم
لتحقيق الهدف(ياريت بنهاية شهر 2 نكون كونا اللجنة وحددنا المهام)
مين يتبرح يكون عضو
ويشرفني ويسعدني أن اكون عضو اللجنة التنفيذية

سلامات عبدوش

وحمدا لله على الظهور بعد طول إحتجاب

ونحييك على الاطلالة الجميلة جمال صباحات الهدى الندية

الهدى هذا الصباح

مرآه تعكس مجهودات الشباب وطموحات ابناء البلد بصورة حية ومباشرة

وتسلط الضؤ على كل الزوايا الحادة والمنفرجة وكذلك الحرجـــــــــة .. !!

بغية التغيير والتطوير وإزالة العثرات والإعوجاج

ودعوة للوصول بين النقطتين باقصر الطرق وهو الخط المستقيم .. !!

ويا علاء ( بيجو) شد حيلك .. !!

لك التحية الأخ ود مدثر ..

ونحي فيك هذه الأفكار النيرة .. التى تربطنا جميعا بالهدى ..
الهدى هذا الصباح .. وكل صباح .. يشدنا الحنين اليها .. منتظرين الصور الجميلة الى تعبر عن كل ماهو جميل .. فعاليات .. مناشط .. وحتى الشمارات !!!!
لك التحية وحمدا على السلامة .. الشفناك طيب ..

سلام ياودمدثر فاكي بخورو
وعبدالرحمن فاكي الاخبار الحلوة فكرة البوست جميلة في انها تربط ناس الخارج بناس الداخل ومعرفة التفاصيل الدقيقة عشان نعيش معاكم اللحظة
وياريت ياسيد علاء تدعم لينا الموضوع بالصور

التحيه للشاب ود مدثر ولكل المتداخلين من ابناء الحبيبة الهدي
البوست سيكون أكثر من رائع ونحن سنكون في شوف لفتحه مع شاي الصباح عشان نعرف أحدث الاخبار وكذلك سنغلق به تصفح المنتدي حتي نكون مع آخر الأحداث ونتمني أن يكون شاملا لكل الاحداث.
مبروك بابور المويه للسمانيه وان شاء تكون حلت المشكله في جزء عزيز من الهدي وتحياتنا لابن الهدي د/ سيف الدين حمد عبد الله والذي يعمل بلا كلل ولا ملل من أجل دفع حركة التنميه في الهدي التحيه له ولكل انسان يعمل من أجل خدمة أهله.

جمعه مباركه لكل الأحباب
نتمني أن تحمل أخبار صباح هذا اليوم الجمعه كل جميل وكل جديد وبكون سوق الخميس كان كارب والناس صحو مبسوطين وجمعه بمزاج

الاخ ابو مزن
حمد لله علي السلامه غيابك طال قلنا الزول دي مشي ميدان التحرير ولا شنو
تطرقت لموضوع غايه الروعه نديك خربشات كده
بدون معاناه وبحمد الله جمعنا كل الرياضيين بالهدي و دمجناهم لاجراء نشاط
رياضي وقسمناهم علي اربع فرق . النصر . التضامن , السهم . الوفاق
كان مباريات في قمت الروعه وكل وتم تقسيم الاجهزه الفنيه عليهم
وروح الجماهير هي حلاوة الدوري ويشكلون يوميا حضور كثيف
وكما قال الشوالي العبره في الخواتيم وتم تسليم كاس البطوله والجوائز
ولم نجد دعم وبحمد الله اكتملت الدوره وطلب منا بقامتها كل 20 يوم
ومن انجازاتها ربطت النسيج الاجتماعي بين كل الاعبين والجماهير

