احلي حاجه انك تنوم وتصحي تلقي ليك قروش بالهبل راجياك
جات من وين
ده ما يخصك
المهم في الزمن ده لو لقيت ليك جنيه ( بالقديم) حتتبسط لمن الجنيه يكمل
زمان كنا بنسمع بالخصخصه ساي كده
مؤسسه تتباع
واخري تتحل
وتانيه تجري مفاوضات حول سعرها
والشعب بتاعنا ولا هاميهو
اكيد مايهمو
لانو ماحيضوق ولا قرش
ده اذا عرف اصلا البيعه تمت علي كم
اها اهلي الغبش في ولايتنا الحبيبه الايام دي كلامهم كلو حول بيع المشروع وسعر الفدان
زمان كان خط احمر حكايه تقول داير ابيع فدان بس خلي كمان مشروع بحالو
هسي الشعب ذاااتو بقي اسرع من الحكومه في البيع
والله لو صبرت حكومتنا شويه
كان شعبنا برااااااهو جاب المستثمر للدوله لحدي عندها
ووفر عليها حق الاقامه والاعاشه وعشاء العمل وعربات المرور والنجده
الدوله واهالي الولايه الان بتفاوضو حول سعر الفدان
الاهالي قالو 3 مليون
الدوله قالت مليون ونص
ماعارف اذا كانت الدوله بتقدر ترشي الاهالي والله الاهالي حيرشو الدوله
المهم المفاوضات جاريه
والفدان سعرو بقي زي الدولار
مره بتلاته
ومره بالف نص
لاول مره يتفق الشعب مع الحكومه
الاتنين اتفقو علي بيع المشروع
والاختلاف هنا اختلاف ليس بجوهري
يعني اختلاف تباين في طريقه البيع بس
واختلاف كمان صغيروووووني حول سعر الفدان
لكن تاني كل بنود البيع متفق عليها
الناس بعد ماضمنت انو البيع خلاص اتفق عليهو
مشت تفتش في الكروت القديما
والحكاوي كلها بقت عن جدي وجدك
وعندك كم كرت
واديني كرتك ابيع ارجع ليك
الناس الغلابه فجاءه كده اتحولو لسماسره
سماسره كبااااااااااار كمان
سماسره في اكبر مشروع فيك يا افريقيا
سماسره في اقتصاد بلد بحالو
وانا من زمااااااااااااااااااان كنت فاكر السمسره دي يعني بالكتير تتوسط ليك في بيع عربيه
تجيب شاري لقطعه ارض وتاخد الفيها النصيب
ايجارات
شقق مفروشه
وكده
بس سمسره بالمستوي ده والله ما سمعت بيها
ده انا طلعت اي كلام ياجدع
مساحه المشروع يمكن تساوي مساحه تلاته ولايات سودانيه
والسودان فيهو 26 ولايه ( بالقديم)
ناتج القسمه بطلع معاك ب 8 وحاجه كده
يعني تمن مساحه البلد
يااااااااااااااااا الله علي دي لعبه
واكييييييييييييييييد ده لعب محترفين
زي اتوبونغ وتوريه
احتراف علي مستوي
اديكو ده في الاحتياطي ما بنلعبو
احتياطي شنو ياباشا
ده والله الكوره من القون مابنخليهو يجيبا
والله جنس فضائح
القاعده عندنا بقت ثاااااااابته
تم الاربعين وتعال العب في العرين
اعمامك لو شفتهم بالجلابيه تقول مستثمرين بس
لو قلت سماسره السماسره حيزعلو كده
اهو في النهايه كلو عدم تخطيط في عدم تخطيط
وانا اللي كنت فاكر انو الناس حترفض وتلقي ليها سبب جتااااااااااااااهز لثروه هههههههههههه
شكلو كده لاول مره اهالينا ركبو الثوره ماسوره هههههههههههه
احسن برضو
يعني الجديد في مصر وتونس واليمن شنو
بالعكس
ماشين لاسوا
جبتك يا عبد المعين تتعان
لقيتك ياعبد المعين عاوز تتعان
الايام دي كلام الاسره كلها حول الكرت ابو الف اللي ظهر لينا فجاءه ده
اخوي الصغير اول حاجه فكر فيها انو نبيع بيت العائله ونمشي نسكن المنشيه
وتااااااااااااااااااااااااااااااني جبنا سيره البيع
وفي المنشيه كمان
شكلو المنشيه دي حتكون مصنع لجيل جديد من السماسره
جهزو لي العقال انا بس

للفقيد الرحمة ولأهله بئس العزاء

اللهم اسكنه فسيح جناتك واغسله بالثلج والماء والبرد . وتشكر أخي حسن علي طريقة السرد الممتعة ولك ودي .