الشاعر الكبير حسن الزبير له قصيدة طريفة

والتى منشأها شاكوش حار جدا اصاب راس الشاعر او من صور له الابيات , ولكن الارجح انه هو صاحب الشاكوش وذلك إثر صدمة عاطفية من المحبوبة التى نظم لها حروف اللغة عقداً يزين جيدها .. ولكن كافأته بان انحازت عواطفها لاحد المغتربين ..

ونظم قصيدته التى يقول فيها :

ان شاءالله القيامة تقوم
عشان ريدك معاي ما بدوم
ناس سهرانة طوالي
وناس طول الليالي تنوم
أشوف انا كيف حسابك يطول
على الوعدالدوام ممطول
وانا الشايف كتير أحباب
بعيشو الريدة عرض وطول
أنا الشايل دوام همك
وأريدك ريدة زي أمك
وأغير من غيرتي زاتا عليك
أخاف أنا يا الخفيف دمك
ان شاءالله القيامة تقوم
وكل زول يمشي في حالو
عشان ما قلبي يرجع يقول
حبيب الدنيا في بالو

وعندما سمع بالقصة والقصيدة صديقة الدكتور / احمد فرح شادول

نظم هو الآخر قصيده رداً على حسن الزبير بعنوان :

إنشاء الله الحســـــــــادة تطير ..

ان شاء الله الحسادة تطير
وتمتد السعادة تدوم
والضاق العذاب في الريد
بكرة يعيش ويشبع نوم
وتقول القيامة تقوم؟؟
عشان حظك شقي ومشئوم
وفتحن ليك بنات حواء
وجافاك ليلة واحدة النوم
بتقول القيامة تقوم؟؟
أنحنا لا عرفنا الريد
ولا زيّك عشقنا الغيد
وحبينا القريب وبعيد
وراجعنا القديم وجديد
ولا ضمانا حضن الليل
مع الوجه البهي وغريد
ولا لليل شكينا حبيب
اذا حتى العشقنا عنيد
ولا نظمنا في الحلوات غنا وموال
درر وقصيد
ولالينا بن عوف غنا
لا الصابر ولا الباكي
خيالِك عندي يوماتي
صباح خيري ومساء أفراحي
أعد ميعادو باللحظات
وسهري معاه صباحي
عيونِك فوق عيوني تنوم
وفوق آلامي ترتاحي
وريدِك من عواتي الريح
المو وأضم عليو جناحي
وتقول القيامة تقوم؟؟
أنحنا مع السعادة نسير
مواكب فرحة هادرة هدير
نحيا نحب نعيش ونغير
ونعلن ثورة التغيير
ناكل حب
ونشرب حب
ونلبس حب
ونفرح بالمحبة نطير
نعيش الريدةعرض وطول
كبيرنا ملك صغيرنا أمير
وتسمع صوت هتافنا يجيك
ان شاء الله الحسادة تطير
وتكبر وتنسى يا زغبير

رد عليه حسن الزبير قائلاً :

ان شاءالله القيامة تقوم
وعشمي في الله ما شويّة
أدخل جنة المأوى
وهناك يدوني حورية
أتكي في الارائك أنووووووم
بكل حبور وحرية
وأرتاح من ده مافي وقوم
وأمش جيبلي وجيب ليّا
أفارق دنية المعدوم
والقى مطالبي بالنية
ولوحنيت للحم الطير
تجيني الطيرة مشويّة
عشانك كيّة يا دكتور
تكون حوريتي خمرية
تجرجر ديسا ده المردوم
ولهجتا خالصة عربية
أخلي ليك بنات حواء
تحاحي صباح وعصرية
وتبقى عواطلي يا دكتور
هناك لا مرض ولا شكيّة
هناك لا أذن سمعت
ولابعيونا مرئية
هناك حتى الرحيق مختوم
وولدان طائفة دوريّة
لا عشوائي في الخرطوم
ولا صفقات تجارية
صفي النية يا مهجوم
بلاش هجمات هبوبية
وان شاء الله القيامة تقوم
وتنجح مية في المية

رد عليه شادول ايضاً :

ما مقبولة اعذارك
وما معروف مصيرك وين
وماهي صالح اعمالك
عشان يدوك حوراً عين
لو انت على الصراط ماشي
وشركوا ليك ببنية
حا تختل كل حساباتك
وحا تحتل حتلة ابدية
أما لو ضرب حظك
وجابوا ليك بنات الحور
تموت واقف على طولك
ويشيلك حيلك المشلول
وتتلفت يمين وشمال
مشدوه بالجمال مبهور
وتحتار باقي عقلك طار
فيمن يهوي او يختار
ديك قواما سمهر وطول
وديك دعج العيون مكحول
وديك جمالا يسبي عقول
وديك من فيها حلو القول
ودييييييييييييييييك خليها لي شادول
وديك شعراً كمان خلي
قدر ما يزيد نعومة وطول
عذابنا وليلنا فيه يطول
وديك خشيما بنقط كلام معسول
تقيف مشدوه وتفوت القيامة عليك
واقف انت تتلفت طرب وذهول
حسن دنياك للزي ديل
وديل يا صاحبي هم دنياك
يودّنك ويجيبّنك
ويختنّك ويشيلنك
يجلبّنك ويبيعّنك
يغسلّنك ويشرّنك
ويدفنّنك ويكتلنك
يقيدو النار يشدّنك
ويبرن عودك المسلوب يحرقنّك
تفوح انت ويزيد دنّك
وتغني الدنيا بي فنك
ده حال الدنيا
ما بتدوم
مرة تلام ومرة تلوم
ويوم تتعب
مرة تحب وتشبع حب
ومرة تحب وما تنحب
حسن خليهم السمعوك وارجع لحلو كلامك
معقولة القيامة تقوم
قبل ماتلقى احلامك

