احبتي لكم التحية الصباحية بدري جدا
ما اصلو الواحد بقى يصحى قبل الديك زاتو
وقبل ناس الخدار
وقبل الجزارين
وقبل ناس الفرن
وقبل ناس العسكر (الله يكفينا شر العساكر)
زمان ونحن صغار مع انو بننوم بدري ونقوم بدري لكن لما تكون مسافر الخرتوم وعارف بكرة ح تقوم ابدر من بدري نفسها بتكون فرحان لانك ماشي البندر
والبندر معناها اقل شئ بتاكل فول ورغيف كل يوم وموية تلج
واهم من الاهم بتتخارج من الحلة الكلها مراسيل دي امشي الخلا
امشي الطاحونة
امشي جيب شنو كدة من السوق
وكان عندك قرش تمشي تلفزيون النادي تتفن في الواطة وماتقدر تشتري تسالي لانو ح يشحدوه منك كلو يعني ح يكون باقي ليك قدر حق الزيادة البتديك ليه الحاجة لازم تجي بعد مسلسل فارس ونجود على طول
اها ولما تمشي الخرتوم التلفزيون في البيت وقاعد في كرسي وتتفرج واحتمال يجيبوا ليكم العشاء قدام التلفزيون تاكل وتتفرج
عليك الله دي براها مامتعة
اها في الحالة دي بتكون فرحان بي بص سرحان اللي ح يخارجك من شظف عيش الفوتريتة الى عيش الفرن الالي كمان
فرح طفولي برئ
وبتكرة صحية بدري بتاعة بص سرحان وانت راجع جائي من هناك تشوف صحية بدري دي متعبة وياريت الواطة ماتصبح زاتو عشان تكمل نومتك اللذيذة
غايتو الحمد لله من قبل ومن بعد السنة دي صحيتنا بتاعة الصباح عندنا قبل بص سرحان زاتو لانو بصراحة كنا بنصحى وحمام ولبس وشاي والصبح لسه ما اذن
الولد الطيب الله يخليه ويديه العافية اختار لينا مدرسة بعيييييييييييييييييييييييييييييييييييييييييييييييييييييييييييييييييييييييييييييييدة كلو كلو لدرجو انو الترحيل مابجي ناحية حلتنا اقوم من صباح الرحمن وعين مفتحة وعين مغمدة اركب اوديه زي نص ساعة كدة بس عشان يحصل بص المدرسة هناك
كل مايصحيني الصباح اقول ليه ياخي اصلك راكب بص سرحان مصحينا بدري كدة
وطبعا دي محتاجة لي شرح بالعربي والانجليزي عشان يصدقني
يلا ياجماعه لا اراكم الله مكروها في قطع نومة صباحية لديكم

طبعا المدارس في كل زاوية زي محلات الموبايلات في السودان
لكن في مدارس كدة بالعربي يعني مبرزة زي حنتوب وخور عمر وبرضو ثانوي عالي
(في ولاية ميريلاند العالي 4 سنوات تاسع يعني عكس جيرانا فرجينيا وواشنطون دي سي عندهم العالي 3 سنوات لانو تاسعه بتكون في المتوسطة لكن نفس عدد سنين الدراسة ) دي جملة اعتراضية توضيحية لسنين الدراسة
اها دي واحدة منهن
بعيدة جدا لكن ميزتها انها قوية جدا
وربنا يوفق الولد القطع نومتنا ده

الاخ عادل
زمان بص ودالطيب بتاع سرحان بدق البوري من قنطرة حسبو
واحد اول يمشي الخرتوم ومنتظر البص من نص الليل وقت الصبح جي سمع صوت البوري البيعزفو السواق
اخونا قام شفقان قال البص وكيت رفع راسو اتسوك انا في الكبري اضرب في البوري

اهم شي ما قلته لينا في السكه بطفطرو وين
فطور السكه محطه مهمه جدا في الرحله
نحنا كنا بنفطر في قهوه ام علقه او قهوه عبد القادر
الوقوف علي حسب علاقه السواق بي القهوه
وفطور السواقين مدنكل ومجاني وتمشي تجمر في الصقيعه
و.........وا........وا:::::::::

صديق الماحي كتب:

انشاء الله تفرح به كدة وهو فى اعلى المراتب التعليمية فى امريكا
كل الصحيان يهون فى هذا السبيل

