زياده في الكهرباء
الغاء الزياده في الكهرباء
فتح استيراد العربات المستعمله
الغاء الفتح
البرلمان .... نادو لي الوزير
الوزير مع النائب الاول
سياسه عجيبه والله
هسي عليك الله .... افتح والغي دي عاوزه ليها دكتوراه ولا دبلوم
يعني اي زول في الشعب ده ممكن يبقي وزير
شنو يعني تلبس نضيف وتقول زيدو بس
بكره يجي زول فوق ليك يقول نقصو
دي دايره ليها درس عصر هسي
انت تزيد زغيرك ينقص
دي السياسه للناس المابتعرف سياسه
لكن ما اي سياسه
سياسه سودانيه خالصه
ممكن نصدرا لبلاد الربيع العربي
سياسه ما سالا في التقشف ذاتو
ماعاوزه ليها اي تعب
بسيطه خاالص
مادايره دراسه ولا درس عصر ولا فهلوه ولا حاجه
لكن اهم حاجه بالمنصب ده
انك ماتعرف حال البلد
ولا تعرف الشعب ده عايش كيف
تزيد بس من طرف
ولا حتي دراسه جدوي
تاخد مرتبك زيك وزي كوفي عنان اقصد بان كي مون
مافي زول بقول ليك زدت ليه
لكن ممكن يقولو ليك ما زدت ليه
حتي لو بقيت وزير التعليم العالي
اول حاجه تعملا طوالي تزيد المناهج
ماهو لازم تزيييييييييييييد عشان نعرفك انك وزير مسؤول
بتتهيكل لو ماعملت كده
طبعا الهيكله دي زي قانون التوالي الزماااااااااااااااااااان داك
اسم حنكشه للرفد
ماقلت ليكم نحن اي حاجه عندنا بننحنكش فيها
دغري كده مافي
لو ما لفينا ودورنا وزدنا
نكون ديل ما نحن
اها النفسو يبقي وزير منو
وعاوز تكون وزير شنو
واول قرار ليك حيكون شنو؟

رمضان سعيد وعيد كريم عليكم