عمر خليفة تشكر على المرور الجميل ..

وفعلا هى مساجلات فيها ما فيها من اريحية الزمن الجميل

والمغترب وقتها كان حكاية ورواية ,, بعباً مخيفا لكل قصص الغرام الخفئ وحتى المعلن ..!!

وحرارة الشاكوش تتناسب طردا مع عمق العلاقة .. !!

تخريمة :

شكلك كدا مريخابى قاعد فى مدرجات الهلال

[ أخونا وليد ياجميل ياراقي إحساسك
لك التحية
إنشاء الله الحسادة تطير وتجينا السعادة سيول
ونعيش الفرح أنسام علي مد العرض والطول
بالمناسبة انت زول راقي ولو ما راقي برضو راقي
مشكور علي علي الوصل الجميل







خالص الود

عصام يا عصام يا حرف ال( N )

نعم

انشاء الله الحسادة تطير

وكل عاشق فى درب الريدة يسير

ونكمل معاً ثورة التشجييير

ونعمل للعاشقين ضلاً كبير ووفير

بس

أوعك تقطع صفقة شجرة .. !!

انشاء الله القيامة تقوم
دا زعل شديد

عوض خيارى كتب:

انشاء الله القيامة تقوم
دا زعل شديد

يا عوض لكن عليك الله الشاكوش ما بزعـــــــل ؟؟

فى احدى مسرحيات فرقة الاصدقاء

سئل محمد نعيم سعد وكان حينها قد اخد شاكوش جامد , عن ماذا يريد ان يفعل ؟؟

قال : بعد كدى بسس الواحد يربى دقن ويشرب العرقى .. !!

يا سلام يا سلام وبس

نحييك مصطفى على المرور الجميل

ولماذا توقفت عن سرد الذكريات والقصص الجميلة ؟؟

واصل ابداعاتك ومتعنا ..

سلام ياوليد تشكر على المساجلات
كلام جميل من ناس مسؤلين حضرت اللقاء من التلفزيون مباشرة
وكانت حرم الدكتور موجودة وسالها المذيع اذا كان عندك بنت ح تزوجيها لي دكتور ولا شاعر
قالت ليه اصلا ما ازوجها لشاعر ح يجننها دكتور وبس

عوض خيارى كتب:

قال : بعد كدى بسس الواحد يربى دقن ويشرب العرقى .. !!

يدفن دقن ويلبس العراقى

تدفن دقن وييييييييييين

ماخلاااااااااااص

دفن الدقن يعنى الاعتصام .. !!

عادل خياري كتب:

سلام ياوليد تشكر على المساجلات
كلام جميل من ناس مسؤلين حضرت اللقاء من التلفزيون مباشرة
وكانت حرم الدكتور موجودة وسالها المذيع اذا كان عندك بنت ح تزوجيها لي دكتور ولا شاعر
قالت ليه اصلا ما ازوجها لشاعر ح يجننها دكتور وبس

كلامها صاح ياعادل لانو الشعر الزمن دا بقى مابأكل عيش حاف .. !!

والمساجلات جميلة جدا وخصوصا لمن تسمعها من دكتور شادول ومايمتلك من جمال السر والإلقاء

الاخ وليد يديك العافية علي الكلام الجميل ودائما متالق

خالد ملك الدار كتب:

الاخ وليد يديك العافية علي الكلام الجميل ودائما متالق

نحييك خالد على المرور والتعليق

وبكم تكتمل حلقات الابداع وترتسم دوائر الالق ........

اشكر صاحب هذة القصيد وليد التلب واتمني له التوفيق والسداد في هذا المنتدي

وضاح صلاح كتب:

اشكر صاحب هذة القصيد وليد التلب واتمني له التوفيق والسداد في هذا المنتدي

نحييك وضاح على المرور

طبعا هذا شرف لا ادعيه.. !!

والقصيدة لشاعرنا الكبير حسن الزبير والذى تغنى له عمالقة اهل الفن ..

والمساجلات والمجادعات مع الدكتور الشاعر احمد فرح شادول ..

انشاء الله القيامة تقعد

القيامة لو قامت هسة مشكلة كبيرة
وليد كلمها قول ليها أديها ضنة ما جاهزين لسة

واللة اعلم ءأكون في واحد جاهز للقيامة علي وش الارض .
العوج كتير لان الصبر سمح؟