سلام شباب عيد مبارك علينا عليكم كل سنة تيبون تيبون
زمان كان العيد له طعم ومذاق خاص كنا نحسب الايام والليالي
اول حاجة جلابية جديدة وشبط او باتا( ثا ) وحلاوة
لكن كان التجهيزات القبل العيد بي كم يوم متعبة جدا
امشي نضف حوش الغنم وشيل الوسخ برة ولازم تغرف البلاعه كل يوم عشان ماتعمل ريحة يوم العيد بالذات وطبعا فيها كم مشوار السوق جيب جيب جيب
زهجتونا زاتو ماتكلمونا من اول مرة دايرين شنو
وطبعا نظافة الفضية حقت البنات لكن كان لزاما علينا ان نجد ورق الجرايد ويندر ان تجده في الحلة دة كمان مشوار سوق تاني ولازم تبقى حريف يكون عندك واحد بتعرفو او صاحبك في المدرسة ابوه عندو دكان عشان يديك من ورق اللف الجرايد الانجليزية ديك ولا وكمان امشي ناس فلان ديلك كان عندهم بنيان قبل فترة شوف لو عندهم رملة قول ليهم ادونا صفيحة عشان ح يفرشوها في الاوضة(والله الموكيت عندنا لكن) وطبعا الصفيحة تقيلة جدا تقوم تقسمها يعني تشيلها بي جردل البلاسيك الصغير داك وطبعا دي معناها كم مشوار
وما ان يصبح الصبح الجميل الا وتنتهي كل هذه المعاناة وياسلام على العيد الجاب الناس الشغالين برة عشان يعيدو مع اهلهم وكمان جايبين معاهم اصحابهم
ومن صباح الرحمن جري على الجامع الشايل كل الناس بيصلوا في الشارع برة قدام الجامع ووراء بيت ودالهادي وكانت اصوات التكبيرات متناسقة كانها سيمفونية بديعةالله اكبر الله اكبر لا اله الا الله الله اكبر الله اكبر ولله الحمد
وتنتهي هذه التكبيرات بوصول الفكي عمر عليه رحمة الله ايذانا بصلات العيد
وبعدها الخطبة واكثر مايرسخ في الذاكرة الوقفة العسكرية للعم عبدالرحمن اب فرار كما كنا نسميه وهو يحمل علم حزب الامة المميز
ولاننسى العم ود مدثر طيب الله ثراه وهو يعطر المصلين ببخوره المميز جيئة وذهابا
وبعد نهاية الخطبة انطلقوا وانتشروا لمباركة العيد وتصيد البيوت القيافة لزوم عندهم حلاوة سمحة مازي حلاوة بلي ودربس ديك
نرجع ليكم بعد ماناخد جمة في اقرب بيت

عادل خياري
ياااااسلام
ايام زمـان
كانت ايام
كل سنة وانت طيب
وربنا يحقق امانيك
سرد جميل
انت زول حكاوي بشكل وفهم
انا في انتظار
عودتك
ياااااااااااااااااااااااااازول
ســـــــــــــــــــــــلام

يا عادل
خليت خشمنا يمطق

ياسلام يا عادل على العيد زمان
نحن نجى من النمرة للعيد فى الهدى
بالحمير نصلى ونسمع كم مدحة من حمد المقبولواولاد خيارى
ونعرر راجبع العيد فى بيوت القصب
والبقية من راكوبة الى راكوبة وحلاوتنا تمر وحلاوة دربس

الحبيب عادل خياري
متعك الله بالصحه والعافيه
كل عام وانت بخير عيد سعيد
الا رحم الله فكي عمر وادخله جناتك مع الصديقين والشهداء
عيد زمان له طعم وزكريات لا تنسي رغم قله مكبرات الصوت
لكن اصوات المصلين بالتكبير تسمع الي اخر بيت ناس عيسي بيلو اسع بقو وسط
وكان الفكي عمر عند التكبير بصوته الجهور وقراه الضحي والليل اذا سجي....
تسمع في البيوت كلها وبعد السلام عيد مبارك عليكم العفو يا اخوانا لله ورسوله
وبعد الخطبه نشيد عكاشه وابو العلاء الله يرحمه .. الي الامام الي الامام يا شباب الامام
ونحن جند الامام رافعين العلم لاصلاح الوطن
ومعها ضربات بالارجل علي الارض اصوات داويه...ثابتين كل جبال
لكن هذا الزمن الحماس قله والمباركه في المسجد والمعارف
الا يستر ما تبقي بالتلفون
اهههههههههه السرد جميل . وربنا يحقق الاماني

لك التحية الحبيب عادل

وكل سنة وإنت طيب .. وإنشاء الله السنة الجاية كل الأماني محققة ( آمين)

الإستعدادات لإستقبال العيد .. هي صورة كربونية وموحدة تجدها ..

في كل ابيوت وهي لاتخرج عن ماتفضلت به من سرد وتفاضيل

وماتنسى ياعادل .. تنجيد المراتب .. .. شغلانة كانت

ولكن تبقي المحبة .. واللمة .. والأهل والأرض والحبان

وتبقي العصيدة الجميلة والماخمج .. والتى تكون أشهي وأجمل في صبحية العيد

بجانب الشعيرية والسكسكانية

وأتعرضوا .. وعدم العروض جــفا ..

والعفو لله والرسول ..

تخريمة :

واحدة خرفانة .. عجوزة .. قالو ليها العيد مبارك عليك ياحبوبة ..

قالت ليهم .. عيدا بخيت وسعيد الفكانا من الصيام دا ساكت

مضوي عبدالرحمن كتب:

عادل خياري
ياااااسلام
ايام زمـان
كانت ايام
كل سنة وانت طيب
وربنا يحقق امانيك
سرد جميل
انت زول حكاوي بشكل وفهم
انا في انتظار
عودتك
ياااااااااااااااااااااااااازول
ســـــــــــــــــــــــلام

سلام استاذ مضوي ياراقي
يعجبني مرورك
ويزعجني غيابك عن المنتدى
اوع تطول الغياب وانت عارف شوقنا كم
وبعدين الوعد بي ناتنا انك كل يوم تكتب الينا وتجيب لينا خبر مكيفات الجامع الناس ماركبتها ليه او رايهم شنو
في انتظارك ياحبيبي

مبارك النعمه النعيم كتب:

يا عادل
خليت خشمنا يمطق

سلام مبارك تشكر على المرور
الخشم ح يمطق اكتر مع عيد الضحية مع الشية والمرارة والشطة بي الالتي والدكوة
ربنا يجمع الكل في سودان خالي من النفوس الضعيفة

مصطفى البله على كتب:

ياسلام يا عادل على العيد زمان
نحن نجى من النمرة للعيد فى الهدى
بالحمير نصلى ونسمع كم مدحة من حمد المقبولواولاد خيارى
ونعرر راجبع العيد فى بيوت القصب
والبقية من راكوبة الى راكوبة وحلاوتنا تمر وحلاوة دربس

سلام ودالبلة
كيفك وعيدك مبارك والله كم تسعدني حروفك التي تشع البهجة في النفس وتهدينا بسمة برغم قساوة الزمن بل ضحكة باكملها
ياخي ماتحرمنا طلتك ومواضيعك بلاي عليك
قلت لي تجو للعيد بالحمير لكن الكريسيدا ماعندكم ياودالبلة آخوي
اما حلاوتكم البلح والدربس دي مافي طريقة نهاجر ليها للنمرة
يلا فتك بي عافية