سلام ودالماحي
ان شاءالله مابعيدة للحيين لكن 4 سنين عاشهم القلب صحيان بدري كتيرة على ودخالتك
كلو يهون في سبييل الاولاد بس ان شاءالله يعوضوا لينا تعبنا ده بما يسُر زي ماقلت
وربنا يفرحك بي اولادك

سلام ودالطيب انت
ياخي قومة بدري دي تلخبت اي زول

اقتباس :

اخونا قام شفقان قال البص وكيت رفع راسو اتسوك انا في الكبري اضرب في البوري

اخونا د.خالد الجفري اهلو من الشوال النيل الابيض قال عندهم نسوان ماشات الخرتوم وعشان البص زي بتاع سرحان كدة مايفوتن قامن جابن ليك ديك وربطنو جنب كراع العنقريب قالت عشان لما الديك الصباح بدري يعوعي يصحن
قوم يالديك مامتعود على الربطة عوعي قبل المواعيد جدا زي الساعة 12 نص اليل الحاجات قامن يتلخبتن شوفي القفة وين ووين شنطتي الليلة الحديد اتسرعي البص يكون فات لي حسة ويتسابقن على الموقف
يلاقيهن ليك ود بتهن امي العازة صاحية وين نص الليل خير ان شاءالله
بري آولدي محصلين باظ الخرتوم مايبقى فاتنا
ياامي قولي بسم الله انا جائي من عجنة الفرن يادوب الصبح لسه ماجاء ارجعيي نومي نومك الساعة 12 نص الليل
شفت قومة بدري بتاعة بص الخرطوم دي مجهجهة الناس في كل مكان
انت لقيتوها باردة اسه حافلات وزلط وتكمل نومتك هنا وهناك

سلام اخونا مبارك
تشكر على المرور والتعقيب شكلك كدة ياشاب انت بتسافر عشان فطور السكة

اقتباس :

اهم شي ما قلته لينا في السكه بطفطرو وين
فطور السكه محطه مهمه جدا في الرحله

على كل فطور بص سرحان كان في ابوقوتة راح جايئ
عندي صاحبي اسمو حمد كان سائق بص الخرطوم المناقل قال لي
انت عارف نحن الفطور ده حتى لو ماجيعانين لازم نقيف
اولا فطور مدنكل ومجاني حاجة باردة وشاي وعلبة سجاير وخمسين مابتذكر جنيه قرش
المهم بدوهم مصاريف جيب عشان كدة مرحلة مهمة للطرفين

سلام ودمدثر الانيق حرفا
مرورك بطعم التحلية بعد الغداء وزي الدفعت لي في البص
ولو تعلم كم نعشق قلمك لما بخلت علينا
المهم

اقتباس :

.. وقسم الله ان لم تخنى الذاكرة سواق حريف بتعاشيقو وابنصاتو من اهلنا ناس سرحان

قسم الله عبدالبين اخو سعيد وديل من اهلنا ناس العقدة

اولاد عيد البين ديل واحد منهم كان احسن لاعب كره في المنطقه
للاسف ما قعد كتير في السودان ؟
كنت بتاع تصطيييييييييح يا عبد الرحمن

العفش داخل البص على مسئولية صاحبه

يا عادل
عبدووش دي كبير خلاص من زمن بص السني وقسم الله ديل كانو بحجونا بيهم

لك التحية الحبيب عادل

وإنشاء الله بالتوفيق والنجاح لولدنا الطيب .. ويكون من الذين يشار اليهم بالبنان

وإنشاء الله نشوفوا ممثل الديمقراطيين في ميري لاند

ويبقي كل هذا التعب .. وكل هذه المسافة من الذكريات الجميلة ..

وزي ماقال حيدر بورتسودان :

ياحبيبي المسافات .. محلها التذكار

.. تخريمة

أقترح عليك .. تشتري ليهو شنطة حديد .. ومرتبة

وتشوف زول من الجماعة في المدينة التي فيها المدرسة وتخليهو عندو

ويبقي يجيكم نهاية الأسبوع ..

سلام طارق

اقتباس :

.. تخريمة

أقترح عليك .. تشتري ليهو شنطة حديد .. ومرتبة

وتشوف زول من الجماعة في المدينة التي فيها المدرسة وتخليهو عندو

ويبقي يجيكم نهاية الأسبوع ..

الحكاية معرفة ماعندنا زول هناك
ماتشوف لينا واسطة ياخ
جزيت خيرا تشكر على المرور