يضربك الضريب شقاق العناقريب ..
دى كانت ظاهره زمان شكلها هسه اختفت او اصبح فيها القليل .. ظاهره الدعاء على الاخرين .. وخاصه النساء المشهورات بها لقله حيلتهن ولانهن من يواجهن ضغط المجتمع .. ولماضه الابناء وشتارتهم .. لذلك يكن مجبرات للتنفيس عن لحظه غضب بكلمات ليست مقصوده فى ذاتها

قاموس فتحت صفحته الاستاذه منى سلمان تحاول ان تجمع اكثر عدد من دعوات الجاهليه زمان بعد ان عفى عليها الدهر واصبحت من الماضى بفضل الصحوه الدينيه ..

زى لما تقول يمه فى لحظه امك فيها خارج الشبكه بفضل تصرفاتك العرجاء ياتيك الجواب ... ابومى اليشقك .. ابومى اليبلعك .. ابومى اليشقك داك الزير امشى اشرب برااااااااااااااك

والنعاااااااامه التزوزى بيك

دى مشهوره جدا


وقلتى شنو ... ؟؟ عندما تعيد ترديد السؤال


تاتيك الاجابه الشنينه ام قرينات (الشنينه ام قرينات دى شنو ياطارق مامون )

عبدالرحمن مدثر كتب:

والنعاااااااامه التزوزى بيك

دى مشهوره جدا


وقلتى شنو ... ؟؟ عندما تعيد ترديد السؤال


تاتيك الاجابه الشنينه ام قرينات (الشنينه ام قرينات دى شنو ياطارق مامون )

لك التحية الحبيب ابومزن ..
يا أخي مشتاقين بالكوم ..

يا ود ماتجـــي تجيـــك الكشـــــة .. الكشة دي ذاتها شــنو ما معروف
دعاء الأمات والحبوبات يا عبدالرحمن .. مافي ليهو تفسير .. حتى هن أنفسن ما بعرفن ليهو تفسير .. حاجة كدى .. ربانيــة
بخصوص إستفسارك عن شنينة ام قرينات .. البتاكل الإضينات .. وحسب معلوماتي البسيطة .. هي يبدو لي .. حاجة خرافية زي الغول والعنقاء .. وتشبه البومة كدا وليها قرون .. اسطورية يعني .. أو من نسج الخيال .. وزمان الناس بأحساسيهم النبيلة .. وبي حياتهم البسيطة .. بنسجوا اشياء ليها أصل ولا فصل .. والله أعلم ..

والله يقول ليك .. يا ولد ماتجي ..
تجيك الطاويــــة حبالهــــــا ؟؟؟؟

ودمامون ردك موضوع يااصيل .. فعلا هى عفويه على طرف اللسان متزامنه مع موقف

ودعوات الامهات والحبوبات كثيره .... لاتسعفنا الذاكره لذكرها نفتح الباب لها

الملاااااااااااااااااله التمللللللللللللللللللللك

القائمة فعلا أخي ابو مزن طويلة ..وهي ثقافة تكون على حسب الموقف .. كما وإنها تختلف بأختلاف ثقافة الأمهات والحبوبات أنفسهن ..
تسمع كثيرا مثلا : شوف الولد المعولق دا ؟ ..او الولد العيفة دا ..
كما وتسمع أيضا .. تآكل ســـأأأأي على عينك .. نان بطنك دي كان سالعاك ..

الاخ عبد الرحمن سلامات

ان جاز التعبير يمكن ان نسميها ثقافة الكثافة !!

بمعنى ان الطفل الشقى جداً لمن خلااااص يوصل امو مرحلة من الزهج ويجيب كثافتها !!

تظهر هذه العبارة كدعوة على الابن المشاغب ,,

تجيك الطاويه حبالا ,, تجيك ام كلعلع !! النصيبة التجغمك !!

يمه ادينى سكر ؟؟ السكرة الترميك فى الشوك !!

مافى عشاء ؟؟ تتعشى قو !!

