مدخل :
بحب الحكومة وبحب الرئيس
بجرتق سوادم بجامة عريس
بلتق بصرصر بشك القميص
بخالف قواعد تشاتر تباعد تلوك الرخيس
نص :
ما تتدسدس خلف خوادع جبة زيفك
ما تتكدس تملا كروش الشارع خفة وتفرد كيفك
شكر شرف الروح الشاخت صغرت داخت زكي نزيفك
زحزح منك دنس افكارك أول طيشم كش وصيفك
بعت ملاذك بي ضل غيمة
وحفنة بذرة تساوي خريفك
فك من حنكك قيد الذمة ولتق جورك من نتيفك
قدم جلدك وقرفة أنفك شبع ضيفك
وما تتونس
ما تتجلس كيف تتملس وإنت المطر الشافع مارق أمك فلس
جلبط عشم الذات بي ضيمو وطينو ملكك ما بتحنس
رقع عافية شوف أحلامك
بي أنسامك
شاور نفسك نقي كلامك
عمرو سؤالك لي ذات نفسك ما بتنفس شهد مرامك
طبطب وجعك مركز نجعك ركن إيلامك
وأعرف نفسك قبل تعرف بعضك منك جنبك سنك كل البرشفو خط أقلامك
وأكتب سطر
عن مرؤوسك
مالي كؤوسك
هادي نفوسك
ضحك عبوسك
حب إسلامك
أكتب رقص حرفك نقص هاود بقص مدح ملامك
وشوف قدامك
ما تتعتر لا تتبخر أو تتشطر إن تتبعثر برضو بلمك طيف انسامك
وأنا بتذكر إنو سمعتك وإنت بتصرخ في بهتان الزيف وتقاوم
إنك ضد الضد الفينا كيف بي صدك عادي تساوم
كيف بتسلم جيد العتمة الضو الباهت وكيف تتوانى وكيف بتداوم
كيف تتمارق داخل برة وكيف من جوة بتدخل جاي
يا عجلاتك وإنت بتركب سرج السكة مغمض ساي
ويا غيماتك ساعة صبن في واديهم صه الناي
حبو رئيسك حتو رقيصك سطر بوحك بالدوباي
يا مفرور من طاقة عزة ليه بتشخبط زين كراسك مارق راسك من ضل عرضك بيك وداي
شرفك اطعم رشف الحنضل من يتسكر وهم الشاي
شيل اسفارك وطول تسفارك خت أفكارك فوق اسوارك أعقد الهمة وشد الراي

حب رئيسك

رئيسك..
لا يخفيك..
ويصبح حبك..
مش على كيفك
بس عشان
تلقى رغيفك
....
شكرا القامة سراقة