تجمعوا لشرب القهوة ، وكل واحدة جابية معاها شوية بن ، ودوى قهوة رابطاهو في طرف توبه


ست البيت مرقت عدة القهـوة من القور


قلايه وفندك من خشب ، وشـرقرق مجـلا نضيف يلمـع

صينية رق فيها جبنه تحتها وقاية مشغولة بالسكسك

وفناجين وسكرية صينى سكسونيا ، وهبابة سعف مدورة اطرافها من حرير ..


ولعت النار وختت البن فى القلاى وختتا فوق الجمر

النسوان قعدن متقابلات لشم القلوة ، قلت البن ومررتـو عليهـن

اخدو نفسهم ، واخدو الكيف ، مرقت بخور التيمان وختته في المبخر

واحدة من النسوان كوركت ، العفو والرضا دستور بى ادب...

وطلعت فتيل ريحة من قفتها وشمت منو ، وبدت ست البيت تدق في البـن بايقاع


وواحدة ماسكة فنجان وملعقة صغيرة تضرب فى الفنجان

مع ايقاع الفندك ودندن والمرة تتمايل

حتى راقت ، مرقت كل واحدة من قفتها قطن منفوش ومترار

وكشفت وركها ، وبدت تغزل وبدت ونسة النساجين

......................................

المرة دي طولو من مامشو يجيبو السدا والله خايفين يجى الصقت ومانسوى لينا فردة

الا نتقتى بى شمالنا دة ساي


انتى صحى قالو السرة مرقت من الاربعين ، الشقريب قبض قبض

من كترة الدخان وقالو راجلها ، جاب ليها توب زراق وملجة للمروق


اتى ياختى زينب ماكلمتكن ، قالو عاملة بربور

المرة جاية باكر تدق لى بتها شلوفتها ، وتعمل ليها نقرابي ،


بري يطرشنا ماكلمتنا


انتي انا ما كلمتك ، قالو السرة راجلها جا من الترس

وجاب معاهو الفريك تاكلى نى ، وجاب اللوبة حلو وعفن ياختي

قالو وقة اللحم بقت بى ابخمسة ، ونحن ولافرطاقة

ماعندنا ولاتعريفة مقدودة ماعندنا ، شرموط ساي يا كافى البلاء مافى


انت يابت امى الحلة مافيها ريحة عرس

اضبحوا لينا تور نشبع لحم نفك القرمة دى


.... ماسمعت شي

لاكن قالو بت مرضية جابو ليها قولة خير لكن لسة مامسكو ليهن يوم ..


دخلت اصبعا في خشما وختتو فى الواطة


اتى بصح نفيسه جاها المرض الكعب


برا وبعيد غادى


وماودوها عزموليها ،


برىبرى دا مو مرض عزيمة


الرسول يالسرة كان ماجيتى اديتنى كدة ، راسى ده كلو ياكلني


الرسول عزيز بجيك تب لكن العصر حسة ماشة اسوى الغدا


واحصل صاجن بت الشيخ اعوس لى طرقات قبل مايبرد

امس جونا بنات بتى قلت ليها تعالى يابت امى النشمك

قالت لى شامانى مالى لابسة عقد الجلاد وراسى ملان كركار

شوفى البت عليك النبي ، ديل ماعيال الزمن دا


امس ولدى خلا الغنم رضعن خلانا نمنا بى صمة خشمنا الله يديا خيرن


خلاص قايمين ودعناكم لى سيد الوداعة

[img][ندعوك للتسجيل في المنتدى أو التعريف بنفسك لمعاينة هذه الصورة][/img
اتفضلو جبنه عصريه

محمد الطيب ابراهيم كتب:

[img]<script src='http://img85.imageshack.us/shareable/?i=36524099.jpg&p=tl' type='text/javascript'></script><noscript>[ندعوك للتسجيل في المنتدى أو التعريف بنفسك لمعاينة هذه الصورة]</noscript>[/img
اتفضلو جبنه عصريه

دي الجبنة وست بيت الجبنة
وين الجارات البترن في القطن المنفوش

الليله صناعه سعف نرسل ليك قفه للملاح[img][ندعوك للتسجيل في المنتدى أو التعريف بنفسك لمعاينة هذه الصورة][/img]
عندكم طماطم وفجل وبامبي