هدانا يا هدى الزينين -سماحتك جوى فى الوجدان -صباحك صباح الزين على الاخوان-صباح الفة ومحنة وريد بريدك يا جمال فتان -غماماتك -سحيباتك تبشر بخريف يزف البشرى للحبان-شوارعك ضواحيك تهلل بفرح اتى وفرح جوانا يشع نورا ببراءة الاطفال -بشوف فى ضواحيك ملامح رويدا والقيم صورهم ديمة فى خيالى وصوتهم نغمة فى جواى -طعامة الحلوين وسماحة اهل الهدى الزينين -سماحة النور وطيبة نصرة ست الفال -ابوى الحاج ...اقيف وقفة سلام تعظيم لاغلى حبيب كتاب احكام ومرجع شورى للغرقان -بلدنا امان وناس حنان وحضن ودف للتايهين - ومهما قلنا ومهما كتبنا يظل العشق فى الوجدان (بقلم ام تمبش)

خريف بلدا مغطغط بالسحاب نجمو
وكان صبح المطر عنوان
حليلو زمان
نسيم دغشا يهبهب بشذاة يفوح ترد الروح
طعم قنانة من حلة بتطلع من وسط دخان
حليلو زمان
وصوت عربية فى طرف الفريق وحلت
صفير شكمانها يعزف بالشذى الالحان
قش حنتوت مجارر سوط
بياض نوارو من نور الشروق البان
حليلو زمان
بنية من العمر يادوب
وبين ايديها حزمة قش
تدور جمرات من الجيران
وبيت كبريتنا اتبلل صبح فارغ
بدون عيدان
وتنفخ فى الجمر تشعل
نار قلبى الحمت بركان
حليلو زمان
تشد برادة بين طوبات
وتلفح طرحة للدكان
تدندن حسها الخافت يزوب حدة الوجدان
وترجع شايله حب الشاى
لفافة ورقة مطوية تمديها وتشيليها
وترفع ايدها للفستان
براءة طفلة غروية
جيبنها من المطر نازل
وخمرة خدها النديان
طريفها من الغمام مكحول
وخصرها حاكى خصر البان
وتخجل منى تدارى
حزم شعرها السلام وامان
ومن بين خصل الشعر ضحكت
قمر من بين سحائب بان
وكشفت ساقها زدت جنان
وقلت امكن تكون بلقيس
وامكن اكون انا سليمان
وانا الفى الغربة ياما شقيت
نسونى الناس بقيت زى كان
فؤاد مكلوم
قليب مسلوب
وهايم فى الدروب ولهان
انا السافرت غربة وريد
حطام انسان بقاسى من الزمن حرمان
وكلو عشان خريف بلدا مغطغط بالسحاب نجمو
وكل مافية من صبح المطر عنوان

نهديك للفرح اغنيات
ولك الفرح الجميل القصيدة للشاعر رحمة الله الماحى (الجود)
هدية من بوبات الخريف القادم
وجااااينكم