قالت ولا اسفا
على ماضي بيفلي ضفيرة الموت في القلوب
فتحت مداس رؤياها
لي أول كبش حرية
سنت سيف صباحة علي ضلام مزعوم
مشت في لوحة معطونة طيوب
وانا بين شوارد حرفي بينك ومقلتيك
ركزت سحابة مدادها دم
سميتا كان في دفتر أحوال الظروف
بي اسما خيط
واقع من السما لي الضلام
باقيلو في اللاوعي حور
ململ قعادو انشك بين ابرة وقلم
كان ذنبي ما جربت كيف الموت بكون
لا مرة سقت الروح تساسق
بين طشاشات المنافي الواسعة
في جثمان بأدي فروض نوافلو علي الألم
أهو هسي ماشيك دون دليل
دون جدوى دون راي لا علم
ماشيك علي ضهر الهدوء
سارج التباريح التداوي الحسرة
بي علقم طفولة فكرك الفاقك همم
درعتني جبة غربتك
كسرت عروقها انهال سقف معنى التواصل وتهت بي
لا كل حلق الحسرة من نم الأنين
لا صن صوت أفكاري من غدرك شوي
فاتورة الهجران بسدد دينا طعنات في العمر
حين ستف الأحلام قفاك
واتمغا بي الشوق العلي
وانا ياتو يوم قبلت صاد من سين براحات انتماك
بس ياتو مرة اخترت أقراك في الحروف
دام كنت بقرا الفكرة قبل تشيل دنون المنطق الجاي لي رؤاك
حدسني صوت راديك بأنك بكرة حتفكي القيود
لي ماضي يسرح في سما الحرية
يصدح برة من حوش اشتهاك
حدسني أنو الدهشة ما انك تكلفتي همي
تضغطي زر خروج روحو
وتكفني وعيو بي طاقة جفاك
الدهشة بيك ساعة فتحتي مزاد دواخلك
لي البكيل من فرط بوحو
ويستفيض حنية يتفجر مسام الريد
علي بحة حديثو الاصطفاك
الدهشة ريق الصحراء يتقطر سراب
نرفع مداميكك تسامي علي تحت
مش مرة لما النوم صحاك
وانت بتوسدي ديسك المجدول سواد
في حضن ايد احلامك
استأمنت لليل البخت
ليه عدت من نفس النفس أوكسيد ثنائي
مكربن الآمال
جدعتي الجتة في ساحات مسافاتك
مواصل في الرحيل احلامو بتسكك بحت
مكسورة صفارة مزامير اشتاهي
شماعة أقدار السنين
يبست من الصد الفضل
في ملمحك منحوت نحت
مأمونة بالخير يا ملاك
ايه الوطن في دفتر أسلاف الأماني
علي مواقيت السنين
إيه الملاذ لو سكّت القعو دك أماسيك والحنين
مين منجي ذاتك
لو فقِد في اللوحة خيط الضو
رسم كنه الشتات منظور حياتك
ما هرب ملمح هتاف من بحة مسجونة حشا
لا انبل في شق الدرت ريق الخريف
لا وهدبت ذكرى العناوين حس صفاتك
ملطوع مجال الوصل في بال انتماك
كشرتي سيف كفّت جوانبو مسن جفاك
وانت بتونسي في كراسي اللحظة تسريحات بناتك
ما لان بلا احساسي جلمود في ازل دنياك
طريتي التوهة توهي وعندي فيك البوصلة
غبش الدروب الفتي في احضانا
كتحتي الحرير الشايلو عندك
بالسفر بالضحكة وألوان العطور المهملة
ما تلصقي العري في غناك
لو كسّت اتواب الدميرة الجوف
وركّت في حروفك مرسلة
انا عندي دون عينيك ضو
مجبول علي كرف البوادي الوسمت في هاف اغانينا الصلة
لو كضّم النضم ابتعادك عنو في اوج اشتهاو
حيعود كما سرب المصابيح للضياء
متشخصن العود في سريرتو
مديي بالروح أجملة
تقنت مواعيدك صهيل
لو رك في غصن الدقايق طيفك المفجوع حنين
حتما حتتكشف بواطن رؤيتك
ترجعلكم نور يا صحاب
حضن التواشيح أولة
[b][i][center][right]