دكام كان مدير مستشفى الاسنان وشالوه من المنصب .. وجابو مدير جديد
واحد من اصحابو لقاهو بيتحاوم بى بره .. قال ليهو مالك يادكام حايم بى بره ...رد دكام .. ياخوى ماضرتى جوه مابقدر ادخل ( بيقصد المدير الجديد
**************
قالوا يوم ابو داؤود كان شغال حفلة وانتهت متأخرة ناس العرس اصروا عليهم يبيتوا في بيت العرس وفي الصباح ابو داؤود بتسوك في الماسورة جات ماشة بي جنبه مرا كبيره في السن قالت ليهو إمبارح العب ساهر بيكم يا ولدى.. قال ليها والله ياحاجة العيب على النظر
*****************************
قالوا ابوداؤود كان شغال حفلة وبعد ما غني الفاصل الاول الجماعة نادوه للعشا فعلي حسب عادته قال عاوز يتعشي مع الجمهور
قام قعد في طربيزة ومعاه مجموعة
جات الصينية الاولي عاين فيها لقاها فقره (رقبة)..عاين للصينية التانية برضو لقي الضلع فقره (الجماعة كانوا ضابحين خرفان كمية)التلاتة برضو كدا
قام نادي العريس وقال ليهو اسمع يا خوي انتو ضابحين زرافة ولا شنو؟؟
***************************
قالو ابو داؤود مشى بيت فرح على اساس احياء حفل ،
لاكنه وجد الفنان القدير المرحوم / خضر بشير واقف على المسرح ويغنى
ومعروف المطرب خضر بشير انه ينفعل مع الغناء
عندما وصل ابو داؤود ووجد هذا المنظر سحب ليهو كرسى وقعد
يتفرج وهو زعلان جدا ، وكان امامه طفل واقف يشاهد فى المطرب خضر بشير
قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك
*************
مرة عوض دكام جاء داخل العيادة بتاعته لقى في كشف المرضى
اسم فتحي فرج الله لاعب المريخ زمان ... وبعدين ما كان شافو قبل كدا
طبعا فتحي فرج الله عيونو في نص راسو ) .المهم دكام عاوز يشوفو قام ناداهو أول واحد)
لما دخل عليه ، دكام اتخلع بي شناته ، كان متخيلوا نجم وجيه
قال ليهو انت فتحي؟ قال ليهو أيوة أنا فتحي
دكام رد بسرعة طيب فرج الله يكون كيف ؟؟؟
******************
ابوداؤد كان بغنى فى حفلة والصف الاول كان
كلو جكس حجم عائلىكلو واحدة اسمن من التانية
وبعد الاغنية الاولى قام الجماعة كوركو ليهو
بالله يا استاذ فريع البان ...قام عاين ليهم وعاين
للصف الاول...وقال ليهم فريع البان كيف مع
شجر التبلدى بتاعكم ده
****************
عوض دكام قال فى واحد
مشى يقلع ضرسو فى مصر
الدكاترة قالوا ليه يا زول
ما عندكم دكاترة اسنان فى السودان
السودانى قال ليه فى دكاترة
بس الحكومة مانعانا نفتح خشمنا
موضوع: طرائف د. عوض دكام والفنان ابو داوؤد 
الثلاثاء 13 مارس 2012 - 20:16
