يامن حببت وماحصل حباني


يامن حببت وماحصل حباني
ماكان في داعي تقفلوا البيباني
حبيتكم حباَ يؤجج أضلعي سجلته بالفحم في الحيطاني
أنا دقلش ومدقلش ياحلوتي ماكان في داعي تكسروا أسناني
أنسيتي فعداتي مقاصد بيتكم متفرجخاَ في عتبة الدكاني؟
راجيكي تفتحي بابكم في مرة وأراكي حائمة وبالفستاني
أو تكشحي موية الغسيل بجردل ياجردلاَ شالته أحلي يداني
أو تندهي لأخوكي من شارع الزلط وأخوكي كبسة معاك في كل مكاني
أنسيتي قعداتك في حفلات العرس مدهونة ملفوفة التيباني؟
وأنا هناك مصنقر في زاوية ومفهي فيك مشحط العيناني
ويقوم مفعوص يلولو وسطه يدعوكي للكاروشة في الميداني
وتظلي ترقصي في السباتة بكشفة وتوزعي البسمات بالمجاني
والكل سارو ثم ثاروا ونططوا مثل الزريبة مليئة بالحملاني
لملمت الكراسي كلها وردمتها واطلقت فيها حارق النيراني
كوركت ياناس المطافي تعالوا النار امتدت الي الصيواني
حتي اذا ناس المطافي ماأتوا كوركت ياناس المطافي ثواني
في القلب نيران وفي المصراني ألغام فلتطفئوا النيران من مصراني
ولتأمروا هذي البنيّة تحبني مادام أبت ريدتنا بالإحســـــــــــــاني
مـادام أبت ريـدتنا بالإحســاني

تغزل في السستر
المتجهجه الأممي

أنا العيان
حرارتي الضاربة فوق ميتين
و لا بينفع بخور تيمان
ولا بتنزل بنوفالجين
رقدت سنين
سريري تعب
مركب فوق وريدي درب
تعب و رعب
جحر عيني يدخل فارة أم سيسي
و أجرجر نفسي بالسيسي
أتقول مخنوق
مصنقع فوق
و كل ما يوم يشيلوا الدم
يزيدوا الهم
يقولوا مقاسو طالع كم.. و طالع كم
و أنا الساكت و غالبني
و غالبني
محل ما أشوفها أتكلم
و ما بسلم
و حاكي البلي و الشمبر
و كان قمت
بقع في السلم أتكسر
عشان تظهر
تمر بسراير العنبر
و تاخد نبضي بت سستر

عيونها الزي عيونها براها
تطعن بالإبار مرضاها
و إبرة ترك و في منديل
وما بتتعب
تكركب في البلاط كركب
وقلبي يدق يسو رب رب
و ناري الليلة تتعلق
دا عنبر كم؟ و شايل كم؟
دكاترتو كم؟
و فت سستر؟؟؟

تجهجه في خلايق الله
و أنا العيان
حرارتي المابية تتدلى
أدوش دوشة
أهضرب هضربة زولا
رقد في برشو خت رويسو فوق بنبر
و لما الناس تقول هستر
وتتغالط.. أظن هستر
أظن دفتر.. أظن بامية.. أظن كستر
أدق الطارة وأتحكر
أدوبي أشكر السستر
أوصف في بنات آوى
كضب كان قالوا بتداوى
و فاضل في المداواة الكي
و ما أظن زاتو ينفع في
أدوخ كلما العيون ترمش
و لما السلسلة تكشكش
أزوغ أتضارى في الكورودور
واخدر لابسة بقت نور
و خاتة الكاب على جنبة
و راشة الريحة فايحة زهور
تموت كرعي أقع و أزحف
وراك طرطور
عشان أرتاح
عليك الله و عليك الله
تفجخي راسي بى ساطور

يا الله حي

المتجهجه الأمممي


يا الله حي
ياني الزمان البحكو بي
و الليله عاد جني القديم
فار ، قام عليّ

بطلع في راس البيت نهار
أعرض أتور في العلال
أسمع طبول بتدق لي
دق دق ددق
يا الله حق
طق طق ططق
الحيطه سالمه و مافيها شق
تل تل تتل
حجاره تقع من راس جبل
كر كر كرو
الكيتا ضاربه
و خالقه جو
و دق دق ددق
حداد يسمكر في حُقق
و دق دق ددق
البت رموشا تقول درق
شبه الQueen
بت الورق
لمحا الوليد
بالكولا قرقر و إنشرق
لبعوه زي زول إنخنق

