الاعضاء الاعزاء لكم التحية
ثورة القنوات الفضائية عموماً و القنوات الموجهة للاطفال خصوصاً يختلف الناس حولها، منهم من يراها حسنة ومنهم من يراى مساوئها اكثر من نقعها وكل واحد له مبرراته.
ما ساقني لهذة المقدمة هو اني سالت ابني -10 سنوات - عن جحا فاجاب بعدم معرفته وعندما سالته عن ود نفاش انفقع من الضحك، ولم ازد عليه الاسئلة عن ابو لمبة، الغول، البعاتي تلكم الشخوص التي تسامرنا باحاجيها و قصصها لياليٍ طويلة تحلقنا حول رواتها لساعات لا يقطعها الا مندات ام فلان لولدها - خلاص كفاية الليل اليل- وكنا نتبادل دور الراوي ويقطع علينا نشوتنا عن خفشات ود نفاش ، قصة يرويها احدهم عن البعاتي - من الذين تخصصوا بهذا النوع من الحكاوي و يؤكد انها حقيقة - تجلك تتحسس الطريق الى بيتكم من الخوف و انت جالس معهم لتتاكد من خلوه من اي شي مثيرٌ للريبه، ولكن سرعان ما يتلاشى الخوف بقصة لجحا او تجربة احدهم مع سفرة. تلكم الحلقات كان مسرحها وسط الشارع تحت ضوء القمر ولكن لو كان هنالك كوم تراب ولا رملة تحلي القعدة لان الجميع يكون راقد على الكوم ، وفي الصباح لا يرى من احدنا الا العيون من الغبشة.
الان تم استبدال تلكم الشخوص ب اسفونج بوب، هامتارو، المحقق كونن، توم اند جيري و....و..
واله انا في غاية الحزن على اولادي لانهم لم يلعبوا بالطين و لم يتمرمغوا في ماء المطر ناهيك عن الترعة و السرحة يوم المطر. في راي ان تلكم الايام كانت في منهى الجمال ، حتى لما ظهر التفاز في بداياته كان يجمع الناس ساعة المسلسل او السهرة في احد بيوت المغتربين ولا تحس بتضايق اصحاب البيت من ذلك . الان انتشرة الاطباق اصبح الناس متقوقعون في منازلهم حتى الزيارات الكانت في السبق بين الجيران انتهت وممكن الواحدة ما تشوف جارتها لاكثر من اسبوع تصوروا
اليست هذا مساوي.
الهم رد غربتنا و رد علينا تلكم الايام. امييييين.

الهادي محمد يحيى

سلام يادفعه
شوقنا ليك طال ليت تعود تلك الايام الجميلة ونعود احباب زي ماكنا
من الحكاوي المخيفة ونحن في الاجازة مرة اخونا ود الياس طلع بينا العالي وقال نحن باليل بتقوم لينا اضافرين من حديد وبننهش بطن اي حاجة ونقد بطنها ويوم داك انا قادي لي بطن حمار ميت واكلناه
لو في زول مغالط يجينا بعد العشاء وراء طاحونة ود السماني
انقر تاني مشينا بي هناك من العصر مابنعتب الشارع داك
ودالياس اسه يقوم يقول ليك مابتذكر عادل ده بقى يالف ساي زي اسامة انور عكاشة

صديق السماحة والحب الهادى لك التحية على هذا الإجترار الجميل الذى حركته فيك التضحيات والهموم بمستقبل جيل الغد ، بالفعل هى حياة جميلة وماتعة ،وبسردك الامتع الظاهر عملت تنويم مغنطيسى لأخونا عادل خيارى حتى ذهب خياله الجموح الى صور عجيبة آفروهوليودية ،بصراحة السرحة فى الخريف لها شجون وخمج البقر فى النمرة النايمة وسط القش وطريقة اكله لها إيقاعات لو لقاها ودالحاوى (عبداللطيف خضر) لابدع منها الحانا تدعو للرقص البرىء،كدى شوف لينا طريقة نصحى بيها عادل دا من حلمتو الدخلتو فيها دى ما يقوم الصباح بكرة مرعوبا من أظافرنا الحديدية ونحن ما جايبين خبر