موضوع الاتوس البيجو بيزعل منك دي قلب الدفاع فريقو
طبعا ما دعوه للدوره القادمه

متعك الله بالصحة والعافية أخونا عبدالرحمن ،بوست جميل بعنوان يبعث الطلق فى العقول النائمة ،فالصباح رباح تنتعش معه الحياة وترقص على اشعة شمسه الدافئة الاطفال والحملان والسخلان فى براءة ماتعة،فقد ذهب خيالنا مع البيارة الجديدة ورش الشوارع والدبس السعودى ،يرسم لوحة الهدى باشجار ناضرة خصوصا والجماعة تنادوا بفكرة تكوين لجنة لهذا الهدف وبدأ الترشيح بالاخت اعتماد لنفسها (نثنى) والتف حولها الاخ وليد عضو سابق لا يزال الامل فيه عريضا املين ان يتجمع الشباب داخل الهدى بجدية وهمة ونشاط ،نحن ندرك مشغوليات الحياة وتشعبها ولكن اذا فقط خصصوا وقت الفراغ سيكفى لتنفيذ ذاك الحلم الجميل ،ارجو مع تداعيات هذا البوست الرائع ان نشهد جهدا عمليا ،من بعد المسافة وارق الغربة نحييكم ونجدد استعدادنا للوقوف معكم بالدعم والمساندة فكم نتمنى أننا بينكم حتى لا نكتفى بأضعف الايمان

فكرة مية مية اخونا عبد الرحمن وارجو ان ترسل اخبار حلوة من كل البلد مدعومة بالصور ولك منا الشكر الكثير

بمناسبة الدمج دى نقيف شوية مع مراسلنا الجميل ابوريان وفكرة النشاط الرياضى

الذى كان حديث الهدى .. حتى الشمارات وصلتنا هنا بدليل قصة (الاتوس )

جمال الفكرة انو الناس قدرت تتغلب على مشكلة عصية تطرقنا ليها هنا فى منتدانا

بخصوصو العصبية الزائدة فى الهدى وعلاقتها بهدم النشاط الرياضى تماما .. وحتى

لو كتبتت له البداية .. فان النهاية مرتبطة بغبار وكتاحة شديدة وكترة بمبان

جمال الفكرة هو التحايل على العصبية بالرجوع للماضى الجميل من خلال توليفة الوفاق الذى

جمع ... والتضامن الذى تضامن بدليل خربشات بابور النور وثورة الشباب .. والسهم الذى انطلق

ليعيد لنا فرحة الانتصارات .. والنصر الاكيد بعودة النشاط .. ولمة العصارى

وطرينا مشوار العصارى .. واكل قصب السكر .. وتنظيرات الجميع .. وفرحة الهدف

السبت19-2-2011

ثورة بابور النور .. وهمة الشباب .. بالرغم من الطريقة الخاطية للفت الانتباه لمايدور فى الهدى

من تجاوزات وخصوصا فى موضوع (الاراضى ) يعلم بها الجميع .. يضع استفهام حول اللجنة الشعبية

بين تعيينها من قبل الحكومة .. وبين احساس تمثيلها للاحياء بالصورة الصحيحة المفقودة

السؤال العصى عن الاجابة

اللجنة جابها الوالى .. ولا جابوها ناس الاحياء لتمثيلهم ....!!

اللجنة دى عندها مدة زمنية بعدها يكون فى تسليم وتسلم ومحاسبة لاى تقصير من اى

شخص ولا قاعدة كدا الى مالانهاية ...............



اسئلة ساى بفتش ليها لاجابة ... كان عندكم مدونا بيها








الموضوع الاخر المهم


علمت من مصادر فى الهدى ان السيد عبدالله محمد على مستشار الوالى امر بتكوين

(لجنة موازية ) فى الهدى هدفها الاساسى هو موضوع التنمية والتطوير فى الهدى من مدارس

الى مستشفيات ....... الخ


وجاءت اللجنة باسم



( لجنة تنمية وتطوير مدينة الهدى )

