هل يمكن للهدى ان تجمع بين التحديث والذي يحدث في كل شئ من حولنا وبين الاصالة التي كانت تتمتع بها وهي ماميزتها عن بقية قرى ومدن المنطقة
ففي غمرة فرحتنا باستقرار التيار الكهربائي والذي قطعا احدث نقلة نوعية في حياة الفرد الهداوي واسهم في رفع الوعي لتمكنه من استعمال كل انواع التكلوجيا المتاحة وكذلك اسهم في نوع من الاستقرار المادي اذ ترى الاهل يشترون كل مايحتاجونه يوم السوق بل قل في نهاية اليوم واعني هنا اللحوم والتي تكون في نهاية السوق بنصف القيمة وكذلك الخضروات والفاكهة وايضا حتى في عز الصيف لم تسقط حلة ملاح واحدة في الشارع لانها باتت بره والدنيا حر وهنا احدى السلبيات وهي ان هذا الذي اصبح يخزن الان الى الغد او لغداء بعد الغد كان بلا منازع من نصيب احد الجيران او الاهل ياولد شيل الملاح ده اديه ناس فلان ديل قبل ما اولادهم يتعشوا قوم حصلن او تكون الحاجة رفعتو بي فوق الحيطة للجيران وكل الناس اهل
هنا فقدنا هويتنا التكافلية
مادعاني لهذا الموضوع ان الابن المشاغب عزمي بعد محادثة اسكايبية مع الاهل في الهدى قال
يابابا انا مابحب الهدى الاسة دي بحب الهدى الزمان
ققلت ليه كيف يعني الفرق شنو اسة وزمان
يابابا زمان كنا لمن نجي الهدي نكون فرحانين ح نلعب مع اصحابنا ونمشي حوش الغنم نركب في الغنماية ومرات نقع ونقوم مع ناس بدوي وصديق اسه باعوا الغنم والبقر
وتاني كنا باليل بنلعب في الشارع ودي كانت احسن حاجة واكتر حاجة بنحبها شليل ولعبات كتار كدة ونتونس ومرات نغني لكن بعد الكهرباء جات الهدى بقت زي الخرطوم مافي فرق الاولاد قاعدين في البيت بالنهار اقيام وباليل مسلسلات
فهل المدنية المستقدمة وان تاخر وصولها الهدى ستفقدنا ارثنا وتنسينا ماضينا الجميل والتكافل الاجتماعي الغريزي بتوزيع فضل الظهر من طرقات كسرة للجيران ومن غير تحرج ياولد امشي ناس عمك ديل جيب لينا موية من زيرهم القدامي الصااااااااااااااقط
فالحياة الان صارت اكثر اعتكافا في البيوت من زي قبل تحمد سيدك تلاجتك مليانة والديجتال والريسيفر جنبك تغير في القنوات
وثالثة الاثافي الموبايل زمان لو طولت من قريبك وصاحبك من غير ميعاد تطرق باب البيت هذا ان لم تدفعه برفق حتى من غير استئذان
اما الان فالموبايل قلل المحنة بين الناس تررررن تررررن الو السلام عليكم سلامتك ياخ قالو لي عيان شوية قلت اكفر ليك بالتلفون لحدي مانلاقيك
نلاقيك متين مامعروف؟

الشغلانية ما كهرباء يا ابو الطيب
تغيرت النفوس وتغير الناس
هو وينو الملاح الببيت
أمشى افتح ليك اى تلاجة مابتلقى فيها غير الموية ويمكن مرات الموية ذاتها ما تلقاها
مش فى الهدى الكلام دة بل فى أجعص بيت فى الخرطوم والحكاية عامة
ليس قفرا مدقعا ولكن عدم نظام تربينا عليه وهو خاطئ
الزمن هو نفس الزمن وتغيرنا نحن

سلام حبيبنا صديق الماحي
تشكر على المرور
وطبعا الشغلانة ماكهرباء الشغلانة ترابط اسري اتفقد في لحظة تحديث وتطوير وانبهار بالجديد
ونسيان القديم بكل خصاله السمحة
ليت ايام الصبا تعود ودهرا تولى ياالهدى يعود

الاستاذ الظريف
مضوي
عام جديد ونتمناه لك وللهدى سعيد
وسعيد انا بمرورك على البوست

اقتباس :

حقا تلك الصور
موجودة الان جلها

طمنتني الله يطمنك اكلم ليك عزمي قول ليه لو عايز ترجع البلد الحاجات دي لسه موجودة

ودخيارى

متعه المتعه زمااان انو تصحى الصباح بدرى .. وتحل الغنم وتوديها للراعى فى رحله صباحيه جميله

وبعد داااك تقوم بماتبقى من تفاصيل مصاحبه .. صرار .. وباقى شنطتك القديمه مرات بتفك الحيره لما

يجى مولود جديد

حوش البهائم .. الزريبه بتاعت البهائم ديييك .. البسجنوا فيها المجرمين من الغنم هاها وتمشى تحلها بقروشك

وبعض الجوديه .. السربه بالليل بالبقر .. وحياه الهمبته الجميله

دى تفاصيل غطت عليها الحداااثه .. فاصبحت تكاد تنعدم

اما الهويه .. فغطاها الغبار ..

لكن بدا كلو

الهدى دى فيها حاجه كدا .. زى بتاعت هاشم صديق .. حاجه بنحسها ومابنلمسها

حاجه زى نقر الاصابع لما ترتاح للموسيقى

لك التحيه حبيبنا الغالي عادل وانت تبدع بمواضيعك الهادفه والتي احبناها بجد وجعلك الله نوارة هذا المنتدي وانت كل يوم تاتينا باالجديد ولكن كما تعلم ان الوضع قد تغير الان ولكن واه من لكن تلك البقعه المباركه التي حباها الله بطيبة اهلها وسماحتهم وحبهم لبعض واوكد لك ان هذا الحب لن ولم ينتهي وسيظل ابد الدهر ولابد للهدي ان تتطور ولك معزتي اخي عادل

الود الشقي الخرباش
ودمدثر لك التحية الخاصة وكم يشتاق المنتدى لخربشات قلمك واسلوبك الجميل

اقتباس :

متعه المتعه

متعة المتعة الواحد يصحى الصباح ويلاقي اسمك يمهر صفحات المنتدى
وقربنا نشيل مذكرة ونطالب الجامعه نقول ليها شلتي مننا عبدالرحمن وده ماصاح
الصاح نحن يوم وانت يوم
فياخرباش برغم زحمة القراية الما ام دق باصر لينا طاقة فرح
وماتقطع الجوابات

سلام اخي عزدالدين

اقتباس :

ولابد للهدي ان تتطور

نحن مع التطور قلبا وقالبا ولكن مع الاحتفاظ بقيمنا الجميلة الاصيلة