اولاد الفعة الافاضل لكم التحية
الاخ الكريم عادل خياري لك التحية وانت في بلاد الغربة الجد مو لعب، تصارع في صعاب الحياة وتصطلي بنار الحنين للوطن الجميل بظرفيه المكاني و الزماني، نتمنى لك التوفيق دوماً، و زي ما انت عارف ان اشواقنا ليك تراكمت بطول السنين و بعد المسفة حتى نئنا عن حملها على الرغم من قوتنا، و حسبنا ان اطلالك الجميل من خلال صفحات المنتدى بخفف عنا، لكن صرنا كالمستجير من الرمضاء بالنار. اكرر لك التحية و للاسرة الصغيرة و الكبيرة ولاخونا صديق و لكل رفاق الزمن الجميل الذين تفرقت بهم سبل الحياة في اصقاعٍ متفرقة.
الغالي دوما ود الياس بنشتاق ليك و انت معانا،
تعقيبكم (عادل ،ود الياس) على خربشاتنا تكسبها قيمة و تجعلنا نعيد قراءتها لنتحسس ما اعجبكم فيها فنعجب به. لكم التحية و التجلة.
اخونا عادل دة قطعت قلبو. وبتكون انت عملتها يا ود الياس، ولا يكون صاحبنا عادل ده بشاهد افلام الخيال العلمي دي و حلم به بالليل. لكم التحية ثاني و ثالث و الى مالانهايه. ونتمنى عودة الزمن داك

نحييك اخى الهادى على هذه الاتكاءة الممتعة على جدار الذكريات الرحبة ..

وجعلتنا نرجع البصر كرات ومرات على تلكم الايام الخالدة والتى لن تمحوها ضراوة السنين ..

كل الفريق يحتشد فى بيت واحد لحضور المسلسل ..

ممنوع اكل التسالى يا شباب .. التسالى بتعبنا الصباح فى الكنس ..

كل واحدة تنفش ليها شوية قطن ..( نوع من الاستغلال الظريف لست البيت )..!!

الهجرة لمسلسل (ادهم ) مابين المجمع والقسم ..

الذهاب كدارى وجريا لحضور منافسة كرة القدم القوية بالعقدة بين نادى الهدى وفريق الوطن ..

يا هادى شباب الاسبيس تون هؤلاء لهم الله ..

تختبرهم بودنفاش وجحا ؟؟ انت ماشى بعيد لييييه ..

لكن نحن نعيبهم والعيب فينا .. ونحن نقضى سحابة النهار كدحاً وجرياً ونحتاج لبضع ساعات من الليل

استعداداً ليوم الغد .. فبالله عليك كيف لنا ان نجالسهم ثم نحكى لهم اقاصيص جحا وودنفاش ..

فلندعهم مع اسبيستونهم .. ولا نعتب عليهم عدم معرفتهم بودنفاشنا .. !!

.

.

تخريمة :

كنا قد طلبنا منك خربشات فى ذاكرة الرياضة والتضامن والنادى الكبير ..

بدون الردود تجف المواضيع
حكمة بليغة ولا جفف الله لك موضوعاً
الاخ الرائع وليد التلب
على الرغم من الجري الكتير لكنك تثري المنتدى بمواضيعك الظريفة و الهادفة.
لك التحية وشكراً على مرورك ( على فكرة المزارعين زمان كانوا بخافوا من مرور المفتش) لكن مرورك بفرحنا
كنا حسبناك من جماعة الاسبيستون طلعت من زمن الرجل الخارق ومسلسل القافلة.
والله ذكرتنا حاجات نحنا نسيناها، محازير اكل التسالي وقشر الفول.و الاطفال البنوموا اثناء المسلسل و التعليقات الجانبية حاجات جميلة في زمن اجمل على الرغم من كثرة الحضور الا ان الرحابة موجودة من ناس البيت و النفوس متطايبة .
لك التحية مجدداً اخي وليد

جميل جدا هذا التفاكر والتذكرة بالزمن الجميل
وزمن التواصل وكل الناس اهل والماهم قراب قربهم
العمل .
تخريمة وليد دى ما تضاهها خش لينا فيها
واطلق للقلم العنان ووثق واحكى لناس الاسبيس
تون . اسبيسكم بتاع الكورة .
وكيف كانت الهدى على عهدكم .
لك ال

اسبيس تون عباره عن حلقه صغيرة من الغزو الثقافي والفكري للمسلمين والجميع يعلم ذلك
الشؤال كيفية التعامل معها؟؟

