الحمد لله الذي انشأنا في الهدى والتي تربينا فيها على الجماعية والتكافل والمؤازرة ويظهر ذلك جليا في المناسبات فالكل اهلك واخوانك
وتجد بعض البيوتات معظمها تتجمع في صالون واحد خصوصا ايام الجمع بعد الصلاة فكل جيران في الحي ترى الصواني تتجمع من البيوت القريبة لتتجمع في صالون فلان
نشانا هكذا على المشاركة في الاكل وعيب ان تأكل لوحدك من غير اسباب
المهم بعد هذه المقدمة بعض الاحيان ان لم يكن لدي وقت للاكل في البيت فبل الذهاب للعمل اخذ معي ماجادت به ام الطيب واشرك من معي في الاكل والجود بالموجود وذاك اليوم كان الغداء ملوخية بي كسرة اكل سوداني خالص وقدمته عن طيب نفس للخواجة الذي يشاركني بعض الاحيان
وقال لاحدى الخواجيات البيض ام عيونا خدر الراجل كل مرو بجيب اكلو من البيت ويقول الا نشاركو فيه تحبي تاكلي معانا قلت ليه جدا
اجرب الاكل السوداني
يابت الناس اكلنا اليوم مابتعرفيه ولا سمعتي بيه ماتقومي تجيبي لينا قليلة ساكت
فالت لا الا تجرب
ونزلنا الملوخية وشرحنا لها كيفية التعامل مع الكسرة وتغميسها في الملاح ولو حريفة تلف ليها لحمة بي جوة
المهم ختينا الاكل قدامها بالاول وانتظرنا نشوف النتيجة قلنا ح تجرب بي لقمة وتقول مادنفعت معاي ومادايراها
قومي يالخواجية اقعي لهط واسرحي بي وشك لدرجة شفقنا انها ح تكملها علينا
ورفعت ايدها بعد سل روح وقالت دي حاجة جميلة وطاعمة جدا
وسالتها حلوة ملوخيتنا ولا بيرقركم
قالت دون تردد
ملوخيتكم
[ندعوك للتسجيل في المنتدى أو التعريف بنفسك لمعاينة هذه الصورة]
عاين الخشم ملان كيف تقول فايتة فيها جوعه
[ندعوك للتسجيل في المنتدى أو التعريف بنفسك لمعاينة هذه الصورة]
المرة الجاية حقو نجيب ليها ويكاب بتول

هههههههه
ما تقول لي يا خال جاتك تاني يوم طايرة تقول ليك Do you have Malwkhya
لانو كدا حتكون جنت على نفسها براقش
و مالو جيب ويكاب .... ولحقوا بعد كم يوم ملاح روب ...وبعدو .......وبعدو ....... زي ما علمونا اكلهم خلينا برضو نعلمهم أكلنا ..... والله يكون في عون أم الطيب .....

لكن التوثيق بالصور عجبني جدا .....

سلمت وعوفيت

الأكل عادات يا أخ عادل .. وطبعا دائما دعاة الحداثة يحاولوا يدخلونا في فلكهم .. حيث البيرغر .. والوجبات الإسناك والتيك اوي ..
ملخويتنا اكيد مافي زيها .. طعما ومضمونا .. والدليل ماقالته ليك الخواجية .. إنها لذيذة وطاعمة .. وأخشي المرة الجاية تطلب منك كمونية .. ومرارة وشطة بي دكوة ..

دي ما مشكلة يا سيد طارق
المشكلة كان خشو في برنامج ام فتفت
هنا العوجا ,,,,,,

شكرا ابن اختي احمد على المرور
والتعليق الذي احلى من البيرقر زاتو
لكن ناسك ديل لو باريناهم بقدوا حلتنا

سلام ياسيد طارق
لك التحية وتشكر على المرور والتعليق

اقتباس :

وأخشي المرة الجاية تطلب منك كمونية .. ومرارة وشطة بي دكوة ..