سلام ياودمدثر
وحمدا لله على سلامة العودة غنيناها في موال
افتقدناك بشدة وسالنا عليك الليل ونجمو واهدانا رنة تلفون كلها ادعية جميلة وترحم
وشهد عليها حسبو الخزين ليؤكد انها النغمة الصحيحة والتي لم تاتينا بمفيد لعدم تمكننا من التواصل
وتكفل الخزين ليوصل التحايا والوصايا
وعايزين نضرب ليك تاني لكن الضريب شقاق العناقريب حال دون ذلك

المثل جميل وشقاق العناقريب اجمل في زمن قلت فيه لمايجي يموت زول يفتشوا ليه بعد تعب

سلامات


قوم تقوم يوم التالته

لكل التحية الاخ يا ود مدثر شيخ ظرفاء المنتدى
وما تطول علينا الغيبة
دعوات الامهات على الابناء هي دلاله على رفقهن بهم لانه ما يتسبب الاولاد من الازعاج يكفي لاصابتهن بالضغط و السكر وغيره، لو حاسبتك بكل غلطة في اليوم كان عظامك اترجرجت ولكنها تكتفي بالدعوات من طرف اللسان لردعك عن الخطاء مع ملاحظة ان اسلوب الاب يكون مختلف عشان كدة تتحاشا ان تخطي امامه لانك بتعرف ردو ح يكون كيف.
مع ملاحظة تطبيق الاداب و العلوم في دعواتهن مثلاً
السجع : حاضر في معظم الدعوات حنها و زجرها (شرك مقسم في الدقشم ، يضربك الضريب شقاق العناقريب ، سكرة وني تمشي و تغني)
الححساب : اضربك الضريب.
علوم : العواليق دة اصلها عوالق
بعض ظرفاء المغتربيين قالوا ان دعوات اماتنا تحققت، مثلاً تجيك الكشة في السعودية عندنا الكشة .
اوتجيك الضريبة و جاتنا الضرائب .
في الختام التحية لكل المشاركين
الاخ عادل خياري الاشواق و التحايا و عايزيين نماذج من دعوات امات بلاد العم سام جداً - كم يقول اخونا صديق خالد.
وتحية خاصة لوليد التلب والسر الدسوقي طوله و المنتدى منور بيكم
الدسوقي الصورة الخاتيها دي شنو ، عشوه لا تنسى ولا انا ما بشوف كويس
بناشد سراج الفاضل، فاقدنك.

عبد الرحمن مدثر كتب--

النحكى ليك دى ... كنت زمان بجى بعد نهايه الدروس لابوى الله يرحمه فى الخلوى بلقاهو يبنى براهو

حتى لو مالقى حاجه يبنيها .. بكسر ليهو حيطه ويبنيها من تانى .. لازلت اتذكر تلك الراكوبه .. حينما امرنى

بان اطلع فوقها واربط القنايات بتاعتها بالحبال .. راكوبه مكشوفه .. بتاع السيرك مابقدر يمشى فيها ..


وكانت تعليمات .. وكانت جزء من التربيه عندما اتذكرها اليوم اضحك كثيرا

اها طلعت بقدره قادر طلعت

وبديت اربط ... خطوه خطوتين .. اختل التوازن .. وعينك ماتشوف الاالنور .. وقعه بادب لكن

وقعت على راسى ... وبقيت اكورك دم .. دم .. لازلت اتذكر ابتسامه الوالد وهو يهون على من ات الامر

بسيط .. ولايحتاج لمستشفى ذاتو ... عندو شنطه .. طلع منها فتيل ريحه .. رشاها فى الجرح وواصلنا يومنا


لك التحية عبدوش -ورحم الله ود مدثر- وهو في طريقه الي خلوته يزرع الابتسامة في كل من يقابله حتى

الاطفال كان يخاطبهم (ازيك يا الملك وازيك يا الملكة) -



2000سلام

زمن جميل شديد

ودمدثر سلام ورحمه وبركة والله دى زاوية جميله وطريفه وزى ما قال وليد اخر الكثافة والمكاواة زول اوصل امو مرحلة الدعا عليهو دا خطير ومسلط !!!
حكا لى واحد ممكون قال ياداب عرفت اضربك الضريب دى وكان عارف ماكان كاويت امى وكان عارفا هى الضريب النحن فيهو ماكان قالتو لينا ؟؟؟
اخير الامات البدعن ياخ ف شفع مش بجيبو الكثافة بس بحرقو الدم ؟ ف حله جنب المناقل واحد شال واحد من شفعو من غلبتو وجدعو بى فوق الحوش لمن قالو وقع من كارو حت ناس البوليس عالجوه ف المستشفى
تانى التحية ليك ولى المتداخلين ولينا رجعه كان حيينا!!!!!

الطاوية حبالا ياخونا ما العقرب؟؟؟؟؟؟؟؟؟؟؟؟

اقتباس :

الطاوية حبالا ياخونا ما العقرب؟؟؟؟؟؟؟؟؟؟؟؟

________________________________________________________

كباشي انا جيتك ماشي ما عندي ضريبه
الطاويه دي ديرنها لناس حي عليهم ياكلو الجلد