طبعا كان عندى مشكله (اسفيريه ) فى التواااجد هنا

ماعارف دى مشكلتى براااى ... ولا مشكله ناس معاااى

اها يوم كدا زارتنى كديسه الاحساس البخربش داااك

وجيتكم جااارى .. بشوق ومحبه .. وقااايم سدارى

***

تقوم الغنمايه تموت

والحيطه تقع

واقول يمكن انا الماجيت

**

كدى النعمل تيست اول احتمال كلامى دا يكون شالو الهواء [b][u]

لا تماااام مافى اى شخشخه .. الصوره واضحه .. والشكه ذاتها مرسومه بدقه

والمشاركه تمت بنجاح .. يكون من شنو دا ياربى

**

فى حاجات بتعمل (شخشخه ) فى الاحساس الداخلى بتاع اى زول فينا

انا عندى اتنين بعملو لى شخشخه

(1) يقوم الغاااز يقطع وانت يادوب جاااى تاخد ليك غمده

(2) وتقوم الاشاره تطش .. والكوره فيها قوون .. والطبق فى وادى والتلفزيون فى وادى [b]

الشاعر حميد مرت كتب مقدمه لاحد دواوينه عجبتنى جدا

تحدث عن الشعر .. ولحظه البوح .. واتفرجخ باحساسو فى نص حواشه وكتب

عن انو لحظه ميلاد القصيده عندو

زى لما تدخل ليك شوكه فى رجلك وانت فى ضحوه او ضهريه

وتقعد الشوكه

وتبدأ الاكوله

وزى زمان تعمل ليها (ملينات ) هاها .. اكان وسخ اضان اكان شيتا تانى

وتدى مفعولها

اها لحظه خروج الشوكه بعد كل الملينات دى

اللحظه البتحس فيها براااحه واكوله

دى عندو زى لما تطلع منو قصيده جديده

شفتو كيييييييييييييييييييييييف

يا زول لوووك الصبر انت بتكتب لى نفسك
اول حاجة حمدا لله على السلامة
وصلت ولا لسة
ضهرك كيف ؟
أخبارك وأحوالك

جيت أنا والأشواق ..
ومعاي إقنونة مشاعري ..
عشان نكفر ليك .. ونقول ليك مع ود الأمين
قالوا متألم شوية شوية يا أخي بعد الشر عليك ..
وحمد لله على سلامتك .. والبركة الشفناك طيب
وبي رواقة كدا .. بعد ضيوفك الجو يكفرو ليك يمشوا
نشوف زحمة المنقول الفي المنتدى العام ..
ونناقش البجمعنا ويهمنا ..
عشان نصل لكرطعة .. احاسيس جديدة
وبي فكر ..
تسلم يا حبيب من كل سوء ..

سلام الشفيف الانيق ودمدثر
من الصباح قمت اتنسم عبق البخور وقلت المرة دي من الصباح فاكه البخور ده كدى مالها
يكون ديل اولاد ماما جو وانا نائم ولاشنو
قمت اشمشم لا لقيت المرة ولالقيت اولاد ماما وقعدت ادور في مصدر الريحة واول ماجيت جنب الكمبيوتر
الريحة زادت وأ قوم تنقش تنقش افتح الكمبيوتر اقوم القى ليك ودمثر فاكي بخورو
قلت الحمد لله معناها دي بشارة خير ربنا يفكنا من كل كربة ووجع ضهر
حمدا لله على سلامتك عزيزنا وحبيبنا ودمدثر وان شاءاله اجر وعافية

اقتباس :

والمشاركه تمت بنجاح .. يكون من شنو دا ياربى

يكون الكمبييوتر برئ وبس داير ليه زول يكتب
والدليل آلولو اهو ظهرت وتمت بنجاح
كل الموضوع يلا خليك مواصل وواصل على طول وتجدنا متلهفين لاحرفك التي افتقدناها كثيراً

ودمدثر جدع وشتر
ياخي الخربشة
عندك ليها مذاق
اها كمان بعد ما
جبتا ليها خلاط
اخلط لينا احساسنا
معاكم
وادونا جغمه جغمتين
من
خلطة مشاعركم
المعتقة الفة وشوق
لانو كان كرطعنا
بختل توازنا .