تقلب يمينا ويسارا على سريره كأنه كان يتقلب على جمر شديد الحرارة
سعل سعالا جافا كاد ان يفرغ ما فى جوفه الخالى اصلا من طعام
وتمتم وهمهم بكلامات لا تكاد تسمع ونادى بصوت مثل فحيح الافاعى
يا فاطنة يا فاطنة عووووووووووووووك الهوا وين انت يامرة المر
وضاع صوته وما من مجيب الا رجع الصدى على جدار بيته الطين
الذى تأكلت حيطانه بفعل الامطار والرياح وعاديات الزمان
وخار مرة اخرى على عنقريبه المفروش ببرش قديم قد تاكلت اطرافة
بفعل كريت وبناتها تقزقز فيه فى هزيع الليل الاخير
وانكراش جرقاس عليه احيانا والمرقوت يفعل به الفعايل
عنقريب زو السوكرى المهترىء وارجله تلاته والرابعة صفيحة
ملا جوفها ترابا
وكانت الحمى تفعل فيه الافاعيل ويرى كل شىء مسربل باللون الاصفر
عرقه اصفر وجسمه اصفر وتقيأ مرا اصفر
وطعم الماء مثل موية النار وهو الذى قد ابى العيش او كما يقال
اغمض عينيه ورأى انه يعوم فى ترعة صافية زللال مائها مثل
موية الليمون وهنالك قراميض تطارده وتحيط به من كل جانب
تريد ان تبتلعه وصحا مزعورا يتمتم بكلامات لا يفهما هو
ونادى وقبل ان يكمل النداء جاءت فاطمة واثار العجين
بادية على ثوبها الزراق ورائحة القصب المحروق تعبق منها
واذا اقتربت منها تشم فيها رائحة الباجور والمسور وعيش قد ضربه السويد
ياراجل ماخيرت شوية؟
خيار وين يامرة؟ الحمى البارح فوقى سهراجا الليل بطوله
ووضعت امامه كسرة ب موية وبصلة خالية من الزيت
وهى حمية قليلة الدسم خالية من الكلوسترول والدهون الزائبة
مد يده الى الا ناء لا يأكل بل لكى يبرد يده فى ماء الكسرة
اخذ لقمة صغيرة ووضعها فى فمه ورفضت الدخول الى جوفه
فلفظها واكتفى ببرودة الماء
ونادى يا فاطنة الحمار اديه العليقة والمعزة ربطيهن واديهن العليقة
يا راجل حمارتك الماتت عمنول ولا معزاك الشالوهن الحرامية
انت بقيت زى ناس القطعان جابوا لى وصل قطعان ب عشرة جنيه
وانا ماعندى غنم قالوا لى والبعر القدام البيت ده لمنو؟ الا يكون بعر ابونا

والله يا ود البلة مبدع فى القصة القيصرة بصورة جميلة بس نا س القطعان ما ليهم حق
طال مافى بعر قدام البيت ابقى حق منو

الجيران وغنمهم المطلوقة ساهى
المعزة يوم ماكلة كسرة ناس فلان ويم شاربات ملاح ناس علان
والبيوت مفتوحة من جميع الجهات

مشكور ودالبله
قصه اكتر من رايعه
لكن قلت لي فاطنه جات
بي عجينه ف ايديها وتوبها
ملان عجين اسي دي مابزيد
الملاريا؟ !!!!!

صباحاتك ساكوبيس ودالبلة ياوصاف
حالة وان كنت تشتم فيها رائحة الزمن القديم إلا أنها مازالت تعيش واقعا
حيا لدي بعض الأسر السودانية في الاقاليم
نتمني ان يعم الخير والرخا والشفا لكل الناس
وان يبدل حالهم الي الأحسن وعنقريبهم ذو الثلاثة ارجل الي سرير ذو أربعة ارجل
أما الصفيحة تعود لأصلها محملة بما صنعت له من زيت وجبنة وطحنية حتي تدب الحياة
في عروق بطل القصة
شكرا مصطفي ومزيد من الإبداع

مصطفي البله سلام
دي بقت عليك انت وعبدالقادر ودالرساله
ذكريات مع حمله تطعيم الشلل في الكنابي
كل ما تمشو بيت وانتم جوعي تاتيكم واحد شايل كوره كبيره مويه
الجوع شالك وقت جابوليكم كوره كبيره قلت ليهم جيبو معاها صابون فنيك وادوها لي ودالرساله ده .
لديك ذكريات كثيره مع حمله الشلل , ادينا منها مع ودالصالح

زرت اليوم هذه واعجبت بها كأنى اقرأها اول مرة

ودالبله صلعتك دي قاعده فوق رأي بتنكت الحاجات دي من وين بس بتشبه لي زول في الهدي اكيد