ادينا واحد الهدى بالزلط
متين ياربي نركب الزلط ونخلي الدقاق والغلط ٠ قريب سيصبح الحلم حقيقة، حتي يركب الراكب من بيشة حتي الخرطوم ويصل وليس عليه وعثاء السفر نضيف ظريف
وحتي تسير عربة حسن سعيد من الفريجاب للهدي لاتخشي الا نفاذ البنزين تحية لاخونا حسن سعيد سفيرنا في الفريجاب حيث الزلط بنوم والعربات بتقوم ؟ ستصبح الهدى مثل الخرطوم نتمنى ذلك بالكوم ، بالمناسبة العلاقة بين السودان والفيل شنو؟ قال ليك الاتنين عندهم خرطوم ، بعد شوية تكورك المراة لجارتها بالحيطة (حيطة شنو ) دى تبقي الحيطة القصيرة ولا الحيطة المائلة ، بعد شوية تضرب المرة لاختها اسمعي ياأختى مك عامرة منشطة شريحتك دايرة اخش علي المنتدى انادى النسوان ديل عندى (كوجان) ابرى كوجان في رمضان ياوليد الطيب ولا كوجان في الميدان ، ولا نلعب الكوجان ،جملة تفسيرية (الكوجان اكفيك عنوانو، للجيل الجديد هو مثنى كوج وهو عملية تخمير الابري الشبيهة بعملية تخصيب اليورانيوم (ما تجيبو لينا هوا ) انتهي التفسير ٠ اما اذا قلتا الزول دا مكجنو او كجنتو فهي تعنى في اللغة شاميهو والمعنى واضح ٠
الهدى ياطارق مامون بعد شوية الا اجيبوك ليها (بخرطة) ،تذكر خالتك (الخرطة) الماخده عبد الله (ودالكراكه) التحية لاهلنا ناس الاريك العوامره بدون فرز ٠
اما الاخ عادل خيارى في امريكا ابارى لو جيت الهدى الا تقوم جارى ،حتلقي عندنا حاجات في امريكا مافي هسه البلبوط والشرموط والمفروكة وام بق بق والنعيمية والشريفية وام تكشو وعمك حسبو شتت قصبو وام برمة والبرمة واللايوق والطايوق والابريق والبرش والمرس والمروق والجالوص والناموس واب فانوس والرههيفةوالعصيدة والويكاب والبلي والضراب والونسة والقرقراب عندكم ياعادل خليك عادل ؟! ازيدك ولا كفاك ٠
وحتي الملتقي في دردشة قادمة خليتكم بعافية

بالمناسبة بعافية عند المصريين يعنى عيان يعني كلامي دا بالمصري بزعل ٠
ذي ناس الشام بقول ليك (فوت ) يعني أدخل نحن تقول لزول فوت ما افوتها ليل ليوم الدين عشان كدا فتكم بعا فية
في الحلقة الجاية (الفته اشد من الفت)
حاستفول معاكم ،ولا رايكم شنو؟!

عثمان مساعد
مرقت من حملة التوقيعات والتي جمعت لارسالها لعمك طارق مطالبة بسحب النوكيا فرع المنتديات
لعدم استخدامك له كما وعدت
الممهم نرجع ليك بشويش

اقتباس :

البلبوط والشرموط والمفروكة وام بق بق والنعيمية والشريفية وام تكشو وعمك حسبو شتت قصبو

الا الاخيرة كلو في طبعا ما ح تصدق ولو مغالط تعال امشي معانا شوبنق shopping عشان تلقى حاجاتك دي كلها بس عمك حسبو ده لو لقيتو مابتلقى قصبو

التحيه لك يااستاذ ابوشيبه وتقبل تحيات كل ابنا الهدى ببيشة 000

تحيات وارفات للاستاذ الجليل عثمان ابوشيبة مع تعظيم سلام،خليتنا نشم ريحة الكوجان عديل كدة ونتخيل ناس بت الدباى ،وشاى المغرب وشراب الغباشة بالصباح وبروتين الشرموط الخالى من القاوت ، لوحة رائعة جعلت طبق الهدى بالزلط يدعو للتفاؤل بقدوم حياة حلوة تتضمن تحقبق أحلام كثييييييرة بس شمروا للعمل ليرى ذاك الحلم المشروع النور قريبا ويصبح واقعا ينشر بذور الرقى والنماء فى ارجاء مجتمعنا العظيم وعليكم بجيل الحداثة ادوه جرعة الكوجان على الريق لتتخصب افكاره ،نشكرك على هذا المدد الرصين

ابو شيبة يا قريبى يا رائع كلامك درر شايل من عمك ود ربيح ولا من العجيل الله يرحمه المهم اطربتنا واسكرت مشاعرنا ب الاكلات الشعبيةكله عرفتها الا عمك حسبو دى اكلة ولا شراب ولااستعمال خارجى

لك التحية العم ابو شيبة

اديتنا الهدى بي ناسها وزلطها .. وبدون وعثاء السفر .. مع زخات المطر .. نضاف .. وظراف .. لوحة رائعة بي كوجانا غير مكجنة . زي البصلة المكشنة .. وزي ريحة الدعاش .. والسنبرية ام قدوم عيش ابوي بقوم بتين .. بقوم باكر مع العساكر .. (وياساتر ) .. اما خالتنا ( الخرتة ) لها التحية هي تنطق بترقيق الطاء وتحويلها الى تاء وليس (خرطة ) .. واصل ابداعك

عثمان مساعد
لك شوق وود
واصل يا جميل

عثمان مساعد ابو شيبة
تعال بي الدقداق ..
تعال بي شرمة وليد
بس أظهر وبان ..

مطلوب لعدالة المنتدى

يا ابوشيبة
اظهر وبان
الامتحانات
وانتهت

التحية لاستاذي العزيز ابو شيبة...والله الواحد اشتاق ليك ولي كتاباتك الجميلة...ويييييين الحي بيك..؟؟ تحياتنا عبرك لجميع اساتذتنا الاجلاء والاسرة الكريمة...