واليوم اعترف بان صغيرتى ذات ال خمس سنوات

علمتنى كثيرا

هاها

هل ممكن الزول يتبرأ من تاريخو المخستك ...!!؟؟

لانو طفولتنا بائسة

سرقة حمام ناس حااجة نفيسة

وشلة الرباااطة الذين يحتفون بالفوضى (ويدقوا ليك ) اى شافع (شااكيها .. ولابس شرابات كمان )

زمان بتذكر فى العطلة بمشى شندى الجنبنا

اها انا من اخش شندى ديل بعمل لى تظاهرة شقاوة ضدالاستقرار والنظام
بتذكر انو الموسم كان موسم فول
ومااحلى حريق الفول بتبساتو
والاستمتاع بالفول الغض الترياان
اها انا قررت قرار احادى انو نحن مانتعب نفسنا ونمشى للحواشات (والنمر ) البعيدة (جمع نمرة )
مالو حواشة ابراهيم ودالصادق عليه رحمه الله جنب الحلة آآآى حواشتو الجنب المقااابر
وبعد المغيرب بشوية بتحلوة الشقاوة اكيد
جهزنا شعورنا وكبريتنا وبطونا وانترحنا
اليوم داااك اكلنا فول باهمال
حرقنا فول باهمال
لدرجة انو ممكن يتاثر حصاد هذا العاام لعمنا ابراهيم
ومع اخر المتعة
كبس علينا حاج ابراهيم بعصايته الغليدة
لكن ولله الحمد كانت كرعينا عنيدة
وشالتنا ليك وزيااادة
لكنه عرف الوجوه التى افسدت عليه حواشتو
فجاء وفى (عبه ) وعبه للحناكيش (ناس تقوى ) يعنى شال باقى الفول فى جلابيتو
وقصد المسجد القريب
وخطب خطبة عصماء
مفادها

ان الجنا ودمدثر دا .. دا زول خراااب ساااى
بجى عشان يخرب شفعنا وحواشتنا

هاها


عارفين كان ماعندى حق الفيتو

كان دقوا لى خروج نهاااااااااااائى

سلام ودمدثر الفاكي بخورو وعبق حروفه التي تنساب من يراع مداده الصدق والاحترافية الحروفية
التي تطاوعه سطر سطر وتقول ليه مابنحتلف ادخل بي قانون منتداك وابداه ليك من الالف
ياخ الف مرحب بيك وبي ذكرياتك الجميلة وبمناسبة

اقتباس :

موضوع: اوعك تقطع صفقة شدرة

زمان كان امسية في مدرسة البنات الابتدائية وعلى ذكر شقاوة زمان قام اخونا عبدالمنعم عوض الكريم وشلتو العجسية ناس تعاليق ساكت وماشين عشان الدهباية ويدلعوها بالدهب وهي ماخوذة من مسلسل الدهباية حينها وكان يطلق علي كل بت سمحة في نظرهم
وقومي يالدهب اطلعي المسرح وغني النشيد ده وكان طالع موضة اوعك تقطع صفقة شدرة عشان مايجينا جفاف وتصحر
وصاحبنا منعم وشلتو عاملين زي الكورس
حاضر يالدهب
اوعك تقطع صفقة شدرة
حاضر يالدهب
بالمناسبة دي اخبار الشدر شنو
والدهب بي كم

سلام ودمدثر
حاولت انزل ليك الرابط بتاع اوع تقطع صفقة شدرة
بس ماتمكنت لكن مازلت محاولا

هاها

الشدر القلعوهو .. والقلب الحزن لو

على وزن

التبر الجمروهو .. والنار انطفت لو

فى مسجد الهدى العتيق كان فى شجرة نخيل سمحة كدا .. وبتزيد سماحه ايام المولد

وعمنا حمد ودالمقبول بصوته النديان .. وودبركة والمجموعة .. ولمة الحبان ..

دى كانت تدعيات ذكريات جميلة ياود خيارى

موضوع رائع ياشباب

ان شجره السدر من اشجار الجنه لقد شرف الله بهابعض الاماكن عن بعضها ولها حرمة ونهي رسولنا الكريم عن قطع تلك الشجرةومن قطع السدر صوب راسه في النار وقدجاء ذكرهافي اربع ايات في القراءن ولها فوائد عظيمة من ورقها وثماره وعروقها في علاج في كثير من الامراض والحمدالله علي هذه النعمه ونحن في غفله منها

أخي عبد الرحمن سلام عليكم ومساء الخير.
نعم ذكريات جميلة كلما يستحضرها الإنسان أحياناً ويقارنها بالواقع تصيبه موجة من الحزن. والأفضل أن نستحضرها لتمدنا بمدد معنوي يقوينا في الحاضر ويجعلنا نتفاءل في المستقبل.
وفيما يتعلق بالشجر فقد قال رسول الله صلى الله عليه وسلم: (إذا قامت القيامة وبيد أحدكم فسيلة فإن استطاع إلا أن يغرسها فليغرسها).