في ونسة مع الوالد علي الصادق
عن اشعار ود البشرى
وجدته يحفظ بعض من اشعار ود البشرى واخد يقول لي البعض من
اشعاره تتخللها اهات التذكر وتذاكر
الرجوع بالزمن عبر بوابة الذاكرة
وكانت مصحوبة بقواميس وشرح
للكثير من المفردات لانها ايضا مشفرة
بالحروف لا بالارقام فحسب
مفردات عميقه يصعب فهمها علينا
نحن جيل اليوم

جات سيرة في احد الحلال وجن فيها بنات سمحات وكانت في واحدة من اجمل بنات الحلة جات في نهاية الحفلة وطفت بقية البنات
احد الشعرا رسل رسالة لود البشرى
قاليهو:
وقعت غارة في حلتنا
نقول حضروها ولا قبال ما تحصل فتنة
كان ما الجاهلة جات بسططتنا
كنا ندى اشارة لي في طيبة بت بلتنا
ود البشرى رد عليهو
وقعت غارة وقعت غارة
مابنحتاج للفي طيبة ندى اشارة
دى مهيرة القليعاب الي اللجم كسارة
داست لي بلود ابو تاج مع ابو نظارة

لك التحيه ياهندسه والتحيه للوالد وزاكرته الحديديه ماشاء الله

عزالدين حسن محمد كتب:

لك التحيه ياهندسه والتحيه للوالد وزاكرته الحديديه ماشاء الله

يا عزالدين تشكر ع المرور
والوالد ما شاء الله عليه
موسوعة وبالاخص في الحقيبة
ومعانيها والونسة معاهو
بس تكنها حلقة من حلقات برنامج
حقيبة الفن

يحكي لي الوالد ان ود البشري
ترك شعر الغزل واصبح يكتب
قصائد الانصار
قال لي جو الجماعة يداعبونه
وقالوا ليو : انت فلانة ديك ما قاعدة
مالك بطلتا تكتب فيها :
ردا ليهم :
الزول الزى نجف الكباري عيونو
ما بديني راحة وما قام نقر تلفونو
كان ما اقولو جا وصدن عليهو جنونو
اشرح نمي فوقو الما (طنب دلفونو)

ومناظره لود البشري مع اخرين في وصف الشعر
الاول قال:
العنق المبوبح مو قصير مداني
المشاطتو تامة سبوعة في التحتاني
جود ياخالقو لسع مااندني الفوقاني
الثاني قال
المشطاطات تمانية ماتمن الارفاف
والتمسح رقد يات من تجيهو تخاف
رد عليهم ود البشري:
ود الادرع الاماتو جن شافنو
بالطيب والجلاد والخمور رشنو
المشطاطات تمانية ركبولن الكالفنو
بدنو في الضحية وفي الكرامة قضنو

لك التحية الحبيب سبعين وستة وثمانمائة

وعبرك الى عمنا الجميل على الصادق خياري

وأولا أعتذر ليك بشدة .ز لأن الشبكة عندي طاشة

والأولاد كل واحد ماسك جوالو وقاعدين برة البيت في الدرج وخارج العمارة بحثا عن الشبكة المفقودة

حيث نبهني الأخ الصديق الشفيع الزوين .. وقال لي ماشفتا أشعار جدك ود البشرى في المنتدى ..

وشرحت له بأنني لم أتمكن من الدخول منذ فترة الى المنتدي ..

ويشهد الله بأنني عند رؤية هذا البوست الجميل

إختلطت وإختلجت عندي المشاعر

مابين قصة في الحلق .. ودهشة

ودمعة وجدت طريقها ونزلت أمامي

وقهقهة وضحكة ..

شعور حقيقي غلبني أوصفو

لك التحية مجددا ولعمنا على الصادق

والذي نتمنى أن يتحفنا بما يحفظ من جميل الكلام من أشعار جدنا ود البشرى ..

وكما ذكرت سابقا كنت أتمني لو أن الوالد كان موجودا

لأتحفنا حقيقي بمايحفظه من اشعار وألغاز ولكن هي إرادة الله ..

توفي قبل أن ينشأ هذا المنتدى

وأعتقد مازالت هنالك فرصة لنا لحفظ وجمع هذا الأرث الكبير عبر عمنا بشرى مساعد والنور محمد البشرى

حيث أنه يحتفظون ببعض اشعار جدنا ود البشرى ..

--

وبعد أن ترك شعر الغزل

تحول الى الشعر الصوفي وخاصة فيما يخص السيرة النبوية

حيث له قصيدة طويلة كانت تردد في كل ايام المولد الى يوم القفلة ( الختامي )

ومن ضمنها :

السيدة خديجة الكبرى

اعطته مالها من غير جبرا

قالت لو يازوي الخبرة

من أعداءك بعيد نبرأ

وهي تصوير للسيرة كاملة حتى لحظة دخول الغار :

وفي الغار إحتضن الحمام ماطار

وبني العنكبوت سوجــــار

ويختم دائما هذه القصيدة بالدعاء بأن ينجو من العذاب

ابن البشرى ياساتر ينجو من عذاب باكر

--

ونسأل الله أن ننجو جميعا من عذاب باكر

التحية ليك ولعمنا على الصادق

على هذه الونسة الجميلة وأتمني أن يكون لها مابعدها من جميل وعذب الكلام ..

عوض خيارى كتب:

ومناظره لود البشري مع اخرين في وصف الشعر

بدنو في الضحية وفي الكرامة قضنو

ههههها ههههههها

دي معجنة شديد . يعني كل يوم شوية مع ونسة وقهوة ولمة

توثيق مهم جدا
تحية خاصة للفردة البشققك فى الامتحان
الشاب
البرقدى
حفظه الله