يمثلها من داخل الهدى


حسن مصطفى .. رئيسا

مهدى محمد نور نائبا له

الصادق السنى الا مين العام

عبدالملك عبدالله امينا للمال

سامى حمد نائبا له


وبتمثيل كذلك من ابناء الهدى بالخارج

بعضوية سيف حمد .. مهدى عبدالقادر .. صديق المقبول . واخرين

التحية والسلام للاحباب المتداخلين ولكى تتم البهجة فى هذا الصباح الجميل تعالوا نمشى الجامع ونحضر مع بعض قفلة المولد النبوي الشريف ونختم الصباح بمدحة جميلة رائعة
الرجاء من الاخوة اذا امكن عمل مكتبة صوتية ورفع هذه المدائح الرائعه

سلام ود مدثر
ولو ماجيت كان المنتدى يقول
يارائع جفيتني وانا ضائع تعال لي
كويس انك جيت مع طلة الصباح والصباح الباهي لونك
واالبوست بتاعك بقى لينا زي نفحات الصباح بتاع ليلي المغربي الله يرحمها
اول مانفتح عينا وبي واحدة نمشي على البوست الشيق والذي يجعلنا نعيش في الهدى
تشكر يارائع وفي انتظار المزيد
لكن جانا شمار شايلو النسيم انو صاحبك عوض الله والبيجو واخرين
تبنوا فكرة التشجير واجتماع وتشاور
لو عندك مصادر موثوقة حاول جيب لينا شمار كامل الدسم والخضرة

صباح الخير عندكم
شنو ياناس الدار خلا وين اخبار الصباح
ارحكم حجونا اه ناس بندور ننوم نحن باقي وقتنا مقلب مو متلكم

ود خياري صباح الخير
شكلك داخل بنص عين الناس في السودان يا دوبك يدوروا علي الشمارات كدي أصبر عليهم شويه نحن كلنا في الانتظار-ظبط القهوه وصحصح.

صديق طالما مصحصحين مصحصحين
على بال ما يجز الناس ديل نمشى على الماسنجر نشوف شمارات اليمن شنو
ونجيهم راجعين

صباح الخير على الحبان
ومساء الخير على الامريكان
اها يا عبدوش
مسلسل (الاتوس) الجابوه بالزلط وشغلوهو غلط .. !! وصل ياتو حلقة ؟؟
واخبار الدورة شنو ؟؟
وهل من الممكن نتعرف على اسماء اللعيبة المشاركين من كل فريق
عشان ساعة نجى نشجع ما يختلط علينا الاختصاص .. !!
وللا كيييف؟؟

فى ومجهودات مقدرة من اختنا مسرة من خلال دورة تدربية انطلقت هذه الايام

معلوماتنا حتى آلان مامؤكدة عن ماهية الدورة التى تهتم بشان العمل العام وتوعية

الشباب .. ونقل بعض الخبرات والتجارب .. الدورة هدفها الاساسى التعريف باهمية العمل

العام لانه وعى انقرض فى ظل تنامى الانا فى داخلنا ..

عبد الرحمن كيف حالك وتشكر على هذا البوست الجميل اليومين دي تشهد امانة الشباب بالموتمر الوطني ولاية الجزيره حركة مقدرة في تدريب الشباب بالريف قلنا نشيل نصيبنا ن واهتم الاخ مصطفى حامد مدير ادارة التدريب-أمانة الشباب بالمؤتمر الوطني ولاية الجزيرة بدورة شباب الهدى عندما سمع بحركة الجمعيات الطوعية ونشاطها

تم التشاور مع الشباب بالهدى والاعداد ليها وكانت البداية يوم الجمعة الساعة العاشرة بحضور أكثر من 60 شاب وشابة وزاد العدد بعد صلاة الجمعة وبمحاضرة عن ادارة وتطوير الذات ثم التخطيط وكتابة الخطة وزع الشباب لمجموعات اختارت كل مجموعة مشروع كتبت خطتها لتنفيذه ونوقشت خطة التنفيذ المشاريع كانت جميلة واتضح بعد التخطيط ليها انو سهل تنفيذها

