صباحكم خير ياحبان
عشقى لحروف ودجبريل وحميميتها الجميلة
والضحكة المتحكرة بين السطور .. جعلتنى انقل لكم دفء المشاعر هذه هنا
هى دعوة احتفاء بحبيب الكل طارق جبريل .. ودعوة لحميمية التواصل رغم بعد المسافات
وطول الفواااااصل

اها النخليكم مع الاستاذ طارق جبريل



يمة قوليلم انا ماني حاريلي شي..
قوليلم انا مشتهي اصليلي ركعتين عند قبرك..
يمة داير اقعد واتفرجخ عند راسك واحكيلك حالي وحال وليداتي..
يمة داير اسألك ان بقيتي شفتي خالتي زينب..
الرسول يمة قوليلا طارق مشتهي القعدي جنبك في تُكُل ود الكرسني...
قوليلا مشتهي مناداتك للنعام فشان يشيل (التُرمي) يودها عند الحاج في الديوان..
قوليلا طارق مشتهي ياكل معاكي حرف أليل قراصي بي ملاحا اخدر في التُكُل التالا دكان العوضابي..
يمة الرسول إن شفتي ستنور بت ابو دية تقوليلا طارق غلبوا الصبر وداير يقعد معاكي في خور السواعير في شبا وتحكيلو عن التمر والنعاج ألات جدو..
يمة ان قابلتك حبوبتي نفيسي قوليلا ولدك جبيرين غلبوا المشي ضُمة ضُمة وكل ما اشيل التليفون واضربلو يقولي: طارق يا ولدي انا انتهيت ما كفاك ترجع
يمة الصاج أليلك كبسو الصدأ... وحاتك من فوتي مافي زولا ولع فيهو واقود..
يمة قُفَافِك ألات القمح والمريق عشعش فيهن العنكبوت.. وكرارتك مرميي في مخزن جبيرين..
يمة أم النصر ماتت والطاقة المن تالاها مافي زولا تاني مدة راسو منها..
يمة الحمام المعشعش في صفايح الزيت الفوق المخزن كَبَر زغاليلو وطار خلاهن..
يمة التمُر كله بقى صيص والكان سمح فيهو رقابو انقصن..
يمة بيوت ود ابو دية اتهدمن والأرضي أكلت المُروق ألتو وتُكل الفردوس بت الريح معشعش فيهو الزرازير وبقى مليان كُدُندي..
يمة الجَر أليلي حق البركاوي التالا بت موزة انكسر ومافي زولا تاني ملاهو لي..
يمة المنقايي ألت الكوشتنير الفي القيفي ماتت وقطعوها..
يمة مشتهيلي لِبِيني مَقَنَني من مراح نورة مرت عمي الطيب..
يمة نفسي أندلا لااااتحت عند بير ود جبارة وألعب (أول حَوَل) بعد بُطان القرونة..
يمة وليداتي كبروا هني لاضاقولم هرود لا شافولم مِشْرِق...
يمة اشتهيت أقالد إبراهيم اخوي وابكي وادمع لامن أبِل جلابيتو..
يمة لطفي كل ما يضربلي يسألني: إنت أصلك داير تجي متين..
يمة طلحة في قفاي بقيت مشدوه لاني عارف أمشيلو وأسألو من وليداتو
لاني كمان قادر أصبر علي بُعادو..
يمة اعتماد عرست لي ولدها وصادا السكري وأنا بي هني مكتول في شوقها..
يمة سلمى بت عفاف الكانت من حجرك آآبتنزل بقت كبيري وفضلها عام تتخرج من جامعة الخرطوم...
يمة أواب هُول سهير أختي كبر ضُمة ضُمة وداخل علي الجامعي..

يمة وحات الله أنا فِتِر..

التحية لك وللشاعر ولود جبريل
اسعد الله صباحك
وصباح كل الامهات
تحية ثناء واجلال لكل الامهات والحبوبات
الاحياء منهم والاموات بقدر ماقدمو للبنين والبنات

تانى جيتكم

تعالوا نشوف (طارق جبريل فى الغربة )
وهو ياخذنا معه فى سياحة جميلة

(بين القرقوش والكارسون )





