لظروف السودان الاقتصادية المعروفة جعلت الكثير من ابنا الوطن يتجهون الي الغربة عن الوطن عسي ان يجد في وطن الغير ما يساعده في تحقيق أحلامه وطموحاته لبنا مستقبل واعد له ولأسرته
فكانت بلاد أطعمهم من جوع وآمنهم من خوف لها القدح المعلي في استقطاب واستيعاب النصيب الأكبر
وتأتي دولا أخري تفرق فيها الأخوة والأبناء والابا
نسال الله ان ينزل علي السودان بركات من السما والأرض لعيش السوداني دون خوف من جوع اوكشة بعزة في وطنه
المهم خلينا في السعودية صاحبة موضوع الكشة لغير المقيمين بصورة رسمية او المخالفين لقوانين الهجرة المحلية
إخوانا في السعودية لديهم الكثير من المواقف سواا حصلت لهم او لمن حولهم نرجو اطلاعنا علي طرائف المواقف فقط
نواصل

قال ليك سوداني في ساحة العمال جات عربية الكشة الجماعة كلهم قاموا جاريين
العسكري جري ورا صاحبنا ده وكان حريف في الجري والزوغان
عشان يتوه العسكري دخل الزقاقات الضيقة العسكري طلب مواتر بالجهاز
صاحبنا طلع الجبال حصلوه بعربات الجيب في النهاية قبضوه المسكين بعد
جري أرضا ومواتر زقاقاتا وعربات جيب جبالا ختًو ليه الكلبشات في يديه
عاين ليهم بي حرقة كدة قال ليهم خلاص هاشم العطا ده قبضتوه فرحانين كدة

واحد نزل يجيب العشا وهو راجع بي صحن الفول وكيس العيش لاقوه ناس الكشه
معاك إقامة
معاي ااي أمسك الصحن ده كده لو سمحت
العسكري بحسن نية مسك صحن العشا والسوداني قام جاري
قال ليه لو ماجبت ليك الإقامة ماتدبني العشا
العزابة قال ليك لسة منتظرين العشا

يديك العافيه ياودخياري دائما ماتدخل السرور الي قلوبنا متعك الله بالصحة والعافيه واحد قال ليك من اخوانا ديل نوع اخونا الخير الصديق في الجري دا مابتلحق وقبضوا ناس الكشه كان بقول ليهم انا لو فكيتوني والله بتتعبوا معاي شديد وطبعا العساكر كميه قالوا الزول دا بتحدانا يعني فكوه كدي وفكوا صاحبنا وفتح طاردوا مالحقوا وفي قعدوا يتفرجوا ويضحكوا

التحية ليك يا ود خياري
وتعريجاتك الظريفه دي.
الكشه هاجس يؤرق كل واحد لوحاته حمر - دي ذاتها من اللطائف لانه ظهرت في فترة تم فيها تغيير اللوحات السيارات للون الازرق، اي سيارة مرخصة لوحاتها زرق (يعني مقيم) و الما مرخصه لوحاتها حمر (يعني عمرة)- ويقلق منامه وما تخليك تتهنا باحلام سعيدة حتى لو كنت متوسد مخدتين من تلك التي كتب على كيسها (احام سعيدة)، الفزع ملازم في الطيف او في الصحيان تفزع من قرع الباب او صوت اي سيارة جيب (طبعاً صوت سيارة الشرطة مميز) وكان شفت سيارة دورية في اول الشارع تخلي ليها الطريق حتى لو ما كانت حقت الكشة تعمل بمبدأ درب السلامة للحول قريب او الخواف ربى عياله.
منبع الخوف ده كل من ان الجيب ده هادم الاحلام و بين يوم و ليله تلقى احلامك تبخرت و تحقق ما كنت تخشاه العوده نقطة الصفر في انتظار عمرة ربيع.
من الاقوال الارتبطة بالكشة(ركب التونسيه) زمان ايام النغنغه كانت الخطوط الجويه التونسيه تعمل بخط جدة- الخرطوم وكان لما يكشوك بركبوك الطيارة التونسية.
نواصل

يكفيتا الله شر الكشة لو كشونا نقبل وين ياود خيارى
بلدنا ما تقبلنا

واحد ما عندو فيزا قام يصلي بالجماعه وقبل التكبير التفت حول المصليين استو يرحمكم الله عينو شافت عسكري في الصف كبر وفي السجود اتناول نعلاتو وهرب خلاهم ساجديين مشي بيت العزابه وحكي لهم الحكايه وقالو ليهو والجماعه لسعه ساجدين صاحبنا قال ليهم انشاء الله سنه ما يقومو .

لك التحية ابو الطيب
لكم التحية احبتى

فى واحد شاف جيب الشرطة من بعيد
واخونا خاف وبدأ يقراء فى سورة يس
لمن الجيب جاه من الخلف
اتلخم :وقال خلفناهم من بعد خلفهم خلفا
بدل وجعلنا من بين ايدهم سدا ومن خلفهم سدا

عسكري سعودي كان في دوريه كشه
جابوهو المستشفي مفمي عليه بعد فتح سألوهو الحاصل شنو
قال ليهم والله 2 سودانييين قبضنا عليهم ما عندهم اقامات
واحد منهم سال الاخر قال له ارششوو
التاني قال ليهو رشو .
قال ليهم بعد داك ما فهمت حاجه