الاخت مسرة علي لك التحية وحمدا لله على ظهورك ومرحب بالغاب وجاب وجبتي لينا البشرى والحاجات الكويسه وياريت من ضمن الندوات ان تتضمن وتخصص ندوة لخطر المخدرات والتي أُفرٍد لها اكثر من بوست مع وجود مختصين طبيين ودينيين وآباء لنوير الشباب بالخطر الداهم

اقتباس :

عبد الرحمن كيف حالك وتشكر على هذا البوست الجميل اليومين دي تشهد امانة الشباب بالموتمر الوطني ولاية الجزيره حركة مقدرة في تدريب الشباب بالريف قلنا نشيل نصيبنا

الام قالوا ليها ولدك منو قالت ليهم حباب النافع
فنحن هنا نقول حباب النافع مؤتمر وطني حزب امه اتحادي شيوعي فالهدي نسيج من كل هؤلاء فاختلاف الاحزاب نعتبره رحمة واختلاف الرأي لايفسد للود قضية ولكن السؤال كيف نترجم تلك الرحمة لمصلحة البلدمع احتفاظ كل بما يعتقد
المهم تنمية الهدى وانسانها فلننسجم في بوتقة واحدة تنصهر لمصلحة البلد
والله الموفق

صباح الخير شباب
هات الجديد يا عبد الرحمن
مسره مشكوره علي احياء النشاط الشبابي بالهدي والي الامام
نتمني أن تتنافس الأحزب في خدمة المواطن وكسب وده وتقديم الأفضل
كل يدلي بدلوه والهدف مصلحة المواطن اتنمي أن يظهر نشاط كل الاحزاب في الهدي خدمة لأهلهم.

سلام مربع
تمام يا باشا على الاخبار والبوست تشكراتنا

لكن الشمار الحارقني انا ومابنتظر لحدي ما الجبنه تدور

ديل جنيات منو؟؟

كدي حاول شبه لينا

لو اتصلنا الزريبه هسي بعدوها ليك ضريبه اتصال وضريبه شمار ويكملو رصيدنا كلو ضرايب وفي النهايه كانك يازيد ماغزيت

خارج الشبكه

اسمعني عملتو مجلس اداره والله لسه
هههههههههههههههههههههههه

انا غايتو ارسح ليك الاولاد ديل ليهم علاقه كده كده بعادل
كيف ماعارف
بس العارفو انو في واسطه في الموضوع
هههههههههههههههههههههههه

انت يا عبدالرحمن فى السخيلا ت .. !!

ولا الضفادع الامريكانية الفكاهن لينا عادل ...... !!

المنتدى كلو بقى قعوى( حقت الكواهلة) .. !!

عادل دا اللوترى بتاعو دا تربية مواشى ولا شنو ؟؟

هههه هههه هههه

الاخ عبدالرحمن مدثر لك التحية صاحب البوست الظريف

اقتباس :

نعرج على الخياراااااااااااااااب


جووووه الشبكة

كضبا كاضب
نديك سكة غير اللاعب

الاخ حسن اسماعيل
لك التحية وحمدا على سلامتك الظهور من جديد
وياريت ماتغيب قدر ده تاني

اقتباس :

غايتو ارسح ليك الاولاد ديل ليهم علاقه كده كده بعادل
كيف ماعارف
بس العارفو انو في واسطه في الموضوع
هههههههههههههههههههههههه

علاقتي بتلك البراءة الطاهرة ان كل اولاد الهدى اهلي واخوتي وابنائي
الا انهم لايحملون الاسم العائلي

الاخوة حسن وعبدالرحمن
لكم التحية

اقتباس :

لكن الشمار الحارقني انا ومابنتظر لحدي ما الجبنه تدور

ديل جنيات منو؟؟

ابوعلى ... تحياتى ياصاحب المقام الرفيع ياازرقانى انت

انا ذاتى الشمار حارقنى فى الحتة الا نستعين بصديق

او نتصل بالزريبة الجابو منها السخيلات

الاجابة في نهاية الحلقة خلي الشمار يعشرق ليكم