مرقت من شغلي يا الحبان جعان ومشتهيلي ((حَرِف))
اها قلت اضرب لي وليداتي فشان النشوف ان بقوا ما طلعوا معاهم العيش وباقي الملاهط
- الو بابا
- الو... اها طلعتوا العيش ولا اجيبو معاي
- بابا اسمه الخبز
- يا بت خبزك جن كلكي انا جعان طلعتوا شنو معاكم
- باب ما جبنا اي حاجة كنا مستعجلين
- كدي اسألي امك دايري شنو من غير العيش
- قالت ليك الخبز وشوية ديسير(فواكه)
- ايي ديسير شنو مو ياهو الموز والبطيخ
- يا بابا جيب معاك كيوي وشوية ديال الرمان وشوية كمثرة وعافاك آبابا دوز للباتسري(بتاع الحلويات) وجيب معاك ميلفي وكرواسون عشان نشرب بيهم (الكافي اوليه)
- واكنها شنو هي الكرواسون والميلفي ديل يا بتي
- بابا غير امشي حدا المخبزة وحداها الباتسري
مشيت يا الحبيبين اخدتة العيش وغشيت بتاع الفواكه وشلتة الموز والبطيخ وحاجة كدي يقولولا الكيوي لامن تفقشها نصين عاملي زي كلوة الخروف
وشيلنا الكمثرة والرمان... فواكه كدي من اسمها ماها راكبي راسي
من دربي داك مشيت علي النصيبة اليقولولوا الباتسري دة ان كان القالك حلويات اشكال وألوان
شي بني وشي ابيض وشي اخضر
- لا باس آلللا
- وي ميسيو
- ياخي دايرلي نصيبة يقولولا الملفي والكرواسون
- كوا مسيو (قلت شنو بالفرنسي)
الخرابة نسيت انها مغربية قايلها من بنوت شبا
- سوري بغيت شي حاجة كيسموها ميلفي وشي حاجة اخرى كيسموها كرواسون
- شحال بغيتي (عايز كم)
- شي عشرة في عشرة
- وخا مسيو
الخرابة جات شايلالي عشرة نصايب ضهرن ابيض ومشختات بالبني علي سيخ ((البيم))
شويتين تاني جابتلها نصايب تاني معوجات علي قرون التور
يا ربي دة وكرة شنو دي
وحات ربي التمن الدفعتو فيهن كان يدققلي شوالين ألات مريق
وانا في الطريق اتذكرت حبوبتي نفيسي وكتين نجي من الخرطوم لي شبا
بالله من تسمعبنا جايين يومين تعوس في القرقوش وتتندلو في التُكل في جردل أليل طلس ابيض
واصلو اول يوم دة من نجي بس تمغرب كدي تمشي تحلب النعاج وتجي تقننلنا اللبن
وتجيبلنا القرقوش ونحن نغتس في القرقوش في كباية الشُب ديك لامن يتنفخ
ووكتين تدخل القرقوشايي في خشمك وتحرك فيها بي لسانك
وحاتكم الواحد يبقى زي راس ابو القدح وكتين يقول كدي يدخل راسو لا جوة
والعجب ان بقيت لقيتلي باقي بركاوي في كوريي
ترقدلك في عنقريب في نص الحوش وتقعد تفسخ في البركاوي دة
وتشوف في سماء الله
هناك نشرب المقنن بالقرقوش
وهني ((الميلفي)) و((الكرواسون)) مع ((الكافي اوليه))
هناك تقعد تكد في عضم المنقة لامن تعدمو نفاخ النار وهني ياكلو في الكمثرة والكيوي
الشافع وكتين يمشي معاك الدكان تلقاهو يتشعلق في (تويكس)) ولا ((سنكرز)) ولا ((كيت كات))
ونحن يعلم الله غير حلاوة عكاز ألت الفلاتة ديك تقعد تقرمش فيها زي كسير الطلح بالفاس
وان بالغتة تاكلك قراصة نبق ((تابوتة))
هسي الشافع هني ترسله للمدرسة بي تيرمس أليل أكل يشتريلك ركشة عديييييييل ومليان نصايب
انا وحات الله يوم جيت للفطور من المدرسة لقيت امي ماها في شلتلي فطيرايي ضرضرت فيها سكر وكبيت فيها روب من الكوريي
ورجعت لي مدرستي وانا آكل فيها لامن وصلت الفصل لقيت قميصي ((الظهري داك)) كله مخطط بالروب علي البشمل فوق الماكرونة
هني يقولوا لي امهن سوي لينا فطيرة بالمكسرات
ونحن وكتين يخلولك الفطيري الاخيري في الصاج فشان تبقى قنقروشة
يمين تقرب تزغرد كله كله

اقولكم شي... انا الجابني البلد دي شنو

ومازلنا مع حميمية الكلمة .. وارتباطها بلهجة الشايقية وعبقرية ودجبريل
كدى تعالوا نشوف الفرحة الطفولية بيكون شكلها كيف من خلال هذه السطور