ياخوي دي حاجات مابتمرق من البيت
نحن زاتنا نفسنا فيها خلي الخواجات

والله لكن بالغت عديل كده:

أولاً: في الجراءة: أن تقدم ملوخية لخواجية!.

ثانياً: في نقل الصورة الحية: أنا إفتكرتك بتمزح لمن قريت الموضوع؛ لكن لمن شفت الصورة اقتنعت عديل كده.

وفي رأيي أن هذه مبادرة طيبة، تعكس التواصل بين الثقافات.

انا شخصياً معجب جدا بهذه المبادرة.

اقتباس :

المرة الجاية حقو نجيب ليها ويكاب بتول

يا حبيب
لا بعد دا دايره
تقول ليك انا ماشه السودان

احمد محمود الضو كتب:

هههههههه
ما تقول لي يا خال جاتك تاني يوم طايرة تقول ليك Do you have Malwkhya
لانو كدا حتكون جنت على نفسها براقش
و مالو جيب ويكاب .... ولحقوا بعد كم يوم ملاح روب ...وبعدو .......وبعدو ....... زي ما علمونا اكلهم خلينا برضو نعلمهم أكلنا ..... والله يكون في عون أم الطيب .....

لكن التوثيق بالصور عجبني جدا .....

سلمت وعوفيت

الويكاب هو الطرد بعينه
زلا ما كدة ياعادل
حاتموت من الضحك لو سمعت قصة الويكاب وناشيرة الخروج فى السودان

الحبيب الزبير
لك التحية وتشكر على المرور
قد قرأت الخواجية تعليقك بعد ترجمته عن طريق قوقل
واعجبت بفكرة التواصل
وتشكر لك تعبيرك

الاخ عادل يعني عامل ليك بهناك ضرى.
وبعدين تغش علينا تقول خواجية الاخت طلعت من السودان شوف فنيلتها مكتوب عليها السودان. يعني لوحاتها سودانية.
ما تباري لي الخواجات, ديل ما عندهم قشة مرة، انا بشوفهم في التلفزيون في ادغال افيقيا يكابسوا مع الافارقة في الاكل كانهم مولودين هناك انت كا ودوك هناك تموت من الجوع.
ملوخيتنا ما عيزه شهاده من الخواجات اكيد طاعمه.

والله أنا أشكرها علي الشعور النبيل.

في مجتمعنا هناك رؤي تُصور الغرب وأمريكا بعيون ظلامية . هذه الرؤي رسبتها المواقف الرسمية في الدول الأوروبية وأمريكا.

ولكن المجتمع الغربي غير ذلك، هو مجتمع مشبع بقيم الكرامة، والحرية، والعدالة، وحقوق الإنسان؛ وهذه قيم لها جذور روحية داخل ديننا

الحنيف؛ ولكنها للأسف لم تجد طريقها للواقع إلا في فترات معينة.

الغرب ليس كله شر. في الغرب قوي معتدلة تُدرك الخطأ الذي تقوم به الحكومات الغربية من احتلال، وهيمنة ثقافية، ودعم جائر للكيان

الصهيوني علي حساب الشعب الفلسطيني.

يجب علينا أن نبني علاقات مع هذه القوي العاقلة حتي نستطيع نحن وهم أن نُشيَد عالم تسوده المحبة والسلام.

ولكن الساحة الدولية إذا تركت للمحتلين منهم، والمتطرفين منا سنشهد في مقبل الأيام عالم ظلامي يسوده العنف والإقتتال.

فلنستفد من حضارة الغرب ما يُلائم موروثاتنا، وليستفد هو من حضارتنا البعد الروحي ليُشبع حضارته المادية، وليكن بيننا الحوار لا الصراع حول القواسم المشتركة لبناء

نسق حضاري يحفظ للكل خصويته الثقافية، ويجمع بين الكل في المشتركات العامة.

ولنا تواصل