أكل السجار الشيالو ني
يا الله حي
فارس هلال
ولداً صِبيّ
ضكران يفوح
دخان تمام
ولداً شِقيّ
بينادي لي :
أعمل صفا
ضم إنتباه
قم راقداً
أرقد قيام
قم بس كفــا
أمرق جري
و كيف اوصفا
البت دي تب
ما بعرفا
بعرف رموشا
اللاعبه بي
كان مته فجأه
منو البقوم
يردح علي
الفاتحه لي ... الفاتحه لي

رائعة الصراف قصيدة الهدايا
المعروف بإسم
المتشعلق بن المنبرش

( نأت خطايا في أرض الاغتراب العربي , وكان المني والتوقع
أن أحظي بمال وفير في زمن وجيز وأعود حاملا الهدايا للأهل
والأصحاب , لكن - للأسف - لم يكن النوال كما توقعت , وعجزت
عن جلب الهدايا فألفت هذه القصيدة معتذرا بها لمن توقع هدية .....
...................
* الهــدايا *
ود اللّمين الباقي رايه
وصاني كتر للوصايا
الغربه قال بتفتح الناس العمايا
وصدقنا نحن وقمنا ندهبش حفايا
سافرت آمالي ابعد من مدايا
ولما تهت رجعت للناس الورايا ...
(المقلي ) يا ضراعي اليمين
أبو ( السارة ) يا الداري العقب
يا الباقي لي فرشة وغتايه
وتعبان وراي ما رامي بالك للعطايا
(دكتور/ عمر ) يا حليلي منك
فرقتنا الدنيا يا طيب النوايا
( ود العبيد ) يا روحي يا رفقة صبايا
حكمتك يا سيدي يا رب البرايا
أمي دايرة تشوف جديدي تشم جنايا
وناس عواطف قالوا دايرين بس رضايا
والتايه ..
التايه يا ام نيتا لبن ..
يا الراجيه فرحة يوم هنايا
وناس فرتكان دايرين اطقوا من الزعل ..
قالوا اب سويقاتا رقاق ما جاب هدايا !
كيف بس أجيب ليكم هدايا ؟!
********

وانتوا عارفين الكبير نادا المنادي
وفي المنام قال ليهو :
حاج الجاك تعال .. تعال .. تعال ..
طقاها لي بلد الحجاز
تبع الحجيج ... وصل البقيع ..
انفش زين ..
يبكي ويحج ..
(مرضية) بتدور العلاج
دايما تنق
في كلاها قالت نار توج
وانا دربي مسدود بالكتر
امشي وافج .. واقعد وافج
والبيت يعج ..
ناس ( سامية ) دايرين الأكل والكسوه
دايرين الشراب
ودخري البيت (عمر)
يا سيدي يازين الشباب
جوابو في ضنب الجواب
جوابا قدر نص الكتاب
داير بناطلين شان يهج
*****
واحدين يسووا الحيله بس جواب سلام
وآخر الكلام يصبح وصايا
لي أنا ..... !
تصور .. ! لي أنا المجنون اقرطع في المحايه
وكتب شيخي ومسح ما خل آيه
ووقع قيدي اندفن وسط البنايا
وزعل مني الفكي ورفس الدوايه
وختف حنكولو فوق راسي كسر كم عصايه
*****
اصبحت اكوس لي صورتي في ضهر المرايه
ومآسي الدنيا ما شربت ندايا !
برضو في آخر النهايه
انتو ما مخلني يا ناس ود هنايه وبت هنايه ؟!
راجيني وموسيقا اللوم بتعزف في الزوايا
ويرقصوا الراجين يخمو رزم هدايا
أجيب هدايا ؟ ... أنا ؟
أجيب هدايا ؟ ... أنا ؟
أجيب هدايا ؟ ... أنا ؟

وين انت ليك مدة ما بنت