تحياتي لك اخ الهادي واسرتك الكريمه وجميع المتداخلين ضحكتنا جدا من مداخلة عادل حتي تعجب ابنائ من ضحكي سيدنا علي كرم الله وجه قال علمو اولادكم لزمان غير زمانكم سوف ياتي زمان نتاسف فيه علي اسبيب تون وجيري هي عجلة الزمن تطوي كل جميل اين نحن من ودنفاش وجحا نحن في زمن التيك اوي اصبحت هموم الحياه تنسيك نفسك ٠اللهم ارزقنا حسن الخاتمه٠مع ذلك نجاهد لكي نربي تربيه اسلاميه سمحا٠ودمتم

محمد الجيلي الشريف محمد كتب:

اسبيس تون عباره عن حلقه صغيرة من الغزو الثقافي والفكري للمسلمين والجميع يعلم ذلك
الشؤال كيفية التعامل معها؟؟

اى حاجة عندكم غزو ثقافى وفكرى ؟
انت فاكر الغربيين ديل فاضيين ليكم عشان يغزوكم ؟
بعدين تعال انت وينها ثقافتنا نحن ؟
اين تقدمنا نحن ؟ انت لو ما قادر تبدع وتتقدم فلابد لك من ان تقبل ثقافات مفيدة لك ولوطنك
بعدين اسبيس تون مالها جيب لى عيوبها ؟ ما احسن من جحا وحماره وود نفاش دخل القراش والحاجات المن سنة اسكت دى
نحن فى عصر العلم والعلوم والتكنلوجيا وهى لغة العصر
وكل هذه الثقافات لم تتدخل فى العقيدة التى هى شأن خاص بين العبد وربه .. لم تقل لك هذه الثقافات كيفية التعامل مع عقيدتك
لابد اذا اردنا ان نواكب العصر ان نعترف بجهلنا ونتعلم وما ضرورى المعلم دة دة يكون بي سبحة ولا خواجة كافر طالما لا يتدخل فى عقيدتنا
لك كل الود

لك التحية الهادي ..
على هذا الطرح .. عقلية الأطفال تغيرت .. بتغير الحياة من حولهم .. لم يعدوا هم صغار وفي حاجة للأحاجي .. وقصص ماقبل النوم .. لأنها تأتيهم طازجة من قنوات متاحة لا يخلوا بيت منها .. وهي فيها فائدة وفيها مضرة .. لأنها ملهاة للأطفال وأحيانا يكون هنالك تقصير وتكاسل في أداء الواجبات .. سوى مدرسية او داخل البيت او عبادة .. اما جحا .. والغول .. فأنسى لأن هذه لنا نحن وأنتم ..
المشكلة حتى تاريخ السودان وحضارته .. في ظل الغربة اصبح غير معروف بالنسبة للإبناء .. وهنالك كثير من الجامعات السودانية حاليا بدأت تدريس مقرر في الجامعات ( سودانيات ) خصوصا لإبناء المغتربين في الدول الغربية وأمريكا كشرط النجاح فيه حتى يلتحقوا بالجامعات السودانية .. المسألة معقدة أخي الهادي .. اكبر من اسبيس تون .. ولكن الربط هو المهم .. ربط الأبناء بالوطن يعلمهم الكثير الذي لم يتعلموه في اسبيس تون وأخواتها ..

والله لو في عيب ولوم
نعيب ونلوم ماسكي ملف الثقافه في بلدي
من حق اطفالنا تكون لهم قناه فضائيه خاصه سودانيه
وتعال بعد داك اسالهم اي سؤال فستجد الاجابه اكييييييييييييييييييييييييييييييييييييييييييييييييد

حسن اسماعيل كتب:

ن حق اطفالنا تكون لهم قناه فضائيه خاصه سودانيه
وتعال بعد داك اسالهم اي سؤال فستجد الاجابه اكييييييييييييييييييييييييييييييييييييييييييييييييد

حتى لو خصصت لهم قناة ياحبيب يا حســن .. سوف تقدم فيها شــنو ؟ برامج موجهة ؟ وآخرتها سوف تقدم توم اند جيرى .. وبينك بانزر ..
طيب ايش استفدنا ؟

طارق مامون كتب:

حسن اسماعيل كتب:

ن حق اطفالنا تكون لهم قناه فضائيه خاصه سودانيه
وتعال بعد داك اسالهم اي سؤال فستجد الاجابه اكييييييييييييييييييييييييييييييييييييييييييييييييد

حتى لو خصصت لهم قناة ياحبيب يا حســن .. سوف تقدم فيها شــنو ؟ برامج موجهة ؟ وآخرتها سوف تقدم توم اند جيرى .. وبينك بانزر ..
طيب ايش استفدنا ؟

اكيد ياحبيب بما انو قناه سودانيه لازم تكون 80% من البرامج سودانيه بحته