مناى فى الدنيا سترة وبيت ..واصل البيت ضمان وامان مودة وريد ..
محال البيت يكون من طين وزنكى وحيط ..ولاممكن يكون سكر وصلصة وزيت ..
كلام البيت كلام تانى كلام احساس مقدس وشرع ربانى ..وريد انسان عزم واختار بنى العش الصغير اوانى ..
بيوت الدنيا مختلفات ماكل البيوت واحد..في بيت دافى وبيت بارد وبيت عمران هوى وتحنان وبيت جامد ..
بيوت مليانة فرحة وحب وخير وامان ..بيوت عدمانة من الحب مسكونة بالاحزان ..
بيوت زاهية وبيوت واهية وبيوت تديك سلام وامان عشان فيها النفوس صافية ..وفيها التقوى والايمان ..
بيوت متروسة مال واساس وخالية من الامل والناس ..وبيوت لالمبة لابتجاز وناس لطاف حنان ولذاذ..
فى بيت عالي حوشوا كبير وسيدو وزير وخيرو وفير وليهو غفير..وبيت من طين فى راكوبتو بس فد زير ورغم الساكنو زول مسكين
بس حقانى عندو ضمير..
بيوت البهجة عنوانا وطول اليوم ضحك وهزار ..وبيوت طوالى حرقانة مولعه التقول من نار..
بيوت بتراعى حق الجار وفيها من الخيار اخيار ..بيوت لابتعرف الجيران ولابتستطلع الاخبار ..
بيوت تمليك وبيوت ايجار ومابتلقاها بالهين ولازم تكرم السمسار ...
شوف فى سكتك كم بيت فى كل البيوت اسرار ..في بيت مسكون وبيت فاضى وبيت جاحد وبيت راضى ..
وبيت مشكلتو معروفة حصلت محكمة وقاضى ..عشان عشرة سنين هانت وكل واحد بقى فى وادى ...
فى بيت حدادى مدادى مافيهو غير اثنين ..وبيت مليان تقول نادى ..فى بيت سكانو متألفين على المرة وعلى الحلوة
وفى بيت سكانو مختلفين مابتفقو بالمرة ..وبيت ستو مرة ضيفان ومرة سترة مابتستاهل الهجران ومابتستاهل الضرة ..
فى بيت محروم من الاطفال ومن ضحكة عيون حلوين وكل يوم ناسو عند دكتوركبير اتعابو بالملايين ..
وبيت اطفالو زى عشرين ومحتاجين وحق كراسة مالاقين ..بس عايشين على الله وماقادرين يسدو الدين..
وناس تانى مرتاحين وهم فى الدنيا ماشايلين ..وياما ..وياما..صاخبة وبيوت لاليها حس لاصوت وكل ناس البيوت بتموت ويبقى البيت شبر واحد..
وبكرة تكون بيوتنا قبور لاهم موية لاهم نور ..ويبقى منانا فى الجنة وننسى حكاية السترة وحكاية الريدة وكأننا لحظة ماكنا ..
حليل البيت وهم البيت وناس البيت حليل الدنيا بالفيها وكا الفيها لاماليها لامكفيها .........

هذا القصيدة الرائعة للاستاذة والكاتبة الصحفية / دالياء الياس
استمعت لها فى حلقة اذاعية (برنامج دندنات)

بمناسبة البيوت ماالجديد للخطة السكنية فى مدينة الهدى ؟
واتمنى للجميع بيوت تمليك ...