السودان دا

والله ماعندو وجيــع ..

أنا شخصيا لا أري أي مبرر لمشاركة السودان في الدورة العربية الحالية والتى ستقام

هنا في المملكة العربية السعودية ..

فريق لقطوه لقيط .. لعيبة مامعروفين وليس لهم إحتكاك خارجي أو معسكرات

يا أخي ما كان أحسن إعتذروا من المشاركة بدل مايكون السودان جمع نقاط بي ببلاش للفرق التانية

يا اخي مجموعة السودان فيها العراق ومصر ولبنان

العراق عشان يضمن مشاركة بالفريق الأول وأن تكون مشاركته فعلا .. لما الكابتن أكرم نشأت لاعب المنتخب العراقي

إعتذر عن المشاركة طالب الجميع بمحاكمته ..

وين نحن من المنتخب المصرى والذي سوف يشارك بكل النجوم الدوليين

يا اخي والله دا ورم للفشافيش .. مش أحسن حفظ ماء الوجه والإعتذار عن المشاركة

طالما لاعبي الهلال والمريخ سوف يكونوا خارج التشكيلة

سوف يمثلنا جوجو .. وماعارف ايه ..

يا أخي والله حرام

سلام طارق وسلامة فشفاشك ياخي
ماتحرق دمك ساي
عليك اسه لو لعبوا الكبار ح يجيبوا شنو
كل مرة يقولوا ليك كسبنا احتكاك خارجي ومايستفيدوا منو اي حاجة يمشوا يتحكوا من الفرق التانية ويمرمطوهم ساكت
هو اصلا في كورة
في ماكلة ونثريات سفر وتذاكر وسفر وشوف باكر تلقاهم كلهم جايبين ليهم كم شنطة ووزن مجان
مصالح شخصية فقط
لله درك ياوطن

تسلم ياأبووضاح ، ياحبيبى لا يستقيم الظل والعود أعوج ، خلينا كدى نفرغ من سرطان البطن والغولون وبعد داك نرجع لنزلات البرد ،أنسى وبرد جوفك فى هذه الايام بالدورى الاوروبى

التحية للأخ الحبيب ابو الطيب

والتحية للحبيب ابو زينب

قدر الله وماشاء فعل

والحمد لله بأن الأمور عدت على خير وكان شكل المنتخب

رغم أن لقيط وهجين إلا إنه وبما قدمه من مباريات أخرص كل الألسنة

بما فيهم أنا

ومع ذلك فأننا ندعو القائمين على أمر البلد عدم مرمطة السودان في مثل هذه المنافسات

دون الإستعداد الجيد لها . أو على الأقل الإعتذار كحال كثير من الدول

التى لها باع طويل في هذه اللعبة

أشكركم على المرور الجميل

ولكم المحبة

تحية لود المامون
الفريق الرديف مر بخير وبالرغم من ذلك لم بسلم من النقد اللاذع من قناة الكاس القطرية وبطريقة مهينة وبطريقة تخلينا نقول نحن اللمانا علي الناس ديل شنو.
المهزلة الكبري كانت بالنسبة لفريق الشباب وللفريق الذي يسمي بفريق الناشئيين وبحمد الله أخد كميات مهولة من الأهداف.
الدول تستعد لمثل هكذا منافسات وناس نحن نجمع أولاد الحاره وجري علي السفارات.
طبعا انتو انسترتوا في جدة ولكن الفضائح في الأردن وتونس.

لكم التحية :

الأخ الصديق ود خالد ود عوض الكريم

الأخ عبدالرحمن قادلة مدير منتديات قدالة والشيخ بلال



على الرغم من مرور الفريق الرديف مرور الكرام

وإنسترتنا في جدة ... إلا أننا مع موقفنا الداعي لمراعاة

عدم الزج بالسودان في منافستات والفريق غير مستعد إستعداد جيد

المشكلة عندنا هم بدفعوا بفريق لخوض مثل هذه المنافستات

لتكون لهم كبديل عن المعسكرات ولتكون لهم كإستعداد لأي منافستات قادمة

نتمني أن يراعي الله فينا من تولى أمرنا

وأن يراعوا لسمعة هذا البلد الطيب أهله