(نفيستى فيهااااااااااا )

نفسي ابوي يدي طلحة القروش ويقولو سوق الولاد ديل اشتريلم حلاوة المولد
نفسي نركب المواصلات للحلي الجديدي وننزل في ميدان المولد
نفسي اشوف الناس اللابسين خُدُور ديك ينقزوا في مديحهم وانفلت من يدين طلحة
وامشي انقزلي نقزي نقزيتين معاهم..
وطلحة يجي يهرشني: يا فقر انت انا ما قلتلك من البيت ما تتملص مني
وانا صاقعلو: نان انت ابوي موش اداك القروش فشان تجيبنا للحفلي دي
- نان يا مطرطش دي حفلي الشي مديح
- انا شن عرفني تراهم ابان عراريق خُدور ديل من جينا ينقزوا
- ههههههههههههه تاني ما تمشي بعيد خليك هني جنب اخوانك
- والله علي امشي ياخي انا داير اشوف الفنان
- الشي مديح قلنالك
- ياخي ما تغشغشني الشي غنا بس ماني عارف الفنان بي طنبورو وين
- انا اصلي عارف راسك دة غلت
- اييي غلت شنو وحات الله الشي حفلي عاين ديلك مسوين شعورهم طويلي كيفن وينقزوا
- ديل دراويش يا مطرطش
- نان الدراويش ماهن قاعدين يودوهم الخرابة اليقولولا التجاني الماحي
- انت شن عرفك بيها التجاني الماحي
- اييي والله مرة مشيت مع امي وقالتلي الدراويش قاعدين يجيبوهم هني
- حجتك كتيري
- ياخي خلني الننقز معاهم
وجريت دخلت جوة النوبة ولقيتلك امة محمد دي تنقز مع المديح وشغال: حي حي حي حي
وانا بقيت انهرد وسطهم واتكعوج واترترلي ترتيرات بي رجولي زي رقيص غنا الرتوتي
وبقوا خاتني في وسطهم.. ووكتين آخدلي ترتيري طويلي واسبقهم اسمع فيهم:
الله حي.. الله حي.. الله حي.. جارين من وراي
وتاني انزرق في وسطهم.. والرقيص ما يبقالي ياهو أليلنا بتاع محمد كرم الله داك
واقول في نفسي: النصايب ديل باقيلي ماهن من شوايقتنا
ويجي واحدا شايلو نوبة ويدقدق فيها بي صوتا عالي والخرابين الوراهو: حي حي حي حي
ويجي واحدا كبيرا كدي يشيلني ويكبر: الله الله.. قايلني دخت من الذكر وانا شابكو:
انت ود كرم الله وصفاقنو وينم ماني شايفو
والراجل شغال حي الله حي الله.. دورت وشي وفقعتها ضحكة.. لقيتو في الحنكين عدمان
السنايي (من اسنان) ان كان تلاتة سنات في الحنك التحت متل حيطة الفاول..
اكمل النقزي أليلي وارجع لي اخواني..
شويتين ان كان اشوفلك بنية الفريق اللااااقداام مننا لابسالا قميصا سممممممح
اعاينلها واضحك وتعاينلي وتضحك..
قمت رفعتلا يدي.. وهي من تحت لااا تحت هزتلي يدها
ومن الفرحي بقيت انقز في مكاني وابرطع.. ومرا ااتشقلب علي بطني وازح
واصلي بقيت مضرضر تراب كله كله.. يمين زي السمكايي الضرضرولم فيها دقيق قبل يشووها
ماني فرحان الخرابة اشرتلي بي يدها
وبقيت ضايق بتين نرجع فشان احكي لي عوض علي اشيرة اليد ألتها
مشينا علي بتاع السمسمية والحمصيي وطلحة ملالو كيسين كبار واشترالي حصان كبييييييييييير
شويتين ان كان القاها واقفي مع امها جنبنا وشايلالا عروسي مزركشي
بالاحمر والاصفر.. قربت منها وسلمت عليها: انت نصيحي
هزتلي راسها.. وقمت قلتلا: باكر الصباح بجي جنب النيمايي ألتكم
واخلي حصاني يشيل العروسة ألتك في ضهرو
قالتلي سمح
مشيت من جنبها بعيد ويدي في خشمي: ورورووووووك يا عوض صحبي انا باقيلي ودرتة
زمن ياخ....



الله بيسألني نفسي في حصان عيد المولد وسمسميي

زولك دة يا ود مدثر قديم شديد ولذيذ زيك كدة
دة قاعد فى الغربة كيف ؟ مايمشى يقعد جنب امو